8
Iɣellaben n Dawud
1 Awarni aya imsar aqa Dawud iɣřeb x Ifilisṭiniyyen uca yarra i-ten sadu afus nnes u Dawud ikkes řeḥkamet zeg ufus n Ifilisṭiniyyen.
2 Ɛawed iɣřeb netta x Mu’ab uca iɛbar i-ten s yijj n ufiřu n řeɛbar am zzřen di temmurt. Netta iɛbar tnayen n ifiřan n řeɛbar, ḥima ad ten ineɣ, uřa d ijj n ufiřu imun, ḥima ad ten yejj ddaren. Ammu i dewřen ayt n Mu’ab d imsexxaren i Dawud nni ittxeṣṣan ad as wcen ljizya.
3 Dawud iɣřeb ɛawed x Hadad-Ɛazar, mmis n Raḥub, ajeǧid n Ṣuba, umi tuɣa dd-iffeɣ wanita ḥima ad ɣares dd-yarr řeḥkamet nnes ɣar yeɣzar n Lfuraṭ.
4 Dawud ikkes zzayes ařef u sebɛa-mya n imnayen d ɛicrin-ařef n yeryazen x iḍaren, uca iqess Dawud iẓewran n iḍaren n marra iysan n ikarruten, maca ijja zzayes mya n iysan n ikarruten.
5 Yusa-dd Aram zi Dimacq, ḥima ad iwc afus i Hadad-Ɛazar, ajeǧid n Ṣuba, u Dawud iɣřeb x tnayen u-ɛicrin-ařaf n yeryazen n Aram.
6 Dawud igga řɛeskarat n uḥewwes jar Iramiyyen n Dimacq u Iramiyyen dewřen d imsexxaren n Dawud inni ittxeṣṣan ad as wcen tarzifin. SIDI igga ttasiɛ i Dawud mani ma iruḥ.
7 Dawud iksi tiseddariyin iqesḥen n uɛeskari nni ttwaggent s wureɣ, tinni tuɣa iǧan n imsexxaren n Hadad-Ɛazar u yiwyi tent ɣar Urcalim.
8 Iksi Dawud aṭṭas n nnḥas zi Bataḥ u zi Biratay, tineddam n Hadad-Ɛazar.
9 Umi Tuɛi, ajeǧid n Ḥamat, isřa aqa Dawud iɣřeb x marra řɛeskar n Hadad-Ɛazar,
10 issekk Tuɛi mmis Yuram ɣar ujeǧid Dawud, ḥima ad isseqsa x umeddur nnes u ḥima ad as ibarek, minzi netta immneɣ akides u iɣřeb xas, maɣar Hadad-Ɛazar tuɣa yarezzu ad immneɣ ak-d Tuɛi řebda. Netta yiwi akides deg ufus nnes řeqcuɛ n nnuqart d řeqcuɛ n wureɣ d řeqcuɛ n nnḥas,
11 inni issqeddes ujeǧid Dawud ɛawed i SIDI, imun ak-d nnuqart d wureɣ nni tuɣa issqeddes zi marra řegnus nni tuɣa yarra sadu nnes:
12 zi Aram, zi Mu’ab, zeg ayt n Ɛammun, zeg Ifilisṭiniyyen, zi Ɛamaliq uřa zi tkeccaḍt n Hadad-Ɛazar, mmis n Raxub, ajeǧid n Ṣuba.
13 Igga Dawud ɛawed ijj n yisem, umi dd-iɛqeb netta zeg řeɣřeb x Aram di Teɣzurt n Tmeǧaḥt, tmenṭac-ařef n yeryazen.
14 Netta igga řɛeskarat n uḥewwes di Idum. Di marra Idum igga řɛeskarat n uḥewwes u marra Idumiyyen dewřen d imsexxaren i Dawud. SIDI igga ttasiɛ i Dawud mani ma iffeɣ netta.
Imdebbaren imeqqranen n Dawud
15 Dawud iḥkem x marra Israil u Dawud igga s řḥeqq d tsegda i marra řgens nnes.
16 Yuwab, mmis n Ṣaruya, tuɣa-t x řɛeskar u Yahucafaṭ, mmis n Axilud, tuɣa-t d amarir n umezruy.
17 Ṣaduq, mmis n Axiṭub, d Aximalik, mmis n Abyatar, tuɣa aten d ikehhanen u Saraya tuɣa-t d amarir.
18 Banaya, mmis n Yahuyadaɛ, tuɣa-t x iɛessasen n arrimet n ujeǧid u x ireqqasen n tazřa. Iḥenjiren n Dawud tuɣa aten d ikehhanen nnes.