9
Cawul yarezzu x iɣyař uca imsagar ak-d Ṣamwil
1 Tuɣa din ijj n weryaz zi Binyamin, qqaren as Qis, mmis n Abiyil, mmis n Ṣarur, mmis n Bakurat, mmis n Afiyaḥ, ijj n weryaz zeg ayt n Binyamin, ijj n weryaz s wagřa aṭṭas.
2 Netta tuɣa ɣares ijj n mmis, qqaren as Cawul. Tuɣa-t d ameẓyan u dayes aẓri. Uřa d ijj n weryaz jar ayt n Israil war dayes tuɣi aẓri am netta. Netta yujar marra řgens s tiddi n uzeǧif.
3 Tuɣa tiɣyař n Qis, babas n Cawul, weddarent. Xenni inna Qis i mmis Cawul: “Ksi ijjen zeg imsexxaren, awyi t akidek uca kkar, arzu x teɣyař.”
4 Netta ikka x idurar n Ifrayim, ikka x temmurt n Calica, maca nitni war tent ufin. Xas uca kkin nitni x temmurt n Caɛalim, war tent ufin dinni. Xenni kkin x temmurt n Binyamin, war tent ufin dinni ɛawed.
5 Umi iwḍen nitni ɣar temmurt n Ṣuf, inna Cawul i umsexxar nnes nni tuɣa akides: “As-dd, ad neɛqeb, niɣ baba war ikessi ɛad s wemnus di teɣyař, maca dayneɣ.”
6 Wanita yarra-dd xas: “Xzar xenni, aqa ijj weryaz n AREBBI izeddeɣ di tendint-a. Aqa-t d ijj n weryaz d amcenneɛ. Marra min iqqar, itteffeɣ-dd nican. Ejj aneɣ ad ɣares nraḥ dinni, xenni ad taɣ ad aneɣ isscen abrid i ittxeṣṣa ad dayes nuyur.”
7 Xenni inna Cawul i umsexxar nnes: “Maca xzar, mařa nraḥ, min ɣa nawi xenni i weryaz nni? Maɣar aɣrum jar řeḥwayej nneɣ iruḥ. Neccin war ɣarneɣ aɣiralut i nzemmar ad newc i weryaz n AREBBI. Niɣ min ɣarneɣ nneɣni?”
8 Yarra-dd umsexxar ɛawed x Cawul, inna: “Xzar, necc ɣari da ɛad ijj n arbeɛ n ijj n ciqlu n nnuqart. Ad t wceɣ i weryaz n AREBBI, maḥend netta ad aneɣ isscen abrid.”
9 Zic tuɣa iqqar weryaz di Israil, mařa tuɣa iffeɣ ḥima ad isseqsa AREBBI: “Asem-dd, ad nuyur ɣar umwařaw!”, maɣar anabi n wass-a, zic qqaren as ‘amwařaw’.
10 Inna Cawul i umsexxar nnes: “Awař nnec iṣbeḥ! As-dd, ejj aneɣ ad nuyur!” Uca uyuren nitni ɣar tendint mani iǧa aryaz n AREBBI.
11 Umi geɛɛden nitni tsawent n tendint msagaren ak-d tebřiɣin tinni dd-iffɣen maḥend ad ayment aman uca nnan asent: “Ma amwařaw da?”
12 Nitenti arrint xasen, nnant: “Xzar, netta aqa-t diha ɣar zzat. Deɣyat, maɣar netta yusa-dd ass-a ɣar tendint, minzi řgens ass-a ad igg ict n tɣarṣt x řgeɛɛdet.
13 Xmi ɣa tadfem ɣar tandint, ad t tafem qbeř ma ad igeɛɛed ɣar řgeɛɛdet ḥima ad imun i macca, maɣar řgens war ittett mařa war dd-yusi netta, minzi netta ad igg lbaraka di tɣarṣt, xenni ɛad ad ccen inewjiwen. Geɛɛdem řexxu, minzi ass-a aqa-t d lfurṣa ad t tafem nican!”
14 Nitni geɛɛden ɣar tendint uca umi iwḍen ɣar řwesṭ n tendint, xzar, iffeɣ-dd ɣarsen Camwil, imsagar akidsen maḥend ad iggur ɣar řgeɛɛdet.
15 Minzi ijj n wass qbeř i dd-yusa Cawul, issargeb SIDI i Camwil deg umezzuɣ, inna:
16 “Tiwecca ammu di řweqt-a, ad ɣarek ssekkeɣ ijj n weryaz zi temmurt n Binyamin. Ad t tdehned d řḥakem x řgens inu Israil. Netta ad ifekk řgens inu zeg ufus n Ifilisṭiniyyen, maɣar Necc ẓriɣ řgens inu Israil u tɣuyyit nsen i usɣati tiweḍ-dd ɣari.”
17 Umi Camwil iẓra Cawul ittas-dd, yarra-dd xas SIDI: “Xzar, d wa d aryaz i x i d ac nniɣ: ‘Wa ad iḥkem x řgens inu.’ ”
18 Yuyur Cawul ɣar Camwil di řwesṭ n tewwart n tendint inna: “Scen ayi mani teǧa taddart n umwařaw.”
19 Yarra-dd Camwil x Cawul, inna: “Necc d amwařaw. Uyur ɣar zzat i wudem inu x řgeɛɛdet, ḥima kenniw ad kidi teccem ass-a. Tiwecca zic ad cek jjeɣ ad teɛdud u necc ad cek ssargbeɣ x marra min iǧan deg wuř nnec.
20 X teɣyař i d ac iweddaren ass-a ɛad třata n wussan zeg wami, war dayek ittiři bu wemnus, maɣar ttwafent nitenti. Maca wi ɣar ittraḥ marra meẓri n Israil? Ma war iǧi ɣarek u ɣar marra taddart n babac?”
21 Xenni yarra-dd Cawul, inna: “Ma war ǧiɣ necc zeg ayt n Binyamin, zi tmeẓyant qaɛ n tqebbař n Israil? Ma war teǧi řaǧ inu tamuqřiřt qaɛ zi marra řaǧat n teqbič n Binyamin? Mayemmi kidi tessawařed awařen am ina?”
22 Camwil iksi Cawul d umsexxar nnes akides, issidef i-ten deg wexxam n arwa, issɣim i-ten deg wemcan amezwaru jar inewjiwen. Tuɣa nnyarwen amenni třatin n yeryazen.
23 Xenni inna Camwil i ugezzar: “Awi-dd řexxu tasɣart i d ac wciɣ, tenni x d ac nniɣ: ‘Ejj i-tt ɣarek!’ ”
24 D agezzar issgeɛɛed taɣruḍt ak-d marra min xas iǧan, issars i-tt zzat i Cawul, inna: “Xzar, aya min iceṭṭen. Egg i-tt zzatek ad tecced, minzi ittwaḥḍa i tsaɛɛet-a, umi nniɣ: ‘Necc ɛarḍeɣ x řgens.’ ” Uca icca Cawul ak-d Camwil deg wass nni.
25 Xenni hwan-dd nitni zi řgeɛɛdet ɣar tendint u netta issiweř ak-d Cawul x tzeqqa.
26 Kkaren zic, uca imsar, ɣar řefjar n wass, aqa iřaɣa-dd Camwil x Cawul i tuɣa iǧan x tzeqqa, inna: “Kkar, necc xseɣ ad cek ssqebbḍeɣ!” Xenni ikkar Cawul uca ffɣen s tnayen idsen ɣar barra, netta ak-d Camwil.
27 Umi dd-hwan nitni ař ṭṭarf n tendint, inna Camwil i Cawul: “Ini i umsexxar ad ibeɛɛed zzat i wudem nneɣ!” Xenni iggʷej netta. Inna Camwil: “Qqim řexxu, bedd da u necc ad ac iniɣ awař n AREBBI.”