12
Awař n unabi Natan
1 Issekk SIDI Natan ɣar Dawud. Řami ɣares yudef netta, inna as:
“Deg ict n tendint tuɣa din tnayen n yeryazen, ijjen tuɣa ɣares agřa, wenneɣni d amezřuḍ.
2 Bu-wagřa ɣares abarru n wuǧi d ifunasen d tfunasin.
3 Amezřuḍ maca war ɣares walu mɣir ict n tḥuřit d tameẓyant i tuɣa dd-isɣa. Netta tuɣa issecca i-tt u tedweř tmeqqar ɣares u ɣar iḥenjiren nnes. Tecca zeg uřeqquz n weɣrum nnes u teswa zeg ufenjař nnes u tᵉṭṭeṣ x ifadden nnes. Tuɣa-tt i netta am yict n yeǧis.
4 Umi dd-yusa ijj n umsebrid ɣar weryaz bu-wagřa, yewɛar xas ḥima ad issewjed macca i umsebrid i ɣares dd-yusin zeg ijj n wuǧi nnes niɣ zeg ijj n ifunasen d tfunasin nnes. S uyenni iksi netta taḥuřit tameẓyant n weryaz amezřuḍ uca issewjed i-tt i weryaz nni tuɣa ɣares dd-yusin.”
5 Yarɣa uxeyyeq n Dawud aṭṭas x weryaz nni, inna i Natan: “S tidett am iddar SIDI, aryaz i iggin aya, tekkar as-dd řmewt,
6 uca taḥuřit tameẓyant ad tt ixřef arebɛa n tseqqar, minzi netta igga aya, war dayes yarḥim.”
7 Xenni inna Natan i Dawud: “Cek simant nnec d aryaz nni. Ammu i iqqar SIDI, AREBBI n Israil: Necc dehneɣ cek d ajeǧid x Israil u Necc ssnejmeɣ cek zeg ufus n Cawul.
8 Necc wciɣ ac taddart n sidi nnec d temɣarin n sidi nnec x ifadden nnec u Necc wciɣ ac taddart n Israil d Yahuda. Mařa aya drus, iři ad arniɣ wa niɣ ta i cek.
9 Mayemmi tesseḥqared awař n SIDI u teggid min iǧan d aɛeffan di tiṭṭawin nnes? Cek tenɣid Aḥitti Uriya s ssif u teksid tamɣart nnes, teggid tt d tamɣart i yixef nnec uca tenɣid aryaz nnes s ssif n ayt n Ɛammun.
10 Xenni řexxu, ssif war ittḥeyyid i řebda x taddart nnec, maɣar cek tesseḥqared ayi u teksid tamɣart n Uḥitti Uriya, ḥima ad tedweř d tamɣart nnec.
11 Ammu i iqqar SIDI: Xẓar, Necc ad xak ssekkareɣ tuɛeffna zi taddart nnec u Necc ad ac kkseɣ timɣarin nnec zzat i tiṭṭawin nnec, ad tent wceɣ i jjar nnec u netta ad iṭṭeṣ ak-d temɣarin nnec ɣar tfuct deg ujenna.
12 Maɣar cek teggid tt s tnuffra, maca Necc ad ggeɣ aya zzat i tiṭṭawin n marra Israil u ɣar tifawt n tfuct.”
13 Xas uca inna Dawud i Natan: “Necc xḍiɣ ak-d SIDI!” Inna Natan i Dawud: “SIDI iɣfar ddenb nnec, war tmettid ca.
14 Maca, umi cek tarrid řɛedyan n SIDI ad ceqqfen aṭṭas, s tidett ittxeṣṣa ad immet mmic i d ac dd-ittwarwen.”
15 Xenni yuyur Natan ɣar taddart nnes. SIDI iřqef aḥenjir i tuɣa dd-turuw temɣart n Uriya i Dawud uca idweř iḥřec aṭṭas.
Taẓaǧit n Dawud i mmis
16 Dawud yarzu AREBBI di ṭṭweɛ n uḥenjir. Iẓumm Dawud břa qeṭṭu u netta yudef, izzeř x temmurt di ǧiřet.
17 Imɣaren n taddart nnes usin-dd, bedden ɣares ḥima ad t arren ad dd-ikkar zi temmurt. Netta maca war ixs u war icci aɣrum akidsen.
18 Deg wass wiss sebɛa imsar aqa aḥenjir immut. Imsexxaren n Dawud ggʷeden ad as inin, aqa aḥenjir immut, maɣar nitni nnan: “Xzar, umi aḥenjir tuɣa iddar ɛad, nessiweř akides, maca war ɣarneɣ isři ca. Mammec i nzemmar řexxu ad as nini: ‘Aḥenjir immut’? Netta ad igg tuɛeffna deg ixef nnes.”
19 Dawud iẓra aqa imsexxaren nnes ssawařen s tḥessect jar asen u Dawud yuca illa aḥenjir tuɣa immut. Netta inna i imsexxaren nnes: “Ma immut uḥenjir?” Nitni nnan as: “Aqa immut!”
20 Xenni ikkar Dawud zi temmurt, issird, idhen ixef nnes, ibeddeř arruḍ nnes. Netta yudef ɣar Taddart n SIDI, isjed. Umi xenni yareggʷeḥ ɣar taddart, ittar aɣrum u nitni ssarsen aɣrum zzates uca icca.
21 Nnan as imsexxaren nnes: “Min teggid cek řexxu? Umi aḥenjir ɛad iddar, tẓummed di ṭṭweɛ nnes u trud. Maca awarni řami immut uḥenjir, tekkared uca teccid aɣrum.”
22 Netta yarra-dd xasen: “Umi aḥenjir ɛad iddar, ẓummeɣ u ruɣ, maɣar necc nniɣ: ‘Wi issnen, SIDI ad xafi iḥinn u aḥenjir ad iddar.’
23 Řexxu maca immut. Mayemmi ɣa ẓummeɣ ɛad? Ma zemmareɣ ad t-i-dd-arreɣ? Necc ad ɣares raḥeɣ ict n twařa, maca netta war dd ɣari ittɛiqqib.”
24 Dawud issfewwej tamɣart nnes Bat-Cabaɛ u netta yudef xas, iṭṭeṣ akides. Nettat turuw-dd ijj n uḥenjir, igga as Suliman. SIDI tuɣa ittexs i-t
25 uca igga as Yadid-Yah s ufus n unabi Natan, am mammec tuɣa ixs SIDI.
Aɣelleb x tendint n Rabba di Ɛammun
26 Yuwab immneɣ ak-d Rabba n ayt n Ɛammun u netta iḥewwes tandint n ujeǧid.
27 Xas uca issekk Yuwab ireqqasen ɣar Dawud, inna: “Necc mmenɣeɣ ak-d Rabba ṭṭfeɣ uřa d tandint n waman.
28 Smun min iqqimen n řɛeskar uca nneḍ i tendint, ṭṭef i-tt, niɣ ad ṭṭfeɣ necc tandint uca ad xas řaɣan s yisem inu.”
29 Xenni issmun Dawud marra řɛeskar, iffeɣ ɣar Rabba, immneɣ akides uca iṭṭef i-tt.
30 Ikkes ttaj x uzeǧif n ujeǧid, wenni s yijj n řewzen n ict n talint n wureɣ u xas tayaqutin iɣřan, uca tusa-dd ttaj x uzeǧif n Dawud. Netta yiwi ɛawed ict n tkeccaḍt d tameqqrant aṭṭas zi tendint.
31 Řgens nni dayes iǧan issuffeɣ i-t u iḥjem xasen s řmencarat d iyařzimen n wuzzař d ccwaqar n wuzzař uca netta ijja i-ten ad ɛdun s řkuccat n llajur. Ammu i igga netta ak-d marra tineddam n ayt n Ɛammun. Xenni iɛqeb Dawud d marra řgens ɣar Urcalim.