3
ⵉⵎⴻⴷⴷⵓⴽⴽⵯⴰⵍ ⵏ ⴷⴰⵏⵉⵢⴰⵍ ⴷⵉ ⵜⴻⴼⵇⵓⵏⵜ ⵉⵛⴻⵎⴹⴻⵏ
1 ⴰⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ ⵉⴳⴳⴰ ⵉⵊⵊ ⵏ ⵍⴻⵅⵢⴰⵍ ⵏ ⵡⵓⵔⴻⵖ ⵙ ⵢⵉⵊⵊ ⵏ ⵍⵓⵄⵍⴰ ⵏ ⵙⴻⵜⵜⵉⵏ ⵉⵖⴰⴵⴻⵏ ⴷ ⵢⵉⵊⵊ ⵏ ⵜⵉⵔⵓ ⵏ ⵙⴻⵜⵜⴰ ⵏ ⵉⵖⴰⴵⴻⵏ. ⵉⵙⵙⴱⴻⴷⴷ ⵉ-ⵜ ⴷⵉ ⵍⵡⴰⵟⴰ ⵏ ⴷⵓⵔⴰ ⴷⵉ ⵍⵄⴰⵎⴰⵍⴰ ⵏ ⴱⴰⴱⵉⵍ.
2 ⵅⴻⵏⵏⵉ ⵉⵙⵙⴻⴽⴽ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ ⵉⵔⴻⵇⵇⴰⵙⴻⵏ ⵃⵉⵎⴰ ⴰⴷ ⵙⵙⵎⵓⵏⴻⵏ ⵉⵊⴻⴵⵉⴷⴻⵏ ⵉ ⵉⴵⴰⵏ ⵙⴰⴷⵓ ⵓⵊⴻⴵⵉⴷ ⴷ ⵉⵎⴹⴻⴱⴱⴰⵔⴻⵏ ⵉⵎⴻⵇⵇⵔⴰⵏⴻⵏ ⴷ ⵍⵡⵓⵍⴰⵜ, ⵍⵇⵓⴹⴰⵜ ⵉⵎⴻⵣⵡⵓⵔⴰ ⵏ ⵜⴳⴻⵍⴷⵉⵜ ⴷ ⵢⵉⵏⵏⵉ ⵅ ⵜⵅⵓⴱⴰⵢ ⴷ ⵉⵎⴻⵙⵏⴰⵡⴻⵏ ⵏ ⵉⵣⴻⵔⴼⴰⵏ ⴷ ⵉⵎⵡⴻⴹⴹⴼⴻⵏ ⵏ ⵜⵓⴷⵔⵉⵏ ⵏ ⵛⵛⵔⴻⵄ ⴷ ⵎⴰⵔⵔⴰ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴷⵉ ⵍⵄⴰⵎⴰⵍⴰⵜ ⵎⴰⵃⴻⵏⴷ ⴰⴷ ⴷⴷ-ⴰⵙⴻⵏ ⵖⴰⵔ ⵓⴷⴻⵛⵛⴻⵏ ⵏ ⵍⴻⵅⵢⴰⵍ ⵏⵏⵉ ⵉⵙⵙⴱⴻⴷⴷ ⵓⵊⴻⴵⵉⴷ.
3 ⵅⴻⵏⵏⵉ ⵎⵓⵏⴻⵏ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵉ ⵓⵊⴻⴵⵉⴷ ⴷ ⵉⵎⴹⴻⴱⴱⴰⵔⴻⵏ ⵉⵎⴻⵇⵇⵔⴰⵏⴻⵏ ⴷ ⵍⵡⵓⵍⴰⵜ ⴷ ⵍⵇⵓⴹⴰⵜ ⵉⵎⴻⵣⵡⵓⵔⴰ ⵏ ⵜⴳⴻⵍⴷⵉⵜ ⴷ ⵢⵉⵏⵏⵉ ⵅ ⵜⵅⵓⴱⴰⵢ ⴷ ⵉⵎⴻⵙⵏⴰⵡⴻⵏ ⵏ ⵉⵣⴻⵔⴼⴰⵏ ⴷ ⵉⵎⵡⴻⴹⴹⴼⴻⵏ ⵏ ⵜⵓⴷⵔⵉⵏ ⵏ ⵛⵛⵔⴻⵄ ⴷ ⵎⴰⵔⵔⴰ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴷⵉ ⵍⵄⴰⵎⴰⵍⴰⵜ ⵉ ⵓⴷⴻⵛⵛⴻⵏ ⵏ ⵍⴻⵅⵢⴰⵍ ⵏⵏⵉ ⵉⵙⵙⴱⴻⴷⴷ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ, ⵓ ⵏⵉⵜⵏⵉ ⴱⴻⴷⴷⴻⵏ ⵣⵣⴰⵜ ⵉ ⵍⴻⵅⵢⴰⵍ ⵏⵏⵉ ⵉⵙⵙⴱⴻⴷⴷ ⵏⴰⴱⵓⵅⴰⴷⵏⴰⵚⵚⴰⵔ.
4 ⵉⵍⴰⵖⴰ ⵉⵊⵊ ⵏ ⵓⵎⴱⴰⵔⵔⴻⵃ ⵙ ⵊⵊⴻⵀⴷ ...
“ⴰ ⵍⴻⴳⵏⵓⵙ ⴷ ⵛⵛⵓⵄⵓⴱ ⴷ ⵉⵍⵙⴰⵡⴻⵏ, ⵉ ⴽⴻⵏⵏⵉⵡ ⵉ ⵖⴰ ⵉⵍⵉⵏ ⴰⵡⴰⵍⴻⵏ-ⴰ ⵉ ⵖⴰ ⵉⵏⵉⵖ.
5 ⴷⵉ ⵜⵙⴰⵄⵄⴻⵜ ⵉ ⴷⵉ ⵉ ⵖⴰ ⵜⴻⵙⵍⴻⵎ ⵍⵃⴻⵙⵙ ⵏ ⵍⴱⵓⵇ ⴷ ⵜⵣⴰⵎⵎⴰⵔⵜ ⴷ ⵍⵄⵓⴷ ⴷ ⵍⴳⴰⵎⴱⵔⵉ ⴷ ⵍⵀⴰⵔⴱⴰ ⴷ ⵜⴻⵎⵊⴰ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⴵⵖⴰ, ⵉⵜⵜⵅⴻⵚⵚⴰ ⴰⴷ ⵜⴻⵡⴹⴰⵎ ⴰⴷ ⵜⵙⴻⵊⴷⴻⵎ ⵉ ⵍⴻⵅⵢⴰⵍ ⵏ ⵡⵓⵔⴻⵖ ⵉ ⵉⵙⵙⴱⴻⴷⴷ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ.
6 ⵡⴻⵏⵏⵉ ⵡⴰⵔ ⵉⵡⴹⵉⵏ ⵓ ⵡⴰⵔ ⵉⵙⵊⴻⴷ ⴰⴷ ⵉⵜⵜⵡⴰⵎⵎⴻⵏⴹⴰⵔ ⴷⵉ ⵍⵡⴻⵙⵟ ⵏ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ ⴷⵉ ⵜⵙⴰⵄⵄⴻⵜ ⵏⵏⵉ.”
7 ⵙ ⵓⵢⴻⵏⵏⵉ, ⴷⵉ ⵜⵙⴰⵄⵄⴻⵜ ⵉ ⴷⵉ ⵙⵍⴻⵏ ⵎⴰⵔⵔⴰ ⵍⴻⴳⵏⵓⵙ ⵉ ⵍⵃⴻⵙⵙ ⵏ ⵍⴱⵓⵇ ⴷ ⵜⵣⴰⵎⴰⵔⵜ ⴷ ⵍⵄⵓⴷ ⴷ ⵍⴳⴰⵎⴱⵔⵉ ⴷ ⵍⵀⴰⵔⴱⴰ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⴷⴷⵓⵣⴰⵏ ⵏ ⴵⵖⴰ, ⵡⴹⴰⵏ ⵎⴰⵔⵔⴰ ⵍⴻⴳⵏⵓⵙ ⴷ ⵛⵛⵓⵄⵓⴱ ⴷ ⵉⵍⵙⴰⵡⴻⵏ ⵖⴰⵔ ⵜⴻⵎⵎⵓⵔⵜ ⵓ ⵙⴻⵊⴷⴻⵏ ⵉ ⵍⴻⵅⵢⴰⵍ ⵏ ⵡⵓⵔⴻⵖ ⵏⵏⵉ ⵉⵙⵙⴱⴻⴷⴷ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ.
8 ⴷⵉ ⵍⵡⴻⵇⵜ ⵏⵏⵉ ⴷ ⵉⵛⵜⴻⵏ ⵇⴰⵔⵔⴱⴻⵏ-ⴷⴷ ⵛⴰ ⵏ ⵉⴽⴰⵍⴷⴰⵏⵉⵢⵢⴻⵏ ⴷⵉ ⵙⵙⵉⴱⴱⴻⵜ-ⴰ, ⵛⴻⵜⵛⴰⵏ ⵣⴻⴳ ⵡⵓⴷⴰⵢⴻⵏ ⵙ ⴱⵟⴰⵢⵟⴰⵢ.
9 ⵏⵉⵜⵏⵉ ⵟⵟⴼⴻⵏ ⴷⴻⴳ ⵡⴰⵡⴰⵍ, ⵏⵏⴰⵏ ⵉ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ: “ⴰ ⴰⵊⴻⴵⵉⴷ, ⴷⴷⴰⵔ ⵉ ⵍⴻⴱⴷⴰ!
10 ⵛⴻⴽ, ⴰ ⴰⵊⴻⴵⵉⴷ, ⵜⵓⵎⵓⵔⴻⴷ ⴱⴻⵍⵍⵉ ⵎⴰⵔⵔⴰ ⵉⵡⴷⴰⵏ ⵏⵏⵉ ⵉⵙⵍⵉⵏ ⵉ ⵍⵃⴻⵙⵙ ⵏ ⵍⴱⵓⵇ ⴷ ⵜⵣⴰⵎⴰⵔⵜ ⴷ ⵍⵄⵓⴷ ⴷ ⵍⴳⴰⵎⴱⵔⵉ ⴷ ⵍⵀⴰⵔⴱⴰ ⴷ ⵜⴻⵎⵊⴰ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⴷⴷⵓⵣⴰⵏ ⵏ ⴵⵖⴰ, ⴰⴷ ⵡⴹⴰⵏ ⴰⴷ ⵙⴻⵊⴷⴻⵏ ⵉ ⵍⴻⵅⵢⴰⵍ ⵏ ⵡⵓⵔⴻⵖ.
11 ⵡⴻⵏⵏⵉ ⵡⴰⵔ ⵉⵡⴹⵉⵏ ⵓ ⵉⵙⵊⴻⴷ, ⴰⴷ ⵉⵎⵎⴻⵏⴹⴰⵔ ⴷⵉ ⵍⵡⴻⵙⵟ ⵏ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.
12 ⴰⵇⴰ ⴷⵉⵏ ⵉⵔⵢⴰⵣⴻⵏ ⵓⴷⴰⵢⴻⵏ, ⵉⵏⵏⵉ ⵜⴻⴳⴳⵉⴷ ⵅ ⵓⴹⴻⴱⴱⴰⵔ ⵏ ⵍⵄⴰⵎⴰⵍⴰ ⵏ ⴱⴰⴱⵉⵍ, ⴰⵇⴰ ⴰⵜⴻⵏ ⴷ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ. ⵉⵔⵢⴰⵣⴻⵏ-ⴰ ⵡⴰⵔ ⵡⵛⵉⵏ ⵜⴰⵢⵏⵉⵜ ⵉ ⵍⵓⵎⵓⵔ ⵏⵏⴻⵛ, ⴰ ⴰⵊⴻⴵⵉⴷ. ⴰⵔⴻⴱⴱⵉⵜⴻⵏ ⵏⵏⴻⵛ ⵡⴰⵔ ⵜⴻⵏ ⵜⵜⵡⴻⵇⵇⴰⵔⴻⵏ ⵓ ⵍⴻⵅⵢⴰⵍ ⵏⵏⴻⵛ ⵡⴰⵔ ⴷ ⴰⵙ ⵙⴻⵊⴷⴻⵏ.”
13 ⵅⴻⵏⵏⵉ ⵉⵏⵏⴰ ⵏⴰⴱⵓⵅⴰⴷⵏⴰⵚⵚⴰⵔ ⴷⴻⴳ ⵓⵅⴻⵢⵢⴻⵇ ⴷ ⵜⴻⴼⵇⴻⵃⵜ ⵏⵏⴻⵙ ⴰⵇⴰ ⴰⴷ ⵏⴻⴷⵀⴻⵏ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ ⵣⵣⴰⵜⴻⵙ. ⵅⴻⵏⵏⵉ ⵏⴻⴷⵀⴻⵏ ⵉⵔⵢⴰⵣⴻⵏ ⵏⵏⵉ ⵣⵣⴰⵜ ⵉ ⵓⵊⴻⴵⵉⴷ.
14 ⵏⴰⴱⵓⵅⴰⴷⵏⴰⵚⵚⴰⵔ ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⴰⵙⴻⵏ: “ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ ⵎⴰ ⵙ ⵏⴻⵄⵎⴰⴷⴰ ⵣⴻⵄⵎⴰ ⵡⴰⵔ ⵜᵉⵜⵜⵡⴻⵇⵇⴰⵔⴻⵎ ⵉⵔⴻⴱⴱⵉⵜⴻⵏ ⵉⵏⵓ ⵓ ⵡⴰⵔ ⵜⵙⴻⵊⵊⴰⴷⴻⵎ ⵉ ⵍⴻⵅⵢⴰⵍ ⵉ ⵙⵙⴱⴻⴷⴷⴻⵖ?
15 ⵅⴻⵏⵏⵉ ⵍⴻⵅⵅⵓ, ⵎⴰⵍⴰ ⴽⴻⵏⵏⵉⵡ, ⴷⵉ ⵜⵙⴰⵄⵄⴻⵜ ⵉ ⴷⵉ ⵉ ⵖⴰ ⵜⴻⵙⵍⴻⵎ ⵉ ⵍⵃⴻⵙⵙ ⵏ ⵍⴱⵓⵇ ⴷ ⵜⵣⴰⵎⴰⵔⵜ ⴷ ⵍⵄⵓⴷ ⴷ ⵍⴳⴰⵎⴱⵔⵉ ⴷ ⵍⵀⴰⵔⴱⴰ ⴷ ⵜⴻⵎⵊⴰ ⴷ ⵎⴰⵔⵔⴰ ⵎⴰⵔⴽⴰⵜ ⵏ ⴷⴷⵓⵣⴰⵏ ⵏ ⴵⵖⴰ, ⵜⵡⴻⵊⴷⴻⵎ ⵎⴰⵃⴻⵏⴷ ⴰⴷ ⵜⴻⵡⴹⴰⵎ ⵓ ⴰⴷ ⵜⵙⴻⵊⴷⴻⵎ ⵉ ⵍⴻⵅⵢⴰⵍ ⵉ ⵙⵙⴱⴻⴷⴷⴻⵖ ⵏⴻⵛⵛ, ⴰⵇⴰ ⵎⵍⵉⵃ. ⵎⴰⵛⴰ ⵎⴰⵍⴰ ⵡⴰⵔ ⵜⵙⴻⵊⴷⴻⵎ, ⴰⴷ ⵜᵉⵜⵜⵡⴰⵎⵎⴻⵏⴹⴰⵔⴻⵎ ⴷⵉ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ ⴷⵉ ⵜⵙⴰⵄⵄⴻⵜ ⵏⵏⵉ. ⵓ ⵎⴰⵏ ⴰⵔⴻⴱⴱⵉ ⵉ ⴽⴻⵏⵏⵉⵡ ⵉ ⵖⴰ ⵉⴼⴻⴽⴽⴻⵏ ⵣⴻⴳ ⵉⴼⴰⵙⵙⴻⵏ ⵉⵏⵓ?
16 ⴰⵔⵔⵉⵏ-ⴷⴷ ⵛⴰⴷⵔⴰⵅ ⴷ ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ, ⵏⵏⴰⵏ ⵉ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ: “ⵡⴰⵔ ⵏⴻⵃⴷⴰⵊ ⴰⴷ ⵅⴰⴽ ⴷⴷ-ⵏⴰⵔⵔ ⴷⵉ ⵜⵎⴻⵙⵍⴰⵛⵜ-ⴰ.
17 ⵎⴰⵍⴰ ⵅⴻⵏⵏⵉ ⴰⵔⴻⴱⴱⵉ ⵏⵏⴻⵖ ⵏⵏⵉ ⵏⵙⴻⵅⵅⴰⵔ, ⵖⴰⵔⴻⵙ ⵜⵉⵣⴻⵎⵎⴰⵔ ⵃⵉⵎⴰ ⴰⴷ ⴰⵏⴻⵖ ⵉⴼⴻⴽⴽ ⵣⵉ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ, ⵅⴻⵏⵏⵉ ⴰⴷ ⴰⵏⴻⵖ ⵉⴼⴻⴽⴽ ⵣⴻⴳ ⵓⴼⵓⵙ ⵏⵏⴻⵛ, ⴰ ⴰⵊⴻⴵⵉⴷ!
18 ⵎⴰⵍⴰ ⵍⵍⴰ, ⴰⴷ ⵜⴻⵙⵙⵏⴻⴷ, ⴰ ⴰⵊⴻⴵⵉⴷ, ⴰⵇⴰ ⵏⴻⵛⵛⵉⵏ ⵡⴰⵔ ⵏⴻⵜⵜⵡⴻⵇⵇⴰⵔ ⵉⵔⴻⴱⴱⵉⵜⴻⵏ ⵏⵏⴻⵛ ⴷ ⵍⴻⵅⵢⴰⵍ ⵉ ⵜⴻⵙⵙⴱⴻⴷⴷⴻⴷ ⵛⴻⴽ, ⵡⴰⵔ ⴷ ⴰⵙ ⵏⵙⴻⵊⵊⴻⴷ ⵛⴰ.”
19 ⵅⴻⵏⵏⵉ ⵉⵙⵄⴰⵔ ⵓⵊⴻⴵⵉⴹ ⵓ ⵜⴱⴻⴷⴷⴻⵍ ⵚⵚⵉⴼⴻⵜ ⵏ ⵡⵓⴷⴻⵎ ⵏⵏⴻⵙ ⵣⵣⴰⵜ ⵉ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ. ⵏⴻⵜⵜⴰ ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⴰⴷ ⴰⵔⵏⵉⵏ ⴷⵉ ⵜⴻⴼⵇⵓⵏⵜ ⵙⴻⴱⵄⴰ ⵏ ⵜⵙⴻⵇⵇⴰⵔ ⴰⵎ ⵎⴰⵎⵎⴻⵛ ⵏⵓⵎⴻⵏ ⵜⵜ ⵙⵙⴰⵔⴻⵇⵇⴻⵏ,
20 ⵓ ⵏⴻⵜⵜⴰ ⵢⵓⵎⵓⵔ ⵉⵔⵢⴰⵣⴻⵏ ⵉⵏⵏⵉ ⴷ ⵉⵔⵢⴰⵣⴻⵏ ⵉⵊⴻⵀⴷⴻⵏ ⵇⴰⵄ ⵣⵉ ⵍⵄⴻⵙⴽⴰⵔ ⵏⵏⴻⵙ, ⴰⴷ ⵛⴰⵔⴼⴻⵏ ⵛⴰⴷⵔⴰⵅ ⴷ ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ ⵃⵉⵎⴰ ⴰⴷ ⵜⴻⵏ ⵏⴹⴰⵔⴻⵏ ⴰⵎⵎⵓ ⴷⵉ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.
21 ⵅⴻⵏⵏⵉ ⵜⵜⵡⴰⵛⴰⵔⴼⴻⵏ ⵉⵔⵢⴰⵣⴻⵏ ⵏⵏⵉ ⴰⴽ-ⴷ ⵉⵙⴻⵍⵀⴰⵎⴻⵏ ⵏⵙⴻⵏ ⴷ ⵙⵙⵔⴰⵡⴻⵍ ⵏⵙⴻⵏ ⴷ ⵜⵛⵓⵛⵛⴰⵢ ⵏⵙⴻⵏ ⴷ ⵡⴰⵔⵔⵓⴹ ⵏⵙⴻⵏ ⵏⵏⴻⵖⵏⵉ ⵓⵛⴰ ⵏⴹⴰⵔⴻⵏ ⵜⴻⵏ ⴷⵉ ⵍⵡⴻⵙⵟ ⵏ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.
22 ⵎⵉⵏⵣⵉ ⵍⵓⵎⵓⵔ ⵏ ⵓⵊⴻⴵⵉⴷ ⵜⵓⵖⴰ ⵉⵇⵙⴻⵃ ⴰⵟⵟⴰⵙ ⵓ ⵜⴰⴼⵇⵓⵏⵜ ⵜⴻⵃⵎⴰ ⴰⵍ ⵟⵟⴰⵔⴼ, ⵏⵖⵉⵏ ⵉⵃⵓⴷⴰⵇ ⵏ ⵜⵎⴻⵙⵙⵉ ⵉⵔⵢⴰⵣⴻⵏ ⵏⵏⵉ ⵙⵙⴳⴻⵄⵄⴷⴻⵏ ⵛⴰⴷⵔⴰⵅ ⴷ ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ,
23 ⵓⵛⴰ ⵜⵍⴰⵜⴰ ⵏ ⵢⴻⵔⵢⴰⵣⴻⵏ ⵏⵏⵉ, ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ, ⵡⴹⴰⵏ ⵜⵜⵡⴰⵛⴰⵔⴼⴻⵏ ⴷⵉ ⵍⵡⴻⵙⵟ ⵏ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.
24 ⵅⴻⵏⵏⵉ ⵉⵏⵏⴻⵅⵍⴻⵄ ⵓⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴰⵔ, ⵉⴽⴽⴰⵔ ⴷⴻⵖⵢⴰ, ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⵉ ⵉⵎⵛⴰⵡⴰⵔⴻⵏ ⵏⵏⴻⵙ: “ⵎⴰ ⵡⴰⵔ ⵏⴻⵏⴹⴰⵔ ⵜⵍⴰⵜⴰ ⵏ ⵢⴻⵔⵢⴰⵣⴻⵏ ⵉⵜⵜⵡⴰⵛⴰⵔⴼⴻⵏ ⴷⵉ ⵍⵡⴻⵙⵟ ⵏ ⵜⵎⴻⵙⵙⵉ?” ⵏⵉⵜⵏⵉ ⴰⵔⵔⵉⵏ-ⴷⴷ, ⵏⵏⴰⵏ ⵉ ⵓⵊⴻⴵⵉⴷ: “ⵏⵉⵛⴰⵏ, ⴰ ⴰⵊⴻⴵⵉⴷ”
25 ⵏⴻⵜⵜⴰ ⵢⴰⵔⵔⴰ-ⴷⴷ, ⵉⵏⵏⴰ: “ⵅⵣⴰⵔ, ⵜⵜⵡⴰⵍⵉⵖ ⴰⵔⴻⴱⵄⴰ ⵏ ⵢⴻⵔⵢⴰⵣⴻⵏ ⴳⴳⵓⵔⴻⵏ ⴷⵉ ⵍⵡⴻⵙⵜ ⵏ ⵜⵎⴻⵙⵙⵉ ⵓ ⵜⵉⵎⴻⵙⵙⵉ ⵡⴰⵔ ⴷ ⴰⵙⴻⵏ ⵜⴻⴳⴳⵉ ⵛⴰ ⵓ ⵡⴻⵏⵏⵉ ⴷ ⵡⵉⵙⵙ ⴰⵔⴻⴱⵄⴰ ⵢⴰⵔⵡⴻⵙ ⴷⴻⴳ ⵉⵊⵊ ⵏ ⵎⵎⵉⵙ ⵏ ⵉⵔⴻⴱⴱⵉⵜⴻⵏ!”
26 ⵅⴻⵏⵏⵉ ⵉⵇⴰⵔⵔⴻⴱ-ⴷⴷ ⵏⴰⴱⵓⵅⴰⴷⵏⴰⵚⵚⴰⵔ ⵖⴰⵔ ⵜⴻⵡⵡⴰⵔⵜ ⵏ ⵜⴻⴼⵇⵓⵏⵜ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ, ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ: “ⴽⴻⵏⵏⵉⵡ, ⵛⴰⴷⵔⴰⵅ, ⵎⵉⵛⴰⵅ, ⵄⴰⴱⴷ-ⵏⴰⵖⵓ, ⴽⴻⵏⵏⵉⵡ ⵉⵎⵙⴻⵅⵅⴰⵔⴻⵏ ⵏ ⴰⵔⴻⴱⴱⵉ ⴰⵎⵄⵓⴵⵉ ⵅ ⴽⵓⵍⵛⵉ, ⴼⴼⵖⴻⵎ-ⴷⴷ ⵓ ⴰⵙⴻⵎ-ⴷⴷ ⴷⴰ!” ⵅⴻⵏⵏⵉ ⴼⴼⵖⴻⵏ-ⴷⴷ, ⵛⴰⴷⵔⴰⵅ ⴷ ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ ⵣⵉ ⵍⵡⴻⵙⵟ ⵏ ⵜⵎⴻⵙⵙⵉ ⵉⵜⵜⴻⵃⴷⵓⴷⵓⵇⴻⵏ.
27 ⵅⴻⵏⵏⵉ ⵙⵙⵎⵓⵏⴻⵏ ⵉⵊⴻⴵⵉⴷⴻⵏ ⵏⵏⵉ ⵉⴵⴰⵏ ⵙⴰⴷⵓ ⵉ ⵓⵊⴻⴵⵉⴷ ⴷ ⵉⵎⴹⴻⴱⴱⴰⵔⴻⵏ ⴷ ⵉⵎⵛⴰⵡⴰⵔⴻⵏ ⵏ ⵓⵊⴻⴵⵉⴷ ⵓⵛⴰ ⵥⵔⵉⵏ ⴰⵇⴰ ⵉⵔⵢⴰⵣⴻⵏ ⵏⵏⵉ ⵡⴰⵔ ⴷ ⴰⵙⴻⵏ ⵉⵎⵙⴰⵔ ⵛⴰ ⵙ ⵜⵎⴻⵙⵙⵉ ⵓ ⴰⵛⵓⵡⵡⴰⴼ ⵏ ⵓⵣⴻⴵⵉⴼ ⵏⵙⴻⵏ ⵡⴰⵔ ⵉⵛⵎⵉⴹ ⵛⴰ ⵓ ⵉⵙⴻⵍⵀⴰⵎⴻⵏ ⵏⵙⴻⵏ ⵡⴰⵔ ⵜⵜⵡⴰⵍⴻⵇⴼⴻⵏ ⵓ ⵡⴰⵔ ⴷⴰⵢⵙⴻⵏ ⵓⵍⴰ ⴷ ⵉⵛⵜ ⵊⵊⵓⵔⵔⴻⵜ ⵏ ⴰⵔⵔⵉⵃⴻⵜ ⵏ ⵜⵎⴻⵙⵙⵉ.
28 ⵅⴻⵏⵏⵉ ⵉⵟⵟⴻⴼ ⵏⴰⴱⵓⵅⴰⴷⵏⴰⵚⵚⴰⵔ ⴷⴻⴳ ⵡⴰⵡⴰⵍ, ⵉⵏⵏⴰ: “ⴰⴷ ⵉⵜⵜⵡⴰⴱⴰⵔⴻⴽ ⴰⵔⴻⴱⴱⵉ ⵏ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ, ⵡⴻⵏⵏⵉ ⴷⴷ-ⵉⵙⵙⴻⴽⴽⴻⵏ ⵍⵎⴰⵍⴰⴽ ⵏⵏⴻⵙ ⵓ ⵉⴼⴻⴽⴽ ⵉⵏⵏⵉ ⵜⵓⵖⴰ ⵅⴰⵙ ⵉⵜⵜⴻⵛⵍⴻⵏ. ⵏⵉⵜⵏⵉ ⴱⴻⴹⵍⴻⵏ ⵍⵓⵎⵓⵔ ⵏ ⵓⵊⴻⴵⵉⴷ ⵓ ⵙⴻⵍⵍⵎⴻⵏ ⴰⵔⵔⵉⵎⴰⵜ ⵏⵙⴻⵏ, ⵎⴰⵖⴰⵔ ⵡⴰⵔ ⵅⵙⴻⵏ ⴰⴷ ⵡⴻⵇⵇⴰⵔⴻⵏ ⵏⵉⵖ ⴰⴷ ⵙⴻⵊⴷⴻⵏ ⵓⵍⴰ ⵉ ⵢⵉⵊⵊ ⵏ ⴰⵔⴻⴱⴱⵉ ⵎⵖⵉⵔ ⵉ ⴰⵔⴻⴱⴱⵉ ⵏⵙⴻⵏ.
29 ⵅ ⵓⵢⴻⵏⵏⵉ ⵉⴼⴼⴻⵖ-ⴷⴷ ⵣⵣⴰⵢⵉ ⵍⵓⵎⵓⵔ ⵎⴰⵃⴻⵏⴷ ⴽⵓⵍ ⵍⴳⴻⵏⵙ ⴷ ⵛⵛⴻⵄⴱ ⴷ ⵢⵉⵍⴻⵙ ⵏⵏⵉ ⵉ ⵖⴰ ⵉⵛⴻⵇⵇⴼⴻⵏ ⴷⴻⴳ ⴰⵔⴻⴱⴱⵉ ⵏ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ, ⴰⴷ ⵉⵜⵜⵡⴰⵇⴻⵙⵙ ⴷ ⵉⵡⴻⵜⵡⵉⵜⴻⵏ ⵓ ⵜⴰⴷⴷⴰⵔⵜ ⵏⵏⴻⵙ ⴰⴷ ⵜⴻⴷⵡⴻⵍ ⴷ ⵉⵊⵊ ⵏ ⵓⵣⵓⴱⴰⵢ, ⵎⴰⵖⴰⵔ ⵡⴰⵔ ⴷⵉⵏ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ ⵡⴻⵏⵏⵉ ⵉⵣⴻⵎⵎⴰⵔⴻⵏ ⴰⴷ ⵉⴼⴻⴽⴽ ⴰⵎⵎⵓ.”
30 ⵅⴻⵏⵏⵉ ⵢⴰⵔⵏⵉ ⴰⵙⴻⵏ ⵓⵊⴻⴵⵉⴷ ⴷⵉ ⵛⵛⴰⵏ ⵉ ⵛⴰⴷⵔⴰⵅ, ⵎⵉⵛⴰⵅ ⴷ ⵄⴰⴱⴷ-ⵏⴰⵖⵓ ⴷⵉ ⵍⵄⴰⵎⴰⵍⴰ ⵏ ⴱⴰⴱⵉⵍ.
31 “ⴰⵊⴻⴵⵉⴷ ⵏⴰⴱⵓⵅⴰⴷⵏⴰⵚⵚⴻⵔ, ⵉ ⵎⴰⵔⵔⴰ ⵍⴻⴳⵏⵓⵙ ⴷ ⵛⵛⵓⵄⵓⴱ ⴷ ⵉⵍⵙⴰⵡⴻⵏ ⵏⵏⵉ ⵉⵣⴻⴷⴷⵖⴻⵏ ⴷⵉ ⵎⴰⵔⵔⴰ ⵜⴰⵎⵎⵓⵔⵜ: ⴰⴷ ⵢⵉⵍⵉ ⵍⴻⵀⵏⴰ ⵏⵡⴻⵎ ⴷ ⴰⵎⴻⵇⵇⵔⴰⵏ!
32 ⵉⵄⵊⴻⴱ ⴰⵢⵉ ⵍⵃⴰⵍ ⵃⵉⵎⴰ ⴰⴷ ⴰⵡⴻⵎ ⵙⵙⴻⵛⵏⴻⵖ ⵍⴻⵄⵍⴰⵎⴰⵜ ⴷ ⵍⵎⵓⵄⵊⵉⵣⴰⵜ ⵏⵏⵉ ⴷ ⴰⵢⵉ ⵉⴳⴳⴰ ⴰⵔⴻⴱⴱⵉ ⴰⵎⵄⵓⴵⵉ ⵅ ⴽⵓⵍⵛⵉ.
33 ⵎⴰⵎⵎⴻⵛ ⵎⵖⴰⵔⴻⵏⵜ ⵍⴻⵄⵍⴰⵎⴰⵜ ⵏⵏⴻⵙ ⴷ ⵎⴰⵎⵎⴻⵛ ⵊⴻⵀⴷⴻⵏⵜ ⵍⵎⵓⵄⵊⵉⵣⴰⵜ ⵏⵏⴻⵙ! ⵜⴰⴳⴻⵍⴷⵉⵜ ⵏⵏⴻⵙ ⴷ ⵉⵛⵜ ⵏ ⵜⴳⴻⵍⴷⵉⵜ ⵉ ⵍⴻⴱⴷⴰ ⴷ ⵍⵎⵓⵍⴽ ⵏⵏⴻⵙ ⵣⵉ ⵊⵊⵉⵍ ⴰⵍ ⵊⵊⵉⵍ.”