9
ⵙⴻⴱⵄⵉⵏ ⵏ ⵙⵉⵎⴰⵏⴰⵜ
1 ⴷⴻⴳ ⵓⵙⴻⴳⴳⵯⴰⵙ ⴰⵎⴻⵣⵡⴰⵔⵓ ⵏ ⴷⴰⵔⵉⵢⵓⵙ, ⵎⵎⵉⵙ ⵏ ⴰⵃⴰⵛⵡⵉⵔⵓⵙ, ⵡⴻⵏⵏⵉ ⵣⴻⴳ ⴰⵢⵜ ⵏ ⵎⴰⴷⴰⵢ, ⵡⴻⵏⵏⵉ ⵉⴷⴻⵡⵍⴻⵏ ⴷ ⴰⵊⴻⴵⵉⴷ ⵅ ⵜⴳⴻⵍⴷⵉⵜ ⵏ ⵉⴽⴰⵍⴷⴰⵏⵉⵢⵢⴻⵏ,
2 ⴷⴻⴳ ⵓⵙⴻⴳⴳⵯⴰⵙ ⴰⵎⴻⵣⵡⴰⵔⵓ ⵏ ⵜⴳⴻⵍⴷⴰ ⵏⵏⴻⵙ ⵉⴱⴰⵏ-ⴰⵢⵉ-ⴷⴷ, ⵉ ⵏⴻⵛⵛ ⴷⴰⵏⵉⵢⴰⵍ, ⵣⴻⴳ ⵉⴷⵍⵉⵙⴻⵏ, ⴱⴻⵍⵍⵉ ⵍⵇⴻⴷⴷ ⵏ ⵉⵙⴻⴳⴳⵯⵓⵙⴰ ⵉ ⵅ ⵜⵓⵖⴰ ⵉⵙⵙⵉⵡⴻⵍ ⵡⴰⵡⴰⵍ ⵏ ⵙⵉⴷⵉ ⵉ ⵓⵏⴰⴱⵉ ⵉⵔⵎⵉⵢⴰ ⵉ ⵓⴽⴻⵎⵎⴻⵍ ⵏ ⵍⵡⴻⵇⵜ ⵏ ⵍⵅⵉⵔⴱⴰⵜ ⵏ ⵓⵔⵛⴰⵍⵉⵎ, ⵜⵓⵖⴰ-ⵜ ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ.
3 ⵏⴻⵛⵛ ⴰⵔⵔⵉⵖ ⴰⵖⴻⵎⴱⵓⴱ ⵉⵏⵓ ⵖⴰⵔ ⵙⵉⴷⵉ ⴰⵔⴻⴱⴱⵉ, ⵃⵉⵎⴰ ⴰⴷ ⵅⴰⵙ ⴰⵔⵣⵓⵖ ⵙ ⵜⵥⴰⴵⵉⵜ ⴷ ⵓⵣⴰⵡⴻⴳ, ⵙ ⵓⵥⵓⵎⵎⵉ ⴷⴻⴳ ⵜⵅⴰⵏⵛⴻⵜ ⵏ ⵡⴻⵛⴹⴰⵏ ⴷ ⵢⵉⵖⵖⴻⴹ.
4 ⵏⴻⵛⵛ ⵥⵥⵓⴵⴻⵖ ⵉ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵓ ⵏⴻⵄⵎⴻⵖ ⵅ ⴷⴷⵏⵓⴱ ⵏⵏⴻⵖ, ⵏⵏⵉⵖ
“ⴰ ⵙⵉⴷⵉ ⵉⵏⵓ, ⵛⴻⴽ ⴷ ⴰⵔⴻⴱⴱⵉ ⴰⵎⴻⵇⵇⵔⴰⵏ ⴷ ⵉⵙⵙⵉⴳⴳⵯⵉⴷⴻⵏ, ⵡⴻⵏⵏⵉ ⵉⵃⴻⵟⵟⴰⵏ ⵍⵄⴰⵀⴷ ⵏⵏⴻⵙ ⴷ ⵜⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵢⵉⵏⵏⵉ ⵜ ⵉⵜⵜⴻⵅⵙⴻⵏ ⵓ ⵉ ⵢⵉⵏⵏⵉ ⵉⵃⴻⵟⵟⴰⵏ ⵜⵉⵡⴻⵚⵚⴰ ⵏⵏⴻⵙ.
5 ⵏⴻⵛⵛⵉⵏ ⵏⴻⵅⴹⴰ ⵓ ⵏⴻⴳⴳⴰ ⵍⵎⵓⵄⵚⵉⵢⵢⴻⵜ ⴷ ⵍⵖⴰⵔ ⵓ ⵏⵖⴻⵡⵡⴻⵖ ⴰⵎ ⵏⴻⴼⴼⴻⵖ ⵣⵉ ⵜⵉⵡⴻⵚⵚⴰ ⴷ ⵍⴼⴰⵔⴰⵢⵉⴹ ⵏⵏⴻⵛ.
6 ⵡⴰⵔ ⵏⴻⵙⵍⵉ ⵉ ⵉⵎⵙⴻⵅⵅⴰⵔⴻⵏ ⵏⵏⴻⵛ, ⵉⵏⴰⴱⵉⵢⵢⴻⵏ, ⵉⵏⵏⵉ ⵜⵓⵖⴰ ⵉⵙⵙⴰⵡⴰⵍⴻⵏ ⴷⴻⴳ ⵢⵉⵙⴻⵎ ⵏⵏⴻⵛ ⵉ ⵉⵊⴻⴵⵉⴷⴻⵏ ⵏⵏⴻⵖ ⴷ ⵍⵃⵓⴽⴽⴰⵎ ⵏⵏⴻⵖ ⴷ ⵍⴻⵊⴷⵓⴷ ⵏⵏⴻⵖ ⵓⵍⴰ ⵉ ⵎⴰⵔⵔⴰ ⵍⴳⴻⵏⵙ ⵏ ⵜⴻⵎⵎⵓⵔⵜ.
7 ⵛⴻⴽ, ⴰ ⵙⵉⴷⵉ ⵉⵏⵓ, ⵖⴰⵔⴻⴽ ⵜⴰⵙⴻⴳⴷⴰ, ⵎⴰⵛⴰ ⵏⴻⵛⵛⵉⵏ ⵖⴰⵔⵏⴻⵖ ⵍⴻⵃⵢⴰ ⴷⴻⴳ ⵓⵖⴻⵎⴱⵓⴱ, ⴰⵎ ⵎⴰⵎⵎⴻⵛ ⵜⴻⴵⴰ ⴰⵙⵙ-ⴰ, ⵖⴰⵔ ⵉⵔⵢⴰⵣⴻⵏ ⵏ ⵢⴰⵀⵓⴷⴰ ⴷ ⵉⵎⴻⵣⴷⴰⵖ ⵏ ⵓⵔⵛⴰⵍⵉⵎ ⴷ ⵎⴰⵔⵔⴰ ⵉⵙⵔⴰⵉⵍ, ⵖⴰⵔ ⵢⵉⵏⵏⵉ ⵢⵓⴷⵙⴻⵏ ⴷ ⵢⵉⵏⵏⵉ ⵉⴳⴳⵯⴻⵊⴻⵏ ⴷⵉ ⵎⴰⵔⵔⴰ ⵜⵉⵎⵎⵓⵔⴰ ⵎⴰⵏⵉ ⵅⴰⵙⴻⵏ ⵜⵓⵥⵥⵍⴻⴷ ⵛⴻⴽ ⴷⵉ ⵙⵙⵉⴱⴱⴻⵜ ⵏ ⵍⴻⵖⴷⴰⵔ ⵏⵙⴻⵏ ⵉ ⵣⵉ ⵛⴻⴽ ⵖⴹⴰⵔⴻⵏ.
8 ⴰ ⵙⵉⴷⵉ, ⴷⴰⵢⵏⴻⵖ ⵍⴻⵃⵢⴰ ⴷⴻⴳ ⵓⵖⴻⵎⴱⵓⴱ ⵏⵏⴻⵖ, ⴰⵇⴰ-ⵜ ⴷⴻⴳ ⵉⵊⴻⴵⵉⴷⴻⵏ ⵏⵏⴻⵖ ⴷⵉ ⵍⵃⵓⴽⴽⴰⵎ ⵏⵏⴻⵖ ⴷⴻⴳ ⵉⴱⴰⴱⴰⵜⴻⵏ ⵏⵏⴻⵖ ⵎⴰⵖⴰⵔ ⵏⴻⵛⵛⵉⵏ ⵏⴻⵅⴹⴰ ⴰⴽⵉⴷⴻⴽ.
9 ⵖⴰⵔ ⵙⵉⴷⵉ ⵉⵏⵓ, ⴰⵔⴻⴱⴱⵉ ⵏⵏⴻⵖ, ⴰⵔⵔⴻⵃⵎⴻⵜ ⴷ ⵡⴻⵖⴼⴰⵔ, ⵡⴰⵅⵅⴰ ⵏⴻⵛⵛⵉⵏ ⵏⵖⴻⵡⵡⴻⵖ ⵅⴰⵙ.
10 ⵡⴰⵔ ⵏⴻⵙⵍⵉ ⵉ ⵜⵎⵉⵊⵊⴰ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵎⴰⵃⴻⵏⴷ ⴰⴷ ⵏⵓⵢⵓⵔ ⴷⵉ ⵍⵇⴰⵡⴰⵏⵉⵏ ⵏⵏⴻⵙ ⵏⵏⵉ ⵉ ⴷ ⴰⵏⴻⵖ ⵉⵡⵛⴰ ⵙ ⵓⴼⵓⵙ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⵉⵏⴰⴱⵉⵢⵢⴻⵏ.
11 ⵎⴰⵔⵔⴰ ⵉⵙⵔⴰⵉⵍ ⵜⵓⵖⴰ ⵉⵜⵜⵄⴻⴷⴷⴰ ⵅ ⵛⵛⴰⵔⵉⵄⴰ ⵏⵏⴻⵛ ⵓ ⵉⵜⵜⴻⴼⴼⴻⵖ ⵣⴻⴳ ⵡⴻⴱⵔⵉⴷ ⵎⴰⵃⴻⵏⴷ ⵡⴰⵔ ⵉⵜⵜⴻⵙⵍⵉ ⵉ ⵜⵎⵉⵊⵊⴰ ⵏⵏⴻⵛ. ⵓ ⴰⵎⵎⵓ ⵉ ⵅⴰⵏⴻⵖ ⵜᵉⵜⵜⵡⴰⵣⴻⴵⴻⵄ ⵏⵏⴻⵄⵍⴻⵜ ⵉ ⵉⵜⵜⵡⴰⴹⴻⵎⵏⴻⵏ ⵙ ⵜⵊⴰⴵⵉⵜ ⵉ ⵉⵜⵜⵡⴰⵔⵉⵏ ⴷⵉ ⵛⵛⴰⵔⵉⵄⴰ ⵏ ⵎⵓⵙⴰ, ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ, ⵎⵉⵏⵣⵉ ⵏⴻⵛⵛⵉⵏ ⵏⴻⵅⴹⴰ ⴰⴽⵉⴷⴻⵙ.
12 ⵏⴻⵜⵜⴰ ⵉⴳⴳⴰ ⴰⵡⴰⵍⴻⵏ ⵏⵏⴻⵙ ⵜⵜⴱⴻⴷⴷⴰⵏ, ⴰⵡⴰⵍⴻⵏ ⵏⵏⵉ ⵉⵙⵙⵉⵡⴻⵍ ⴰⴽⵉⴷⵏⴻⵖ ⵓ ⴰⴽ-ⴷ ⵍⵇⵓⴹⴰⵜ ⵏⵏⴻⵖ ⵏⵏⵉ ⵜⵓⵖⴰ ⵉ ⵅⴰⵏⴻⵖ ⵉⵃⴻⴽⴽⵎⴻⵏ, ⴰⵎ ⴷⴰⵢⵏⴻⵖ ⵉⴳⴳⴰ ⵉⵊⵊ ⵏ ⵍⵖⴰⵔ ⴷ ⴰⵎⴻⵇⵇⵔⴰⵏ ⵉ ⵡⴰⵔ ⵉⵎⵙⴰⵔⴻⵏ ⵄⴻⵎⵎⴰⵔⵚ ⵙⴰⴷⵓ ⵓⵊⴻⵏⵏⴰ, ⴰⵎ ⵎⴰⵎⵎⴻⵛ ⵉ ⵉⵜⵜⵡⴰⴳⴳ ⵉ ⵓⵔⵛⴰⵍⵉⵎ.
13 ⴰⵎ ⵎⴰⵎⵎⴻⵛ ⵜⵓⵔⴰ ⴷⵉ ⵛⵛⴰⵔⵉⵄⴰ ⵏ ⵎⵓⵙⴰ, ⴰⵎⵎⵓ ⵢⵓⵙⴰ-ⴷⴷ ⵅⴰⵏⴻⵖ ⵎⴰⵔⵔⴰ ⵍⵖⴰⵔ ⵏⵏⵉ. ⵓ ⵏⴻⵛⵛⵉⵏ ⵅⴻⵏⵏⵉ ⵡⴰⵔ ⵏⵣⴰⵡⴻⴳ ⵛⴰ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵎⴰⵃⴻⵏⴷ ⴰⴷ ⵏⵃⴻⵢⵢⴻⴷ ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵓ ⵎⴰⵃⴻⵏⴷ ⴰⴷ ⵏⴰⵔⵣⵓ ⴰⴷ ⵏⴻⴼⵀⴻⵎ ⵜⵉⴷⴻⵜⵜ ⵏⵏⴻⵛ.
14 ⵙⵉⴷⵉ ⵉⵃⴹⴰ ⵍⵖⴰⵔ ⵓⵛⴰ ⵉⵙⵙⴰⵔⵙ ⵉ-ⵜ-ⵉ-ⴷⴷ ⵅⴰⵏⴻⵖ, ⵎⴰⵖⴰⵔ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ ⴷ ⴰⵎⵙⴻⴳⴳⴻⴷ ⴷⵉ ⵎⴰⵔⵔⴰ ⵍⴻⴼⵄⴰⵢⴻⵍ ⵏⵏⴻⵙ ⵏⵏⵉ ⵉⴳⴳⴰ ⵓⵎⵉ ⵡⴰⵔ ⵏⴻⵙⵍⵉ ⵖⴰⵔ ⵜⵎⵉⵊⵊⴰ ⵏⵏⴻⵙ.
15 ⵓ ⵍⴻⵅⵅⵓ, ⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⵖ, ⵡⴻⵏⵏⵉ ⵉⵙⵙⵓⴼⴼⵖⴻⵏ ⵍⴳⴻⵏⵙ ⵏⵏⴻⵛ ⵣⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵙ ⵢⵉⵊⵊ ⵏ ⵓⴼⵓⵙ ⵉⵊⴻⵀⴷⴻⵏ ⵓ ⵡⴻⵏⵏⵉ ⵉⴳⴳⵉⵏ ⵉ ⵢⵉⵅⴻⴼ ⵏⵏⴻⵙ ⵉⵊⵊ ⵏ ⵢⵉⵙⴻⵎ, ⴰⵎ ⵎⴰⵎⵎⴻⵛ ⵉⴵⴰ ⴰⵍ ⴰⵙⵙ-ⴰ. ⵏⴻⵛⵛⵉⵏ ⵏⴻⵅⴹⴰ ⵓ ⵏⴻⴳⴳⴰ ⵍⵖⴰⵔ.
16 ⴰ ⵙⵉⴷⵉ ⵉⵏⵓ, ⵣⵉ ⵙⵙⵉⴱⴱⴻⵜ ⵏ ⵜⵙⴻⴳⴷⴰ ⵏⵏⴻⵛ, ⵙⵃⴻⵢⵢⴻⴷ ⴰⵖⴹⴰⴱ ⵏⵏⴻⵛ ⴷ ⵡⴻⵙⵄⴰⵔ ⵏⵏⴻⵛ ⵅ ⵜⴻⵏⴷⵉⵏⵜ ⵏⵏⴻⵛ ⵓⵔⵛⴰⵍⵉⵎ, ⵅ ⵡⴻⴷⵔⴰⵔ ⵏⵏⴻⵛ ⵉⵇⴻⴷⴷⵙⴻⵏ. ⵎⴰⵖⴰⵔ ⵣⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵏⵏⴻⵖ ⴷ ⵍⵎⵓⵄⵚⵉⵢⵢⴻⵜ ⵏ ⵍⴻⵊⴷⵓⴷ ⵏⵏⴻⵖ ⵜⴻⴷⵡⴻⵍ ⵓⵔⵛⴰⵍⵉⵎ ⴷ ⵍⴳⴻⵏⵙ ⵏⵏⴻⵛ ⴷ ⵍⵄⴰⵔ ⵉ ⵎⴰⵔⵔⴰ ⵉⵏⵏⵉ ⴷ ⴰⵏⴻⵖ ⴷⴷ-ⵉⵏⵏⴹⴻⵏ.
17 ⵓ ⵍⴻⵅⵅⵓ, ⴰ ⴰⵔⴻⴱⴱⵉ ⵏⵏⴻⵖ, ⵙⴻⵍ ⵖⴰⵔ ⵜⵥⴰⴵⵉⵜ ⵏ ⵓⵎⵙⴻⵅⵅⴰⵔ ⵏⵏⴻⵛ ⵓ ⵖⴰⵔ ⵓⵣⴰⵡⴻⴳ ⵏⵏⴻⵙ, ⴻⵊⵊ ⵓⴷⴻⵎ ⵏⵏⴻⵛ ⴰⴷ ⵢⴻⴳⴳ ⵜⴰⴼⴰⵡⵜ ⴷⵉ ⵟⵟⵡⴻⵄ ⵏⵏⴻⵛ, ⴰ ⵙⵉⴷⵉ ⵉⵏⵓ, ⵅ ⵣⵣⴰⵡⴻⵛⵜ ⵏⵏⴻⵛ ⵉⵇⴻⴷⴷⵙⴻⵏ, ⵜⴻⵏⵏⵉ ⵉⴷⴻⵡⵍⴻⵏ ⴷ ⵍⵅⴰⵔⴱⴻⵜ.
18 ⴻⵡⵛ ⴰⵎⴻⵣⵣⵓⵖ ⵏⵏⴻⵛ, ⴰ ⴰⵔⴻⴱⴱⵉ, ⵙⴻⵍ. ⴰⵔⵣⴻⵎ ⵜⵉⵟⵟⴰⵡⵉⵏ ⵏⵏⴻⵛ ⵓ ⵅⵣⴰⵔ ⵍⵅⵉⵔⴱⴰⵜ ⴷ ⵜⴻⵏⴷⵉⵏⵜ ⵏⵏⵉ ⵉⵜⵜⵡⴰⵍⴰⵖⴰⵏ ⵙ ⵢⵉⵙⴻⵎ ⵏⵏⴻⵛ, ⵎⵉⵏⵣⵉ ⵏⴻⵛⵛⵉⵏ ⵡⴰⵔ ⵏⴻⵡⴹⵉ ⵣⵣⴰⵜ ⵉ ⵡⵓⴷⴻⵎ ⵏⵏⴻⵛ ⵎⴰⵃⴻⵏⴷ ⴰⴷ ⵏⵣⴰⵡⴻⴳ ⵅ ⵓⵙⴷⴰⵀⴻⴵⵉ ⵏ ⵜⵙⴻⴳⴷⴰ ⵏⵏⴻⵖ, ⵎⴰⵛⴰ ⵅ ⵓⵙⴷⴰⵀⴻⴵⵉ ⵏ ⴰⵔⵔⴰⵃⵎⴻⵜ ⵏⵏⴻⵛ ⵜⴰⵎⴻⵇⵇⵔⴰⵏⵜ.
19 ⴰ ⵙⵉⴷⵉ ⵉⵏⵓ, ⵙⴻⵍ! ⴰ ⵙⵉⴷⵉ ⵉⵏⵓ, ⵖⴼⴰⵔ! ⴰ ⵙⵉⴷⵉ ⵉⵏⵓ, ⵃⴹⴰ ⵓⵛⴰ ⴻⴳⴳ, ⵡⴰⵔ ⵜⵄⴻⵟⵟⴰⵍ ⵛⴰ, ⴷⵉ ⵟⵟⵡⴻⵄ ⵏ ⵢⵉⵅⴻⴼ ⵏⵏⴻⵛ, ⴰ ⴰⵔⴻⴱⴱⵉ ⵉⵏⵓ, ⵎⴰⵖⴰⵔ ⵜⴰⵏⴷⵉⵏⵜ ⵏⵏⴻⵛ ⴷ ⵍⴳⴻⵏⵙ ⵏⵏⴻⵛ ⵜⵜⵡⴰⵍⴰⵖⴰⵏ ⵙ ⵢⵉⵙⴻⵎ ⵏⵏⴻⵛ.”
20 ⴰⵎ ⵜⵓⵖⴰ ⵙⵙⴰⵡⴰⵍⴻⵖ ⵄⴰⴷ ⵓ ⵜⵜⵥⴰⴵⵉⵖ ⵓ ⵏⴻⵄⵄⵎⴻⵖ ⵙ ⴷⴷⵏⵓⴱ ⵉⵏⵓ ⴷ ⴷⴷⵏⵓⴱ ⵏ ⵍⴳⴻⵏⵙ ⵉⵏⵓ ⵉⵙⵔⴰⵉⵍ ⵓ ⵜⵜⵣⴻⴵⵄⴻⵖ ⴰⵣⴰⵡⴻⴳ ⵉⵏⵓ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⴷⵉ ⵟⵟⵡⴻⵄ ⵏ ⵡⴻⴷⵔⴰⵔ ⵉⵇⴻⴷⴷⵙⴻⵏ ⵏ ⴰⵔⴻⴱⴱⵉ ⵉⵏⵓ,
21 ⴰⵎ ⵜⵓⵖⴰ ⵙⵙⴰⵡⴰⵍⴻⵖ ⵄⴰⴷ ⴰⵎⵎⵓ, ⵜⵜⵥⴰⴵⵉⵖ, ⵢⵓⵙⴰ-ⴷⴷ ⵡⴻⵔⵢⴰⵣ ⵊⵉⴱⵔⵉⵍ ⵏⵏⵉ ⵥⵔⵉⵖ ⴷⴻⴳ ⵓⵎⴻⵣⵡⴰⵔⵓ ⴷⵉ ⵍⴻⵡⵃⵉⵢ, ⵉⴹⵡⴰ-ⴷⴷ ⵣⴻⴳ ⵓⵊⴻⵏⵏⴰ ⵖⴰⵔⵉ. ⵉⵃⴰⴷⴰ ⴰⵢⵉ ⵖⴰⵔ ⵍⵡⴻⵇⵜ ⵏ ⵜⴻⵡⵀⵉⴱⵜ ⵏ ⵜⵎⴻⴷⴷⵉⵜ.
22 ⵏⴻⵜⵜⴰ ⵉⵙⵙⴻⴼⵀⴻⵎ ⵓ ⵉⵙⵙⵉⵡⴻⵍ ⴰⴽⵉⴷⵉ, ⵉⵏⵏⴰ:
“ⴷⴰⵏⵉⵢⴰⵍ, ⵏⴻⵛⵛ ⴼⴼⵖⴻⵖ-ⴷⴷ ⵖⴰⵔ ⵍⵡⴻⵇⵜ-ⴰ ⵎⴰⵃⴻⵏⴷ ⴰⴷ ⵛⴻⴽ ⵙⵙⴰⵔⴳⴱⴻⵖ ⵅ ⵍⵎⴻⵄⵏⴰ.
23 ⵖⴰⵔ ⵓⵎⴻⵣⵡⴰⵔⵓ ⵏ ⵓⵣⴰⵡⴻⴳ ⵏⵏⴻⵛ ⵉⴼⴼⴻⵖ-ⴷⴷ ⵢⵉⵊⵊ ⵏ ⵡⴰⵡⴰⵍ ⵓ ⵏⴻⵛⵛ ⵓⵙⵉⵖ-ⴷⴷ ⵃⵉⵎⴰ ⴰⴷ ⴰⵛ ⵜ ⵏⵏⵉⵖ, ⵎⴰⵖⴰⵔ ⵛⴻⴽ ⴷ ⵉⵊⵊ ⵏ ⵡⴻⵔⵢⴰⵣ ⵉⵄⵉⵣⵣⴻⵏ ⴰⵟⵟⴰⵙ. ⴼⵀⴻⵎ ⴰⵡⴰⵍ-ⴰ ⵓ ⴰⵔⵣⵓ ⵍⴻⴼⵀⴰⵎⴻⵜ ⴷⵉ ⵍⴻⵡⵃⵉⵢ-ⴰ.
24 ⵜⵜⵡⴰⴳⴳⴻⵏⵜ ⵙⴻⴱⵄⵉⵏ ⵏ ⵙⵙⵉⵎⴰⵏⴰⵜ ⵅ ⵍⴳⴻⵏⵙ ⵏⵏⴻⵛ ⵓ ⵅ ⵜⴻⵏⴷⵉⵏⵜ ⵏⵏⴻⵛ ⵉⵇⴻⴷⴷⵙⴻⵏ, ⵃⵉⵎⴰ ⴰⴷ ⵉⵜⵜⵡⴰⵙⵙⴱⴻⴷⴷ ⵓⵄⴻⴷⴷⵓ ⵓ ⴰⴷ ⵉⵜⵜⵡⴰⵛⴻⵎⵎⴻⵄ ⴷⴷⴻⵏⴱ ⵓ ⴰⴷ ⵜᵉⵜⵜⵡⴰⵚⵍⴻⵃ ⵉ ⵍⵎⵓⵄⵚⵉⵢⵢⴻⵜ ⵓ ⵃⵉⵎⴰ ⴰⴷ ⵜᵉⵜⵜⵡⴰⵡⵉ ⵜⵙⴻⴳⴷⴰ ⵓ ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵍⴻⵡⵃⵉⵢ ⴷ ⵓⵏⴰⴱⵉⵎ ⵓ ⵃⵉⵎⴰ ⴰⴷ ⵉⵜⵜⵡⴰⴷⵀⴻⵏ ⵎⵉⵏ ⵉⴵⴰⵏ ⵉⵇⴻⴷⴷⵙⴻⵏ ⵇⴰⵄ.
25 ⵙⵙⴻⵏ ⵓ ⴼⵀⴻⵎ, ⴰⵇⴰ ⵣⴻⴳ ⵡⴰⵎⵉ ⴷⴷ-ⵉⴼⴼⴻⵖ ⵡⴰⵡⴰⵍ ⵃⵉⵎⴰ ⴰⴷ ⵄⴻⴷⵍⴻⵏ ⵓ ⴰⴷ ⴱⵏⴰⵏ ⵓⵔⵛⴰⵍⵉⵎ ⴰⵍ ⴰⵎⴻⴷⵀⵓⵏ, ⵎⵉⵏ ⵉⵅⵙ ⴰⴷ ⵢⵉⵏⵉ ⵍⵎⴰⵙⵉⵃ, ⵍⵃⴰⴽⴻⵎ, ⴰⵇⴰ ⵙⴻⴱⵄⴰ ⵏ ⵙⵙⵉⵎⴰⵏⴰⵜ, ⵓ ⵜⵏⴰⵢⴻⵏ ⵓ-ⵙⴻⵜⵜⵉⵏ ⵏ ⵙⵉⵎⴰⵏⴰⵜ ⴰⴷ ⵜⴻⵇⵇⵉⵎ ⵜⴻⵏⴷⵉⵏⵜ ⵜᵉⵜⵡⴰⵄⴻⴷⴻⵍ ⵓ ⴰⴷ ⵜᵉⵜⵜⵡⴰⴱⵏⴰ ⵓⵔⵛⴰⵍⵉⵎ ⵄⴰⵡⴻⴷ ⴰⴽ-ⴷ ⵡⴰⵣⵣⴰⵢ ⴷ ⵡⵓⵔⴻⵖ ⵉⵇⵇⵓⵔⴻⵏ, ⵄⴰⴷ ⴷⵉ ⵍⴻⵃⵚⴰⵔⴻⵜ ⵏ ⵍⴻⵡⵇⴰⵜ ⵢⴻⵡⵄⴰⵔⴻⵏ.
26 ⴰⵡⴰⵔⵏⵉ ⵜⵏⴰⵢⴻⵏ ⵓ-ⵙⴻⵜⵜⵉⵏ ⵏ ⵙⵙⵉⵎⴰⵏⴰⵜ ⵏⵏⵉ ⴰⴷ ⵉⵜⵜⵡⴰⴽⴽⴻⵙ ⵓⵎⴻⴷⵀⵓⵏ ⵓ ⵡⴰⵔ ⵖⴰⵔⴻⵙ ⵉⵜⵜⵉⵍⵉ ⵡⴰⵍⵓ. ⵓ ⵜⴰⵏⴷⵉⵏⵜ ⴷ ⵣⵣⴰⵡⴻⵛⵜ ⵉⵇⴻⴷⴷⵙⴻⵏ ⴰⴷ ⵜⵜⵡⴰⵔⴻⴷⴷⴵⴻⵏⵜ ⵙ ⵢⵉⵊⵊ ⵏ ⵍⴳⴻⵏⵙ ⵏ ⵉⵊⵊ ⵏ ⵍⵃⴰⴽⴻⵎ ⵡⴻⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⵓ ⵜⴰⵏⴻⴳⴳⴰⵔⵓⵜ ⵏⵏⴻⵙ ⴰⴷ ⵜⵉⵍⵉ ⴷⵉ ⵙⵙⴻⵃⵍⴻⵜ ⵓⵛⴰ ⴰⴷ ⴷⵉⵏ ⵢⵉⵍⵉ ⵓⵎⴻⵏⵖⵉ ⴰⵍ ⴰⵏⴻⴳⴳⴰⵔ, ⴰⵔⴻⴷⴷⴻⴵ ⵏⵏⵉ ⴰⵇⴰ ⵢⵓⵔⴰ ⴰⴷ ⵢⵉⵍⵉ.
27 ⵏⴻⵜⵜⴰ ⴰⴷ ⵉⵙⵙⴻⴷⵇⴻⵍ ⵍⵄⴰⵀⴷ ⵉ ⵡⴰⵟⵟⴰⵙ ⵉ ⵢⵉⵊⵊ ⵏ ⵍⵎⵉⵊⴰⵍ ⵏ ⵉⵛⵜ ⵏ ⵙⵙⵉⵎⴰⵏⴰ ⵓ ⴷⴻⴳ ⵡⴻⵣⵢⴻⵏ ⵏ ⵙⵙⵉⵎⴰⵏⴰ ⴰⴷ ⵉⵙⵙⴱⴻⴷⴷ ⵜⴰⵖⴰⵔⵚⵜ ⴷ ⵜⴻⵡⵀⵉⴱⵜ ⵏ ⵍⵖⵉⴵⴻⵜ ⵓ ⵅ ⵡⴰⴼⵔⵉⵡ ⵏ ⵏⵏⵄⴰⵡⴰⵜ ⴰⴷ ⴷⴷ-ⵢⴰⵙ ⵉⵊⵊ ⵏ ⵓⵎⵜⴻⵃⵃⴰⵢ ⴰⵍ ⵖⴰ ⵉⵜⵜⵡⴰⴼⴰⵔⵔⴻⵖ ⵍⴻⵃⴽⴰⵎ ⵉ ⵢⵓⵔⵉⵏ ⵅ ⵡⴻⵏⵏⵉ ⵉⵜⵜⵡⴰⵜⴻⵃⵃⴰⵏ.