9
ⴱⵏⴰⴷⴻⵎ ⵡⴰⵔ ⵉⵣⴻⵎⵎⴰⵔ ⴰⴷ ⵉⵃⴽⴻⵎ ⵜⴰⵙⵖⴰⵔⵜ ⵏⵏⴻⵙ
1 ⵎⴰⵖⴰⵔ ⵏⴻⵛⵛ ⴳⴳⵉⵖ ⵎⴰⵔⵔⴰ ⴰⵢⴰ ⵖⴰⵔ ⵡⵓⵍ ⵉⵏⵓ, ⵎⴰⵃⴻⵏⴷ ⴰⴷ ⴰⵔⵣⵓⵖ ⴷⵉ ⵎⴰⵔⵔⴰ ⴰⵢⴰ, ⴰⵇⴰ ⵉⵎⵙⴻⴳⴳⴰⴷⴻⵏ ⴷ ⵉⵎⵉⵖⵉⵙⴻⵏ ⴷ ⵜⵎⴻⴳⴳⴰ ⵏⵙⴻⵏ ⴷⴻⴳ ⵓⴼⵓⵙ ⵏ ⴰⵔⴻⴱⴱⵉ. ⵜⴰⵢⵔⵉ ⴷ ⵡⴻⵛⵔⴰⵀ ⵡⴰⵔ ⵜⴻⵏ ⵉⵙⵙⵉⵏ ⴱⵏⴰⴷⴻⵎ, ⴰⵇⴰ ⵎⴰⵔⵔⴰ ⵉⴵⴰ ⵣⵣⴰⵜⴻⵙ.
2 ⵎⴰⵔⵔⴰ ⵉⴵⴰ ⴰⵎ ⵎⴰⵎⵎⴻⵛ ⵉⴵⴰ ⵖⴰⵔ ⵎⴰⵔⵔⴰ: ⵜⵉⵔⴰ ⴷ ⵉⵛⵜ ⵜⵍⴻⵇⵇⴻⴼ ⴰⵎⵙⴻⴳⴳⴻⴷ ⴷ ⵓⵄⴻⴼⴼⴰⵏ, ⴰⵎ ⵓⵚⴻⴱⵃⴰⵏ ⴷ ⵓⵎⴻⵣⴷⴰⴳ ⴰⵎ ⵓⵎⴻⵅⵎⵓⵊ, ⵡⴻⵏⵏⵉ ⵉⵇⴻⴷⴷⵎⴻⵏ ⵜⴰⵖⴰⵔⵚⵜ ⴷ ⵡⴻⵏⵏⵉ ⵡⴰⵔ ⵉⵇⴻⴷⴷⵎⴻⵏ ⵜⴰⵖⴰⵔⵚⵜ, ⴰⵚⴻⴱⵃⴰⵏ ⴷ ⵓⵎⴻⴷⵏⵓⴱ, ⵡⴻⵏⵏⵉ ⵉⵜⵜⵊⵊⴰⴵⴰⵏ ⴷ ⵡⴻⵏⵏⵉ ⵉⵜⵜⴻⴳⴳⵯⴻⴷⴻⵏ ⵎⴰⵃⴻⵏⴷ ⴰⴷ ⵉⵊⵊⴰⴵ.
3 ⵎⴰⵏ ⴰⵢⴰ ⴷ ⵉⵊⵊ ⵏ ⵍⵖⴰⵔ ⵖⴰⵔ ⵎⴰⵔⵔⴰ ⵎⵉⵏ ⵉⵎⵙⴰⵔⴻⵏ ⵙⴰⴷⵓ ⵜⴼⵓⵛⵜ, ⴰⵇⴰ ⵎⴰⵔⵔⴰ ⵉⵡⴷⴰⵏ ⵉⵍⵇⴻⴼ ⵉ-ⵜⴻⵏ ⵜⵉⵔⴰ ⴷ ⵉⵛⵜ, ⵓⵛⴰ ⵓⵍⴰ ⵓⵍ ⵏ ⵜⴰⵔⵡⴰ ⵏ ⴱⵏⴰⴷⴻⵎ ⵉⵛⵛⵓⵔ ⵙ ⵍⵖⴰⵔ, ⵓ ⴰⵇⴰ ⴷⵉⵏ ⴰⵟⴻⵎⵎⴻⵙ ⴷⴻⴳ ⵡⵓⵍ ⵏⵙⴻⵏ ⴷⵉ ⵍⵡⴻⵇⵜ ⵏ ⵜⵓⴷⴰⵔⵜ ⵏⵙⴻⵏ, ⵓ ⴰⵡⴰⵔⵏⵉ ⵉ ⵓⵢⴰ ⴰⴷ ⵓⵢⵓⵔⴻⵏ ⵏⵉⵜⵏⵉ ⵖⴰⵔ ⵉⵎⴻⵜⵜⵉⵏⴻⵏ.
4 ⵎⴰⵖⴰⵔ ⵉ ⵡⴻⵏⵏⵉ ⵉⵇⵇⵏⴻⵏ ⵉ ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ ⴰⵇⴰ ⴷⵉⵏ ⴰⵙⵉⵜⴻⵎ, ⵎⵉⵏⵣⵉ ⵍⵃⴰⵍ ⵉ ⵡⴻⵇⵣⵉⵏ ⵉⴷⴷⴰⵔⴻⵏ ⵃⵙⴻⵏ ⵣⵉ ⵍⵃⴰⵍ ⵉ ⵡⴻⵢⵔⴰⴷ ⵉⵎⵎⵓⵜⴻⵏ.
5 ⵎⴰⵖⴰⵔ ⵉⵏⵏⵉ ⵉⴷⴷⴰⵔⴻⵏ ⵙⵙⵏⴻⵏ, ⴰⵇⴰ ⵏⵉⵜⵏⵉ ⴰⴷ ⵎⵎⵜⴻⵏ, ⵎⴰⵛⴰ ⵉⵎⴻⵜⵜⴰⵏ ⵡⴰⵔ ⵙⵙⵉⵏⴻⵏ ⵡⴰⵍⵓ ⵇⴰⵄ. ⵏⵉⵜⵏⵉ ⵡⴰⵔ ⵜⵜᵉⵟⵟⴼⴻⵏ ⵡⴰⵍⵓ ⵣⵉ ⵍⵎⵓⵏⴻⵜ, ⵎⴰⵖⴰⵔ ⵍⵉⴷⴰⵔⴻⵜ ⵅⴰⴼⵙⴻⵏ ⵜᵉⵜⵜⵡⴰⵜⵜⵓ.
6 ⴰⵇⴰ ⵜⴰⵢⵔⵉ ⵏⵙⴻⵏ ⴷ ⵡⴻⵛⵔⴰⵀ ⵏⵙⴻⵏ ⴷ ⵜⵓⵙⵎⵉ ⵏⵙⴻⵏ ⴼⵏⴰⵏ. ⵉ ⵍⴻⴱⴷⴰ ⵡⴰⵔ ⵖⴰⵔⵙⴻⵏ ⴱⵓ ⵜⴻⵙⵖⴰⵔⵜ ⵄⴰⴷ ⴷⵉ ⵎⴰⵔⵔⴰ ⵎⵉⵏ ⵉⵜⵜⴻⵎⵙⴰⵔⴻⵏ ⵙⴰⴷⵓ ⵜⴼⵓⵛⵜ.
7 ⵓⵢⵓⵔ ⵅⴻⵏⵏⵉ, ⵉⵡⴰ ⴻⵛⵛ ⵙ ⵍⴻⴼⵔⴰⵃⴻⵜ ⴰⵖⵔⵓⵎ ⵏⵏⴻⵛ, ⵙⵓ ⵙ ⵡⵓⵍ ⵉⴼⴰⵔⵃⴻⵏ ⴱⵉⵏⵓ ⵏⵏⴻⵛ, ⵎⴰⵖⴰⵔ ⵉⵄⵊⴻⴱ ⴰⵙ ⵉ ⴰⵔⴻⴱⴱⵉ ⵜⵉⵎⴻⴳⴳⴰ ⵏⵏⴻⵛ ⴰⵟⵟⴰⵙ ⵣⴻⴳ ⵡⴰⵎⵉ.
8 ⴻⵊⵊ ⴰⴷ ⵢⵉⵍⵉ ⴰⵔⵔⵓⴹ ⵏⵏⴻⵛ ⴷ ⴰⵛⴻⵎⵍⴰⵍ ⵍⴻⴱⴷⴰ ⵓ ⵄⴻⵎⵎⴰⵔⵚ ⵡⴰⵔ ⵉⵜⵜⵅⴻⵚⵚⵉ ⵣⵣⴻⵛⵜ ⵅ ⵓⵣⴻⴵⵉⴼ ⵏⵏⴻⵛ.
9 ⴱⴰⵔⵔⴻⵄ ⵅ ⵜⵓⴷⴰⵔⵜ ⴰⴽ-ⴷ ⵜⴻⵎⵖⴰⵔⵜ ⵏⵏⵉ ⵜᵉⵜⵜⴻⵅⵙⴻⴷ, ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵛ ⵉⴼⴻⵏⵏⴰⵏ ⵏⵏⵉ ⴷ ⴰⵙ ⵉⵡⵛⴰ ⴰⵔⴻⴱⴱⵉ ⵙⴰⴷⵓ ⵜⴼⵓⵛⵜ, ⵎⴰⵍⴰ ⵓⵙⵙⴰⵏ ⵏ ⵍⵃⴰⴹⴰⵔ ⵏⵏⴻⵛ ⵉⴼⴻⵏⵏⴰⵏ ⴷⴰⵏⵉⵜⴰ, ⵎⴰⵖⴰⵔ ⵜⴰ ⴷ ⵜⴰⵙⵖⴰⵔⵜ ⵏⵏⴻⵛ ⴷⵉ ⵜⵓⴷⴰⵔⵜ-ⴰ ⵓ ⵖⴰⵔ ⵓⵎⴰⵔⵔⴻⵜ ⵉ ⵣⵉ ⵜⵎⴰⵔⵔⵜⴻⴷ ⵙⴰⴷⵓ ⵜⴼⵓⵛⵜ.
10 ⵎⴰⵔⵔⴰ ⵎⵉⵏ ⵖⴰ ⵢⴰⴼ ⵓⴼⵓⵙ ⵏⵏⴻⵛ ⵎⴰⵃⴻⵏⴷ ⴰⴷ ⵜ ⵢⴻⴳⴳ, ⴻⴳⴳ ⵉ-ⵜ ⵄⵍⴰⵃⵙⴰⴱ ⵊⵊⴻⵀⴷ ⵏⵏⴻⵛ, ⵎⴰⵖⴰⵔ ⵡⴰⵔ ⵉⴵⵉ ⴷⵉ ⵍⴰⵅⴰⵔⵜ ⵎⴰⵏⵉ ⵖⴰ ⵜⵓⵢⵓⵔⴻⴷ ⵎⵉⵏ ⵖⴰ ⵜⴻⴳⴳⴻⴷ, ⵏⵉⵖ ⴰⵅⴰⵔⵔⴻⵚ ⵏⵉⵖ ⵜⵓⵙⵙⵏⴰ ⵓⵍⴰ ⴷ ⵜⵉⵖⵉⵜ.
11 ⵄⴰⵡⴻⴷ ⵥⵔⵉⵖ ⵙⴰⴷⵓ ⵜⴼⵓⵛⵜ ⴰⵇⴰ ⴰⵢⵜ ⵏ ⴱⵓ-ⵜⴰⵣⵍⴰ ⵡⴰⵔ ⵖⴻⴵⴱⴻⵏ ⵍⴻⴱⴷⴰ ⴷⵉ ⵃⴰⵎⴰⵜ, ⵏⵉⵖ ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵍⴻⴱⴷⴰ ⴷⴻⴳ ⵓⵎⴻⵏⵖⵉ, ⵓ ⵉⵎⵉⵖⵉⵙⴻⵏ ⵡⴰⵔ ⵖⴰⵔⵙⴻⵏ ⵉⴵⵉ ⵡⴻⵖⵔⵓⵎ ⵍⴻⴱⴷⴰ ⵓ ⵢⵉⵏⵏⵉ ⵙ ⵍⴻⵄⵇⴻⵍ ⵡⴰⵔ ⵖⴰⵔⵙⴻⵏ ⵉⴵⵉ ⵡⴰⴳⵍⴰ ⵍⴻⴱⴷⴰ, ⵓⵍⴰ ⴷ ⵉⵏⵏⵉ ⵙ ⵍⴻⴼⵀⴰⵎⴻⵜ ⵡⴰⵔ ⵖⴰⵔⵙⴻⵏ ⵉⴵⵉ ⴰⵔⴹⴰ ⵍⴻⴱⴷⴰ, ⵎⴰⵖⴰⵔ ⵍⵃⴰⵍ ⴷ ⵜⵉⵔⴰ ⵍⴻⵇⵇⴼⴻⵏ ⵓⵍⴰ ⴷ ⵎⴰⵔⵔⴰ ⵏⵉⵜⵏⵉ.
12 ⵎⴰⵖⴰⵔ ⴱⵏⴰⴷⴻⵎ ⵡⴰⵔ ⵉⵙⵙⵉⵏ ⵍⵎⵉⵊⴰⵍ ⵏⵏⴻⵙ, ⴰⵎ ⵢⵉⵙⴻⵍⵎⴰⵏ ⵉⵏⵃⴻⵚⵔⴻⵏ ⴷⵉ ⵜⵔⴰⵛⵛⴰ ⵏ ⴰⵔⵥⵉⵢⵢⴻⵜ, ⵓ ⴰⵎ ⵢⵉⵊⴹⴰⴹ ⵉⵏⵏⵃⴻⵚⵔⴻⵏ ⴷⵉ ⵍⴼⴻⵅ. ⴰⵎⵎⵓ ⵓⵍⴰ ⴷ ⵜⴰⵔⵡⴰ ⵏ ⴱⵏⴰⴷⴻⵎ ⵜⵜⵡⴰⵟⵟⴼⴻⵏ ⴷⵉ ⵍⴼⴻⵅ ⴷⴻⴳ ⵉⵛⵜ ⵏ ⵍⵡⴻⵇⵜ ⴷ ⵜⴰⵄⴻⴼⴼⴰⵏⵜ, ⵅⵎⵉ ⵅⴰⵙⴻⵏ ⴷⴷ-ⵜⵡⴻⵟⵟⴰ ⵜⵔⴰⵛⵛⴰ ⴷⴻⵖⵢⴰ.
ⵜⵉⵖⵉⵜ ⵡⴰⵔ ⵖⴰⵔⴻⵙ ⴱⵓ ⵓⵡⴻⵇⵇⴰⵔ
13 ⵓⵍⴰ ⴷ ⵎⴰⵏ ⴰⵢⴰ ⴱⴷⵉⵖ ⴰⴷ ⴷⴰⵢⴻⵙ ⵥⵔⵉⵖ ⵜⵉⵖⵉⵜ ⵙⴰⴷⵓ ⵜⴼⵓⵛⵜ, ⵜⵓⵙⴰ ⴰⵢⵉ-ⴷⴷ ⴷ ⵜⴰⵎⴻⵇⵇⵔⴰⵏⵜ ⴰⵟⵟⴰⵙ.
14 ⵜⵓⵖⴰ ⴷⵉⵏ ⵉⵛⵜ ⵏ ⵜⴻⵏⴷⵉⵏⵜ ⴷ ⵜⴰⵎⴻⵥⵢⴰⵏⵜ ⴷⴰⵢⴻⵙ ⴷⵔⵓⵙ ⵏ ⵢⴻⵡⴷⴰⵏ ⵡⴰⵀⴰ. ⵉⴼⴼⴻⵖ ⵅⴰⵙ ⵉⵊⵊ ⵏ ⵓⵊⴻⴵⵉⴷ ⴷ ⴰⵎⴻⵇⵇⵔⴰⵏ, ⵉⵃⴻⵡⵡⴻⵙ ⵉ-ⵜⵜ, ⵓ ⵉⵙⵙⴱⴻⴷⴷ ⵅⴰⵙ ⵍⴱⴰⵔⴰⵊⴰⵜ ⵜⵉⵎⴻⵇⵇⵔⴰⵏⵉⵏ.
15 ⵉⵜⵜⵡⴰⴼⴼ ⴷⴰⵢⴻⵙ ⵉⵊⵊ ⵏ ⵡⴻⵔⵢⴰⵣ ⴷ ⴰⵎⴻⵣⵍⵓⴹ ⴷ ⴰⵎⵉⵖⵉⵙ ⵡⴻⵏⵏⵉ ⵉⴼⴻⴽⴽⴻⵏ ⵜⴰⵏⴷⵉⵏⵜ ⵙ ⵜⵉⵖⵉⵜ ⵏⵏⴻⵙ, ⵎⴰⵛⴰ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵉⵄⵇⴻⵍ ⵄⴰⴷ ⵄⴻⵎⵎⴰⵔⵚ ⵅ ⵡⴻⵔⵢⴰⵣ ⵏⵏⵉ.
16 ⵅⴻⵏⵏⵉ ⵏⵏⵉⵖ ⵏⴻⵛⵛ: “ⵜⵉⵖⵉⵜ ⵜⴻⵃⵍⴰ ⵅ ⵊⵊⵀⴻⴷ!”, ⵡⴰⵅⵅⴰ ⵜᵉⵜⵜⵡⴰⵙⵙⴻⵃⵇⴰⵔ ⵜⵉⵖⵉⵜ ⵏ ⵓⵎⴻⵣⵍⵓⴹ ⵓ ⴰⵡⴰⵍⴻⵏ ⵏⵏⴻⵙ ⵡⴰⵔ ⵜᵉⵜⵜⵡⴰⵙⵍⴻⵏ.
17 ⴰⵡⴰⵍⴻⵏ ⵏ ⵉⵎⵉⵖⵉⵙⴻⵏ ⵏⵏⵉ ⵖⴰⵔ ⵜⵜⴻⵙⵍⴰⵏ ⵉⵡⴷⴰⵏ ⴷⵉ ⵍⵀⵓⴷⵏⴻⵜ, ⵃⵙⴻⵏ ⵣⴻⴳ ⵓⵖⵓⵢⵢⵉ ⵏ ⵍⵃⴰⴽⴻⵎ ⵊⴰⵔ ⵉⴱⵓⵀⴰⵍⵉⵢⵢⴻⵏ.
18 ⵜⵉⵖⵉⵜ ⵜⴻⵃⵍⴰ ⵅ ⵍⴻⵙⵏⴰⵃ ⵏ ⵓⵎⴻⵏⵖⵉ, ⵎⴰⵛⴰ ⵉⵊⵊ ⵏ ⵓⵎⴻⴷⵏⵓⴱ ⵡⴰⵀⴰ ⵉⵀⴻⴷⴷⴻⵎ ⴰⵟⵟⴰⵙ.