27
Dawud di temmurt n Ifilisṭiniyyen
1 Inna Dawud deg wuř nnes: “Řexxu ɛad ijj n wass uca ad ttwanɣeɣ x ufus n Cawul. War iqqim ḥaca ad arewřeɣ deɣya ɣar temmurt n Ifilisṭiniyyen, maḥend ad iqḍeɛ i Cawul řayas zi jjihet inu maḥend ad xafi yarzu ɛad ktar di marra tammurt n Israil. Ammu i ɣa nejmeɣ i ufus nnes.”
2 Dawud ikkar, netta d setta-mya n yeryazen nni tuɣa ɣares iǧan, ɛdun ɣar mmis n Maɛuk, ajeǧid n Jat.
3 Iqqim Dawud ɣar Axis, netta d yeryazen nnes, kuř aryaz ak-d taddart nnes. Dawud izdeɣ din ak-d tnayen n temɣarin nnes, Axinuɛam zi Yazraɛil u Abijayil, tamɣart n Nabal, zi Karmil.
4 Umi nnan i Cawul, aqa Dawud yarweř ɣar Jat, war yarni iqqim ad xas yarzu ɛad ktar.
5 Inna Dawud i Axic: “Mařa ufiɣ necc řxaḍar di tiṭṭawin nnec, xenni ewc ayi ijj n wemcan deg ict zi tneddam nnec n temmurt, ḥima zemmareɣ ad zedɣeɣ din. Mayemmi i ɣarek i ɣa izdeɣ umsexxar nnec akidek di tendint n ujeǧid?”
6 Deg wass nni iwca as Axic tandint n Ṣiqlaɣ. S uya tuɣa teǧa Ṣiqlaɣ n ijeǧiden n Yahuda ař ass-a.
7 Ussan i ikka Dawud di temmurt n Ifilisṭiniyyen, tuɣa d ijj n useggʷas d arebɛa n iyuren.
8 Dawud iffeɣ ak-d iryazen nnes u nitni keccḍen Ijacuriyyen d Ijarziyyen d ayt n Ɛamaliq, minzi ina tuɣa zeddɣen zeg wecḥař uya di temmurt, jjihet n Cur ař tammurt n Miṣra.
9 Dawud iwta tammurt u war ijji ad iddar uřa d ijj n weryaz niɣ uřa d ict n temɣart. Iṭṭef ɛawed uǧi d ifunasen d tfunasin d yeɣyař d iřeɣman d warruḍ uca iɛqeb, yusa-dd ɣar Axic.
10 U Axic inna: “Mani truḥem ass-a maḥend ad tkeccḍem?” Inna Dawud: “Ɣar ljanub n Yahuda!”, niɣ: “Ɣar ljanub n temmurt n Iyarḥamitiliyyen!”, niɣ: “Ɣar ljanub n temmurt n Iqiniyyen!”
11 War ijji Dawud ad iddar uřa d ijj n weryaz niɣ uřa d ict n temɣart ḥima ad dd-yas ɣar Jat. Inna: “Ḥima nitni war xaneɣ ttɛiwiden walu, ad inin: ‘Ta i igga Dawud!’ ” Ammu i iqqim ittegg di marra ussan i ikka di jjwayeh n Ifilisṭiniyyen.
12 Axic ittiqq di Dawud, inna: “S tidett netta issarzeg ixef nnes ɣar řgens nnes, ɣar Israil, uca x uyenni aqa netta ad yiři d amsexxar inu i řebda.”