20
Tageldit n ařef n iseggʷusa
1 Uca ẓriɣ ijj n lmalak nneɣni ihwa-dd zeg ujenna, ɣares tasarut n tesraft i iǧan sadu i temmurt d ict n ssnesřet tameqqrant deg ufus nnes.
2 Netta iṭṭef řhaycet, afiɣar awessar, wenni d ibřis d cciṭan uca icarf i-t i yijj n řqedd n wařef n iseggʷusa,
3 uca inḍar i-t di tesraft sadu temmurt, ibelleɛ xas uca igga xas acemmiɛ, ḥima war ittɣecci ɛad řegnus. Awarni man aya ad ittwaḍřeq ɣar cwayt n řweqt.
4 Necc ẓriɣ řekrasi n ijeǧiden uca nitni ssɣimin ixef nsen xasen, uca immewc asen řḥukm. Aqa řeɛmur-a - n yinni umi kksen izeǧifen nsen di ṭṭweɛ n cchadet n Yasuɛ d wawař n AREBBI, war sejden i řweḥc uřa i řexyař, war ṭṭifen ca řmarka x tenyart nsen uřa deg ufus nsen - aqa řeɛmur-a ddaren u ḥekmen ak-d Lmasiḥ ařef iseggʷusa.
5 Ta d tanukra tamezwarut.
6 Sseɛd d umqeddas n wenni i ɣa iṭṭfen tasɣart di tnukra tamezwarut. Řmewt wiss tnayen war ɣares tiři bu ṣṣulṭa xasen, maca nitni ad iřin d ikehhanen n AREBBI u n Lmasiḥ uca ad kis ḥekmen ařef n iseggʷusa.
Řḥukm x cciṭan ameqqran
7 Xmi ɣa iqfeř ařef n iseggʷusa, ad ittwaḍřeq cciṭan zi řeḥbes nnes,
8 uca ad dd-iffeɣ ḥima ad iɣecc marra řegnus inni iǧan ɣar arebɛa n tɣemmura n temmurt, Hajuj d Majuj, ad ten issmun i umenɣi, u řqedd nsen am yejdi n řebḥar.
9 Ḥarrcen-dd zi ṭṭarf n temmurt uca nnḍen as i řmargeḥ n řɛeskar n imqeddasen d tendint iɛizzen, uca tewḍa-dd tmessi zeg ujenna, zi zzat AREBBI, uca tecca i-ten.
10 Uca ibřis, wenni tuɣa ten iɣwan, aqa immenḍar di řebḥar n tmessi ittcefcufen s řecbareyyet mani iǧa řweḥc d unabi issxarriqen uca ad ttwaɛeddben ass d ǧiřet i řebda qaɛ.
Řḥukm x imettinen
11 Uca ẓriɣ ijj n řɛarc d ameqqran d acemřař d Wenni xas iqqimen, aqa zi arendad n uɣembub nnes tarweř temmurt d ujenna, maca war d asen iqqim bu wemcan.
12 Necc ẓriɣ imettinen bedden zzat i řɛarc, imeqqranen d imeẓyanen. Aqa nnurzmen idlisen ittwanḍen uca innurzem wedlis ittwanḍen nneɣni, Adlis ittwanḍen n Řḥukm. Uca ittwaḥkem x imettinen zi min yuran deg wedlis ittwanḍen x řeḥsab n řexdayem nsen.
13 Uca řebḥar iwca imettinen inni tuɣa aten dayes, uca řmewt d řaxart wcint imettinen inni tuɣa aten daysent, uca ittwaḥkem xasen, kuř ijjen anect n řexdayem nnes.
14 Řmewt d řaxart mmenḍarent di řebḥar n tmessi. Ta d řmewt wiss tnayen.
15 Mařa ittwaf ḥed war ittwazemmem deg Wedlis ittwanḍen n Tudart, immenḍar di řebḥar n tmessi.