4
Tameẓriwt wiss xemsa - Řqendiř d tnayen n tzitunin
1 Lmalak nni kidi issawařen, iɛqeb-dd uca issfaq ayi-dd am mammec dd-ssfaqan ijj n weryaz zeg yiḍeṣ nnes.
2 Netta inna ayi: “Min teẓrid?” Necc nniɣ: “Necc ẓriɣ, u xzar, ijj n řqendiř n wureɣ marra, u aqa din ijj n ṭṭebṣi n zzect x uzeǧif nnes u xas sebɛa n řefnarat, sebɛa sennej i sebɛa n ibuḍen i řefnarat i iǧan x uzeǧif nnes
3 u zzates aqa din tnayen n izemmuren, ijj ɣar uɣezdis afusi n ṭṭebṣi n zzect u ijj ɣar uzeřmaḍ nnes.”
4 Necc arriɣ-dd u ssiwřeɣ ak-d lmalak nni kidi issawařen, nniɣ: “Sidi inu, min ɛnant tmesřayin-a?”
5 Lmalak nni kidi issawařen, yarra-dd, inna ayi: “Ma war tessined cek, min ɛnant tmesřayin-a?” Necc nniɣ: “Lla, a sidi inu!”
6 Xenni yarra-dd uca issiweř-dd akidi, inna: “Wa d awař n SIDI i Zarubbabil, awař nni iqqar: ‘War iǧi s jjehd uřa s lɛunf, maca ad yiři s Arruḥ inu!’, ammu i iqqar SIDI n řɛeskarat.
7 Min teɛnid cek, a adrar ameqqran? Ad tdewřed d ict n řwaṭa zzat i wudem n Zarubbabil, maɣar netta ad dd-issuffeɣ aẓru n nnej s iɣuyyan ijehden: ‘Arḍa, arḍa ad ɣares yiři!’ ”
8 Yusa-dd ɣari wawař n SIDI, inna:
9 “Ifassen n Zarubbabil ssarsen dsas i Taddart-a, ifassen nnes ad tt kemmřen, maḥend ad tessnem aqa SIDI n řɛeskarat issekk ayi-dd ɣarwem.
10 Maɣar man wen isseḥqaran ass n tmesřayin timeẓyanin? Sebɛa n tiṭṭawin nni ggur ad farḥen, xmi ɣa ẓaren aẓru n teɣmart deg ufus n Zarubbabil, aqa atent tiṭṭawin n SIDI nni ittekken marra tammurt.”
11 Necc arreɣ-dd, nniɣ as: “Mana tnayen n izemmuren nni din ɣar uɣezdis afusi d uẓermaḍ n řqendiř?”
12 Arniɣ ṭṭfeɣ deg wawař, nniɣ as: “Min ɛnan tnayen n řefruɛ n uzemmur nni iǧan sennej i tnayen n iqudas n wureɣ, d yinni ittfarraɣen zzect s tinta nnes n wureɣ s tnayen n iqudas nni?”
13 Netta issawař-dd ɣari, inna: “Ma war tessined cek min ɛnan ina?” Necc nniɣ: “Lla, a sidi inu!”
14 Xenni inna: “Ina d tnayen n iḥenjiren i ittwadehnen s zzect nni ibedden zzat i Sidi n marra tammurt.”