4
Řxedmet n umbeccar
1 D man aya i ttɛewwřeɣ xak zzat i AREBBI d Siditneɣ Yasuɛ Lmasiḥ, wenni i ɣa iḥekmen x yinni iddaren u x yinni immuten ɣar uxecci n Tgeldit nnes:
2 barreḥ s Wawař, iři tfaqed di man aya di řweqt niɣ barra i řweqt, ṣeḥḥ, ɛaqeb, ɛřem s marra ttasiɛ n řxaḍar u s useřmed.
3 Minzi ad dd-tas ict n řweqt xmi iwdan war qebbiřen ɛad taɣuri iṣeḥḥen, maca ad ssmunen i ixef nsen aṭṭas n imesɣaren ɛlaḥsab tizi nsen, inni issareyyḥen imezzuɣen nsen.
4 Ad jemden tidett x imejjan nsen uca ad ffɣen zeg webrid ɣar tḥuja ixwan.
5 Maca cek, faq di kuřci, ksi armeḥ, egg řxedmet n umbeccar uca kemmeř řxedmet n tsexxart nnec.
Awař d useǧem aneggaru
6 Minzi necc aqa ttwazeǧɛeɣ am tewhibt n useyyeb u řmijař n twaḥit inu yiweḍ-dd.
7 Necc menɣeɣ amenɣi aṣebḥan, aqa kemmřeɣ tazzřa inu, ḥḍiɣ l’iman.
8 Xenni řexxu, ttaj n tsegda, tenni i d ayi ɣa iwc Sidi deg wass nni, xmi ɣa iḥkem imseggaden, aqa iwjed. Maca war iǧi i necc waha, maca ɛawed i marra inni ittexsen axecci nnes.
9 Cḍaret ḥima ad ɣari dd-tased deɣya.
10 Minzi Dimas ismeḥ dayi, maɣar netta ittexs ddunect n yiḍa uca iruḥ ɣar Tissalunika, u Kriskis iruḥ ɣar Galaṭiya u Titus ɣar Dalmatiya.
11 Mɣir Luka i kidi iqqimen. Awi-dd Markus uca gewwed i-t akidek, minzi ineffeɛ ayi di řxedmet n tsexxart.
12 Sekkeɣ-dd Ticikus ɣar Afasus.
13 Xmi dd ɣa tased, awi-dd akidek aqrab i idlisen ittwanḍen nni jjiɣ di Truwas ɣar Karpus uřa d idlisen, d amezwaru řemṣaḥef n ccark.
14 Aliksandir, amziř n nnḥas, tuɣa igga dayi aṭṭas n tuɛeffna. Siditneɣ ad t ixeǧeṣ ɛlaḥsab řexdayem nnes.
15 Ḥḍa ixef nnec zzayes, minzi netta tuɣa ittɛekkas awařen nneɣ aṭṭas.
16 Umi kkareɣ ad wteɣ x ixef inu twařa tamezwarut, uřa d ijj war kidi dd-yusi, maca marra semḥen d ayi. Ejj war ittiři d axeǧeṣ nsen.
17 Maca Sidi tuɣa-t ɣar uɣezdis inu uca iwca ayi jjehd, ḥima xenni zzayi i ɣa tkemmeř tbarreḥt, u marra řegnus ad sřen, aqa necc ttwafekkeɣ-dd zeg uxenfuc n wayrad.
18 Sidi ad ayi ifekk zi marra tameɛmuč taɛeffant, ad ayi iwc Tudart di Tgeldit nnes deg ijenwan, maɣar i Netta i ɣa yiři uɛuǧi i řebda qaɛ. Amin.
19 Seǧem x Priskilla d Akwila u x aytbab n taddart n Unisifurus s řehna.
20 Irastus iqqim di Kurintus u Trufimus jjiɣ t di Militus ihřec.
21 Cḍaret ad dd-tased qbeř tagrist.
Iwbulus d Pudins d Linus d Kludiya d marra awmaten ttseǧamen xak s řehna.
22 Ad yiři Siditneɣ Yasuɛ Lmasiḥ ak-d arruḥ nnec. Arḍa ad kidek yiři. Amin.