21
ⵍⵃⵓⴽⵎ ⵅ ⵜⴻⵎⵎⵓⵔⵜ ⵏ ⵍⵊⴰⵏⵓⴱ
1 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
2 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴻⴳⴳ ⵓⴷⴻⵎ ⵏⵏⴻⵛ ⵖⴰⵔ ⵍⵊⴰⵏⵓⴱ, ⴻⵊⵊ ⴰⵡⴰⵍⴻⵏ ⵏⵏⴻⵛ ⴰⴷ ⵓⴷⵓⵎⴻⵏ ⵊⵊⵉⵀⴻⵜ ⵏ ⵍⵊⴰⵏⵓⴱ ⵓⵛⴰ ⵏⴰⴱⴱ ⴹⵉⴷⴷ ⵉ ⵡⴻⵣⵖⴰⵔ ⵏ ⵢⴻⵢⵢⴰⵔ ⴷⵉ ⵜⴻⵎⵎⵓⵔⵜ ⵏ ⵍⵊⴰⵏⵓⴱ.
3 ⵉⵏⵉ ⵉ ⵡⴻⵣⵖⴰⵔ ⵏ ⵜⴻⵎⵎⵓⵔⵜ ⵏ ⵍⵊⴰⵏⵓⴱ: ‘ⵙⴻⵍ ⵉ ⵡⴰⵡⴰⵍ ⵏ ⵙⵉⴷⵉ: ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⵏⴻⵛⵛ ⴰⴷ ⵙⵙⴰⵔⵖⴻⵖ ⴷⴰⵢⴻⵎ ⵉⵛⵜ ⵏ ⵜⵎⴻⵙⵙⵉ, ⵜⴻⵏⵏⵉ ⵉ ⵖⴰ ⵉⵛⵛⴻⵏ ⴽⵓⵍ ⵜⴰⵛⴻⵊⵊⴰⵔⵜ ⵜⴰⵣⵉⵣⴰⵡⵜ ⵓ ⴽⵓⵍ ⵜⴰⵛⴻⵊⵊⴰⵔⵜ ⵢⵓⵥⵖⴻⵏ. ⴰⵛⴻⵄⵄⴰⵍ ⵏ ⵍⵄⴰⴱⵓⵇ ⵡⴰⵔ ⵉⵜⵜⵡⴰⵅⴻⵙⵙⵉ ⵓ ⵙ ⵓⵢⴰ ⴰⴷ ⵜⵜⵡⴰⵛⴻⵎⴹⴻⵏ ⵎⴰⵔⵔⴰ ⵉⵖⴻⵎⴱⴰⴱ ⵣⵉ ⵍⵊⴰⵏⵓⴱ ⴰⵍ ⵛⵛⴰⵎⴰⵍ
4 ⵓⵛⴰ ⵎⴰⵔⵔⴰ ⵉⵡⴷⴰⵏ ⴷ ⵍⵎⴰⵍ ⴰⴷ ⵥⴰⵔⴻⵏ ⴰⵇⴰ ⵏⴻⵛⵛ, ⵙⵉⴷⵉ, ⴷ ⵡⴻⵏⵏⵉ ⵉⵙⵙⴰⵔⵖⴻⵏ ⵜⵉⵎⴻⵙⵙⵉ. ⵡⴰⵔ ⵜᵉⵜⵜⵡⴰⵅⴻⵙⵙⵉ ⵛⴰ.’
5 ⵏⵏⵉⵖ ⵏⴻⵛⵛ: ‘ⴰ, ⵙⵉⴷⵉ ⵉⵏⵓ, ⵙⵉⴷⵉ, ⵄⴰⴷ ⵏⵉⵜⵏⵉ ⵇⵇⴰⵔⴻⵏ ⵅⴰⴼⵉ: ‘ⵎⴰ ⵡⴰⵔ ⵉⵙⵙⵉⵡⴻⵍ ⵏⴻⵜⵜⴰ ⵙ ⵜⵃⵓⵊⴰ ⵏ ⵜⵡⴰⴼⵉⵜ ⵡⴰⵀⴰ?’!”
ⵍⵃⵓⴽⵎ ⵏ ⵙⵉⴷⵉ ⵅ ⵓⵔⵛⴰⵍⵉⵎ
6 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
7 “ⴰ ⵎⵎⵉⵙ ⵏ ⴱⵏⴰⴷⴻⵎ, ⴻⴳⴳ ⵓⴷⴻⵎ ⵏⵏⴻⵛ ⵖⴰⵔ ⵓⵔⵛⴰⵍⵉⵎ, ⴻⵊⵊ ⴰⵡⴰⵍⴻⵏ ⵏⵏⴻⵛ ⴰⴷ ⵓⴷⵓⵎⴻⵏ ⴹⵉⴷⴷ ⵉ ⵜⵣⴰⵡⵉⵢⵢⵉⵏ ⵉⵇⴻⴷⴷⵙⴻⵏ ⵓⵛⴰ ⵏⴰⴱⴱ ⴹⵉⴷⴷ ⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ.
8 ⵉⵏⵉ ⵉ ⵜⴻⵎⵎⵓⵔⵜ ⵏ ⵉⵙⵔⴰⵉⵍ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ⵅⵣⴰⵔ, ⴰⵇⴰ ⵖⴰⵔⴻⵎ, ⵏⴻⵛⵛ ⴰⴷ ⴷⴷ-ⵊⴻⴱⴷⴻⵖ ⵙⵙⵉⴼ ⵉⵏⵓ ⵣⴻⴳ ⵓⴼⵓⵔⵔⵓ ⵏ ⵡⴻⵖⵍⴰⴼ ⵏⵏⴻⵙ ⵓⵛⴰ ⴰⴷ ⵇⴻⴹⵄⴻⵖ ⴰⵎ ⵓⵎⵙⴻⴳⴳⴻⴷ ⴰⵎ ⵓⵄⴻⴼⴼⴰⵏ.
9 ⵎⵉⵏⵣⵉ ⴰⴷ ⵇⴻⴹⵄⴻⵖ ⴰⵎ ⵓⵎⵙⴻⴳⴳⴻⴷ ⴰⵎ ⵓⵄⴻⴼⴼⴰⵏ ⵣⵉ ⵍⵡⴻⵙⵟ ⵏⵏⴻⵎ, ⵙ ⵓⵢⴰ ⴰⴷ ⴷⴷ-ⵉⴼⴼⴻⵖ ⵙⵙⵉⴼ ⵉⵏⵓ ⵣⴻⴳ ⵓⴼⵓⵔⵔⵓ ⵏ ⵡⴻⵖⵍⴰⴼ ⵏⵏⴻⵙ, ⴹⵉⴷⴷ ⵉ ⵎⴰⵔⵔⴰ ⵉⵏⵏⵉ ⵖⴰⵔⵙⴻⵏ ⴰⵔⵔⵉⵎⴻⵜ ⵏ ⵡⴻⵢⵙⵓⵎ, ⵣⵉ ⵍⵊⴰⵏⵓⴱ ⴰⵍ ⵛⵛⴰⵎⴰⵍ,
10 ⵓⵛⴰ ⵎⴰⵔⵔⴰ ⵉⵏⵏⵉ ⵖⴰⵔⵙⴻⵏ ⴰⵔⵔⵉⵎⴻⵜ ⵏ ⵡⴻⵢⵙⵓⵎ ⴰⴷ ⵙⵙⵏⴻⵏ, ⴱⴻⵍⵍⵉ ⵏⴻⵛⵛ, ⵙⵉⴷⵉ, ⵊⴻⴱⴷⴻⵖ ⵙⵙⵉⴼ ⵉⵏⵓ ⵣⴻⴳ ⵓⴼⵓⵔⵔⵓ ⵏ ⵡⴻⵖⵍⴰⴼ. ⵄⴻⵎⵎⴰⵔⵚ ⵡⴰⵔ ⵖⴰⵔⴻⵙ ⴷⴷ-ⵉⴷⴷⵉⴽⴽⵡⵉⵍ.’ ”
11 “ⵎⴰⵛⴰ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵙⵖⵓⵏⴼⴰ, ⵙⵖⵓⵏⴼⴰ ⵣⵣⴰⵜ ⵉ ⵜⵉⵟⵟⴰⵡⵉⵏ ⵏⵙⴻⵏ ⵙ ⵜⴻⵊⵄⵉⵏⵏⴰⵜⵉⵏ ⵜⵜⵡⴰⵔⵥⴻⵏⵜ ⴷ ⵜⴰⵔⵣⵓⴳⵉ.
12 ⴰⴷ ⵉⵎⵙⴰⵔ ⵅⵎⵉ ⴷ ⴰⵛ ⵉ ⵖⴰ ⵉⵏⵉⵏ: ‘ⵎⴰⵖⴰⵔ ⵜⴻⵙⵙⵖⵓⵏⴼⵉⴷ ⴰⵎⵎⵓ?’, ⴰⵇⴰ ⵛⴻⴽ ⴰⴷ ⵜⵉⵏⵉⴷ: ‘ⵣⵉ ⵙⵙⵉⴱⴱⴻⵜ ⵏ ⵎⵉⵏ ⵙⵍⵉⵖ, ⵎⴰⵖⴰⵔ ⴰⴷ ⴷⴷ-ⵢⴰⵙ ⵓⵛⴰ ⴽⵓⵍ ⵓⵍ ⴰⴷ ⵉⴼⵙⵉ ⵓ ⵎⴰⵔⵔⴰ ⵉⴼⴰⵙⵙⴻⵏ ⴰⴷ ⵀⴻⵢⵢⴼⴻⵏ ⵓ ⵎⴰⵔⵔⴰ ⴱⵓⵃⴱⴻⵍ ⴰⴷ ⵢⴰⵔⵅⵓ ⵓ ⵎⴰⵔⵔⴰ ⵉⴼⴰⴷⴷⴻⵏ ⴰⴷ ⴰⵔⴷⴱⴻⵏ ⴰⵎ ⵡⴰⵎⴰⵏ. ⵅⵣⴰⵔ, ⴰⴷ ⴷⴷ-ⵢⴰⵙ ⵓⵛⴰ ⴰⴷ ⵢⵉⵍⵉ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.’ ”
13 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
14 “ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ ⵓⵛⴰ ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ!’ ⵓⵛⴰ ⵉⵏⵉ:
‘ⵙⵙⵉⴼ, ⵙⵙⵉⴼ,
ⴰⵇⴰ ⵉⵜⵜⵡⴰⵙⵙⴻⵇⴹⴻⵄ ⵓ ⵉⵜⵜⵡⴰⵙⵙⵓⵢⴷⴰ.
15 ⵉⵜⵜⵡⴰⵙⵙⴻⵇⴹⴻⵄ ⵎⴰⵃⴻⵏⴷ ⴰⴷ ⵉⵖⴰⵔⵚ ⵜⵉⵖⴰⵔⵚⴰ,
ⵉⵜⵜⵡⴰⵙⵙⵓⵢⴷⴰ ⵎⴰⵃⴻⵏⴷ ⴰⴷ ⵉⵍⴻⵍⵍⴻⵛ.’
ⵏⵉⵖ ⵉⵜⵜⵅⴻⵚⵚⴰ ⵉ ⵏⴻⵛⵛⵉⵏ ⴰⴷ ⵏⴼⴰⵔⵔⴻⵃ, ⴰⴷ ⵏⵉⵏⵉ:
‘ⴰⵣⴻⴵⴰⴹ ⵏ ⵍⴻⵃⴽⴰⵎⴻⵜ ⵏ ⵎⵎⵉ
ⵉⵙⵙⴻⵃⵇⴰⵔ ⴽⵓⵍ ⴰⴽⴻⵛⵛⵓⴹ ⵏⵏⴻⵖⵏⵉ?’
16 ‘ⵉⵎⵎⴻⵡⵛ ⵎⴰⵃⴻⵏⴷ ⴰⴷ ⵉⵜⵜⵡⴰⵙⵙⵓⵢⴷⴰ,
ⵎⴰⵃⴻⵏⴷ ⴰⴷ ⵜ ⵟⵟⴼⴻⵏ ⴷⴻⴳ ⵓⴼⵓⵙ.
ⵙⵙⵉⴼ ⵉⵜⵜⵡⴰⵇⴹⴻⵄ ⵓ ⵉⵜⵜⵡⴰⵙⵙⵓⵢⴷⴰ,
ⵎⴰⵃⴻⵏⴷ ⴰⴷ ⵉⵜⵜⵡⴰⴳⴳ ⴷⴻⴳ ⵓⴼⵓⵙ ⵏ ⵓⵇⴻⵜⵜⴰⵍ.
17 ⵙⵖⵓⵢⵢ ⵓⵛⴰ ⵜⵔⵓⴷ, ⴰ ⵎⵎⵉⵙ ⵏ ⴱⵏⴰⴷⴻⵎ,
ⵎⴰⵖⴰⵔ ⴰⴷ ⵢⵉⵍⵉ ⵅ ⵍⴳⴻⵏⵙ ⵉⵏⵓ,
ⴰⴷ ⵢⵉⵍⵉ ⵅ ⵎⴰⵔⵔⴰ ⵍⵃⵓⴽⴽⴰⵎ ⵏ ⵉⵙⵔⴰⵉⵍ.
ⴰⵇⴰ ⵎⵎⴻⵡⵛⴻⵏ ⵉ ⵙⵙⵉⴼ ⵎⵓⵏⴻⵏ
ⴰⴽ-ⴷ ⵍⴳⴻⵏⵙ ⵉⵏⵓ.
ⵙ ⵓⵢⴰ, ⵡⵡⴻⵜ ⵅ ⵜⵎⴻⵚⵚⴰⴹⵜ ⵏⵏⴻⵛ.’
18 ‘ⵡⴰⵀ, ⵙⵙⵉⴼ ⵉⵜⵜⵡⴰⵇⴻⴵⴻⴱ.
ⵎⴰⵛⴰ ⵎⴰⵏⴰ, ⵎⴰⵍⴰ ⴰⵣⴻⴵⴰⴹ
ⵏⵏⵉ ⵉⵙⵙⴻⵃⵇⴰⵔⴻⵏ ⵎⴰⵔⵔⴰ ⴰⴽⴻⵛⵛⵓⴹ
ⵡⴰⵔ ⴷⴷ-ⵉⵜⵜⵉⵍⵉ ⵄⴰⴷ?’,
ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ.
19 ‘ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ,
ⵓⵛⴰ ⵡⵡⴻⵜ ⵉⴼⴰⵙⵙⴻⵏ ⵉⵊⵊ ⴷⴻⴳ ⵡⴻⵏⵏⴻⵖⵏⵉ,
ⵎⴰⵖⴰⵔ ⵙⵙⵉⴼ ⴰⴷ ⵉⵡⵡⴻⵜ ⵜⵏⴰⵢⴻⵏ,
ⵡⴰⵀ, ⵜⵍⴰⵜⴰ ⵏ ⵉⵎⵓⵔⴻⵏ.
ⴰⵇⴰ-ⵜ ⴷ ⵙⵙⵉⴼ ⵏ ⵢⵉⵏⵏⵉ ⵉⵜⵜⵡⴰⵏⵖⴻⵏ,
ⵙⵙⵉⴼ ⵏ ⵓⵎⴻⵇⵇⵔⴰⵏ ⵏⵏⵉ ⵉⵜⵜⵡⴰⵏⴻⵖ,
ⵙⵙⵉⴼ ⵏⵏⵉ ⵖⴰⵔⵙⴻⵏ ⵉⵜⵜⴰⴷⴼⴻⵏ,
20 ⵃⵉⵎⴰ ⵅⴻⵏⵏⵉ ⵓⵍ ⴰⴷ ⵉⴼⵙⵉ
ⵓⵛⴰ ⴰⴷ ⵎⵎⴰⵔⴻⵏⵢⴻⵏⵜ ⵜⵄⴻⵏⴽⵔⵉⴼⵉⵏ.
ⵍⴻⵇⴹⴻⵄ ⵏ ⵙⵙⵉⴼ ⴳⴳⵉⵖ ⵜ
ⵅ ⵎⴰⵔⵔⴰ ⵜⵉⵡⵡⵓⵔⴰ ⵏⵙⴻⵏ.
ⴰⵢ, ⴰⵇⴰ ⵙⵙⵉⴼ ⵉⵡⵊⴻⴷ ⵎⴰⵃⴻⵏⴷ ⴰⴷ ⵉⵍⴻⵍⵍⴻⵛ,
ⴰⵇⴰ ⵉⵜⵜⵡⴰⵊⴻⴱⴱ-ⴷⴷ ⵣⴻⴳ ⵓⴼⵓⵔⵔⵓ ⵏ ⵡⴻⵖⵍⴰⴼ
ⵎⴰⵃⴻⵏⴷ ⴰⴷ ⵉⵖⴰⵔⵚ.
21 ⵙⵎⵓⵏ ⵊⵊⴻⵀⴷ ⵏⵏⴻⵛ, ⵇⴻⵙⵙ ⵖⴰⵔ ⵓⴼⵓⵙⵉ,
ⴱⴻⴷⴷ, ⵇⴻⵙⵙ ⵖⴰⵔ ⵓⵣⴻⵍⵎⴰⴹ,
ⴰⵔⵔ ⵍⴻⵇⴹⴻⵄ ⵏⵏⴻⵛ ⵎⴰⵏⵉ ⵎⴰ ⵜⴻⵅⵙⴻⴷ.’
22 ‘ⵓⵍⴰ ⴷ ⵏⴻⵛⵛ ⴰⴷ ⵡⵜⴻⵖ ⵉⴼⴰⵙⵙⴻⵏ ⵉⵏⵓ
ⵉⵊⵊ ⴷⴻⴳ ⵡⴻⵏⵏⴻⵖⵏⵉ
ⵓⵛⴰ ⴰⴷ ⵙⵙⴰⵔⴻⵢⵢⵃⴻⵖ ⴰⵙⵄⴰⵔ ⵉⵏⵓ.
ⵏⴻⵛⵛ, ⵙⵉⴷⵉ, ⴰⵇⴰ ⵙⵙⵉⵡⵍⴻⵖ.’ ”
23 ⵢⵓⵙⴰ-ⴷⴷ ⵖⴰⵔⵉ ⵡⴰⵡⴰⵍ ⵏ ⵙⵉⴷⵉ, ⵉⵏⵏⴰ:
24 “ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⴻⴳⴳ ⵜⵏⴰⵢⴻⵏ ⵏ ⵉⴱⵔⵉⴷⴻⵏ ⵣⵉ ⵎⴰⵏⵉ ⴷⴷ ⵖⴰ ⵢⴰⵙ ⵙⵙⵉⴼ ⵏ ⵓⵊⴻⴵⵉⴷ ⵏ ⴱⴰⴱⵉⵍ. ⵣⴻⴳ ⵉⵛⵜ ⵏ ⵜⴻⵎⵎⵓⵔⵜ ⴰⴷ ⴼⴼⵖⴻⵏ ⵏⵉⵜⵏⵉ ⵙ ⵜⵏⴰⵢⴻⵏ ⵉⴷⵙⴻⵏ. ⵏⵇⴻⵛ ⵉⵊⵊ ⵏ ⵓⵛⵉⵢⵢⴰⵔ ⵖⴰⵔ ⵓⴱⴻⵟⵟⵓ ⵏ ⵡⴻⴱⵔⵉⴷ, ⵏⵇⴻⵛ ⵉ-ⵜ ⵖⴰⵔ ⵓⴱⴻⵟⵟⵓ ⵏ ⵡⴻⴱⵔⵉⴷ ⵖⴰⵔ ⵜⴻⵏⴷⵉⵏⵜ.
25 ⴰⴷ ⵜⵏⴻⵢⵢⵛⴻⴷ ⴰⴱⵔⵉⴷ ⵙ ⵎⴰⵏⵉⵙ ⴷⴷ ⵖⴰ ⵢⴰⵙ ⵙⵙⵉⴼ ⵖⴰⵔ ⵔⴰⴱⴱⴰ ⵏ ⴰⵢⵜ ⵏ ⵄⴰⵎⵎⵓⵏ ⵓ ⵖⴰⵔ ⵢⴰⵀⵓⴷⴰ ⴰⵍ ⴷⴰⵅⴻⵍ ⴷⵉ ⵜⴻⵏⴷⵉⵏⵜ ⵉⵜⵜⵡⴰⵙⵙⵊⴻⵀⴷⴻⵏ: ⵓⵔⵛⴰⵍⵉⵎ.
26 ⵎⵉⵏⵣⵉ ⴰⵊⴻⴵⵉⴷ ⵏ ⴱⴰⴱⵉⵍ ⴰⴷ ⵉⴱⴻⴷⴷ ⵖⴰⵔ ⵎⴰⵏⵉ ⴼⴰⵔⵇⴻⵏ ⵉⴱⵔⵉⴷⴻⵏ, ⵖⴰⵔ ⵓⴱⴻⴷⴷⵓ ⵏ ⵜⵏⴰⵢⴻⵏ ⵏ ⵉⴱⵔⵉⴷⴻⵏ ⵏⵏⵉ ⵎⴰⵃⴻⵏⴷ ⴰⴷ ⵉⵄⴻⵣⵣⴻⵎ. ⴰⴷ ⵉⵣⵣⴻⵔⵣ ⴼⵍⵉⵜⵛⴰⵜ ⵏ ⵍⵇⴻⵡⵚ, ⴰⴷ ⵉⵙⵙⴻⵇⵙⴰ ⵍⴻⵅⵢⴰⵍⴰⵜ ⵏ ⵍ’ⴰⵚⵏⴰⵎ, ⴰⴷ ⵉⵅⵣⴰⵔ ⵜⵙⴰ.
27 ⴷⴻⴳ ⵓⴼⵓⵙ ⵏⵏⴻⵙ ⵓⴼⵓⵙⵉ ⵢⵓⵙⴰ-ⴷⴷ ⵡⴻⵛⵜⴰⴱ ⵏ ‘ⵓⵔⵛⴰⵍⵉⵎ!’, ⵎⴰⵃⴻⵏⴷ ⴰⴷ ⴷⵉⵏ ⵢⴻⴳⴳ ⵍⴻⵇⵛⵓⵄ ⵏ ⵡⴻⴷⵀⴰⵎ, ⵎⴰⵃⴻⵏⴷ ⴰⴷ ⵢⴰⵔⵣⴻⵎ ⴰⵇⴻⵎⵎⵓⵎ ⵏⵏⴻⵙ ⵙ ⵉⵖⵓⵢⵢⴰⵏ ⵏ ⵡⴻⵏⵖⵉ, ⵎⴰⵃⴻⵏⴷ ⴰⴷ ⵉⵙⵙⴳⴻⵄⵄⴻⴷ ⵜⵎⵉⵊⵊⴰ ⵏⵏⴻⵙ ⵙ ⵉⵖⵓⵢⵢⴰⵏ ⵏ ⵓⵎⴻⵏⵖⵉ, ⵎⴰⵃⴻⵏⴷ ⴰⴷ ⵉⴳⴳ ⵍⴻⵇⵛⵓⵄ ⵏ ⵡⴻⴷⵀⴰⵎ ⴹⵉⴷⴷ ⵉ ⵜⴻⵡⵡⵓⵔⴰ, ⵎⴰⵃⴻⵏⴷ ⴰⴷ ⵢⴻⴳⴳ ⴰⵛⴱⴰⵔ, ⵎⴰⵃⴻⵏⴷ ⴰⴷ ⵉⴳⴳ ⵍⴱⴰⵔⴰⵊⴰⵜ.
28 ⵎⴰⵛⴰ ⵎⴰⵏ ⴰⵢⴰ ⴰⴷ ⵖⴰⵔⵙⴻⵏ ⵢⵉⵍⵉ ⴰⵎ ⵓⴳⴻⵣⵣⴻⵏ ⵉⵖⴻⵛⵛⴻⵏ ⴷⵉ ⵜⵉⵟⵟⴰⵡⵉⵏ ⵏⵙⴻⵏ, ⵎⴰⵖⴰⵔ ⵏⵉⵜⵏⵉ ⴰⵇⴰ ⵖⴰⵔⵙⴻⵏ ⵜⵉⵊⴰⴵⴰⵜⵉⵏ ⵉⵎⴻⵜⵏⴻⵏ, ⵎⴰⵛⴰ ⵏⴻⵜⵜⴰ ⴰⴷ ⵉⵙⵙⴻⵄⵇⴻⵍ ⵅ ⵍⵎⵓⵄⵚⵉⵢⵢⴻⵜ ⵏⵙⴻⵏ, ⵎⴰⵃⴻⵏⴷ ⴰⴷ ⵜⵜⵡⴰⵟⵟⴼⴻⵏ ⵏⵉⵜⵏⵉ.”
29 “ⵙ ⵓⵢⴰ, ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ ⵙⵉⴷⵉ: ‘ⵎⵉⵏⵣⵉ ⵜⴻⵙⵙⴻⵄⵇⵉⵍⴻⵎ ⵅ ⵍⵎⵓⵄⵚⵉⵢⵢⴻⵜ ⵏⵡⴻⵎ ⵓⵎⵉ ⵉⵄⴻⴷⴷⵉⵢⴻⵏ ⵏⵡⴻⵎ ⵜⵜⴱⴰⵏⴻⵏ ⵏⵉⵛⴰⵏ, ⵅⵎⵉ ⵜⵜⵡⴰⵥⴰⵔⵔⴻⵏ ⴷⴷⵏⵓⴱ ⵏⵡⴻⵎ ⵙ ⵎⴰⵔⵔⴰ ⵎⵉⵏ ⵜᵉⵜⵜⴻⴳⴳⴻⵎ, ⵡⴰⵀ, ⵎⵉⵏⵣⵉ ⵜⵙⵙⴻⵄⵇⵉⵍⴻⵎ ⵅ ⵍⵎⵓⵄⵚⵉⵢⵢⴻⵜ ⵏⵡⴻⵎ, ⵙ ⵓⵢⴰ ⴰⴷ ⴽⴻⵏⵏⵉⵡ ⵟⵟⴼⴻⵏ ⵙ ⵓⴼⵓⵙ.’
30 ⵓ ⵛⴻⴽ, ⴰⵄⴻⴼⴼⴰⵏ ⵉⵢⴻⵣⵣⵎⴻⵏ ⵉ ⵍⵎⴻⵡⵜ, ⵛⴻⴽ, ⴰ ⵍⵃⴰⴽⴻⵎ ⵏ ⵉⵙⵔⴰⵉⵍ, ⵡⴻⵏⵏⵉ ⴰⵙⵙ ⵏⵏⴻⵙ ⴰⴷ ⴷⴷ-ⵢⴰⵙ ⴷⵉ ⵍⵡⴻⵇⵜ ⵏ ⵍⴻⵃⵙⴰⴱ ⴰⵏⴻⴳⴳⴰⵔⵓ ⵏ ⵍⵎⵓⵄⵚⵉⵢⵢⴻⵜ,
31 ⴰⵎⵎⵓ ⵉ ⴷ ⴰⵛ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ: ‘ⴽⴽⴻⵙ ⴰⵔⴻⵥⵥⴻⵜ ⵏⵏⵉ, ⴽⴽⴻⵙ ⵜⵜⴰⵊ ⵏⵏⵉ. ⴰⵎⵎⵓ ⵡⴰⵔ ⵉⵜⵜⵉⵍⵉ ⵄⴰⴷ. ⵎⵉⵏ ⵉⵙⵙⴻⵀⵡⴰⵏ, ⴰⴷ ⵉⵜⵜⵡⴰⵙⵙⵓⵄⵍⴰ, ⵓ ⵎⵉⵏ ⵉⵙⵙⵓⵄⵍⴰⵏ, ⴰⴷ ⴷⴷ-ⵉⵜⵜⵡⴰⵙⵙⴻⵀⵡⴰ.
32 ⴰⴷ ⴰⵔⵔⴻⵖ ⴰⵢⴰ ⴷ ⵍⵅⴰⵔⴱⴻⵜ, ⴷ ⵍⵅⴰⵔⴱⴻⵜ, ⵡⴰⵀ, ⴰⴷ ⵜ ⴰⵔⵔⴻⵖ ⴷ ⵍⵅⴰⵔⴱⴻⵜ. ⵎⴰⵛⴰ ⵎⴰⵔⵔⴰ ⴰⵢⴰ ⵡⴰⵔ ⵉⵜⵜⵖⵉⵎⵉ ⵄⴰⴷ, ⵎⵖⵉⵔ ⴰⵍ ⴷⴷ ⵖⴰ ⵢⴰⵙ ⵡⴻⵏⵏⵉ ⵖⴰⵔ ⵉⴵⴰⵏ ⵍⵃⴻⵇⵇ ⵓⵛⴰ ⵏⴻⵛⵛ ⴰⴷ ⴰⵙ ⵜ ⵡⵛⴻⵖ.’ ”
ⵍⵃⵓⴽⵎ ⵏ ⵙⵉⴷⵉ ⵅ ⵉⵄⴰⵎⵎⵓⵏⵉⵢⵢⴻⵏ
33 “ⵓ ⵛⴻⴽ, ⴰ ⵎⵎⵉⵙ ⵏ ⴱⵏⴰⴷⴻⵎ, ⵏⴰⴱⴱ ⵓⵛⴰ ⵉⵏⵉ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵉⵏⵓ, ⵙⵉⴷⵉ, ⵅ ⴰⵢⵜ ⵏ ⵄⴰⵎⵎⵓⵏ ⵓ ⵅ ⵓⵙⴻⵃⵇⴰⵔ ⵏⵙⴻⵏ!’ ⵉⵏⵉ:
‘ⵙⵙⵉⴼ, ⵙⵙⵉⴼ ⵉⵜⵜⵡⴰⵊⴻⴱⴷ-ⴷⴷ,
ⵉⵜⵜⵡⴰⵙⵙⵓⵢⴷⴰ ⵎⴰⵃⴻⵏⴷ ⴰⴷ ⵢⴻⵛⵛ,
ⵎⴰⵃⴻⵏⴷ ⴰⴷ ⵉⵍⴻⵍⵍⴻⵛ, ...
34 - ⵡⴰⵅⵅⴰ ⵏⵉⵜⵏⵉ ⵜⵜⵡⴰⵍⴰⵏ ⵉ ⵛⴻⴽ ⵉⵊⵊ ⵏ ⵍⴻⵡⵃⵉⵢ ⵡⴰⵔ ⵉⴵⵉⵏ, ⵡⴰⵅⵅⴰ ⵏⵉⵜⵏⵉ ⵜⵜⴳⴻⵣⵣⵏⴻⵏ ⵉ ⵛⴻⴽ ⵉⵊⵊ ⵏ ⵓⴳⴻⵣⵣⴻⵏ ⵉⵙⵙⵅⴰⵔⵔⵉⵇⴻⵏ -
... ⴰⵇⴰ ⵙⵙⵉⴼ ⵉⵜⵜⵡⴰⵊⴻⴱⴷ-ⴷⴷ
ⵎⴰⵃⴻⵏⴷ ⴰⴷ ⵛⴻⴽ ⵢⴰⵔⵔ
ⵖⴰⵔ ⵉⵔⴰⵡⴻⵏ ⵏ ⵉⵄⴻⴼⴼⴰⵏⴻⵏ ⵉⵜⵜⵡⴰⵙⵙⵏⵓⵇⵇⴱⴻⵏ
ⵏⵏⵉ ⵣⵉ ⴷⴷ-ⵢⵓⵙⴰ ⵡⴰⵙⵙ ⵏⵙⴻⵏ
ⴷⵉ ⵍⵡⴻⵇⵜ ⵏ ⵍⴻⵃⵙⴰⴱ ⴰⵏⴻⴳⴳⴰⵔⵓ ⵏ ⵍⵎⵓⵄⵚⵉⵢⵢⴻⵜ.
35 ⴰⵔⵔ ⵙⵙⵉⴼ ⵖⴰⵔ ⵓⴼⵓⵔⵔⵓ ⵏ ⵡⴻⵖⵍⴰⴼ ⵏⵏⴻⵙ.
ⴷⴻⴳ ⵡⴻⵎⵛⴰⵏ ⵎⴰⵏⵉ ⴷⴷ-ⵜᵉⵜⵜⵡⴰⵅⴻⵍⵇⴻⴷ,
ⴷⵉ ⵜⴻⵎⵎⵓⵔⵜ ⵏ ⵍ’ⴰⵚⴻⵍ ⵏⵏⴻⵛ
ⴰⴷ ⵛⴻⴽ ⵃⴻⴽⵎⴻⵖ.
36 ⴰⴷ ⵅⴰⴽ ⵣⴻⴵⵄⴻⵖ ⵡⴻⵙⵅⴻⴹ ⵉⵏⵓ.
ⵙ ⵜⵎⴻⵙⵙⵉ ⵏ ⵓⴷⵓⵇⵇⴻⵣ ⵉⵏⵓ ⵏ ⵓⴼⵓⴳⴻⵎ
ⴰⴷ ⵅⴰⴽ ⵙⵓⴹⴻⵖ ⵓⵛⴰ ⴰⴷ ⵛⴻⴽ ⴳⴳⴻⵖ
ⴷⴻⴳ ⵓⴼⵓⵙ ⵏ ⴰⵢⵜ ⵏ ⴱⵓ-ⵖⴻⵣⵣⵓ
ⵏⵏⵉ ⵉⵙⵙⵏⴻⵏ ⴰⴷ ⴷⴻⴵⴻⵏ.
37 ⴰⴷ ⵜⵉⵍⵉⴷ ⴷ ⵎⴰⵛⵛⴰ ⵉ ⵜⵎⴻⵙⵙⵉ,
ⵉⴷⴰⵎⵎⴻⵏ ⵏⵏⴻⵛ ⴰⴷ ⵜⴻⵏ ⵙⵙⵉⵣⵣⵍⴻⵏ
ⴷⵉ ⵍⵡⴻⵙⵟ ⵏ ⵜⴻⵎⵎⵓⵔⵜ.
ⵡⴰⵔ ⵜᵉⵜⵜⵉⵍⵉ ⵇⴰⵄ ⵍⵉⴷⴰⵔⴻⵜ ⴷⴰⵢⴻⴽ,
ⵎⴰⵖⴰⵔ ⵏⴻⵛⵛ, ⵙⵉⴷⵉ, ⴰⵇⴰ ⵙⵙⵉⵡⵍⴻⵖ.’ ”