29
ⴰⵡⴰⵍ ⵅ ⵎⵉⵚⵔⴰ ⴰⵎ ⵉⵛⵜ ⵏ ⵍⵀⴰⵢⵛⴻⵜ
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵄⴻⵛⵔⴰ, ⴷⴻⴳ ⵓⵢⵓⵔ ⵡⵉⵙⵙ ⵄⴻⵛⵔⴰ, ⴷⴻⴳ ⵡⴰⵙⵙ ⵡⵉⵙⵙ ⵜⴻⵏⵄⴰⵛ ⵏ ⵓⵢⵓⵔ, ⵉⵏⵏⴰ:
2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵔ ⵓⴷⴻⵎ ⵏⵏⴻⵛ ⵖⴰⵔ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ ⵓⵛⴰ ⵏⴰⴱⴱ ⵅⴰⵙ ⵓ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ.
3 ⵙⵉⵡⴻⵍ, ⵉⵏⵉ:
‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⵅⵣⴰⵔ, ⵏⴻⵛⵛ ⴹⵉⴷⴷ ⵏⵏⴻⵛ,
ⴰ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ,
ⵛⴻⴽ ⴷ ⵍⵀⴰⵢⵛⴻⵜ ⵜⴰⵎⴻⵇⵇⵔⴰⵏⵜ
ⵏⵏⵉ ⵉⵣⵣⵍⴻⵏ ⴷⵉ ⵍⵡⴻⵙⵟ ⵏ ⵉⵖⴻⵣⵔⴰⵏ ⵏⵏⴻⵙ,
ⵜⴻⵏⵏⵉ ⵉⵇⵇⴰⵔⴻⵏ: ⵉⵖⵣⴰⵔ ⵉⵏⵓ,
ⵏⴻⵛⵛ ⴳⴳⵉⵖ ⵜ ⵉ ⵢⵉⵅⴻⴼ ⵉⵏⵓ!
4 ⵏⴻⵛⵛ ⴰⴷ ⴳⴳⴻⵖ ⵜⵉⵙⴻⵏⵏⴰⵔⵉⵏ ⴷⴻⴳ ⵓⵖⴻⵙⵎⴰⵔ ⵏⵏⴻⵛ,
ⴰⴷ ⵙⵙⵍⴻⵙⵇⴻⵖ ⵉⵙⴻⵍⵎⴰⵏ ⵏ ⵉⵖⴻⵣⵔⴰⵏ ⵏⵏⴻⵛ
ⵖⴰⵔ ⵜⴻⵇⵛⵓⵔⵉⵏ ⵏⵏⴻⵛ.
ⴰⴷ ⵛⴻⴽ ⴷⴷ-ⵊⴻⴱⴷⴻⵖ ⵣⵉ ⵍⵡⴻⵙⵟ ⵏ ⵉⵖⴻⵣⵔⴰⵏ ⵏⵏⴻⵛ
ⵓⵛⴰ ⵎⴰⵔⵔⴰ ⵉⵙⴻⵍⵎⴰⵏ ⵏ ⵉⵖⴻⵣⵔⴰⵏ ⵏⵏⴻⵛ
ⴰⴷ ⵍⴻⵙⵇⴻⵏ ⵖⴰⵔ ⵜⴻⵇⵛⵓⵔⵉⵏ ⵏⵏⴻⵛ.
5 ⵏⴻⵛⵛ ⴰⴷ ⵛⴻⴽ ⵏⴹⴰⵔⴻⵖ ⴱⴰⵔⵔⴰ ⴷⵉ ⵍⴻⵅⵍⴰ,
ⵛⴻⴽ ⴷ ⵎⴰⵔⵔⴰ ⵉⵙⴻⵍⵎⴰⵏ ⵏ ⵉⵖⴻⵣⵔⴰⵏ ⵏⵏⴻⵛ.
ⵅ ⵡⵓⴷⴻⵎ ⵏ ⵢⴻⵢⵢⴰⵔ ⴰⴷ ⵜⴻⵡⴹⵉⴷ.
ⵡⴰⵔ ⴷⵉⵏ ⵡⴻⵏⵏⵉ ⵛⴻⴽ ⵉ ⵖⴰ ⵢⴰⵡⵢⴻⵏ
ⵏⵉⵖ ⵛⴻⴽ ⵉ ⵖⴰ ⵉⵟⵟⴼⴻⵏ.
ⵏⴻⵛⵛ ⴰⴷ ⵛⴻⴽ ⵡⵛⴻⵖ ⴷ ⵎⴰⵛⵛⴰ
ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ
ⵓ ⵉ ⵉⵊⴹⴰⴹ ⵏ ⵓⵊⴻⵏⵏⴰ.
6 ⵎⴰⵔⵔⴰ ⵉⵎⴻⵣⴷⴰⵖ ⵏ ⵎⵉⵚⵔⴰ ⴰⴷ ⵙⵙⵏⴻⵏ
ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ,
ⵎⴰⵖⴰⵔ ⵏⵉⵜⵏⵉ ⵜⵓⵖⴰ ⴰⵜⴻⵏ ⴷ ⴰⵣⴻⴵⴰⴹ ⵏ ⵓⵖⴰⵏⵉⵎ
ⵉ ⵅ ⵜⵓⵖⴰ ⵜⵙⴻⵏⵏⴻⴷ ⵜⴰⴷⴷⴰⵔⵜ ⵏ ⵉⵙⵔⴰⵉⵍ.
7 ⵎⴰⵍⴰ ⵏⵉⵜⵏⵉ ⴽⵙⵉⵏ ⵛⴻⴽ ⵙ ⵓⴼⵓⵙ ⵏⵏⴻⵛ,
ⵜⴼⴻⴵⵇⴻⴷ ⵓⵛⴰ ⵜⴻⵙⵙⵏⵓⵇⵇⴱⴻⴷ ⵖⴰⵔⵙⴻⵏ
ⵜⴰⵖⵔⵓⴹⵜ ⵏⵙⴻⵏ ⵎⴰⵔⵔⴰ,
ⵓ ⵎⴰⵍⴰ ⵅⴰⴽ ⵙⵙⴻⵏⴷⴻⵏ,
ⵜⴰⵔⵥⵉⴷ ⵓⵛⴰ ⵜⴻⵙⵙⴰⵔⵊⵉⵊⴻⴷ
ⵜⵉⵊⵄⵉⵏⵏⴰⵜⵉⵏ ⵏⵙⴻⵏ ⵎⴰⵔⵔⴰ.’ ”
8 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵅⵣⴰⵔ, ⵏⴻⵛⵛ ⴰⴷ ⵅⴰⴽ ⵙⵙⴻⵄⴷⵓⵖ ⵙⵙⵉⴼ ⵓⵛⴰ ⴰⴷ ⵇⴻⵙⵙⴻⵖ ⵣⵣⴰⵢⴻⴽ ⴱⵏⴰⴷⴻⵎ ⴷ ⵍⵎⴰⵍ.
9 ⵜⴰⵎⵎⵓⵔⵜ ⵏ ⵎⵉⵚⵔⴰ ⴰⴷ ⵜⴻⴷⵡⴻⵍ ⵉ ⵓⵔⴻⴷⴷⴻⴵ ⵓ ⵉ ⵍⵅⵉⵔⴱⴻⵜ ⵓⵛⴰ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⵎⵉⵏⵣⵉ ⵏⴻⵜⵜⴰ ⵉⵏⵏⴰ: ‘ⵉⵖⵣⴰⵔ ⵉⵏⵓ ⵓ ⵏⴻⵛⵛ ⴳⴳⵉⵖ ⵜ!’ ”
10 “ⵙ ⵓⵢⴰ, ⵅⵣⴰⵔ, ⵏⴻⵛⵛ ⵅⴰⴽ ⵓ ⵅ ⵉⵖⴻⵣⵔⴰⵏ ⵏⵏⴻⵛ ⵓ ⵏⴻⵛⵛ ⴰⴷ ⴳⴳⴻⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⵍⴻⵅⵔⴰⴱⵉ, ⵡⴰⵀ, ⴷ ⵉⵛⵜ ⵏ ⵍⵅⵉⵔⴱⴻⵜ ⵏ ⵡⴰⵔⴻⴷⴷⴻⴵ ⵣⵉ ⵎⴰⵊⴷⴰⵍ ⴰⵍ ⴰⵙⵡⴰⵏ, ⴰⵍ ⴰⵢⵎⵉⵔ ⵏ ⵜⴻⵎⵎⵓⵔⵜ ⵏ ⴽⵓⵛ.
11 ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵡⴰⵔ ⵣⵣⴰⵢⴻⵙ ⵉⵥⴻⴽⴽⵡⵉ ⵅ ⵓⴹⴰⵔ ⵓ ⵓⵍⴰ ⴷ ⵉⵊⵊ ⵏ ⵓⴹⴰⵔ ⵏ ⵍⵎⴰⵍ ⴰⴷ ⵅⴰⵙ ⵉⵥⵡⴰ. ⵡⴰⵔ ⴷⴰⵢⴻⴽ ⵜⵜⵉⵍⵉⵏ ⵉⵎⴻⵣⴹⴰⵖ ⵉ ⵢⵉⵊⵊ ⵏ ⵍⵎⵉⵊⴰⵔ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ.
12 ⵎⵉⵏⵣⵉ ⵏⴻⵛⵛ ⴰⴷ ⴳⴳⴻⵖ ⵜⴰⵎⵎⵓⵔⵜ ⵏ ⵎⵉⵚⵍⴰ ⴷ ⴰⵔⴻⴷⴷⴻⴵ ⴷⵉ ⵍⵡⴻⵙⵟ ⵏ ⵜⴻⵎⵎⵓⵔⴰ ⵜⵜⵡⴰⵔⴻⴷⴵⴻⵏⵜ ⵓⵛⴰ ⵜⵉⵏⴻⴷⴷⴰⵎ ⴰⴷ ⵉⵍⵉⵏⵜ ⴷ ⴰⵔⴻⴷⴷⴻⴵ ⴷⵉ ⵍⵡⴻⵙⵟ ⵏ ⵜⵏⴻⴷⴷⴰⵎ ⵏⵏⴻⵖⵏⵉ ⵏⵏⵉ ⵉⴷⴻⵡⵍⴻⵏ ⴷ ⵍⵅⵉⵔⴱⴰⵜ, ⵍⵎⵉⵊⴰⵔ ⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ, ⵓ ⵏⴻⵛⵛ ⴰⴷ ⵙⵙⵓⵢⵙⴻⵖ ⵉⵎⵉⵚⵔⵉⵢⵢⴻⵏ ⵊⴰⵔ ⵍⴻⴳⵏⵓⵙ ⵓⵛⴰ ⴰⴷ ⵜⴻⵏ ⴱⴻⵣⵣⵄⴻⵖ ⵅ ⵜⴻⵎⵎⵓⵔⴰ.”
13 “ⵎⴰⵛⴰ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⴰⵡⴰⵔⵏⵉ ⵍⴰⵎⵉ ⵉ ⵖⴰ ⵄⴷⵓⵏ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⵏⴻⵛⵛ ⴰⴷ ⵙⵙⵎⵓⵏⴻⵖ ⵉⵎⵉⵚⵔⵉⵢⵢⴻⵏ ⵣⵉ ⵍⴻⴳⵏⵓⵙ ⵏⵏⵉ ⵎⴰⵏⵉ ⵜⵓⵖⴰ ⵜⵜⵡⴰⴱⴻⵣⵣⵄⴻⵏ.
14 ⵏⴻⵛⵛ ⴰⴷ ⴱⴻⴷⴷⵍⴻⵖ ⵜⴰⵎⴻⵃⴱⴰⵙⵜ ⵏ ⵉⵎⵉⵚⵔⵉⵢⵢⴻⵏ ⵓⵛⴰ ⴰⴷ ⵜⴻⵏ ⵙⵙⵄⴻⵇⴱⴻⵖ ⴷⵉ ⵜⴻⵎⵎⵓⵔⵜ ⵏ ⴼⴰⵜⵔⵓⵙ, ⴷⵉ ⵜⴻⵎⵎⵓⵔⵜ ⵉ ⵣⵣⴰⵢⴻⵙ ⴷⴷ-ⵉⴼⴼⵖⴻⵏ, ⵓⵛⴰ ⴷⵉⵏⵏⵉ ⴰⴷ ⵉⵍⵉⵏ ⴷ ⵉⵛⵜ ⵏ ⵜⴳⴻⵍⴷⵉⵜ ⵜⴰⵎⴻⵄⵏⴰⵏⵓⵛⵜ.
15 ⵜⴰⴳⴻⵍⴷⵉⵜ ⵏⵙⴻⵏ ⴰⴷ ⵜⵉⵍⵉ ⴷ ⵜⴰⵎⴻⵄⵏⴰⵏⵓⵛⵜ ⵣⵉ ⵜⴳⴻⵍⴷⴰⵜⵉⵏ ⵏⵏⴻⵖⵏⵉ ⵓ ⵡⴰⵔ ⵜⴻⵙⵙⴳⴻⵄⵄⴰⴷ ⵉⵅⴻⴼ ⵏⵏⴻⵙ ⵄⴰⴷ ⵅ ⵍⴻⴳⵏⵓⵙ, ⵎⵉⵏⵣⵉ ⵏⴻⵛⵛ ⴰⴷ ⵜⴻⵏ ⵙⵙⵎⴻⵥⵢⴻⵖ ⴰⵍⴰⵎⵉ ⵡⴰⵔ ⵜⵜⵚⴻⵍⵍⵟⴻⵏ ⵄⴰⴷ ⵅ ⵍⴻⴳⵏⵓⵙ.
16 ⵡⴰⵔ ⵜᵉⵜⵜⵉⵍⵉ ⵄⴰⴷ ⵉ ⵜⴰⴷⴷⴰⵔⵜ ⵏ ⵉⵙⵔⴰⵉⵍ ⴷ ⴰⵜⴻⵛⵍⵉ ⵏⵏⵉ ⵜⴻⵏ ⵉ ⵖⴰ ⵉⵙⵙⵉⴷⴰⵔ ⵍⵎⵓⵄⵚⵉⵢⵢⴻⵜ, ⵍⴰⵎⵉ ⴷⴻⵡⵍⴻⵏ ⵖⴰⵔⵙⴻⵏ, ⴹⴻⴼⴼⴰⵔⴻⵏ ⵜⴻⵏ. ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⴷ ⵙⵉⴷⵉ ⵉ ⴵⵉⵖ.’ ”
ⵍⵎⵓⵏⴻⵜ ⵏ ⵏⴰⴱⵓⵅⴰⴷⵔⴰⵚⵚⴰⵔ ⵅ ⵓⵎⴻⵏⵖⵉ ⵏⵏⴻⵙ ⴹⵉⴷⴷ ⵏ ⵚⵓⵔ
17 ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵙⴻⴱⵄⴰ ⵓ-ⵄⵉⵛⵔⵉⵏ, ⴷⴻⴳ ⵓⵢⵓⵔ ⵡⵉⵙⵙ ⴰⵎⴻⵣⵡⴰⵔⵓ, ⴷⴻⴳ ⵡⴰⵙⵙ ⴰⵎⴻⵣⵡⴰⵔⵓ ⵏ ⵓⵢⵓⵔ ⵉⵎⵙⴰⵔ ⴱⴻⵍⵍⵉ ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
18 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ, ⵢⴰⵔⵔⴰ ⵍⵄⴻⵙⴽⴰⵔ ⵏⵏⴻⵙ ⴰⴷ ⵢⴻⴳⴳ ⵉⵛⵜ ⵏ ⵍⵅⴻⴷⵎⴻⵜ ⵜⴰⵎⴻⵇⵇⵔⴰⵏⵜ ⴹⵉⴷⴷ ⵉ ⵚⵓⵔ. ⵎⴰⵔⵔⴰ ⴰⵣⴻⴵⵉⴼ ⵉⵇⵇⵉⵎ ⴷ ⴰⵇⴻⵛⵛⴰⵔ ⵓ ⵎⴰⵔⵔⴰ ⵜⴰⵖⵍⵓⴹⵜ ⵜⴰⵔⴽⴻⵛ, ⵎⴰⵛⴰ ⵡⴰⵔ ⵖⴰⵔⴻⵙ ⵜⵓⵖⵉ ⵍⴻⵅⵍⴰⵚ ⵣⵉ ⵜⴻⵏⴷⵉⵏⵜ ⵏ ⵚⵓⵔ, ⵉ ⵏⴻⵜⵜⴰ ⵓ ⵉ ⵍⵄⴻⵙⴽⴰⵔ ⵏⵏⴻⵙ ⵅ ⵍⵅⴻⴷⵎⴻⵜ ⵉ ⵢⴻⴳⴳⴰ ⴹⵉⴷⴷ ⵏⵏⴻⵙ.
19 ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⵅⵣⴰⵔ, ⵏⴻⵛⵛ ⴰⴷ ⵡⵛⴻⵖ ⵜⴰⵎⵎⵓⵔⵜ ⵏ ⵎⵉⵚⵔⴰ ⵉ ⵏⴰⴱⵓⵅⴰⴷⵔⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ. ⵏⴻⵜⵜⴰ ⴰⴷ ⵣⵣⴰⵢⴻⵙ ⴷⴷ-ⵢⴰⵡⵉ ⴰⴼⴻⵢⵢⴻⴹ ⵏ ⵡⴰⴳⵍⴰ ⵏⵏⴻⵙ ⵓⵛⴰ ⴰⴷ ⵉⴽⴻⵛⵛⴻⴹ ⵜⴰⴽⴻⵛⵛⴰⴹⵜ ⵏⵏⴻⵙ ⵓⵛⴰ ⴰⴷ ⵉⴽⴽⴻⵙ ⵜⵓⴽⴽⴰⵔⴹⴰ. ⴰⵢⴰ ⴰⴷ ⵢⵉⵍⵉ ⴷ ⵍⴻⵅⵍⴰⵚ ⵏⵏⴻⵙ ⵉ ⵍⵄⴻⵙⴽⴰⵔ ⵏⵏⴻⵙ.
20 ⵅ ⵍⵅⴻⴷⵎⴻⵜ ⵏⵏⵉ ⵢⴻⴳⴳⴰ ⴹⵉⴷⴷ ⵚⵓⵔ ⵡⵛⵉⵖ ⴰⵙ ⵜⴰⵎⵎⵓⵔⵜ ⵏ ⵎⵉⵚⵔⴰ ⴷ ⵍⴻⵅⵍⴰⵚ, ⵎⵉⵏⵣⵉ ⵏⵉⵜⵏⵉ ⴳⴳⵉⵏ ⵜⵜ ⴷⵉ ⵟⵟⵡⴻⵄ ⵉⵏⵓ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.
21 ⴷⴻⴳ ⵡⴰⵙⵙ ⵏⵏⵉ ⴰⴷ ⴰⵔⵔⴻⵖ ⵉⵛⵛ ⵏ ⵉⵙⵔⴰⵉⵍ ⴰⴷ ⴷⴷ-ⵉⴼⴼⴻⵖ ⵓⵛⴰ ⴰⴷ ⴰⵔⵣⵎⴻⵖ ⴰⵇⴻⵎⵎⵓⵎ ⵏⵏⴻⵛ ⴷⵉ ⵍⵡⴻⵙⵟ ⵏⵙⴻⵏ. ⵅⴻⵏⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.’ ”