6
Imsexxaren d aytbab nsen
1 Ittxeṣṣa i marra inni iǧan sadu azayřu n tesmuɣi ad weqqaren aytbab nsen di marra, ḥima war ittiři uceqqef deg Yisem n AREBBI u di tɣuri nnes.
2 Ejj isemɣan nni ɣar iǧa imasen umnen war ten sseḥqirin ca, umi nitni d awmaten i iǧan. Maca s řɛeks ejj i-ten ad asen sexxaren mliḥ, minzi nitni umnen u aqa aten d awmaten iɛizzen, inni ɣarsen xeddmen nitni di řaman. Seřmed man aya u zeyyar xasen.
Lxaṭar n waṭṭas n wagřa
3 Maca mařa din ḥed isseřmed ict n řḥajjet nneɣni uca war yareddef ca awařen iṣeḥḥen n Siditneɣ Yasuɛ Lmasiḥ d tɣuri x mammec icuwwar ad neɛbed AREBBI s tiggʷudi,
4 aqa netta ittuff am war issin walu, iweddar deg imḥarwaḍen d imcubbecen i-dd-ittawyen řeḥsed d umenɣi d uceqqef d ict n nneyyet d taɛeffant
5 uřa d tamara i dd-yekkin zeg iwdan inni ittwaɣeccen di řeɛqeř nsen, tweddar asen ttidet, ittɣiř asen aqa arbeḥ iqqim ɣar tiggʷudi zi AREBBI. Beɛɛed xasen.
6 Maca arbeḥ nneɣ d ameqqran. Aqa-t d tiggʷudi zi AREBBI, am ɣarneɣ min neḥdaj.
7 Minzi war dd-niwi walu ɣar ddunect uca aqa nessen war nzemmar akidneɣ neksi walu zzayes.
8 S uyenni, mařa ɣarneɣ řmeɛteq d dduri, aqa neqneɛ.
9 Maca inni ixsen ad ssmunen agřa, ad wḍan deg ijarriben u di řefxux u deg waṭṭas n nnecwat tifɣař ittḍarran, tinni ittejjan iwdan ad ɣarqen deg uteḥḥi d řekḥeḍ.
10 Minzi aẓwar n marra tuɛeffna aqa t d ṭṭmeɛ n tmenyat. Aqa din ca inni tuɣa ittmeẓřin di man aya, iweddar asen l’iman uca jebbden aṭṭas n tamara i yixef nsen.
11 Maca cek, a bnadem n AREBBI, arweř zi man aya uca arzu x tsegda, x tnicant, x l’iman, x tayri, x ṣṣbar u x temhint.
12 Mneɣ amenɣi aṣebḥan n l’iman, cebbar di Tudart ittduman nni umi ɣar dd-tᵉttwařaɣid, min xef tcehded cchadet taṣebḥant zzat i waṭṭas n řechud.
13 Cehhdeɣ i cek zzat i AREBBI, wenni iwcin Tudart i marra, u zzat i Yasuɛ Lmasiḥ, wenni tuɣa icehhden cchadet taṣebḥant aṭṭas zzat i Punṭiyus Pilaṭus,
14 ḥima ad teḥḍid ttewṣeyyet břa ssuss niɣ řɛib ař dd ɣa iban Siditneɣ Yasuɛ Lmasiḥ.
15 Netta ad ittwasseḍhar di řweqt nnes: AREBBI ittwabarken, Amzemmar kuřci x marra min iǧan, Ajeǧid x marra ijeǧiden d Sidi n isiditen,
16 Wenni weḥḥdes war ifennin, Wenni izeddɣen di tfawt i war izemmar ad ɣares yadef ḥed, Wenni war iẓri bnadem niɣ izemmar ɛad ad t iẓar, i Netta umi ɣar iǧa ccan d ṣṣulṭa i řebda qaɛ. Amin.
17 Ɛřem i aytbab n wagřa di ddunect-a war ttiřin d imɛeffaren, war ttcařen x wagřa war yarekknen, maca ad ttecřen x AREBBI iddaren, wenni d aneɣ itticen marra timesřayin s ufeyyeḍ ḥima ad xaneɣ ifewwej,
18 uca ɛřem i-ten ad ggen řexdayem iṣebḥen, ad ɣarsen iřint tmegga tiṣebḥanin, ad wejden maḥend ad wcen u ad carcen.
19 Ejj i-ten ad ssarsen ammu dsas aṣebḥan i yixef nsen i řweqt i dd ɣa yasen, maḥend ad ɣarsen tiři Tudart d Tidett.
20 A Timutiyu, ḥḍa min d ac ittwawekkřen, aggʷej x řhard ixwan uřa x řɛekasat i dd-itteffɣen zi tussna issxarriqen.
21 Aqa din ca n iwdan řami seɛfen man aya, semḥen di l’iman. Ad kidek yiři arḍa! Amin.