15
Tameɛmuč i igga Abcalum x Dawud
1 Awarni uya imsar, aqa Abcalum ijja ad as iḍebbaran ijj n ukarru d iysan d xemsin n yeryazen inni ittazzřen ɣar zzat nnes.
2 Tuɣa ittekkar Abcalum zic ɣar tuffut n řḥař uca ibedd ɣar uɣezdis n webrid ɣar tewwart n tendint. Uca imsar, meřmi ma ixs ijj n weryaz ad iraḥ s ict n ddeɛwet ɣar ujeǧid i ccreɛ, iřaɣa-dd xas ɣares, inna: “Zi man tandint cek?” Mařa wanita yarra-dd: “Amsexxar nnec zeg ict zi tqebbař n Israil”,
3 inna as Abcalum: “Xzar, ddeɛwa nnec mliḥ u nican, maca ɣar ujeǧid war iǧi uřa d ijj wenni ɣarek ɣa isřen.”
4 Abcalum yarni inna: Mři d ayi ggin d řqaḍi di temmurt, maḥend kuř aryaz wenni ɣar iǧa umcubbec niɣ ddeɛwet, ad ɣari dd-yas, necc ad as aɣeɣ tasɣart?”
5 Mařa iqarreb-dd ɣares ijj n weryaz ḥima ad as ibendeq, isswiẓẓeḍ afus nnes, iṭṭef i-t uca issudem i-t.
6 Ammu igga Abcalum ɣar marra inni iǧan zi Israil, inni dd-yusin i ccreɛ ɣar ujeǧid. Ammu yucar Abcalum uř n yeryazen n Israil.
7 Awarni arebɛa n iseggʷusa imsar aqa Abcalum inna i ujeǧid: “Ejj ayi ad uyureɣ, ad ssqefřeɣ di Ḥabrun lwaɛd inu i waɛdeɣ i SIDI.
8 Maɣar amsexxar nnec igga ijj n lwaɛd umi tuɣa zeddɣeɣ ɛad di Jacur di Aram, nniɣ: ‘Mařa SIDI ijja ayi s tidett ad dd-dewřeɣ ɣar Urcalim, xenni ad xedmeɣ i SIDI.’ ”
9 Xenni inna as ujeǧid: “Uyur di řehna!” Ikkar netta uca yuyur ɣar Ḥabrun.
10 Abcalum maca issekk iryazen x iḍaren ɣar marra tiqebbař n Israil ḥima ad inin: “Mařa kenniw tesřam i usuḍi deg uyicc n icarri, xenni ittxeṣṣa ad tinim: ‘Abcalum d ajeǧid di Ḥabrun.’ ”
11 Zi Urcalim uyuren ak-d Abcalum mitayen n yeryazen inni ittwaɛarḍen. Nitni uyuren akides di řehna nsen, war ssinen x walu.
12 Řami din iqeddem tiɣarṣa, issekk Abcalum ɛawed ɣar Axitufil, zi Jilu, wenni d amcawar n Dawud, zi tendint nnes, zi Jilu. Ammu i tedweř tmeɛmuč tmeqqar uca immarni řgens i iǧan ɣar Abcalum.
Arweř n Dawud zi Abcalum
13 Xenni dd-yusa ijj n ureqqas ɣar Dawud, inna: “Uř n kuř aryaz idweř ak-d Abcalum!”
14 Xenni inna Dawud i marra imsexxaren nnes, inni tuɣa ɣares iǧan di Urcalim: “Kkarem, ad narweř, maɣar war ittɣimi ɣarneɣ uřa d ijjen nni i ɣa injem zzat i wudem n Abcalum. Deɣyam deg wuffuɣ niɣ netta ad iqeǧeb ad xaneɣ iḥart, ad dayneɣ igg tuɛeffna uca ad iwwet tandint-a s řeqḍeɛ n ssif.”
15 Xenni nnan imsexxaren n ujeǧid i ujeǧid: “Xzar, imsexxaren nnec ad ggen ɛlaḥsab marra min ɣa yixḍar sidi inu ajeǧid.”
16 Ammu i iffeɣ ujeǧid zi tendint, ak-d marra taddart nnes deg iṣuraf nnes. Ajeǧid ijja ɛecra n tiyya maḥend ad ḥḍant taddart.
17 Umi dd-iffeɣ ujeǧid zi tendint ak-d marra řgens nnes deg iṣuraf nnes, qqimen nitni bedden ɣar řaggʷaj.
18 Marra imsexxaren ɛdun xas uřa d iɛessasen n arrimet nnes marra, u marra ireqqasen nnes n tazřa. Uřa d marra ayt n Jat, setta-mya n yeryazen nni dd-yusin deg iṣuraf nnes zi Jat, aqa kkin zzat i wudem n ujeǧid.
19 Xenni inna ujeǧid i Ittay, wenni zeg ayt n Jat: “Mayemmi texsed uřa d cek ad tuyured akidneɣ? Ɛqeb u qqim ɣar ujeǧid, maɣar cek d ijj n ubarrani, aqa cek beɛda tᵉttwassuffɣed zi temmurt nnec.
20 Iḍennaḍ i dd-tusid cek. Ma necc ad cek awyeɣ akidneɣ ass-a ḥima ad dd-teffɣed, umi i ɣa uyureɣ necc mani ma i ttwariɣ izemmar ad řaḥeɣ. Ɛqeb, awi-dd akidek aytmac. Ad kidek tiři tmexsiwt icewwaren d řaman.”
21 Maca Ittay yarra-dd x ujeǧid, inna: “S tidett am iddar SIDI u iddar sidi inu ajeǧid, deg wemcan mani ɣa yiři sidi inu ajeǧid, ma immut niɣ iddar, dinni i ɣa yiři uřa d amsexxar nnec!”
22 Xenni inna Dawud i Ittay: “Uyur xenni, ekk-dd!” Ikka xas Ittay, wenni iǧan zeg ayt n Jat, ak-d marra iryazen nnes d iḥenjiren i ɣares iǧan.
23 Marra temmurt tru umi ikka řgens. Ajeǧid iẓwa tiɣzart n Qidrun uřa d marra řgens iẓwa, ṭṭfen abrid ɣar řexřa.
24 Aqa din uřa d Ṣaduq d marra Ilawiyyen inni yarbun Ttabut n Řɛahd akides. Nitni ssarsen Ttabut n AREBBI u Abyatar igeɛɛed din ařami iqfeř uɛeddu n marra řgens zi tendint.
25 Xenni inna ujeǧid i Ṣaduq: “Arr Ttabut n AREBBI ɣar tendint. Mařa necc ufiɣ arḍa zzat i tiṭṭawin n SIDI, xenni Netta ad ayi yarr ɣar da, ad ayi yarr ad ẓarɣ Ttabut ɛawed uřa d Tazeddiɣt.
26 Maca mařa Netta ad yini: ‘Cek war d ayi dd-tusid x řxaḍar!’, aqa ayi da, ejj i-t ad kidi igg min iǧan d lemliḥ di tiṭṭawin nnes.”
27 Yarenni inna ujeǧid i ukehhan Ṣaduq: “Ma war teǧid cek d amwařaw? Ɛqeb di řehna ɣar temmurt nnec d tnayen n iḥenjiren nwem akidwem: mmic Aximaɛaṣ, d Yunatan, mmis n Abyatar.
28 Xzar, necc ad rajiɣ di řexřa ɣar manis ẓekkwan x L’Urdun, ař dd ɣa tas tebrat zzaywem ɣari.”
29 Xas uca yiwyi Ṣaduq ak-d Abyatar Ttabut n AREBBI ɣar Urcalim uca qqimen dinni.
30 Dawud igeɛɛed tasawent n wedrar n Zzitun. Iru am dd-igeɛɛed. Tuɣa azeǧif nnes ireḥḥef, yuyur x iḍaren s řeḥfa. Uřa d marra řgens i ɣares, kuř aryaz zzayes ireḥḥef azeǧif nnes, uca geɛɛden nitni, run am geɛɛden.
31 Xenni ḥajan as i Dawud, nnan: “Axitufil tuɣa-t jar inni iggin tameɛmuč x uɣezdis n Abcalum.” Uca inna Dawud: “A SIDI, sbeṭṭeř ccwar n Axitufil.”
32 Řami Dawud yiweḍ ɣar tqiccet n wedrar, mani ttnuman ad sejden zzat i AREBBI, xzar, yusa-dd Ḥucay, Ayarki, i umsagar akides s warruḍ icarrgen u s ucař x uzeǧif nnes.
33 Dawud inna as: “Mařa cek teẓwid akidi, ad xafi tiřid d ddqeř.
34 Mařa maca cek tɛeqbed ɣar tendint, ad tinid i Abcalum: ‘Necc ad iřiɣ d amsexxar nnec, a ajeǧid! Tuɣa ayi zic d amsexxar n babac, řexxu maca ad iřiɣ d amsexxar nnec!’, xenni tzemmared ad tbeḍřed ccwar n Axitufil.
35 Ma war dinni ɣarek ikehhanen Ṣaduq d Abyatar? Ad imsar ad tɛawded marra min ɣa tesřed zi taddart n ujeǧid i ikehhanen Ṣaduq d Abyatar.
36 Aqa nitni ɣarsen dinni tnayen n iḥenjiren nsen, Aximaɛaṣ, mmis n Ṣaduq, d Yunatan, mmis n Abyatar. Ad ayi dd-tessiwḍem marra awař i tesřim zzaysen.”
37 Uca Ḥucay, ameddukkeř n Dawud, yudef ɣar tendint uca uřa d Abcalum yudef ɣar Urcalim.