9
Arebbi d řgens nnes Israil
1 Qqareɣ tidett di Lmasiḥ, war ssxarriqeɣ ca, uca tanefsect inu tcehhed dayi s Arruḥ Iqeddsen,
2 belli ɣari acḍan imɣar d řeḥriq war ittbeddi deg wuř inu.
3 Tuɣa ttẓaǧiɣ meɛlik ufiɣ ttwaḥarrmeɣ di mummu inu x Lmasiḥ s ict nneɛřet di ṭṭweɛ n wawmaten inu, řaǧ inu zi jjihet n weysum n arrimet.
4 arrawen n Israil, inni ittwaqebřen d mmis. Ɣarsen i yeǧa uɛuǧi, řɛuhud, Ccariɛa, tasexxart i iǧan di Zzawect Iqeddsen i ɣares dd-iqqnen, lwuɛud d řejdud.
5 Zzaysen i dd-iban Lmasiḥ x webrid n weysum n arrimet wenni d AREBBI x marra. I Netta i ɣa yiři marra asemɣar d marra lbaraka i řebda qaɛ. Amin!
6 Maca war iǧi ařami awař n AREBBI war yiwiḍ, minzi marra inni zi Israil war ǧin ca d Israil.
7 Uca uřa d marra nitni war ǧin ca d tarwa n Ibrahim, minzi nitni zi zzariɛet n Ibrahim, minzi ittwanna: “Di Isḥaq ad ac řaɣan zzariɛet.”
8 Man aya war ixs ad yini aqa tarwa ɛlaḥṣab jjadira n arrimet aqa-ten d tarwa n AREBBI, maca tarwa n lwaɛd ad ttwaḥesben d zzariɛet.
9 Minzi awař n lwaɛd d wa:
“Ɣar řweqt-a ad dd-aseɣ
uca ad ɣares yiři ɣar Sara mmis!”
10 Man aya war iǧi waha di tmesřact n Sara, maca uřa di tmesřact n Rifqa, umi tmun ak-d uyenni n bnadem nni, jedditeɣ Isḥaq,
11 tuɣa tizzar tettwassen řixḍaret n AREBBI umi tuɣa ɛad war dd-xřiqen iḥenjiren nnes, war zemmaren ad ggen ɛad řxar niɣ řɣar, ḥima war tᵉttiři tmesřact deg webrid n řexdayem, maca deg webrid n wenni ittřaɣan.
12 Maɣar ittwanna i Rifqa:
“Aqa ameqqran ad isexxar i umeẓyan!”,
13 am mammec tura:
“Yaɛqub i xseɣ, maca carheɣ Isu.”
14 Min ɣa nini xenni? Ma iqedd ad yiři ɣar AREBBI min war iseggden? Ɛemmarṣ!
15 Xzar, Netta inna ɛawed i Musa:
“Ad areḥmeɣ wi xseɣ ad areḥmeɣ,
uca ad ḥinneɣ x wi xseɣ ad ḥinneɣ.”
16 Xenni tamesřact war teqqim ca ɣar wi ittexsen uřa ɣar wi ittazzřen, maca ɣar AREBBI wenni yareḥḥmen.
17 Minzi ɛlaḥsab Tira Iqeddsen inna Netta i firɛun:
“Aqa i man aya ssnekkareɣ-dd cek,
ḥima ad zzayek ssecneɣ jjehd inu,
uca ad ittwabarreḥ Isem inu
di marra ddunect.”
18 Xenni Netta ad yarḥem wi ixs, uca ad isseqseḥ wi ixs.
19 Iwa, ad taɣ ad tinid: Mayemmi ittcetca ɛad, minzi wi ɣa immɛařan ak-d min ixs Netta?
20 Maca min teɛnid cek, a bnadem, wenni ittqacaḥen AREBBI? Ma min ittwaggen izemmar ad ini i wenni t iggin: “Mayemmi d ayi teggid ammu?”
21 Ma war iǧi ɣar bu-třaxt ṣṣulṭa x třaxt ḥima ad igg zeg ict n řɛejnet ict n řqecɛet i lkarama u wenneɣni i ubehdeř?
22 Maɣar AREBBI, wenni tuɣa ixs ad isscen aɣḍab nnes d jjehd nnes, issiweḍ lɣaḍab nnes s waṭṭas n ttasiɛ n řxaḍar x řeqcuɛ n weɣḍab inni ittwasswejden marra i uhellek,
23 uca ifarɣ tayri nnes x řeqcuɛ n arreḥmet inni izwar issewjed i-ten i uɛuǧi i AREBBI!
24 Maɣar neccin d inni ittwařaɣan, war iǧi zeg Wudayen waha, maca ɛawed zi řegnus.
25 Am mammec ittwanna ɛawed di Ḥuciɛa:
“Ad semmiɣ i yinni war iǧin d řgens inu
‘Řgens inu!’,
uca i yinni war iǧin d amɛizz d ‘Amɛizz!’ ”
26 Ad yiři deg wemcan mani d asen ittwařaɣa:
‘War iǧi d řgens inu!’,
belli dinni ad asen řaɣan:
‘Arrawen n AREBBI iddaren!’
27 Maca Icaɛya ibarreḥ zi jjihet n ayt n Israil:
“Mařa tuɣa řqedd n ayt n Israil
anect n ijdi n řebḥar,
mɣir min i ɣa iqqimen ad injem.”
28 “Tamesřact tbedd nican u ad tᵉttwaqfeř,
SIDI ad tt igg x temmurt.”
29 Am mammec izwar Icaɛya inna:
“Maɛlik SIDI n řɛeskarat war d aneɣ ijji
inni iqqimen ddaren,
iři nedweř am Sadum u narwes di Ɛamurra.”
30 Min ɣa nini xenni? Ma xenni řegnus inni war yarezzun tasegda, aqa ksin tasegda? Iwa, maca tasegda tenni s l’iman.
31 Maca Israil nni iḍeffaren Ccariɛa n tsegda, war yiwiḍ ca ɣar Ccariɛa n tsegda.
32 Mayemmi? Minzi tasegda nni war teǧi ca zi l’iman maca zi řexdayem n Ccariɛa, minzi nitni nderfen deg Weẓru n unedref,
33 am mammec tura:
“Aqa ad ggeɣ di Ṣihyun Aẓru i unedref
d Weẓru i uneqrad.
Marra wi zzayes i ɣa yamnen,
war ittseḍḥa.”