24
ⵓⵔⵛⴰⵍⵉⵎ ⴷ ⵉⵛⵜ ⵏ ⵎⴰⵔⵎⵉⵜⴰ ⴷⴰⵢⴻⵙ ⴷⴷⵔⴰ
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ ⴷⴻⴳ ⵓⵙⴻⴳⴳⵯⴰⵙ ⵡⵉⵙⵙ ⵜⴻⵙⵄⴰ, ⴷⴻⴳ ⵓⵢⵓⵔ ⵡⵉⵙⵙ ⵄⴻⵛⵔⴰ, ⴷⴻⴳ ⵡⴰⵙⵙ ⵡⵉⵙⵙ ⵄⴻⵛⵔⴰ ⵏ ⵓⵢⵓⵔ, ⵉⵏⵏⴰ:
2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴰⵔⵉ ⵉ ⵢⵉⵅⴻⴼ ⵏⵏⴻⵛ ⵉⵙⴻⵎ ⵏ ⴰⵙⵙ-ⴰ, ⵉⵙⴻⵎ ⵏ ⴰⵙⵙ ⵏ ⵢⵉⴹⴰ. ⴷⴻⴳ ⵡⴰⵙⵙ-ⴰ ⵏⵏⵉⵜ ⴰⴷ ⵉⵃⵚⴰⵔ ⵓⵊⴻⴵⵉⴷ ⵏ ⴱⴰⴱⵉⵍ ⵓⵔⵛⴰⵍⵉⵎ.
3 ⵙⵉⵡⴻⵍ ⵉⵊⵊ ⵏ ⵓⵎⴻⴷⵢⴰ ⵉ ⵜⴰⴷⴷⴰⵔⵜ ⵉⵖⴻⵡⵡⵖⴻⵏ ⵏⵏⵉ, ⵉⵏⵉ ⴰⵙⴻⵏ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
ⴻⴳⴳ ⵉⵛⵜ ⵏ ⵜⴻⵢⴷⵓⵔⵜ,
ⴻⴳⴳ ⵉ-ⵜⵜ ⵓⵛⴰ ⴽⴻⴱⴱ ⴷⴰⵢⴻⵙ ⴰⵎⴰⵏ.
4 ⴻⴳⴳ ⴷⴰⵢⴻⵙ ⵜⵉⴼⴻⵜⵜⵓⵜⵉⵏ ⵏ ⵡⴻⵢⵙⵓⵎ,
ⵎⴰⵔⵔⴰ ⵜⵉⴼⴻⵜⵜⵓⵜⵉⵏ ⵉⵛⵏⴰⵏ,
ⵜⴰⵎⴻⵚⵚⴰⴹⵜ ⴷ ⵜⴻⵖⵔⵓⴹⵜ,
ⵄⴻⵎⵎⴰⵔ ⵉ-ⵜⵜ ⵙ ⵢⴻⵖⵙⴰⵏ ⴷ ⵍⴻⵎⵍⵉⵃ ⵇⴰⵄ.
5 ⴽⵙⵉ ⵍⴻⵎⵍⵉⵃ ⵏ ⵡⵓⴵⵉ
ⵓⵛⴰ ⴰⵔⵔ ⵓⵍⴰ ⴷ ⴰⴽⴻⵛⵛⵓⴹ ⵙⴰⴷⵓ ⵏⵙⴻⵏ.
ⴻⵊⵊ ⴰⴷ ⵙⴻⵀⴷⴻⵏ ⵎⴰⵔⵔⴰ ⵎⵍⵉⵃ
ⴰⵍⴰⵎⵉ ⵄⴰⴷ ⵉⵖⵙⴰⵏ ⵏⵏⴻⵙ ⴰⴷ ⴷⴰⵢⴻⵙ ⵜⵜⵡⴰⵏⴻⵏⵏⴰⵏ.’ ”
6 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
‘ⵓⵛⵜ ⵅ ⵜⴻⵏⴷⵉⵏⵜ ⵏ ⵉⴷⴰⵎⵎⴻⵏ!
ⵜⴰⵢⴷⵓⵔⵜ ⵉ ⵣⵉ ⵍⴻⵅⵎⴻⵊ ⵏⵏⴻⵙ ⵄⴰⴷ ⴷⴰⵢⴻⵙ,
ⵜⴻⵏⵏⵉ ⵣⵉ ⵡⴰⵔ ⵢⴻⴽⴽⵉⵙ ⵍⴻⵅⵎⴻⵊ ⵏⵏⴻⵙ!
ⴽⴽⴻⵙ ⵣⵣⴰⵢⴻⵙ ⵜⴰⴼⴻⵜⵜⵓⵜ
ⴰⵡⴰⵔⵏⵉ ⵉ ⵜⴼⴻⵜⵜⵓⵜ ⵏⵏⴻⵖⵏⵉ
ⴱⵍⴰ ⴰⴷ ⵅⴰⵙ ⵜⴻⴳⴳⵉⴷ ⵜⴰⵇⴻⴷⴷⵓⵃⵜ.
7 ⵎⵉⵏⵣⵉ ⵉⴷⴰⵎⵎⴻⵏ ⵏⵏⴻⵙ ⴰⵇⴰ ⴷⵉ ⵍⵡⴻⵙⵜ ⵏⵏⴻⵙ,
ⵜⴻⵙⵙⵉⵣⴻⵍ ⵉ-ⵜⴻⵏ ⵅ ⵉⵛⵜ ⵏ ⵜⴻⵚⴹⴰⵔⵜ ⵜⴰⵇⴻⵛⵛⴰⵔⵜ.
ⵡⴰⵔ ⵜⴻⵏ ⵜⴻⵙⵙⵉⵣⵣⵉⵍ ⵅ ⵜⴻⵎⵎⵓⵔⵜ
ⵎⴰⵃⴻⵏⴷ ⴰⴷ ⵜⴻⵏ ⵜⴻⴷⴷⵉⵍ ⵙ ⵓⵛⴰⵍ.
8 ⵃⵉⵎⴰ ⴰⴷ ⵉⵜⵜⵡⴰⵙⵙⴻⴽⴽⴰⵔ ⵡⴻⵙⵄⴰⵔ,
ⵃⵉⵎⴰ ⴰⴷ ⵢⵉⵍⵉ ⵡⴻⵏⵇⴰⵎ,
ⴳⴳⵉⵖ ⵉⴷⴰⵎⵎⴻⵏ ⵉ ⵜⴻⵙⵙⵉⵣⵣⴻⵍ ⵏⴻⵜⵜⴰⵜ
ⵅ ⵜⴻⵚⴹⴰⵔⵜ ⵜⴰⵇⴻⵛⵛⴰⵔⵜ,
ⵃⵉⵎⴰ ⵡⴰⵔ ⴷⴷⴰⵍⴻⵏ ⵉⴷⴰⵎⵎⴻⵏ ⵏⵏⴻⵙ.’ ”
9 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ:
‘ⵓⵛⵜ ⵅ ⵜⴻⵏⴷⵉⵏⵜ ⵏ ⵉⴷⴰⵎⵎⴻⵏ!
ⵏⴻⵛⵛ ⵙ ⵢⵉⵅⴻⴼ ⵉⵏⵓ ⴰⴷ ⴳⴳⴻⵖ ⴰⵇⴻⵍⵍⵉⵊ ⵏ ⵓⴽⴻⵛⵛⵓⴹ
ⵉ ⵓⵛⴻⵄⵄⴰⵍ ⵏ ⵜⵎⴻⵙⵙⵉ ⵉⵎⵖⴰⵔ!
10 ⴰⵔⵏⵉ ⴰⴽⴻⵛⵛⵓⴹ, ⴻⵊⵊ ⵜⵉⵎⴻⵙⵙⵉ ⴰⴷ ⵜⴰⵔⴻⵖ ⴰⵟⵟⴰⵙ,
ⵛⴻⵏⵏⴻⴼ ⴰⵢⵙⵓⵎ ⵎⵍⵉⵃ
ⵓⵛⴰ ⴻⵊⵊ ⴰⵅⴻⴵⴻⴹ ⵏ ⵍⴻⴱⵥⴰⵔ
ⴰⴷ ⵉⵜⵜⴻⵅⵜⵜⴻⵅ ⵎⵍⵉⵃ
ⵓⵛⴰ ⴻⵊⵊ ⵉⵖⵙⴰⵏ ⴰⴷ ⵛⴻⵎⴹⴻⵏ.
11 ⴰⵔⵔ ⵅⴻⵏⵏⵉ ⵜⴰⵢⴷⵓⵔⵜ ⵉⵅⵡⴰⵏ ⵄⴰⵡⴻⴷ
ⵅ ⵍⴻⴼⵃⴻⵎ ⵏⵏⴻⵙ ⵉⵜⵜⴻⵃⴷⵓⴷⵓⵇⴻⵏ,
ⵃⵉⵎⴰ ⴰⴷ ⵉⵃⵎⴰ ⴰⴷ ⵉⵛⵎⴻⴹ
ⴷⴷⵔⴰ ⵏⵏⴻⵙ ⵏ ⵏⵏⵃⴰⵙ
ⵓⵛⴰ ⴰⴷ ⵜⴻⴼⵙⵉ ⵣⵣⴰⵢⴻⵙ ⵜⴻⵅⵎⵓⵊⵉ ⵉ ⴷⴰⵢⴻⵙ ⵉⴵⴰⵏ
ⵓ ⵅⴻⵏⵏⵉ ⴰⴷ ⵉⵜⵜⵡⴰⵇⴹⵉ ⵍⴻⵅⵎⴻⵊ.
12 ⵎⴰⵔⵔⴰ ⴰⵎⴰⵔⵔⴻⵜ ⴰⵇⴰ-ⵜ ⴷⵉ ⴱⴰⵟⴻⵍ.
ⵍⴻⵅⵎⴻⵊ ⵏⵏⴻⵙ ⵉⴼⴻⵢⵢⴹⴻⵏ ⵡⴰⵔ ⴷⴷ-ⵉⴼⴼⵉⵖ ⵣⵣⴰⵢⴻⵙ.
ⴰⵔⵔ ⵍⴻⵅⵎⴻⵊ ⵏⵏⵉ ⴷⵉ ⵜⵎⴻⵙⵙⵉ!
13 ⴷⵉ ⵜⴻⵅⵎⵓⵊⵉ ⵏⵏⴻⵎ ⵜⴻⴵⵉ ⵍⴻⴼⴹⵉⵃⴻⵜ ⵏⵏⴻⵎ,
ⵎⵉⵏⵣⵉ ⵏⴻⵛⵛ ⵜⵓⵖⴰ ⵅⵙⴻⵖ ⴰⴷ ⵛⴻⵎ ⵙⵙⵉⵣⴻⴷⴳⴻⵖ
ⵓⵛⴰ ⵅⴻⵏⵏⵉ ⵡⴰⵔ ⵜᵉⵜⵜⵡⴰⵙⵙⵉⵣⴷⵉⴳⴻⴷ.
ⵅ ⵓⵢⴰ ⵡⴰⵔ ⵜᵉⵜⵜⵡⴰⵙⵙⵉⵣⴷⵉⴳⴻⴷ
ⵣⵉ ⵍⴻⵅⵎⴻⵊ ⵏⵏⴻⵎ
ⴰⵍ ⵅⴰⵎ ⵉ ⵖⴰ ⵙⵙⵉⵡⴹⴻⵖ ⴰⵙⵄⴰⵔ ⵉⵏⵓ.
14 ⵏⴻⵛⵛ, ⵙⵉⴷⵉ, ⵙⵙⵉⵡⵍⴻⵖ.
ⴰⴷ ⵉⴼⴼⴻⵖ ⵓ ⵏⴻⵛⵛ ⴰⴷ ⵜ ⴳⴳⴻⵖ.
ⵡⴰⵔ ⵙⴻⵎⵃⴻⵖ ⴷⴻⴳ ⵉⵎⴻⵔⵡⵓⵙⴰ
ⵓ ⵡⴰⵔ ⵣⵣⵉⴵⵣⴻⵖ ⵓ ⵡⴰⵔ ⵏⴷⵉⵎⴻⵖ.
ⴰⴷ ⵅⴰⵎ ⵃⴻⴽⵎⴻⵏ
ⵉⴱⵔⵉⴷⴻⵏ ⵏⵏⴻⵎ ⴷ ⵜⵎⴻⴳⴳⴰ ⵏⵏⴻⵎ!’,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.”
ⵍⵎⴻⵡⵜ ⵏ ⵜⴻⵎⵖⴰⵔⵜ ⵏ ⵃⵉⵣⵇⵉⵢⴰⵍ
15 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
16 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵅⵣⴰⵔ, ⵙ ⵉⵛⵜ ⵏ ⵜⴻⵛⵜⵉ ⵏⴻⵛⵛ ⴰⴷ ⴽⴻⵙⵙⴻⵖ ⵎⴻⵥⵔⵉ ⵏⵏⴻⵛ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵏⴻⵛ. ⵡⴰⵔ ⵜⵜᵉⵜⵜⵔⵓ, ⵡⴰⵔ ⵜⵜⴻⵊⵊⵉ ⴰⴷ ⵓⵣⵣⵍⴻⵏ ⵉⵎⴻⵟⵟⴰⵡⴻⵏ ⵏⵏⴻⵛ.
17 ⵙⵖⵓⵢⵢ ⴷⴻⴳ ⵓⵀⴻⴷⴷⴻⵏ, ⵡⴰⵔ ⵛⴻⵟⵟⴻⵏ ⵅ ⵓⵎⴻⵜⵜⵉⵏ. ⵇⵇⴻⵏ ⴰⵔⴻⵥⵥⴻⵜ ⵏⵏⴻⵛ ⵅⴰⴽ ⵓⵛⴰ ⴻⴳⴳ ⵜⵉⵙⵉⵍⴰ ⵏⵏⴻⵛ ⴷⴻⴳ ⵉⴹⴰⵔⴻⵏ ⵏⵏⴻⵛ, ⵓ ⵡⴰⵔ ⵜⵜⵍⴻⵃⵃⵉⴼ ⴰⵛⵍⴰⵖⴻⵎ ⵖⴰⵔ ⵓⵢⴻⵏⵛⵉⵛ ⵏⵉⵖ ⴰⴷ ⵜⴻⵛⵛⴻⴷ ⴰⵖⵔⵓⵎ ⵏⵏⵉ ⴷⴷ ⵖⴰ ⵢⴰⵡⵢⴻⵏ ⵉⵡⴷⴰⵏ ⵉ ⵡⴻⵛⴹⴰⵏ.”
18 ⵖⴰⵔ ⵜⵓⴼⴼⵓⵜ ⵙⵙⵉⵡⵍⴻⵖ ⵉ ⵍⴳⴻⵏⵙ ⵓ ⵖⴰⵔ ⵜⵎⴻⴷⴷⵉⵜ ⵜⴻⵎⵎⵓⵜ ⵜⵎⴻⵟⵟⵓⵜ ⵉⵏⵓ ⵓ ⴷⵉ ⵜⵡⴻⵛⵛⴰ ⴳⴳⵉⵖ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵉⵜⵜⵡⴰⵡⴻⵚⵚⴰ.
19 ⵉⵏⵏⴰ ⴰⵢⵉ ⵍⴳⴻⵏⵙ: “ⵎⴰ ⵡⴰⵔ ⵜⴻⵅⵙⴻⴷ ⴰⴷ ⴰⵏⴻⵖ ⵜⴻⵙⵙⴻⵛⵏⴻⴷ ⵎⵉⵏ ⵄⵏⴰⵏⵜ ⵜⵎⴻⵙⵍⴰⵢⵉⵏ-ⴰ, ⵎⴰⵢⴻⵎⵎⵉ ⵉ ⵜⴻⴳⴳⴻⴷ ⴰⵎⵎⵓ?”
20 ⵏⴻⵛⵛ ⵏⵏⵉⵖ ⴰⵙⴻⵏ: “ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
21 ‘ⵉⵏⵉ ⵉ ⵜⴰⴷⴷⴰⵔⵜ ⵏ ⵉⵙⵔⴰⵉⵍ: ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ! ⵅⵣⴰⵔ, ⵏⴻⵛⵛ ⴰⴷ ⵙⵙⵄⵉⴵⵜⴻⵖ ⵣⵣⴰⵡⴻⵛⵜ ⵉⵏⵓ ⵉⵇⴻⴷⴷⵙⴻⵏ ⵜⴻⵏⵏⵉ ⴷ ⴰⵄⵓⴵⵉ ⵏ ⵊⵊⴻⵀⴷ ⵏⵡⴻⵎ ⴷ ⵓⵎⴻⵥⵔⵉ ⵏ ⵜⵉⵟⵟⴰⵡⵉⵏ ⵏⵡⴻⵎ ⴷ ⵍⴻⵀⵣⵓⵟ ⵉ ⵍⴻⵄⵎⴰⵔ ⵏⵡⴻⵎ, ⵓⵍⴰ ⴷ ⵉⵃⴻⵏⵊⵉⵔⴻⵏ ⵏⵡⴻⵎ ⴷ ⵜⵃⴻⵏⵊⵉⵔⵉⵏ ⵏⵡⴻⵎ ⵏⵏⵉ ⵜⴻⵊⵊⵉⵎ ⴷⵉⵏ ⴰⴷ ⵡⴹⴰⵏ ⵙ ⵙⵙⵉⴼ.
22 ⵅⴻⵏⵏⵉ ⴰⴷ ⵜⴻⴳⴳⴻⵎ ⴰⵎ ⵎⴰⵎⵎⴻⵛ ⴳⴳⵉⵖ ⵏⴻⵛⵛ. ⵡⴰⵔ ⵜᵉⵜⵜⵍⴻⵃⵃⵉⴼⴻⵎ ⴰⵛⵍⴰⵖⴻⵎ ⵖⴰⵔ ⵓⵢⴻⵏⵛⵉⵛ ⵓⵛⴰ ⴰⵖⵔⵓⵎ ⵉ ⴷⴷ-ⵢⵉⵡⵢⴻⵏ ⵉⵔⵢⴰⵣⴻⵏ, ⵡⴰⵔ ⵜ ⵜᵉⵜⵜⴻⵜⵜⴻⵎ.
23 ⴰⵔⴻⵥⵥⴰⵜ ⵏⵡⴻⵎ ⴰⴷ ⵉⵍⵉⵏⵜ ⵅ ⵉⵣⴻⴵⵉⴼⴻⵏ ⵏⵡⴻⵎ ⵓ ⵙⴰⵏⴷⴰⵍⵉⵢⴰⵜ ⵏⵡⴻⵎ ⴷⴻⴳ ⵉⴹⴰⵔⴻⵏ ⵏⵡⴻⵎ. ⵡⴰⵔ ⵜⵛⴻⵟⵟⵏⴻⵎ ⵓ ⵡⴰⵔ ⵜᵉⵜⵜⵔⵓⵎ. ⴰⴷ ⵜᵉⵜⴻⵃⵃⴰⵎ ⴷⵉ ⵍⵎⵓⵄⵚⵉⵢⵢⴻⵜ ⵏⵡⴻⵎ ⵓⵛⴰ ⴰⴷ ⵜⵡⴻⵃⵡⴻⵃⴻⵎ ⵉⵊⵊⴻⵏ ⵅ ⵡⴻⵏⵏⴻⵖⵏⵉ.
24 ⴰⵎⵎⵓ ⵉ ⵖⴰ ⵢⵉⵍⵉ ⵃⵉⵣⵇⵉⵢⴰⵍ ⴷ ⵍⴻⵄⵍⴰⵎⴻⵜ ⵏ ⵍⴻⵄⵊⴻⴱ ⵉ ⴽⴻⵏⵏⵉⵡ. ⴰⴷ ⵜⴻⴳⴳⴻⵎ ⵏⵉⵛⴰⵏ ⴰⵎ ⵎⴰⵎⵎⴻⵛ ⵉⴳⴳⴰ ⵏⴻⵜⵜⴰ. ⵅⵎⵉ ⴷⴷ ⵖⴰ ⵢⴰⵙ ⴷⴷⴻⴳⴳⴰ, ⴰⴷ ⵜⴻⵙⵙⵏⴻⵎ, ⴱⴻⵍⵍⵉ ⵏⴻⵛⵛ ⵙⵉⴷⵉ, ⴷ ⵙⵉⴷⵉ.’ ”
25 “ⵓⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵎⴰ ⵡⴰⵔ ⵉⵜⵜⵉⵍⵉ ⴰⵇⴰ ⴷⴻⴳ ⵡⴰⵙⵙ ⵉ ⵣⵣⴰⵢⵙⴻⵏ ⵉ ⵖⴰ ⴽⴻⵙⵙⴻⵖ ⵍⴱⵓⵔⵊ ⵏⵙⴻⵏ, ⵍⴻⴼⵔⴰⵃⴻⵜ ⵅ ⵜⴻⵍⵡⵉⵣⵜ ⵏⵙⴻⵏ, ⵓⵍⴰ ⴷ ⵎⴻⵥⵔⵉ ⵏ ⵜⵉⵟⵟⴰⵡⵉⵏ ⵏⵙⴻⵏ ⴷ ⵉⵃⴻⵏⵊⵉⵔⴻⵏ ⴷ ⵜⵃⴻⵏⵊⵉⵔⵉⵏ ⵏⵙⴻⵏ ⵏⵏⵉ ⵢⴰⵔⴻⴱⴱⵓⵏ ⵏⵉⵜⵏⵉ ⴷⴻⴳ ⵡⵓⵍ,
26 ⴰⵇⴰ ⴷⴻⴳ ⵡⴰⵙⵙ ⵏⵏⵉ ⵙⵉⵎⴰⵏⵜ ⵏⵏⴻⵙ ⴰⴷ ⵖⴰⵔⴻⴽ ⴷⴷ-ⵢⴰⵙ ⵉⵊⵊⴻⵏ ⵡⴻⵏⵏⵉ ⵢⴰⵔⴻⵡⵍⴻⵏ ⵎⴰⵃⴻⵏⴷ ⴰⴷ ⵢⴻⴳⴳ ⵜⵏⴰⵢⴻⵏ ⵏ ⵉⵎⴻⵣⵣⵓⵖⴻⵏ ⵏⵏⴻⵛ ⴰⴷ ⵙⵍⴻⵏ ⵓⵢⴰ.
27 ⴷⴻⴳ ⵡⴰⵙⵙ ⵏⵏⵉ ⴰⴷ ⵢⴰⵔⵣⴻⵎ ⵓⵇⴻⵎⵎⵓⵎ ⵏⵏⴻⵛ ⴰⴽ-ⴷ ⵓⵇⴻⵎⵎⵓⵎ ⵏ ⵡⴻⵏⵏⵉ ⵢⴰⵔⴻⵡⵍⴻⵏ ⵓⵛⴰ ⴰⴷ ⵜⴻⵙⵙⵉⵡⵍⴻⴷ, ⵡⴰⵔ ⵜᵉⵜⵜⵉⵍⵉⴷ ⵄⴰⴷ ⴷ ⴰⵢⵏⴰⵡ. ⵛⴻⴽ ⴰⴷ ⴰⵙⴻⵏ ⵜⵉⵍⵉⴷ ⴷ ⵍⴻⵄⵍⴰⵎⴻⵜ ⵏ ⵍⴻⵄⵊⴻⴱ ⵓⵛⴰ ⵏⵉⵜⵏⵉ ⴰⴷ ⵙⵙⵏⴻⵏ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ.”