6
ⴷⴰⵏⵉⵢⴰⵍ ⴷⴻⴳ ⵡⴻⵃⴼⵓⵔ ⵏ ⵉⵢⵔⴰⴷⴻⵏ
1 ⴷⴰⵔⵉⵢⵓⵙ, ⴰⵎⴰⴷⴰⵢ, ⵉⴽⵙⵉ ⵜⴰⴳⴻⵍⴷⴰ ⵓⵎⵉ ⵜⵓⵖⴰ ⵖⴰⵔⴻⵙ ⵄⵍⴰⵃⴰⵍ ⵜⵏⴰⵢⴻⵏ ⵓ-ⵙⴻⵜⵜⵉⵏ ⵏ ⵉⵙⴻⴳⴳⵯⵓⵙⴰ.
2 ⵢⴰⵔⴹⴰ ⴷⴰⵔⵉⵢⵓⵙ ⵃⵉⵎⴰ ⴰⴷ ⵢⴰⵍⴻⵇⵇⴻⵎ ⵎⵢⴰ ⵓ-ⵄⵉⵛⵔⵉⵏ ⵏ ⵉⵊⴻⴵⵉⴷⴻⵏ ⵙⴰⴷⵓ ⵓⴼⵓⵙ ⵏⵏⴻⵙ ⵉⵏⵏⵉ ⵉ ⵖⴰ ⵉⵃⴻⴽⴽⵎⴻⵏ ⵎⴰⵏⵉ ⵎⴰ ⴷⵉ ⴽⵓⵍ ⵜⴳⴻⵍⴷⵉⵜ.
3 ⵏⴻⵜⵜⴰ ⵉⴳⴳⴰ ⵅⴰⵙⴻⵏ ⵜⵍⴰⵜⴰ ⵏ ⵍⵃⵓⴽⴽⴰⵎ ⵉⵎⴻⵇⵇⵔⴰⵏⴻⵏ. ⵜⵓⵖⴰ ⴷⴰⵏⵉⵢⴰⵍ ⵉⵊⵊⴻⵏ ⵣⵣⴰⵢⵙⴻⵏ. ⵜⵓⵖⴰ ⵉⵜⵜⵅⴻⵚⵚⴰ ⵉ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵓⴼⵓⵙ ⵏ ⵓⵊⴻⴵⵉⴷ, ⴰⴷ ⴰⵙⴻⵏ ⴳⴳⴻⵏ ⵍⴻⵃⵙⴰⴱ, ⵃⵉⵎⴰ ⴰⵊⴻⴵⵉⴷ ⵡⴰⵔ ⵜ ⵜⵍⴻⵇⵇⴻⴼ ⵜⵅⴻⵙⵙⴰⵔⵜ.
4 ⵅⴻⵏⵏⵉ ⵜⵓⵖⴰ ⴷⴰⵏⵉⵢⴰⵍ ⵉⵄⴻⴷⴷⵓ ⵍⵃⵓⴽⴽⴰⵎ ⵉⵎⴻⵇⵇⵔⴰⵏⴻⵏ ⵏⵏⵉ ⴷ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵓⴼⵓⵙ ⵏ ⵓⵊⴻⴵⵉⴷ, ⵎⵉⵏⵣⵉ ⵜⵓⵖⴰ ⴷⴰⵢⴻⵙ ⵉⵊⵊ ⵏ ⴱⵓⵃⴱⴻⵍ ⵉⵛⵏⴰ ⴰⵟⵟⴰⵙ, ⵓ ⴰⵊⴻⴵⵉⴷ ⵜⵓⵖⴰ ⵉⵜⵜⵅⴰⵔⵔⴻⵚ, ⵃⵉⵎⴰ ⴰⴷ ⵜ ⵢⴻⴳⴳ ⵅ ⵎⴰⵔⵔⴰ ⵜⴰⴳⴻⵍⴷⵉⵜ.
5 ⵅⴻⵏⵏⵉ ⴰⵔⵣⵓⵏ ⵍⵃⵓⴽⴽⴰⵎ ⵉⵎⴻⵇⵇⵔⴰⵏⴻⵏ ⴷ ⵉⵊⴻⴵⵉⴷⴻⵏ ⵏⵏⵉ ⵉⵛⵜ ⵏ ⵙⵙⵉⴱⴱⴻⵜ ⵎⴰⵃⴻⵏⴷ ⴰⴷ ⵜⵜⴰⵀⵎⴻⵏ ⴷⴰⵏⵉⵢⴰⵍ ⴷⵉ ⵜⵎⴻⵙⵍⴰⵛⵜ ⵏ ⵜⴳⴻⵍⴷⵉⵜ, ⵎⴰⵛⴰ ⵏⵉⵜⵏⵉ ⵡⴰⵔ ⵓⴼⵉⵏ ⵓⵍⴰ ⴷ ⵉⵛⵜ ⵏ ⵙⵙⵉⴱⴱⴻⵜ ⵏⵉⵖ ⵍⵖⴻⵛⵛ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⴷ ⴰⵎⵜⵉⵇⵇⵉ ⵓ ⵡⴰⵔ ⴷⴰⵢⴻⵙ ⵉⵜⵜⵡⵉⴼ ⵍⴻⵄⴳⴻⵣ ⵏⵉⵖ ⵓⵍⴰ ⴷ ⵉⵛⵜ ⵏ ⵊⵊⵓⵔⴻⵜ ⵏ ⵜⵎⴻⵙⵍⴰⵢⵉⵏ ⵜⵉⵄⴻⴼⴼⴰⵏⵉⵏ.
6 ⵅⴻⵏⵏⵉ ⵏⵏⴰⵏ ⵉⵔⵢⴰⵣⴻⵏ ⵏⵏⵉ: “ⵡⴰⵔ ⵏⴻⵜⵜⵉⴼ ⵓⵍⴰ ⴷ ⵉⵛⵜ ⵏ ⵙⵙⵉⴱⴱⴻⵜ ⵉ ⵜⵜⵓⵀⵎⴻⵜ ⵅ ⴷⴰⵏⵉⵢⴰⵍ-ⴰ, ⵎⵖⵉⵔ ⵎⴰⵍⴰ ⵏⵓⴼⴰ ⵉ-ⵜⵜ ⴷⵉ ⵜⵎⴻⵙⵍⴰⵛⵜ ⵏ ⵛⵛⴰⵔⵉⵄⴰ ⵏ ⴰⵔⴻⴱⴱⵉ ⵏⵏⴻⵙ.”
7 ⵍⴻⵅⴷⴻⵏⵏⵉ ⵎⵓⵏⴻⵏ ⵍⵃⵓⴽⴽⴰⵎ ⵉⵎⴻⵇⵇⵔⴰⵏⴻⵏ ⴷ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵓⴼⵓⵙ ⵏ ⵓⵊⴻⴵⵉⴷ, ⵓⵙⵉⵏ-ⴷⴷ ⵀⴰⵊⴰⵏ ⵉ ⵓⵊⴻⴵⵉⴷ, ⵏⵏⴰⵏ ⴰⵙ: “ⴰ ⴰⵊⴻⴵⵉⴷ ⴷⴰⵔⵉⵢⵓⵙ, ⴷⴷⴰⵔ ⵉ ⵍⴻⴱⴷⴰ!
8 ⵎⵛⴰⵡⴰⵔⴻⵏ ⵎⴰⵔⵔⴰ ⵍⵃⵓⴽⴽⴰⵎ ⵉⵎⴻⵇⵇⵔⴰⵏⴻⵏ ⵏ ⵜⴳⴻⵍⴷⵉⵜ: ⵉⵎⴹⴻⴱⴱⴰⵔⴻⵏ ⴷ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵉ ⵓⵊⴻⴵⵉⴷ ⴷ ⵉⵎⵛⴰⵡⴰⵔⴻⵏ ⴷ ⵍⵡⵓⵍⴰⵜ, ⵃⵉⵎⴰ ⴰⵊⴻⴵⵉⴷ ⴰⴷ ⴷⴷ-ⵉⵙⵙⵓⴼⴼⴻⵖ ⵉⵊⵊ ⵏ ⵍⵓⵎⵓⵔ ⴷ ⵉⵊⵊ ⵏ ⵍⴻⵃⴽⴰⵎ ⵉⵏⴻⵀⵀⴰⵏ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵉⵇⴻⴷⴷⵎⴻⵏ ⵉⵛⵜ ⵏ ⵜⵓⵜⵔⴰ ⵉ ⵢⵉⵊⵊ ⵏ ⴰⵔⴻⴱⴱⵉ ⵏⵉⵖ ⵉ ⵢⵉⵊⵊ ⵏ ⴱⵏⴰⴷⴻⵎ ⵎⵖⵉⵔ ⵉ ⵛⴻⴽ, ⴰ ⴰⵊⴻⴵⵉⴷ, ⴷⵉ ⵍⵎⵉⵊⴰⵍ ⵏ ⵜⵍⴰⵜⵉⵏ ⵏ ⵡⵓⵙⵙⴰⵏ, ⴰⴷ ⵉⵜⵜⵡⴰⵎⵎⴻⵏⴹⴰⵔ ⴷⵉ ⵜⴻⵙⵔⴰⴼⵜ ⵏ ⵡⴰⵢⵔⴰⴷⴻⵏ.
9 ⵅⴻⵏⵏⵉ ⵍⴻⵅⵅⵓ, ⴰ ⴰⵊⴻⴵⵉⴷ, ⵙⴻⴽⴽⴰⵔ ⵍⵓⵎⵓⵔ ⵓ ⵡⴻⵇⵇⴻⵄ ⵜⵉⵔⴰ, ⵃⵉⵎⴰ ⵡⴰⵔ ⵉⵜⵜⵡⴰⴱⴻⵟⵟⴻⵍ ⵍⵓⵎⵓⵔ ⵓ ⵡⴰⵔ ⵉⴼⴻⵏⵏⵉ ⴰⵎ ⵎⴰⵎⵎⴻⵛ ⴽⵓⵍ ⵍⵇⴰⵏⵓⵏ ⵏ ⴰⵢⵜ ⵏ ⵎⴰⴷⴰⵢ ⴷ ⴰⵢⵜ ⵏ ⵍⴼⵓⵔⵙ.”
10 ⵙ ⵓⵢⴻⵏⵏⵉ ⵢⵓⵔⴰ ⵓⵊⴻⴵⵉⴷ ⴷⴰⵔⵉⵢⵓⵙ ⵜⵉⵔⴰ ⴷ ⵍⵓⵎⵓⵔ ⵏⵏⵉ ⵙ ⵢⵉⵙⴻⵎ ⵏⵏⴻⵙ.
11 ⵓⵎⵉ ⵉⵙⵙⴻⵏ ⴷⴰⵏⵉⵢⴰⵍ ⴰⵇⴰ ⵜⵉⵔⴰ-ⵢⴰ ⵜᵉⵜⵜⵡⴰⵡⴻⵇⵇⴻⵄ, ⵢⵓⴷⴻⴼ ⵏⴻⵜⵜⴰ ⵖⴰⵔ ⵜⴰⴷⴷⴰⵔⵜ ⵏⵏⴻⵙ. ⵜⵓⵖⴰ ⵜⵉⴱⵓⵔⵊⴰⵜⵉⵏ ⵏ ⵜⵖⵓⵔⴼⴻⵜ ⵏⵏⴻⵙ ⴰⵔⴻⵣⵎⴻⵏⵜ ⵖⴰⵔ ⵓⵔⵛⴰⵍⵉⵎ. ⵏⴻⵜⵜⴰ ⵉⵙⵊⴻⴷ ⴷⵉⵏ ⵅ ⵉⴼⴰⴷⴷⴻⵏ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⴷⴻⴳ ⵡⴰⵙⵙ, ⵉⵥⵥⵓⴵ ⵓ ⵉⵇⴰⴷⴰ ⴰⵔⴻⴱⴱⵉ ⵏⵏⴻⵙ ⴰⵎ ⵎⴰⵎⵎⴻⵛ ⵜⵓⵖⴰ ⵉⵜⵜⴻⴳⴳ ⵇⴱⴻⵍ.
12 ⵍⴻⵅⴷⴻⵏⵏⵉ ⵎⵓⵏⴻⵏ ⵢⴻⵔⵢⴰⵣⴻⵏ ⵏⵏⵉ ⵙ ⵓⵀⴰⵊⵉ ⵓⵛⴰ ⵓⴼⵉⵏ ⴷⴰⵏⵉⵢⴰⵍ ⵉⵜⵜⵥⴰⴵⴰ ⵓ ⵉⵜⵜⵣⴰⵡⴰⴳ ⵉ ⴰⵔⴻⴱⴱⵉ ⵏⵏⴻⵙ.
13 ⵅⴻⵏⵏⵉ ⵓⴷⴼⴻⵏ-ⴷⴷ ⵖⴰⵔⴻⵙ ⵓ ⵙⵙⵉⵡⵍⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ ⵅ ⵍⵓⵎⵓⵔ ⵏ ⵓⵊⴻⴵⵉⴷ: “ⵎⴰ ⵡⴰⵔ ⵜⵡⴻⵇⵇⵄⴻⴷ ⵛⴰ ⵉⵊⵊ ⵏ ⵍⵓⵎⵓⵔ ⴱⴻⵍⵍⵉ ⴽⵓⵍ ⵉⵊⵊⴻⵏ ⵡⴻⵏⵏⵉ, ⴷⵉ ⵍⵎⵉⵊⴰⵍ ⵏ ⵜⵍⴰⵜⵉⵏ ⵏ ⵡⵓⵙⵙⴰⵏ, ⵖⴰ ⵉⵇⴻⴷⴷⵎⴻⵏ ⵉⵛⵜ ⵏ ⵜⵓⵜⵔⴰ ⵉ ⵢⵉⵊⵊ ⵏ ⴰⵔⴻⴱⴱⵉ ⵏⵉⵖ ⵉ ⵢⵉⵊⵊ ⵏ ⴱⵏⴰⴷⴻⵎ ⵎⵖⵉⵔ ⵉ ⵛⴻⴽ, ⴰ ⴰⵊⴻⴵⵉⴷ, ⴰⴷ ⵉⵜⵜⵡⴰⵎⵎⴻⵏⴹⴰⵔ ⴷⵉ ⵜⴻⵙⵔⴰⴼⵜ ⵏ ⵡⴰⵢⵔⴰⴷⴻⵏ?” ⵢⴰⵔⵔⴰ-ⴷⴷ ⵓⵊⴻⴵⵉⴷ, ⵉⵏⵏⴰ: “ⵜⴰⵎⴻⵙⵍⴰⵛⵜ ⵜⴱⴻⴷⴷ ⴰⵎ ⵢⵉⵊⵊ ⵏ ⵍⵇⴰⵏⵓⵏ ⵏ ⴰⵢⵜ ⵏ ⵎⴰⴷⴰⵢ ⴷ ⴰⵢⵜ ⵏ ⵍⴼⵓⵔⵙ ⵏⵏⵉ ⵡⴰⵔ ⵉⴼⴻⵏⵏⵉⵏ.”
14 ⵅⴻⵏⵏⵉ ⴰⵔⵔⵉⵏ-ⴷⴷ, ⵏⵏⴰⵏ ⵣⵣⴰⵜ ⵉ ⵡⵓⴷⴻⵎ ⵏ ⵓⵊⴻⴵⵉⴷ: “ⴷⴰⵏⵉⵢⴰⵍ, ⵉⵊⵊⴻⵏ ⵣⴻⴳ ⵉⵎⴻⵏⴼⵉⵢⵢⴻⵏ ⵣⵉ ⵢⴰⵀⵓⴷⴰ, ⴰⵇⴰ ⵡⴰⵔ ⵛⴻⴽ ⵉⵜⵜⵡⴻⵇⵇⴰⵔ, ⴰ ⴰⵊⴻⴵⵉⴷ, ⵓⵍⴰ ⴷ ⵍⵓⵎⵓⵔ ⵏⵏⵉ ⵜⵡⴻⵇⵇⵄⴻⴷ. ⵏⴻⵜⵜⴰ ⵉⵜⵜⵥⴰⴵⴰ ⵜⵍⴰⵜⴰ ⵏ ⵜⵡⴰⵍⴰⵡⵉⵏ ⴷⴻⴳ ⵡⴰⵙⵙ.”
15 ⵓⵎⵉ ⵉⵙⵍⴰ ⵓⵊⴻⴵⵉⴷ ⴰⵡⴰⵍ-ⴰ, ⵉⵅⴻⵢⵢⴻⵇ ⴰⵟⵟⴰⵙ ⵅ ⵢⵉⵅⴻⴼ ⵏⵏⴻⵙ ⵓⵛⴰ ⵉⴳⴳⴰ ⵅ ⵡⵓⵍ ⵏⵏⴻⵙ ⵎⴰⵃⴻⵏⴷ ⴰⴷ ⵉⴼⴻⴽⴽ ⴷⴰⵏⵉⵢⴰⵍ. ⴰⵍ ⴰⵖⴻⴵⴰⵢ ⵏ ⵜⴼⵓⵛⵜ ⵉⴳⴳⴰ ⵜⵉⵣⴻⵎⵎⴰⵔ ⵏⵏⴻⵙ ⵎⴰⵃⴻⵏⴷ ⴰⴷ ⵜ ⵉⵙⵙⴻⵏⵊⴻⵎ.
16 ⵅⴻⵏⵏⵉ ⵎⵓⵏⴻⵏ-ⴷⴷ ⵢⴻⵔⵢⴰⵣⴻⵏ ⵏⵏⵉ ⵙ ⵓⵀⴰⵊⵉ ⵖⴰⵔ ⵓⵊⴻⴵⵉⴷ, ⵏⵏⴰⵏ ⵉ ⵓⵊⴻⴵⵉⴷ: “ⴰ ⴰⵊⴻⴵⵉⴷ, ⵜⴻⵙⵙⵏⴻⴷ ⴰⵇⴰ-ⵜ ⴷ ⵉⵊⵊ ⵏ ⵍⵇⴰⵏⵓⵏ ⵏ ⴰⵢⵜ ⵏ ⵎⴰⴷⴰⵢ ⴷ ⴰⵢⵜ ⵏ ⵍⴼⵓⵔⵙ ⵓ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⴱⴻⴷⴷⴻⵍ ⵓⵍⴰ ⴷ ⵉⵊⵊ ⵍⵓⵎⵓⵔ ⵏⵉⵖ ⴷ ⵍⴻⵃⴽⴰⵎ ⵏⵏⵉ ⴷⴷ-ⵉⴼⴼⵖⴻⵏ ⵣⴻⴳ ⵓⵊⴻⴵⵉⴷ.”
17 ⵅⴻⵏⵏⵉ ⵢⵓⵎⵓⵔ ⵓⵊⴻⴵⵉⴷ ⴰⴷ ⵏⴻⴷⵀⴻⵏ ⴷⴰⵏⵉⵢⴰⵍ ⵣⵣⴰⵜⴻⵙ ⵓ ⵏⴹⴰⵔⴻⵏ ⵜ ⴷⵉ ⵜⴻⵙⵔⴰⴼⵜ ⵏ ⵡⴰⵢⵔⴰⴷⴻⵏ. ⴰⵊⴻⴵⵉⴷ ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⵉ ⴷⴰⵏⵉⵢⴰⵍ: “ⴰⵔⴻⴱⴱⵉ ⵏⵏⴻⵛ, ⵡⴻⵏⵏⵉ ⵉ ⵜⵡⴻⵇⵇⴰⵔⴻⴷ ⵍⴻⴱⴷⴰ, ⴰⴷ ⵛⴻⴽ ⵉⴼⴻⴽⴽ!”
18 ⵉⵡⵢⴻⵏ-ⴷⴷ ⵉⵊⵊ ⵏ ⵡⴻⵥⵔⵓ ⵓⵛⴰ ⵙⵙⴰⵔⵙⴻⵏ ⵜ ⵅ ⵓⵇⴻⵎⵎⵓⵎ ⵏ ⵜⴻⵙⵔⴰⴼⵜ ⵓⵛⴰ ⵉⵛⴻⵎⵎⴻⵄ ⵉ-ⵜ ⵓⵊⴻⴵⵉⴷ ⵙ ⵜⵅⴰⴷⴻⵏⵜ ⵏⵏⴻⵙ ⵓⵍⴰ ⵙ ⵜⵅⴰⴷⴻⵏⵜ ⵏ ⴰⵢⵜ ⵏ ⵊⵊⴻⵀⴷ ⵏⵏⴻⵙ, ⵃⵉⵎⴰ ⵡⴰⵔ ⵉⵜⵜⴱⴻⴷⴷⵉⵍ ⴰⵔⵔⴰⵢ ⵅ ⴷⴰⵏⵉⵢⴰⵍ.
19 ⵅⴻⵏⵏⵉ ⵢⵓⵢⵓⵔ ⵓⵊⴻⴵⵉⴷ ⵖⴰⵔ ⵍⴻⵇⵚⴰⵔ ⵏⵏⴻⵙ. ⵉⵙⵙⴻⵄⴷⵓ ⴵⵉⵍⴻⵜ ⵏⵏⵉ ⴷⴻⴳ ⵓⵥⵓⵎⵎⵉ ⵓ ⵡⴰⵔ ⵢⴻⵊⵊⵉ ⴰⴷ ⴰⵙ ⴷⴷ-ⴰⵡⵢⴻⵏ ⴰⴼⴰⵔⵔⴻⵊ ⵓⵛⴰ ⵉⴹⵡⴰ ⵣⵣⴰⵢⴻⵙ ⵢⵉⴹⴻⵚ.
20 ⵣⵉⵛ ⵖⴰⵔ ⵚⵚⴱⴻⵃ ⵖⴰⵔ ⵡⴻⵏⵇⴰⵔ ⵏ ⵜⴼⴰⵡⵜ, ⵉⴽⴽⴰⵔ-ⴷⴷ ⵓⵊⴻⴵⵉⴷ, ⵉⵜⵜⴰⵥⵥⴻⵍ ⵖⴰⵔ ⵜⴻⵙⵔⴰⴼⵜ ⵏ ⵡⴰⵢⵔⴰⴷⴻⵏ.
21 ⵓⵎⵉ ⴷⴷ-ⵉⵇⴰⵔⵔⴻⴱ ⵖⴰⵔ ⵜⴻⵙⵔⴰⴼⵜ, ⵉⵍⴰⵖⴰ ⵙ ⵜⵎⵉⵊⵊⴰ ⵜⴻⵛⴹⴻⵏ ⵅ ⴷⴰⵏⵉⵢⴰⵍ. ⴰⵊⴻⴵⵉⴷ ⵉⵙⵙⵉⵡⴻⵍ, ⵉⵏⵏⴰ ⵉ ⴷⴰⵏⵉⵢⴰⵍ: “ⴰ ⴷⴰⵏⵉⵢⴰⵍ, ⵛⴻⴽ ⴷ ⴰⵎⵙⴻⵅⵅⴰⵔ ⵏ ⴰⵔⴻⴱⴱⵉ ⵉⴷⴷⴰⵔⴻⵏ! ⵎⴰ ⴰⵔⴻⴱⴱⵉ ⵏⵏⴻⵛ, ⵡⴻⵏⵏⵉ ⵉ ⵜⵡⴻⵇⵇⴰⵔⴻⴷ ⵍⴻⴱⴷⴰ, ⵎⴰ ⵜⵓⵖⴰ ⵉⵣⴻⵎⵎⴰⵔ ⴰⴷ ⵛⴻⴽ ⵉⴼⴻⴽⴽ ⵣⴻⴳ ⵉⵢⵔⴰⴷⴻⵏ?”
22 ⵅⴻⵏⵏⵉ ⵉⵙⵙⵉⵡⴻⵍ ⴷⴰⵏⵉⵢⴰⵍ ⴰⴽ-ⴷ ⵓⵊⴻⴵⵉⴷ “ⴰ ⴰⵊⴻⴵⵉⴷ, ⴷⴷⴰⵔ ⵉ ⵍⴻⴱⴷⴰ!
23 ⴰⵔⴻⴱⴱⵉ ⵉⵏⵓ ⵉⵙⵙⴻⴽⴽ ⵍⵎⴰⵍⴰⴽ ⵏⵏⴻⵙ ⵓ ⵉⴱⴻⵍⵍⴻⵄ ⴰⵇⴻⵎⵎⵓⵎ ⵏ ⵡⴰⵢⵔⴰⴷⴻⵏ. ⵜⵓⵖⴰ ⵡⴰⵔ ⵣⴻⵎⵎⴰⵔⴻⵏ ⴰⴷ ⴰⵢⵉ ⵉⵢⵣⵎⴻⵏ ⵎⴰⵖⴰⵔ ⵢⵓⴼⴰ ⴰⵢⵉ ⴷ ⴰⵎⴻⵣⴷⴰⴳ ⵣⵣⴰⵜⴻⵙ. ⵓⵍⴰ ⴰⴽⵉⴷⴻⴽ, ⴰ ⴰⵊⴻⴵⵉⴷ, ⵡⴰⵔ ⴳⴳⵉⵖ ⵓⵍⴰ ⴷ ⵉⵛⵜ ⵏ ⵍⵊⴰⵔⵉⵎⴰ!”
24 ⵅⴻⵏⵏⵉ ⵉⴼⴰⵔⵃ ⵓⵊⴻⴵⵉⴷ ⴰⵟⵟⴰⵙ, ⵢⵓⵎⵓⵔ ⴰⴷ ⴷⴷ-ⴰⵡⵢⴻⵏ ⴷⴰⵏⵉⵢⴰⵍ ⵣⵉ ⵜⴻⵙⵔⴰⴼⵜ. ⴰⵡⴰⵔⵏⵉ ⵍⴰⵎⵉ ⵜ ⵉⵡⵢⴻⵏ ⵣⵉ ⵜⴻⵙⵔⴰⴼⵜ ⵡⴰⵔ ⴷⴰⵢⴻⵙ ⵓⴼⵉⵏ ⵓⵍⴰ ⴷ ⵉⵛⵜ ⵏ ⵊⵊⵔⵉⵃⴻⵛⵜ, ⵎⴰⵖⴰⵔ ⵏⴻⵜⵜⴰ ⵜⵓⵖⴰ ⵉⵜⵜⵛⴻⵍ ⵅ ⴰⵔⴻⴱⴱⵉ ⵏⵏⴻⵙ.
25 ⵍⴻⵅⴷⴻⵏⵏⵉ ⵢⵓⵎⵓⵔ ⵓⵊⴻⴵⵉⴷ ⴰⴷ ⴰⵡⵢⴻⵏ ⵉⵔⵢⴰⵣⴻⵏ ⵏⵏⵉ ⵜⵓⵖⴰ ⵉⵜⵜⴰⵀⵎⴻⵏ ⴷⴰⵏⵉⵢⴰⵍ. ⵏⴹⴰⵔⴻⵏ ⵜⴻⵏ ⴷⵉ ⵜⴻⵙⵔⴰⴼⵜ ⵏ ⵡⴰⵢⵔⴰⴷⴻⵏ, ⵏⵉⵜⵏⵉ ⴷ ⵉⵃⴻⵏⵊⵉⵔⴻⵏ ⵏⵙⴻⵏ ⴷ ⵜⴻⵎⵖⴰⵔⵉⵏ ⵏⵙⴻⵏ. ⵏⵉⵜⵏⵉ ⵜⵓⵖⴰ ⵄⴰⴷ ⵡⴰⵔ ⵉⵡⵉⴹⴻⵏ ⵛⴰ ⵖⴰⵔ ⵜⵉⵙⵉ ⵏ ⵜⴻⵙⵔⴰⴼⵜ ⵓⵎⵉ ⵜⴻⵏ ⵟⵟⴼⴻⵏ ⵡⴰⵢⵔⴰⴷⴻⵏ ⵓⵛⴰ ⵎⴻⵣⵣⵇⴻⵏ ⵎⴰⵔⵔⴰ ⵉⵖⵙⴰⵏ ⵏⵙⴻⵏ.
26 ⵅⴻⵏⵏⵉ ⵢⵓⵔⴰ ⵓⵊⴻⴵⵉⴷ ⴷⴰⵔⵉⵢⵓⵙ ⵉ ⵎⴰⵔⵔⴰ ⵍⴻⴳⵏⵓⵙ ⴷ ⵛⵛⵓⵄⵓⴱ ⴷ ⵉⵍⵙⴰⵡⴻⵏ: “ⴰⴷ ⵢⵉⵍⵉ ⵍⴻⵀⵏⴰ ⵏⵡⴻⵎ ⴷ ⴰⵎⴻⵇⵇⵔⴰⵏ ⴰⵟⵟⴰⵙ.
27 ⴰⵇⴰ ⵙⵙⵓⴼⴼⵖⴻⵖ-ⴷⴷ ⵉⵊⵊ ⵏ ⵍⵓⵎⵓⵔ ⵃⵉⵎⴰ ⵉⵎⴻⵣⴷⴰⵖ ⴷⵉ ⵎⴰⵔⵔⴰ ⵜⴰⴳⴻⵍⴷⵉⵜ ⵉⵏⵓ, ⵜⴻⵏⵏⵉ ⵅ ⵚⴻⵍⵍⵟⴻⵖ, ⴰⴷ ⴰⵔⵊⵉⵊⴻⵏ ⵓ ⴰⴷ ⵇⴻⴼⵇⴼⴻⵏ ⵣⵣⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ ⵏ ⴷⴰⵏⵉⵢⴰⵍ ⵎⴰⵖⴰⵔ ⵏⴻⵜⵜⴰ ⴷ ⴰⵔⴻⴱⴱⵉ ⵉⴷⴷⴰⵔⴻⵏ ⵓ ⵏⴻⵜⵜⴰ ⴰⴷ ⵉⵇⵇⵉⵎ ⵉ ⵍⴻⴱⴷⴰ ⵇⴰⵄ ⵓ ⵜⴰⴳⴻⵍⴷⴰ ⵏⵏⴻⵙ ⵡⴰⵔ ⵣⴻⵎⵎⴰⵔⴻⵏ ⴰⴷ ⵜⵜ ⴹⴰⵔⵔⴻⵏ ⵓ ⵚⵚⵓⵍⵟⴰ ⵏⵏⴻⵙ ⴰⴷ ⵜⴻⵇⵇⵉⵎ ⴰⵍ ⴰⵏⴻⴳⴳⴰⵔⵓ.
28 ⵏⴻⵜⵜⴰ ⵉⴼⴻⴽⴽ ⵓ ⵉⵙⵙⴻⵏⵊⴻⵎ ⵓ ⵉⵜⵜⴻⴳⴳ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵣⴰⵜ ⴷⴻⴳ ⵓⵊⴻⵏⵏⴰ ⵓ ⵅ ⵜⴻⵎⵎⵓⵔⵜ. ⴷ ⵏⴻⵜⵜⴰ ⵉ ⵉⴼⴻⴽⴽⴻⵏ ⵓ ⵉⵙⵙⴻⵏⵊⵎⴻⵏ ⴷⴰⵏⵉⵢⴰⵍ ⵣⴻⴳ ⵡⴰⵛⵛⴰⵔⴻⵏ ⵏ ⵡⴰⵢⵔⴰⴷⴻⵏ.”
29 ⴷⴰⵏⵉⵢⴰⵍ ⵡⴰⵏⵉⵜⴰ ⵜⵓⵖⴰ ⵉⴼⵍⴻⵃ ⵓⵎⵉ ⵜⵓⵖⴰ ⵜⴰⴳⴻⵍⴷⴰ ⴷⴻⴳ ⵓⴼⵓⵙ ⵏ ⴷⴰⵔⵉⵢⵓⵙ ⵓ ⴷⴻⴳ ⵓⴼⵓⵙ ⵏ ⴽⵓⵔⴰⵛ, ⴰⴼⴰⵔⵙⵉ.