1 Ṣamwil
1
Taẓaǧit n Ḥanna
1 Tuɣa din ijj n weryaz zi Ramatayim-Ṣufim, zeg idurar n Ifrayim, qqaren as Ilqana, mmis n Yaruḥam, mmis n Alihu, mmis n Tuḥu, mmis n Ṣuf, ijj n weryaz zi Ifrayim.
2 Netta tuɣa ɣares tnayen n temɣarin. Icten qqaren as Ḥanna u tenneɣnit qqaren as Faninna. Faninna tuɣa ɣares iḥenjiren, maca Ḥanna war ɣares tuɣi bu iḥenjiren.
3 Aryaz-a tuɣa ittgeɛɛad aseggʷas x useggʷas zi tendint nnes ḥima ad isjed u ad iqeddem tiɣarṣa i SIDI n řɛeskarat ɣar Taddart n SIDI di Cilu. Dinni tuɣa tnayen n iḥenjiren n Ɛali, Ḥufni d Finaḥas. Nitni d ikehhanen n SIDI.
4 Deg wass řami dd-yiwi Ilqana taɣarṣt, imsar aqa iwca tiseqqar n tɣarṣt i temɣart nnes Faninna u i marra iḥenjiren nnes d tḥenjirin nnes,
5 maca i Ḥanna iwca as tnayen n tseqqar, maɣar netta tuɣa ittexs Ḥanna, waxxa SIDI tuɣa ibelleɛ as řemřawet.
6 Taɣrimt nnes tuɣa tseɛɛar i-tt aṭṭas maḥend ad tt tessfugem, minzi SIDI tuɣa ibelleɛ as řemřawet.
7 Ammu i igga Ilqana aseggʷas x useggʷas. Uca meřmi ma tᵉttgeɛɛed Ḥanna akides ɣar Taddart n SIDI, tseɛɛar i-tt Faninna u nettat tru, war tecci walu.
8 Xenni inna aryaz nnes Ilqana: “Ḥanna, mayemmi tᵉttrud, mayemmi war tᵉttᵉtted ca u mayemmi uř nnem icḍen? Ma necc war d am cniɣ x ɛecra n iḥenjiren?”
9 Deg ijj n wass, awarni umi tecca u teswa di Cilu, tekkar Ḥanna. Tuɣa akehhan Ɛali iqqim x řkursi ɣar tefřawt n uɣezḍis n tewwart n Zzawect n SIDI.
10 Tuɣa řeɛmar n Ḥanna yarzeg, tᵉẓẓuǧ ɣar SIDI, tru aṭṭas.
11 Nettat tegga ijj n lwaɛd, tenna: “A, SIDI n řɛeskarat, mařa Cek texzared s tidett ɣar řemḥayen n tayya nnec u txarrṣed dayi u war tᵉttᵉttud tayya nnec, ad tewced i tayya nnec ijj n uḥenjir d awtem, xenni ad t wceɣ i SIDI min ɣa yekk iddar uca uřa d ijj n řmus war ittḥeffi i uzeǧif nnes.”
12 Umi tekka aṭṭas tᵉttẓaǧa zzat i wudem n SIDI, imsar, aqa Ɛali iḥḍa aqemmum nnes.
13 Tuɣa Ḥanna tessiweř deg wuř nnes, iyencicen nnes ttenhezzan waha, maca tmijja nnes tuɣa war tᵉttwaseř. Ɛali ittɣiř as tescar.
14 Inna as Ɛali: “Mecḥař ɛad i ɣa teqqimed tescared? Kkes xam ssekra nnem!”
15 Ḥanna tarra-dd xas, tenna: “Lla, sidi inu, necc d ict n temɣart s buḥbeř icḍen. Necc war swiɣ binu uřa d ccrab, maca farrɣeɣ uř inu zzat i wudem n SIDI.
16 War ḥesseb ca tayya nnec d ict n tyeǧit i war tsekkʷi, maɣar ař i řexxu ssiwřeɣ waha zi řhemm inu ameqqran u zi tiqqest n wuř inu.”
17 Ɛali yarra-dd xas, inna: “Uyur di řehna uca AREBBI n Israil ad am iwc min zzayes tᵉttared.”
18 Nettat tenna: “Iři ad taf tayya nnec d aḥinni zzat i tiṭṭawin nnec!” Xenni tuyur temɣart abrid nnes, tecca u tuɣa aɣembub nnes war icḍin ɛad.
19 Ɣar tuffut n ṣṣbeḥ kkaren zic, bendqen zzat i wudem n SIDI uca ɛeqben ɣar taddart nsen di Rama. Tuɣa Ilqana iṭṭeṣ ak-d Ḥanna, tamɣart nnes, uca SIDI ixarreṣ dayes, di Ḥanna.
Axřaq n Ṣamwil
20 Umi ɛdun wussan awarni řami teksi Ḥanna s ddeyset, turuw-dd ijj n uḥenjir. Tegga as Camwil, umi nettat tenna: “Maɣar necc ttareɣ t zi SIDI.”
21 Uca aryaz nni, Ilqana, igeɛɛed ɛawed ak-d marra inni n taddart nnes, ḥima ad yawi taɣarṣt n kuř aseggʷas d tɣarṣt nnes n lwaɛd i SIDI.
22 Maca Ḥanna war kidsen tgiɛɛid ca, maca tenna i weryaz nnes: “Xmi d as ɣa kkseɣ uṭṭuḍ i useymi, xenni ad t-i-dd-awyeɣ din, uca ad iḍhar uḥenjir zzat i wudem n SIDI u netta ad iqqim dinni i řebda.”
23 Aryaz nnes, Ilqana, inna as: “Egg min tᵉttwařid mliḥ di tiṭṭawin nnem. Qqim da di taddart ař d as i ɣa tekksed uṭṭuḍ. Ad iqfeř SIDI awař nnes!” Ammu i teqqim temɣart di taddart uca tessuṭṭuḍ aḥenjir nnes ařami i d as tekkes uṭṭuḍ.
24 Awarni řami i d as tekkes uṭṭuḍ, tiwyi t akides ak-d třata n ifunasen imeẓyanen d ijj n ifa n waren d ict n txancet n binu. Nettat tiwyi t ɣar Taddart n SIDI di Cilu. Tuɣa-t aḥenjir ɛad d ameẓyan.
25 Nitni ɣarṣen i ufunas ameẓyan uca iwyen aḥenjir ɣar Ɛali.
26 Nettat tenna: “A, sidi inu, s tidett am iddar řeɛmar nnec, a sidi inu, necc d tamɣart nni tuɣa i da ibedden ɣar uɣezdis nnec, ḥima ad ẓẓaǧeɣ ɣar SIDI.
27 Necc ttareɣ aḥenjir-a u SIDI isřa i tutra inu nni zzayes ttareɣ.
28 S uyenni aqa sellmeɣ t i SIDI marra ussan min ɣa yekk iddar. Aqa immewc i SIDI.” Uca netta ibendeq din zzat i wudem n SIDI.