6
ⴰⴳⵍⴰ ⵏⵏⵉ ⵣⵣⴰⵢⵙⴻⵏ ⴱⴰⴱ ⵏⵙⴻⵏ ⵡⴰⵔ ⴷⴷ-ⵢⴰⵔⵔ ⵎⴻⵥⵔⵉ
1 ⴰⵇⴰ ⴷⵉⵏ ⵉⵊⵊ ⵏ ⵍⵖⴰⵔ ⵏⵏⵉ ⵥⵔⵉⵖ ⵙⴰⴷⵓ ⵜⴼⵓⵛⵜ ⵏⵏⵉ ⵉⵎⵙⴰⵔⴻⵏ ⴰⵟⵟⴰⵙ ⵊⴰⵔ ⵉⵡⴷⴰⵏ:
2 ⵉⵊⵊⴻⵏ ⵢⴰⵔⵣⴻⴼ ⴰⵙ ⴰⵔⴻⴱⴱⵉ ⴰⴳⵍⴰ ⴷ ⵜⵅⵓⴱⴰⵢ ⴷ ⵛⵛⴰⵏ. ⴰⵇⴰ ⵡⴰⵔ ⵉⵜⵜⵅⴻⵚⵚⵉ ⵡⴰⵍⵓ ⵉ ⵍⴻⵄⵎⴰⵔ ⵏⵏⴻⵙ ⵣⵉ ⵎⴰⵔⵔⴰ ⵎⵉⵏ ⴷⴰⵢⴻⵙ ⴷ ⵎⴻⵥⵔⵉ, ⵎⴰⵛⴰ ⴰⵔⴻⴱⴱⵉ ⵡⴰⵔ ⵜ ⵉⵊⵊⵉ ⴰⴷ ⵣⵣⴰⵢⴻⵙ ⵉⵛⵛ, ⵎⴰⵖⴰⵔ ⵉⵊⵊ ⵏ ⵓⴱⴰⵔⵔⴰⵏⵉ ⴰⴷ ⵜ ⵉⵛⵛ. ⴰⵇⴰ ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵉⵊⵊ ⵏ ⵍⵖⴰⵔ ⴷ ⴰⵄⴻⴼⴼⴰⵏ.
3 ⵎⴰⵍⴰ ⵉⵊⵊ ⵏ ⵡⴻⵔⵢⴰⵣ ⵢⴻⵊⵊ-ⴷⴷ ⵎⵢⴰ ⵏ ⵉⵃⴻⵏⵊⵉⵔⴻⵏ ⵓ ⵉⴷⴷⴰⵔ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ, ⴰⵍⴰⵎⵉ ⴷⴻⵡⵍⴻⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⴷⴻⴳ ⵡⴰⵟⵟⴰⵙ, ⵎⴰⵛⴰ ⵍⴻⵄⵎⴰⵔ ⵏⵏⴻⵙ ⵡⴰⵔ ⵉⵊⵊⵉⵡⴻⵏ ⵛⴰ ⵙ ⵍⵅⴰⵔ ⵓ ⵡⴰⵔ ⵉⵜⵜⵡⵉⴼ ⵡⴻⵏⴹⴻⵍ ⵉ ⵏⴻⵜⵜⴰ, ⵏⴻⵛⵛ ⴰⴷ ⵉⵏⵉⵖ: ⵉⵊⵊ ⵏ ⵡⴻⵖⵔⴰⵢ ⵉⵛⵏⴰ ⴰⵙ ⵅ ⵏⴻⵜⵜⴰ.
4 ⵎⴰⵖⴰⵔ ⵢⵓⵙⴰ-ⴷⴷ ⴷⵉ ⵍⴱⴰⵟⴻⵍ ⵓⵛⴰ ⵉⴼⴼⴻⵖ ⴷⵉ ⵜⴰⴵⴻⵙⵜ ⵓ ⵙ ⵜⴰⴵⴻⵙⵜ ⵉⵜⵜⵡⴰⵍⴻⵃⵃⴻⴼ ⵉⵙⴻⵎ ⵏⵏⴻⵙ.
5 ⵏⴻⵜⵜⴰ ⵄⴰⵡⴻⴷ ⵡⴰⵔ ⵉⵥⵔⵉ ⵜⴰⴼⵓⵛⵜ ⵓ ⵡⴰⵔ ⵜⵜ ⵉⵙⵙⵉⵏ. ⴰⵎⵎⵓ ⵖⴰⵔ ⵡⴻⵖⵔⴰⵢ-ⴰ ⵍⵀⵓⴷⵏⴻⵜ ⴽⵜⴰⵔ ⵅ ⵡⴻⵔⵢⴰⵣ ⵏⵏⵉ,
6 ⵡⴰⵅⵅⴰ ⵏⴻⵜⵜⴰ ⵉⴷⴷⴰⵔ ⴰⵍⴼⴰⵢⴻⵏ ⵏ ⵉⵙⴻⴳⴳⵯⵓⵙⴰ, ⵎⴰⵛⴰ ⴱⵍⴰ ⵎⴰ ⴰⴷ ⵉⵥⴰⵔ ⵍⵅⴰⵔ! ⵎⴰ ⵡⴰⵔ ⵉⴳⴳⵓⵔⴻⵏ ⴽⵓⵍ ⵉⵊⵊ ⵖⴰⵔ ⵡⴻⵎⵛⴰⵏ ⴷ ⵉⵊⵊ?
7 ⵎⴰⵔⵔⴰ ⴰⵎⴰⵔⵔⴻⵜ ⵏ ⴱⵏⴰⴷⴻⵎ ⵉ ⵓⵇⴻⵎⵎⵓⵎ ⵏⵏⴻⵙ, ⵡⴰⵅⵅⴰ ⴰⵎⴻⵏⵏⵉ ⵄⴻⵎⵎⴰⵔⵚ ⵡⴰⵔ ⵉⵜⵜⵛⵛⵓⵔⵉ ⵍⴻⵄⵎⴰⵔ ⵏⵏⴻⵙ.
8 ⵎⴰⵖⴰⵔ ⵎⴰⵏ ⵍⴻⴼⴹⴻⵍ ⵉ ⵓⵎⵉⵖⵉⵙ ⵅ ⵓⴱⵓⵀⴰⵍⵉ? ⵎⴰⵏ ⵍⴻⴼⴹⴻⵍ ⵉ ⵓⵎⴻⵣⵍⵓⴹ ⵏⵏⵉ ⵉⵙⵙⵏⴻⵏ ⴰⴷ ⵢⵓⵢⵓⵔ ⵇⵉⴱⴰⵍⵜ ⵉ ⵢⵉⵏⵏⵉ ⵉⴷⴷⴰⵔⴻⵏ?
9 ⵉⵃⵍⴰ ⴰⴷ ⵜⴻⵥⵔⵉⴷ ⵎⵉⵏ ⵉⴵⴰⵏ ⵣⵣⴰⵜ ⵉ ⵜⵉⵟⵟⴰⵡⵉⵏ ⵅ ⵡⴻⵜⵍⴰⵄ ⵏ ⵍⴻⵄⵎⴰⵔ. ⵓⵍⴰ ⴷ ⵎⴰⵏ ⴰⵢⴰ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.
10 ⵎⵉⵏ ⵎⴰ ⵉⴵⴰ ⵛⴰ ⵏ ⵉⵊⵊⴻⵏ, ⴰⵇⴰ ⵉⵙⴻⵎ ⵏⵏⴻⵙ ⵉⵜⵜⵡⴰⵍⴰⵖⴰ ⵇⴱⴻⵍ, ⵓ ⵜⵓⵖⴰ ⵉⵜⵜⵡⴰⵙⵙⴻⵏ ⵎⵉⵏ ⵖⴰ ⵢⵉⵍⵉ ⴱⵏⴰⴷⴻⵎ: ⵏⴻⵜⵜⴰ ⵡⴰⵔ ⵉⵣⴻⵎⵎⴰⵔ ⴰⴷ ⵉⵎⵛⵓⴱⴱⴻⵛ ⴰⴽ-ⴷ ⵡⴻⵏⵏⵉ ⵅⴰⵙ ⵉⵊⴻⵀⴷⴻⵏ.
11 ⵎⴰⵖⴰⵔ ⴰⵇⴰ ⴷⵉⵏ ⴰⵟⵟⴰⵙ ⵏ ⵡⴰⵡⴰⵍⴻⵏ ⵏⵏⵉ ⵢⴰⵔⴻⵏⵏⵢⴻⵏ ⴷⵉ ⵎⵉⵏ ⵉⴵⴰⵏ ⴷⵉ ⵍⴱⴰⵟⴻⵍ. ⵎⴰⵏ ⵍⴻⴼⴹⴻⵍ ⵏ ⵓⵢⴰ ⵉ ⴱⵏⴰⴷⴻⵎ?
12 ⵎⴰⵖⴰⵔ ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵙⵙⴻⵏ ⵎⵉⵏ ⵉⵃⵍⴰⵏ ⵉ ⴱⵏⴰⴷⴻⵎ ⴷⵉ ⵜⵓⴷⴰⵔⵜ ⵏⵏⴻⵙ ⴷⵉ ⵍⵡⴻⵇⵜ ⵏ ⵍⵇⴻⴷⴷ ⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ ⵉⴼⴻⵏⵏⴰⵏ ⵏⵏⵉ ⵉⵙⵙⵄⴻⴷⴷⵓ ⴰⵎ ⵜⵉⵍⵉ? ⵎⴰⵖⴰⵔ ⵡⵉ ⵉⵣⴻⵎⵎⴰⵔⴻⵏ ⴰⴷ ⵉⵙⵙⵛⴻⵏ ⵉ ⴱⵏⴰⴷⴻⵎ ⵎⵉⵏ ⵖⴰ ⵉⵎⵙⴰⵔⴻⵏ ⴰⵡⴰⵔⵏⵉ ⴰⵙ ⵙⴰⴷⵓ ⵜⴼⵓⵛⵜ?