3
ⴰⵙⴳⴻⵏⴼⵉ ⵏ ⵉⵊⵊ ⵏ ⵓⵏⴻⵄⴹⴰⴱ
1 ⴷ ⵎⴰⵏ ⴰⵢⴰ ⵉⵎⵙⴰⵔ ⵓⵎⵉ ⴳⴻⵄⵄⴷⴻⵏ ⵛⵉⵎⵄⵓⵏ ⴱⵓⵟⵔⵓⵙ ⴷ ⵢⵓⵃⴰⵏⵏⴰ ⵊⵎⵉⵄ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⴷⵉ ⵜⵙⴰⵄⵄⴻⵜ ⵏ ⵜⵥⴰⴵⵉⵜ ⵜⴻⵏⵏⵉ ⴷ ⵡⵉⵙⵙ ⵜⴻⵙⵄⴰ, ⵉⵅⵙ ⴰⴷ ⵢⵉⵏⵉ ⴷ ⵜⵍⴰⵜⴰ ⴰⵡⴰⵔⵏⵉ ⴹⴹⵀⵓⵔ.
2 ⵅⵣⴰⵔ, ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵔⵢⴰⵣ ⴷ ⴰⵏⴻⵄⴹⴰⴱ ⵣⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰⵙ, ⴰⵔⴱⵓⵏ ⵜ ⵉⵏⵏⵉ ⵉⵏⵏⵓⵎⴻⵏ ⴰⴷ ⵜ-ⵉ-ⴷⴷ-ⴰⵡⵢⴻⵏ, ⵙⵙⵖⵉⵎⴰⵏ ⵜ ⵖⴰⵔ ⵜⴻⵡⵡⴰⵔⵜ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵓⵎⵉ ⵇⵇⴰⵔⴻⵏ ‘ⵜⴰⵡⵡⴰⵔⵜ ⵜⴰⵚⴻⴱⵃⴰⵏⵜ’, ⵃⵉⵎⴰ ⴰⴷ ⵉⵜⵜⴰⵔ ⵚⵚⴻⴷⵇⴻⵜ ⵣⴻⴳ ⵉⵏⵏⵉ ⵉⵜⵜⴰⴷⴼⴻⵏ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ.
3 ⴰⵇⴰ ⵡⴰ, ⵓⵎⵉ ⵉⵥⵔⴰ ⴱⴻⵍⵍⵉ ⵛⵉⵎⵄⵓⵏ ⴷ ⵢⵓⵃⴰⵏⵏⴰ ⵜⵜⴰⴷⴼⴻⵏ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⵜⵜⴰⵔ ⵣⵣⴰⵢⵙⴻⵏ ⵃⵉⵎⴰ ⴰⴷ ⴰⵙ ⵡⵛⴻⵏ ⵉⵛⵜ ⵏ ⵚⵚⴻⴷⵇⴻⵜ.
4 ⵛⵉⵎⵄⵓⵏ ⴰⴽ-ⴷ ⵢⵓⵃⴰⵏⵏⴰ ⵏⴹⴰⵔⴻⵏ ⴷⴰⵢⴻⵙ ⵜⵉⵟⵟⴰⵡⵉⵏ, ⵏⵏⴰⵏ ⴰⵙ: “ⵅⵣⴰⵔ ⴷⴰⵢⵏⴻⵖ!”
5 ⵏⴻⵜⵜⴰ ⵉⵇⵛⴻⵄ ⴷⴰⵢⵙⴻⵏ, ⵉⵜⵜⵔⴰⵊⴰ ⴰⴷ ⵣⵣⴰⵢⵙⴻⵏ ⵉⵟⵟⴻⴼ ⵛⴰ.
6 ⵉⵏⵏⴰ ⴰⵙ ⵛⵉⵎⵄⵓⵏ: “ⵏⵏⵓⵇⴰⵔⵜ ⴷ ⵡⵓⵔⴻⵖ ⵡⴰⵔ ⵖⴰⵔⵉ ⴵⵉⵏ, ⵎⴰⵛⴰ ⵎⵉⵏ ⵖⴰⵔⵉ ⴷ ⵎⴰⵏ ⴰⵢⴰ ⵉ ⴷ ⴰⵛ ⵖⴰ ⵡⵛⴻⵖ ⵙ ⵢⵉⵙⴻⵎ ⵏ ⵢⴰⵙⵓⵄ ⵍⵎⴰⵙⵉⵃ ⵏⵏⴰⵚⵉⵔⵉ! ⴽⴽⴰⵔ, ⵜⵓⵢⵓⵔⴻⴷ!”
7 ⵉⵟⵟⴻⴼ ⵉ-ⵜ ⵣⴻⴳ ⵓⴼⵓⵙ ⵏⵏⴻⵙ ⴰⴼⵓⵙⵉ ⵓⵛⴰ ⵉⵙⵙⵏⴻⴽⴽⴰⵔ ⵉ-ⵜ. ⵍⴻⵅⴷⴻⵏⵏⵉ ⵎⴻⵏⵄⴻⵏ ⵉⴹⴰⵔⴻⵏ ⵏⵏⴻⵙ ⴷ ⵜⵉⵛⴻⵄⴱⵉⵏ ⵏⵏⴻⵙ,
8 ⵓⵛⴰ ⵉⵏⴳⴻⵣ ⵓⵛⴰ ⵉⴱⴻⴷⴷ ⵅ ⵉⴹⴰⵔⴻⵏ, ⵉⴳⴳⵓⵔ ⵓⵛⴰ ⵢⵓⴷⴻⴼ ⴰⴽⵉⴷⵙⴻⵏ ⵖⴰⵔ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵉⴳⴳⵓⵔ, ⵉⵏⴻⴳⴳⴻⵣ, ⵉⵙⵙⴻⵎⵖⴰⵔⴰ ⴷⵉ ⴰⵔⴻⴱⴱⵉ.
9 ⵎⴰⵔⵔⴰ ⵍⴳⴻⵏⵙ ⵉⵥⵔⴰ ⵉ-ⵜ ⵉⴳⴳⵓⵔ, ⵉⵙⵙⴻⵎⵖⴰⵔⴰ ⴷⵉ ⴰⵔⴻⴱⴱⵉ.
10 ⵙⵙⵏⴻⵏ ⵉⵡⴷⴰⵏ ⴰⵇⴰ ⵏⴻⵜⵜⴰ ⴷ ⵡⴻⵏⵏⵉ ⵜⵓⵖⴰ ⵉⵜⵜⵖⵉⵎⴰⵏ ⵉⵜⵜⴻⵜⵜⴰⵔ ⴽⵓⵍ ⴰⵙⵙ ⵖⴰⵔ ⵜⴻⵡⵡⴰⵔⵜ ⵏ ⵣⵣⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵓⵎⵉ ⵇⵇⴰⵔⴻⵏ ‘ⵜⴰⵚⴻⴱⵃⴰⵏⵜ’ ⵓⵛⴰ ⵏⵉⵜⵏⵉ ⴷⴻⵡⵍⴻⵏ ⵛⵛⵓⵔⴻⵏ ⵙ ⵡⴻⴷⵀⴰⵛ ⴷ ⵓⵜⴻⴱⵀⴻⵜ ⵅ ⵎⵉⵏ ⴷ ⴰⵙ ⵉⵎⵙⴰⵔⴻⵏ.
11 ⴰⵎ ⵜⵓⵖⴰ ⴰⵔⵢⴰⵣ ⴰⵏⴻⵄⴹⴰⴱ ⵉⵜⵜⵛⴻⴱⴱⴰⵔ ⴷⵉ ⵛⵉⵎⵄⵓⵏ ⴷ ⵢⵓⵃⴰⵏⵏⴰ, ⴷⴷⵓⵇⵇⵣⴻⵏ ⵅⴰⵙⴻⵏ ⵎⴰⵔⵔⴰ ⵉⵡⴷⴰⵏ ⵖⴰⵔ ⵓⵙⴻⵇⵇⵉⴼ ⴰⴽ-ⴷ ⵓⴽⵓⵍⵡⴰⵔ ⴷ ⵉⴱⵉⵍⴰⵔⴻⵏ, ⵓⵎⵉ ⵇⵇⴰⵔⴻⵏ ‘ⴰⵙⴻⵇⵇⵉⴼ ⵏ ⵙⵓⵍⵉⵎⴰⵏ’, ⵜⴱⴻⵀⵜⴻⵏ.
12 ⵓⵎⵉ ⵉⵥⵔⴰ ⵛⵉⵎⵄⵓⵏ ⴰⵢⴰ, ⵉⵟⵟⴻⴼ ⴷⴻⴳ ⵡⴰⵡⴰⵍ, ⵉⵏⵏⴰ ⴰⵙⴻⵏ: “ⴰ ⵉⵔⵢⴰⵣⴻⵏ, ⵉⵃⴻⵏⵊⵉⵔⴻⵏ ⵏ ⵉⵙⵔⴰⵉⵍ, ⵎⵉⵏ ⴽⴻⵏⵏⵉⵡ ⵉⴷⴻⵄⵡⴻⵏ ⵜᵉⵜⵜⴱⴻⵀⵜⴻⵎ ⵙ ⵓⵢⴰ? ⵎⴰⵢⴻⵎⵎⵉ ⴷⴰⵢⵏⴻⵖ ⵜⴻⵊⵄⴰⵔⴻⵎ ⴰⵅⵎⵉ ⵙ ⵊⵊⴻⵀⴷ ⵏ ⵢⵉⵅⴻⴼ ⵏⵏⴻⵖ ⵏⵉⵖ ⵙ ⵚⵚⵓⵍⵟⴰ ⵏ ⵢⵉⵅⴻⴼ ⵏⵏⴻⵖ ⵏⴰⵔⵔⴰ ⵉ-ⵜ ⵉⴳⴳⵓⵔ?
13 ⴰⵔⴻⴱⴱⵉ ⵏ ⵉⴱⵔⴰⵀⵉⵎ ⴷ ⵉⵙⵃⴰⵇ ⴷ ⵢⴰⵄⵇⵓⴱ, ⴰⵔⴻⴱⴱⵉ ⵏ ⵍⴻⵊⴷⵓⴷ ⵏⵏⴻⵖ, ⴰⵇⴰ ⵉⵙⵙⵄⵓⴵⴰ ⵎⵎⵉⵙ ⵢⴰⵙⵓⵄ ⵡⴻⵏⵏⵉ ⵜⵙⴻⵍⵍⵎⴻⵎ ⵓ ⵜⵎⴻⵏⴹⴰⵔⴻⵎ ⵣⵣⴰⵜ ⵏ ⵡⵓⴷⴻⵎ ⵏ ⴱⵉⵍⴰⵟⵓⵙ ⵡⴻⵏⵏⵉ ⵜⵓⵖⴰ ⵅⴰⵙ ⵉⵃⴽⴻⵎ ⵙ ⵉⵊⵊ ⵏ ⵍⵃⵓⴽⵎ ⵉⵙⴻⴳⴳⴷⴻⵏ ⵓ ⵜⵓⵖⴰ ⵉⵅⵙ ⴰⴷ ⴰⵙ ⵢⴰⵔⵅⵓ.
14 ⵎⴰⵛⴰ ⴽⴻⵏⵏⵉⵡ ⴰⵇⴰ ⵜⴻⵎⵎⴻⵏⴹⴰⵔⴻⵎ ⴰⵎⵇⴻⴷⴷⴰⵙ ⴷ ⴰⵎⵙⴻⴳⴳⴰⴷ, ⵜⵣⴰⵡⴳⴻⵎ ⴰⴷ ⴰⵡⴻⵎ ⵉⵎⵎⴻⵡⵛ ⴰⵔⵢⴰⵣ ⴰⵇⴻⵜⵜⴰⵍ.
15 ⴰⵇⴰ ⵜⴻⵏⵖⵉⵎ ⴰⵣⴻⴵⵉⴼ ⵏ ⵜⵓⴷⴰⵔⵜ, ⵡⴻⵏⵏⵉ ⴷⴷ-ⵉⵙⵙⵏⴻⴽⴽⴰⵔ ⴰⵔⴻⴱⴱⵉ ⵣⵉ ⵜⴰⴷⴷⴰⵔⵜ ⵏ ⵉⵎⴻⵜⵜⵉⵏⴻⵏ, ⴰⵇⴰ ⵏⴻⵛⵛⵉⵏ ⵎⴰⵔⵔⴰ ⴷ ⵍⴻⵛⵀⵓⴷ ⵅ ⵎⴰⵏ ⴰⵢⴰ.
16 ⵙ ⵍ’ⵉⵎⴰⵏ ⴷⴻⴳ ⵢⵉⵙⴻⵎ ⵏⵏⴻⵙ, ⴰⵇⴰ ⵉⵙⵙⴻⵊⵀⴻⴷ ⵓ ⵉⵙⵙⴳⴻⵏⴼⴰ ⵏⴻⵜⵜⴰ ⵡⴰ, ⵡⴻⵏⵏⵉ ⵜᵉⵜⵜⵡⴰⵍⴰⵎ, ⵜⴻⵙⵙⵏⴻⵎ ⵜ. ⵍ’ⵉⵎⴰⵏ ⴷⴰⵢⴻⵙ ⴰⵇⴰ ⵉⵡⵛⴰ ⴰⵙ ⴰⴳⴻⵏⴼⵉ-ⵢⴰ ⵣⵣⴰⵜⵡⴻⵎ ⵎⴰⵔⵔⴰ.
17 ⵍⴻⵅⵅⵓ, ⴰ ⴰⵢⵜⵎⴰ, ⵙⵙⵏⴻⵖ, ⴰⵇⴰ ⵜⴻⴳⴳⵉⵎ ⴰⵢⴰ ⵙ ⵜⵇⵓⴱⴱⴰⵏⴻⵛⵜ, ⴰⵎ ⵎⴰⵎⵎⴻⵛ ⵉ ⴳⴳⵉⵏ ⵓⵍⴰ ⴷ ⵉⵎⴻⵇⵇⵔⴰⵏⴻⵏ ⵏⵡⴻⵎ.
18 ⴰⵎⵎⵓ ⴰⵇⴰ ⵉⴽⴻⵎⵎⴻⵍ ⴰⵔⴻⴱⴱⵉ ⵎⵉⵏ ⵜⵓⵖⴰ ⵉⵙⵙⵉⵣⵡⴰⵔ ⵉⵅⴻⴱⴱⴰⵔ ⵅⴰⵙ ⵙ ⵓⵇⴻⵎⵎⵓⵎ ⵏ ⵎⴰⵔⵔⴰ ⵉⵏⴰⴱⵉⵢⵢⴻⵏ ⴱⴻⵍⵍⵉ ⵍⵎⴰⵙⵉⵃ ⵉⴳⴳⵓⵔ ⴰⴷ ⵉⵡⴻⴷⴷⴻⴱ.
19 ⵙ ⵓⵢⴻⵏⵏⵉ ⵜⵓⴱⴻⵎ, ⵜⴷⴻⵡⵍⴻⵎ ⵖⴰⵔ ⵡⴻⴱⵔⵉⴷ ⵃⵉⵎⴰ ⴰⴷ ⴰⵡⴻⵎ ⵜⵜⵡⴰⵎⴻⵙⵃⴻⵏ ⴷⴷⵏⵓⴱ ⵏⵡⴻⵎ ⵓⵛⴰ ⵅⴻⵏⵏⵉ ⴰⴷ ⴷⴷ-ⴰⵙⴻⵏ ⵣⵣⵎⴰⵏⴰⵜ ⵏ ⴰⵔⵔⴰⵃⴻⵜ ⵣⵣⴰⵜ ⵉ ⵡⵓⴷⴻⵎ ⵏ ⵙⵉⴷⵉ,
20 ⵓⵛⴰ ⵏⴻⵜⵜⴰ ⴰⴷ ⴰⵡⴻⵎ ⴷⴷ-ⵉⵙⵙⴻⴽⴽ ⵡⴻⵏⵏⵉ ⵉⵡⴻⵊⴷⴻⵏ ⵉ ⴽⴻⵏⵏⵉⵡ ⵉ ⵎⴰⵏ ⴰⵢⴰ: ⵢⴰⵙⵓⵄ ⵍⵎⴰⵙⵉⵃ,
21 ⵡⴻⵏⵏⵉ ⵉⵜⵜⵅⴻⵚⵚⴰ ⵓⵊⴻⵏⵏⴰ ⴰⴷ ⵜ ⵉⵇⴱⴻⵍ ⴰⵍ ⵓⴽⴻⵎⵎⴻⵍ ⵏ ⵣⵣⵎⴰⵏⴰⵜ, ⵏ ⵎⴰⵔⵔⴰ ⵎⵉⵏ ⵅⴻⴼ ⵜⵓⵖⴰ ⵉⵙⵙⴰⵡⴰⵍ ⴰⵔⴻⴱⴱⵉ ⵙ ⵓⵇⴻⵎⵎⵓⵎ ⵏ ⵎⴰⵔⵔⴰ ⵉⵏⴰⴱⵉⵢⵢⴻⵏ ⵏⵏⴻⵙ ⵉⵇⴻⴷⴷⵙⴻⵏ ⵣⵉ ⵣⵣⵎⴰⵏ.
22 ⵎⴰⵖⴰⵔ ⵎⵓⵙⴰ ⵉⵏⵏⴰ:
‘ⵙⵉⴷⵉ ⴰⴷ ⴰⵡⴻⵎ ⴷⴷ-ⵉⵙⵙⴳⴻⵄⵄⴻⴷ ⵉⵊⵊ ⵏ ⵓⵏⴰⴱⵉ
ⴰⵎ ⵏⴻⵛⵛ ⵣⴻⴳ ⵡⴰⵡⵎⴰⵜⵡⴻⵎ.
ⵉ ⵏⴻⵜⵜⴰ ⵓⵎⵉ ⵖⴰ ⵜⴻⵙⵍⴻⵎ
ⴷⵉ ⵎⴰⵔⵔⴰ ⵎⵉⵅⴻⴼ ⴷ ⴰⵡⴻⵎ ⵉ ⵖⴰ ⵉⵙⵙⵉⵡⴻⵍ.’
23 ⴰⴷ ⵢⵉⵍⵉ ⴱⴻⵍⵍⵉ ⴽⵓⵍ ⵍⴻⵄⵎⴰⵔ
ⵉ ⵡⴰⵔ ⵉⵙⵍⵉⵏ ⵖⴰⵔ ⵓⵏⴰⴱⵉ ⵏⵏⵉ,
ⴰⴷ ⵉⵜⵜⵡⴰⵙⵙⵀⴻⵍⵍⴻⴽ ⵣⴻⴳ ⵍⴳⴻⵏⵙ.
24 ⵎⴰⵔⵔⴰ ⵉⵏⴰⴱⵉⵢⵢⴻⵏ ⵣⵉ ⵛⴰⵎⵡⵉⵍ ⴷ ⵎⴰⵔⵔⴰ ⵉⵏⴰⴱⵉⵢⵢⴻⵏ ⵏⵏⵉ ⵉ-ⵜ-ⵉ-ⴷⴷ-ⵉⵅⴻⵍⴼⴻⵏ, ⴰⵇⴰ ⵉⵣⵡⴰⵔⴻⵏ ⵅⴻⴱⴱⴰⵔⴻⵏ ⵅ ⵡⵓⵙⵙⴰⵏ-ⴰ.
25 ⴽⴻⵏⵏⵉⵡ ⴷ ⴰⵢⵜ ⵏ ⵉⵏⴰⴱⵉⵢⵢⴻⵏ ⵓ ⵏ ⵍⵄⴰⵀⴷ ⵉ ⵉⴳⴳⴰ ⴰⵔⴻⴱⴱⵉ ⴰⴽ-ⴷ ⵍⴻⵊⴷⵓⴷ ⵏⵡⴻⵎ ⵍⴰⵎⵉ ⵜⵓⵖⴰ ⵉⵇⵇⴰⵔ ⵉ ⵉⴱⵔⴰⵀⵉⵎ:
‘ⵙ ⵣⵣⴰⵔⵉⵄⴻⵜ ⵏⵏⴻⵛ ⴰⴷ ⵜⵜⵡⴰⴱⴰⵔⴽⴻⵏⵜ
ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵜⴻⵎⵎⵓⵔⵜ!’
26 ⵣⵉⵛ ⵉⴳⴳⴰ ⵏⴻⵜⵜⴰ ⵍⵄⴰⵀⴷ ⵏⵏⴻⵙ ⴰⴽⵉⴷⵡⴻⵎ ⵓⵛⴰ ⵉⵙⵙⴻⴽⴽ-ⴷⴷ ⴰⵔⴻⴱⴱⵉ ⵍⴻⵅⵅⵓ ⵎⵎⵉⵙ ⵎⴰⵃⴻⵏⴷ ⴰⴷ ⴰⵡⴻⵎ ⵉⴱⴰⵔⴻⴽ, ⵎⴰⵍⴰ ⴰⴷ ⵜⴷⴻⵡⵍⴻⵎ, ⴰⴷ ⵜᵉⵜⵓⴱⴻⵎ ⵣⵉ ⵍⵖⴰⵔ ⵏⵡⴻⵎ.”