6
Aseɣḍeṣ di Lmasiḥ
1 Min ɣa nini xenni? Ma ad neqqim di ddenb ḥima ad immarni arḍa?
2 Ɛemmarṣ! Neccin inni immuten i ddenb, mammec ɛad dayes i ɣa neddar?
3 Ma war tessinem ca belli inni zzayneɣ ittwassɣeḍṣen di Yasuɛ Lmasiḥ, ttwassɣeḍṣen di řmewt nnes?
4 Aqa nettwanḍeř akides s useɣḍeṣ di řmewt, ḥima, am mammec dd-ittwassnekkar Lmasiḥ zi taddart n imettinen ɣar uɛuǧi n Babas, ammu i ɣa nuyur uřa d neccin di Tudart n jdid.
5 Minzi mařa nettwaẓẓu di temmurt d ijjen akides s tefras n řmewt nnes, xenni ammu i ɣa niři ɛawed d ijjen akides s tefras n tnukra nnes.
6 Aqa nessen belli bnadem nneɣ aqdim ittwaṣelleb akides, ḥima ad tebḍeř arrimet n ddenb, war ndikkwiř ɛawed d imsexxaren i ddenb.
7 Minzi wenni immuten, aqa ittwafekk zi ddnub.
8 Mařa xenni nemmut ak-d Lmasiḥ, aqa numen belli neddar ɛawed akides, ak-d Lmasiḥ.
9 Minzi nessen belli Lmasiḥ ittwassnekkar-dd zi taddart n imettinen, war ittmetti ɛawed. Aqa řmewt war xas tḥekkem ca.
10 Minzi zeg uɣezdis n řmewt i immut, aqa immut i ddnub ijj n umur, maca zeg uɣezdis n Tudart nnes, Netta iddar i AREBBI.
11 Ammu kenniw ɛawed: ḥesbem ixef nwem d imettinen i ddenb, maca d imuddaren i AREBBI di Siditneɣ Yasuɛ Lmasiḥ.
12 Xenni war ttejjim ddenb ad iḥkem di arrimet nwem ifennan, ařami ad as tᵉṭṭaɛem di nnecwat nnes,
13 uca war ttewcim iɣezdisen n arrimet nwem am dduzan i řmuɛṣiyyet, maca wcem ixef nwem i AREBBI, am iwdan inni idewřen ɣar Tudart zeg imettinen, uca wcem iɣezdisen n arrimet nwem am dduzan i tsegda n AREBBI.
14 Ddenb war xawem iḥekkem ca, minzi war teǧim sadu Ccariɛa maca sadu arḍa.
Imsexxaren n tsegda
15 Mammec xenni? Ma ad nexḍa minzi war neǧi ca sadu Ccariɛa, maca sadu arḍa? Ɛemmarṣ!
16 Ma war tessinem ca aqa kenniw d imsexxaren n wenni umi tewcim ixef nwem maḥend ad as tsexxarem s ṭṭaɛet, n wenni umi tᵉttᵉṭṭaɛem, ma i ddenb i tᵉttᵉṭṭaɛem niɣ i tsegda?
17 Tqad as i AREBBI, aqa kenniw inni tuɣa d imsexxaren i ddenb, aqa tdewřem tᵉttᵉṭṭaɛem s wuř i ddab iṣfan n useřmed i d awem ittwasellmen.
18 Řami tᵉttwafekkem zi ddenb, tdewřem d imsexxaren n tsegda.
19 Ssawařeɣ x řeḥsab řeɛqeř n bnadem x ssibbet n tuḍɛeft n weysum nwem, minzi am mammec tewcim iɣezdisen nwem d imsexxaren i řexmej d min war iseggden, amenni řexxu wcem iɣezdisen nwem d imsexxaren i tsegda d tqeddast.
20 Minzi řami tuɣa kenniw d imsexxaren n ddenb, tuɣa kenniw d iḥurriyyen zi jjihet n tsegda.
21 Man řɣiǧet i tuɣa ɣarwem řexdenni? Timesřayin i zi tᵉttseḍḥam řexxu? S minzi aneggar nsent d řmewt.
22 Maca řexxu, umi tᵉttwafekkem zi ddenb uca tdewřem d imsexxaren n AREBBI, aqa řɣiǧet nwem tᵉttwaqeddes uca uneggar nnes d Tudart ittduman.
23 Minzi řexřaṣ n ddenb d řmewt, maca tawhibt n AREBBI d Tudart ittduman s Siditneɣ Yasuɛ Lmasiḥ.