22
Izři n Dawud
1 Dawud issiweř awařen n izři-ya i SIDI deg wass umi t ifekk SIDI zeg ufus n marra řɛedyan nnes u zeg ufus n Cawul.
2 Netta inna:
“SIDI d Taṣḍart inu
d lburj inu d amfekki inu.
3 SIDI n Teṣḍart inu, ɣares arekkwařeɣ.
Cek d aseřqi inu
d yicc n usenjem inu,
lburj inu yuɛřan,
amcan inu n tarewřa d Amsenjam inu.
Cek tfekked ayi zi lɛunf.
4 Řaɣiɣ: Asemɣar i SIDI!,
uca ttwassnejmeɣ zi řɛedyan inu.
5 Maɣar nnḍen ayi-dd
řemwaj n řmewt,
ssiggʷedent ayi
řḥemřat n waman ihajen.
6 Iseɣwan n řaxart carfen ayi,
tixecfin n řmewt ḥṣarent ayi.
7 Di řeḥṣaret inu řaɣiɣ-dd x SIDI
u x AREBBI inu i x dd-řaɣiɣ.
Zi Zzawect Tameqqrant nnes
isřa Netta i tmijja inu
uca iɣuyyan inu udfen
ɣar imezzuɣen nnes.
8 Xenni tenhezz u tarjiji temmurt,
dsusa n ujenna
ttraḥen-dd ttasen-dd, nhezzen,
maɣar aɣḍab nnes tuɣa ittwassarɣ.
9 Ddexxan igeɛɛed-dd zeg wenzaren nnes,
timessi zeg uqemmum nnes tṣarḍ,
řefḥem itteḥduduqen ittwassarɣ zzayes.
10 Netta igga ajenna ad yaḍar,
Netta ihwa-dd.
Aqa din ijj n useynu ibbumbes
sadu iḍaren nnes.
11 Netta indeh x ijj n ukirub, iḍwa,
Netta ittwaẓar x wafriwen n usemmiḍ.
12 Netta igga taǧest ad as tenneḍ
am iɛuccuten,
ijj n wegraw n waman,
iseynuten iqelljen ibbarecnen.
13 Zi tissiqt qibač nnes
ttwassarɣen řefḥem itteḥduduqen.
14 Ijja SIDi ajjaj ad idduqqez zeg ujenna,
uca Amɛuǧi x kuřci
igga tmijja nnes ttnefrara.
15 Netta issekk fřitcat n řqews nnes
uca ibezzeɛ i-ten,
izzaryeḍ assamen uca issiggʷed i-ten.
16 Tisiwin n řebḥar dewřent ttbanent,
dsusa n ddunect dewřen ɛarran
zeg uweddeb n SIDI,
zeg usuḍi n řeɛwin zeg wenzaren nnes.
17 Isswiẓẓeḍ-dd afus nnes zi řuɛřa,
yiwi ayi, ijbed ayi-dd zeg waman mɣaren.
18 Netta ifekk ayi-dd
zi řeɛdu inu ijehden,
zeg inni d ayi icarrhen,
minzi nitni tuɣa jehden xafi.
19 Ḥṣaren ayi deg wass n arẓiyyet inu,
maca SIDI tuɣa d amɛemmed inu.
20 Netta indeh ayi ɣar ttasiɛ, issenjem ayi,
maɣar Netta tuɣa ittɛizza dayi.
21 SIDI ixřef ayi ɛlaḥsab tasegda inu,
ɛlaḥsab tazdugi n ifassen inu ixeǧeṣ ayi.
22 Maɣar necc ḥḍiɣ ibriden n SIDI,
war ḥeyydeɣ ca x AREBBI inu s uxeyyeb.
23 Maɣar marra lfarayiḍ nnes
tuɣa jar tiṭṭawin inu,
war ḥeyyideɣ ca x tweṣṣa nnes.
24 Dewřeɣ kemřeɣ i Netta,
ḥḍiɣ ixef inu zi řmuɛṣiyyet inu.
25 SIDI ixřef ayi anect n tasegda inu,
anect n tazdugi inu zzat i tiṭṭawin nnes.
26 I umeddukkeř amtiqqi
i teǧid d ameddukkeř d amtiqqi,
i bu-teɣruḍt ikemmřen
i teǧid Cek tkemmřed.
27 I wenni ittwassizedgen
aqa Cek d amezdag,
ak-d wenni ifarɣen, aqa tfarɣed.
28 Cek tessnejmed řgens ittwaḥṣar,
maca tiṭṭawin nnec ḍidd i imɛeffaren,
Cek ad ten tessehwid.
29 Minzi Cek d řefnar inu, a SIDI!
SIDI ittegg tafawt di taǧest inu.
30 Minzi akidek ad azzřeɣ
x ict n bandiyya,
ak-d AREBBI inu ad neggzeɣ
x ijj n řḥiḍ.
31 Abrid n Arebbi ikmeř, min iqqar SIDI
aqa ittwaṣeffa di tmessi.
Netta d aseřqi i marra
inni ɣares yarekkwařen.
32 Maɣar man wen i iǧan d Arebbi,
mɣir SIDI,
u man wen i iǧan d taṣḍart,
mɣir AREBBI nneɣ?
33 Arebbi nni d lqelɛa inu ijhed,
Netta issarxu abrid inu nican.
34 Netta igga iḍaren inu
am yinni n tudadin,
Netta yarra ayi
ad beddeɣ x řegɛudi inu.
35 Netta isseřmed ifassen inu i umenɣi,
iɣaǧen inu maḥend ad meḥḍen
ijj n řqews n nnḥas.
36 Tewcid ayi aseřqi n usenjem nnec,
s uwaḍeɛ nnec tessemɣared ayi.
37 Aqa tegged ttasiɛ i uṣurif inu sadu inu,
uca ticeɛbin inu war meyyřent.
38 Necc ḍfareɣ řɛedyan inu
uca teḥḥiɣ ten,
war dd-ttɛiqqibeɣ ař ten qḍiɣ.
39 Necc qḍiɣ ten u řebzeɣ ten,
ařami war kkaren ɛawed.
Nitni wḍan-dd sadu iḍaren inu.
40 Cek tbeysed ayi s jjehd i umenɣi,
tarrid inni ɣari dd-ikkaren
ad aḍaren sadu inu.
41 Cek tewcid ayi timejjart n řɛedyan inu,
n yinni d ayi icarrhen,
u necc areddǧeɣ ten.
42 Nitni řaɣan, maca war din tuɣi amsenjem,
řaɣan, x SIDI,
maca Netta war xasen dd-yarri.
43 Necc ssweddareɣ ten
am tɛejjajt n temmurt,
am ubeǧaɛ x ibriden
ɛejneɣ xasen u řebzeɣ ten.
44 Cek tfekked ayi
zeg imcubbecen n řgens inu,
teḥḍid ayi d azeǧif n řegnus,
ijj n řgens war t ssineɣ, ad ayi isexxar.
45 Tarwa n ijj n ubarrani
ssniɛmiřen sswaḍɛen ayi.
Mɣir řami d ayi isřa umezzuɣ nsen waha,
sřin-dd ɣari.
46 Arrawen n ijj n ubarrani fecřen,
waxxa nnḍen asen-dd lbarajat nsen.
47 Tudart i SIDI. Ad tᵉttwabarek Teṣḍart inu.
Ejj AREBBI n teṣḍart n usenjem inu
ad ittwassgeɛɛed ɣar ujenna!.
48 Arebbi wenni xafi ittentaqamen
d wenni d ayi itteggen řegnus
sadu ufus inu,
49 wenni d ayi ittfekkan
zeg ufus n řɛedyan inu,
wah, Cek tessgeɛɛaded ayi
tiwa n yinni d ayi ittḍaddan,
Cek tessenjamed ayi
zeg weryaz n řexcunet.
50 X uya, SIDI, xseɣ ad Cek qadiɣ,
xseɣ ad zehhdeɣ Isem nnec.
51 Netta igga isenjimen
n ujeǧid nnes mɣaren,
uca isscen tamexsiwt nnes icewwaren
i umedhun nnes,
i Dawud u i zzariɛet nnes i řebda.”