16
Dawud ittwadhen am ujeǧid
1 Xenni inna SIDI i Camwil: “Mecḥař d acḍan i yeǧan ɛad ɣarek x Cawul, wenni ggiɣ Necc d ajeǧid x Israil? Ɛemmar icc nnec s zzect, uca tuyured. Necc ad cek ssekkeɣ ɣar Yassa zi Bayt-Laḥm, minzi jar arraw nnes aqa ẓriɣ ijj n ujeǧid i Necc.”
2 Maca Camwil inna: “Mammec i ɣa ggeɣ ad din raḥeɣ? Mařa iseř x man aya Cawul, ad ayi ineɣ.” Yarra-dd SIDI: “Ksi ict n tɛejmit zeg ifunasen akidek, ad tinid: ‘Necc usiɣ-dd ḥima ad qeddmeɣ ict n tɣarṣt d tawhibt i SIDI.’
3 Ittxeṣṣa ad tɛarḍed x Yassa ɣar tewhibt u Necc ad cek ssargbeɣ x min i ittxeṣṣan ad tegged. Cek ad tdehned wenni i d ac ɣa iniɣ.”
4 Camwil igga min tuɣa d as inna SIDI. Umi dd-yusa ɣar Bayt-Laḥm, ffɣen-dd ɣares imɣaren n tendint ttarjijin, nnan: “Ma tawasit nnec s řehna?”
5 Netta inna: “S řehna. Necc usiɣ-dd ḥima ad qeddmeɣ ict n tɣarṣt d ṣṣedqet i SIDI. Qeddsem ixef nwem u asem-dd akidi ɣar ṣṣedqet. Netta iqeddes Yassa d iḥenjiren nnes uca iɛarḍ i-ten ɣar tewhibt n tɣarṣt.
6 Uca imsar umi dd-usin nitni, iẓra netta Iliyab uca ixarreṣ: “D wa s tidett ɣar SIDI d amedhun nnes.”
7 SIDI maca inna i Camwil: “War xezzar ca ɣar waddud nnes uřa ɣar řuɛřa nnes n tiddi, minzi Necc nḍareɣ t, maɣar war itthimmi ca min ɣar ixezzar bnadem, minzi bnadem ittwařa min iǧan zzat i tiṭṭawin nnes, maca SIDI ittwařa uř.”
8 Xenni iřaɣa Yassa x Abinadab, ijja i-t ad iɛdu x Camwil, maca netta inna: “Wanita ɛawed war t yixḍar SIDI.”
9 Xas uca ijja Yassa ad xas iɛdu Camma, maca netta inna: “Wanita ɛawed war t yixḍar SIDI.”
10 Ammu i ijja Yassa ad ɛdun sebɛa n iḥenjiren nnes x Camwil, maca Camwil inna i Yassa: “Ina war ten ixḍar ca SIDI.”
11 Xenni inna Camwil i Yassa: “Ma d ina marra iḥudriyyen nnec?” Netta yarra-dd xas: “Amaẓuẓ iqqim ɛad, aqa yarekkwes uǧi.” Inna Camwil i Yassa: “Sekk ijj maḥend ad t-i-dd-yawi, minzi neccin war nettquwwir ca i ṭṭabřa qbeř i dd ɣa yas netta.”
12 Netta issekk ijj maḥend ad t-i-dd yawi. Netta tuɣa d arrubyu u tuɣa ɣares tiṭṭawin cnant u tuɣa d muṣbiḥ i řxezrat. Xenni inna SIDI: “Kkar, dehn i-t, maɣar aqa d wa.”
13 Uca iksi Camwil icc s zzect, idehn i-t di řwest n aytmas. Uca Arruḥ n SIDI ihwa x Dawud zeg wass nni d tsawent. Camwil ikkar, yareggʷeḥ ɣar Rama.
Dawud ittirar x řgambri i Cawul
14 Arruḥ n SIDI tuɣa iḥeyyed x Cawul u ijj n řaryah d aɛeffan zi ɣar SIDI issiggʷed i-t.
15 Nnan as imsexxaren n Cawul: “Xzar, ijj n řaryah d aɛeffan n AREBBI issiggʷed i cek.
16 Ejj ad yini siditneɣ i imsexxaren nnec inni ibedden zzat i wudem nnec, maḥend ad arzun x ijj n weryaz ittḥakan di řgambri. Mařa iṭṭef i cek řaryaḥ aɛeffan n AREBBI, ejj i-t xenni ad yirar netta s ufus nnes di řgambri, ḥima ad tiřid mliḥ.”
17 Xenni inna Cawul i imsexxaren nnes: “Arzum ayi-dd x ijj n weryaz nni ittiraren mliḥ x řgambri u awyem t-i-dd da ɣari!”
18 Ijjen zeg imsexxaren yarra-dd xas, inna: “Aqa ẓriɣ ijj n mmis n Yassa zi Bayt-Laḥm wenni izemmaren ad yirar mliḥ. Netta d ijj n bu-teɣruḍt imeḥḍen d ijj n weryaz aɛeskari, issen ad ixḍar awařen nnes. Aqa-t d ijj n weryaz d aṣebḥan n waddud u SIDI akides.”
19 Issekk Cawul ireqqasen ɣar Yassa, inna: “Sekk ayi-dd mmic Dawud wenni iǧan ak-d wuǧi.”
20 Yassa iksi ijj n weɣyuř ak-d weɣrum d ict n tecyart n binu d ijj n iɣayḍ d ameẓyan zeg iɣayḍen uca issekk aya s ufus n mmis Dawud ɣar Cawul.
21 Ammu dd-yusa Dawud ɣar Cawul uca ibedd zzat i wudem nnes u netta ittexs i-t aṭṭas. Netta idweř d aḥemmař n řesnaḥ nnes.
22 S uyenni issekk Cawul ɣar Yassa maḥend ad as yini: “Ttzawgeɣ cek, ejj Dawud ad iqqim ibedd zzat i wudem inu, maɣar netta yufa arḍa di tiṭṭawin inu.”
23 Meřmi ma dd-yusa řaryaḥ d aɛeffan n AREBBI ɣar Cawul, iksi Dawud řgambri uca ibda ittirar dayes s ufus nnes. D man aya dd-yarrin nnefs ɣar Cawul ařami idweř mliḥ, uca xenni iḥeyyed xas buḥbeř aɛeffan.