17
Tamɣart i iqqimen x řweḥc
1 Uca yusa-dd ijjen zi sebɛa n lmalakat, tinni ɣar iǧa sebɛa n ṭṭawyat, issiweř akidi, inna:
“As-dd, ad ac ssecneɣ řḥukm
x temɣart n farq-ccɣeř
i iqqimen x waṭṭas n waman,
2 tenni zi ssfesden ijeǧiden n temmurt
ixef nsen,
uca marra imezdaɣ n temmurt
scaren s binu n farq-ccɣeř nnes.”
3 Indeh ayi di Arruḥ ɣar řexřa uca ẓriɣ ict n tmeṭṭut tenya x ijj n řweḥc azeggʷaɣ iḥedqen, iccuren s ismawen n ttekfir, tuɣa ɣares sebɛa n izeǧifen d ɛecra n waccawen.
4 Tuɣa tameṭṭut tyarḍ taqendurt turjuwanit d tazeggwaɣt iḥedqen teqqen s wureɣ d yeẓra iɣřan d tyaqutin. Tuɣa ɣares deg ufus nnes ijj n uɣarraf n wureɣ iccur s řexmej u s nnɛi n farq-ccɣeř nnes.
5 Ittwari x tenyart nnes ijj n isem: ‘Ssirr n Babil tameqqrant, yemmatsent n temɣarin n farq-ccɣeř d marra nnɛawat n temmurt’.
6 Uca ẓriɣ tameṭṭut tescar s idammen n imqeddasen u s idammen n yinni icehhden x Yasuɛ. Ařami tt ẓriɣ, ttbehteɣ aṭṭas.
7 Inna ayi lmalak: “Mayemmi tᵉttbehted? Necc ad cek ssargbeɣ x ssirr n tmeṭṭut d řweḥc s sebɛa n izeǧifen d ɛecra n waccawen, wenni tt yarebbun.
8 Řweḥc i teẓrid, d wenni tuɣa d wenni war iǧin, ad igeɛɛed zi řebḥar, ad iweddar. Uca ad tbehten imezdaɣ n temmurt, inni isem nsen war ittwazemmem ca deg Wedlis ittwanḍen n Tudart zeg wami ittwagg dsas n ddunect, ad tbehten xmi ɣa ẓaren řweḥc wenni tuɣa, d wenni war iǧin, ɛad ad dd-iqarreb.
9 Aqa da řmeɛna nnes i wenni ɣar teǧa řefhamet: sebɛa n izeǧifen aqa d sebɛa n idurar min xef teqqim tmeṭṭut.
10 Aqa-ten uřa d sebɛa n ijeǧiden, xemsa zzaysen wḍan, ijjen aqa iǧa ɛad, d wenneɣni aqa-t ɛad war dd-yusi. Mařa netta ad dd-yas, ad as immewc drus n řweqt i iqqimen ɛad.
11 Uca řhaycet d řweḥc nni dd-yiwi u war iǧi d wenni, řhaycet nni aqa-tt d ajeǧid wiss tmenya, maca ad teffeɣ zi sebɛa nni uca ad thellek.
12 Ɛecra n waccawen i teẓrid, aqa d ɛecra n ijeǧiden, war ṭṭifen tagelda ɛad, maca ad ṭṭfen ṣṣulṭa n ijeǧiden řqedd n ict n tsaɛɛet ak-d řweḥc.
13 Nitni ɣarsen array d ijjen, ad wcen jjehd nsen d ṣṣulṭa nsen i řweḥc.
14 Ina ad mmenɣen ak-d Izmar uca Izmar ad xasen iɣřeb minzi Netta d Sidi x marra isiditen d Ujeǧid x marra ijeǧiden, u inni akides iǧan aqa-ten d inni ittwařaɣan d yinni ittwafarzen d imtiqqan.”
15 Inna ayi ɛawed: “Aman i teẓrid i x teqqim temɣart n farq-ccɣeř, aqa aten d řegnus, d ibarruten n řɣaci, d ccuɛub, d iřsawen.
16 Uca ɛecra n waccawen i teẓrid x řweḥc, nitni ad carhen tamɣart n farq-ccɣeř ad tt areddǧen, ad tt arren d taɛeryant, ad ccen aysum nnes, ad tt sscemḍen s tmessi.
17 Maɣar AREBBI iwca asen deg wuřawen nsen ḥima ad ggen nneyyet n řweḥc, u maḥend ad tt ggen s array d ijjen, uca ad wcen tagelda nsen i řweḥc ař ɣa ttwakemmřen awařen n AREBBI.
18 Uca tameṭṭut i teẓrid, nettat d tandint tameqqrant, tenni ɣar teǧa tgelda x ijeǧiden n temmurt.”