15
Inni iḍeɛfen d inni ijehden
1 Maca neccin inni ijehden, ittxeṣṣa aneɣ ad narbu tuḍɛeft n yinni iḍeɛfen, war nettiwi ca arḍa i yixef nneɣ.
2 Kuř ijjen ad issarḍa jjar nnes i tcuni d řebni.
3 Minzi Lmasiḥ ɛawed war issarḍi ca Ixef nnes, maca am mammec tura:
“Tikkwura n yinni i Cek ikkwaren,
wḍant-i-dd xafi.”
4 Minzi marra min tura zic, tura i useřmed nneɣ, ḥima s ṣṣbar d ucejjeɛ s min iǧan di Tira Iqeddsen ad ɣarneɣ yiři usitem.
5 AREBBI n ṣṣbar d ufewwej ad awem iwc maḥend ad tḥesbem ijj wenneɣni ɣares řqimet d ict di Yasuɛ Lmasiḥ,
6 ḥima s ijj n array d ict n tmijja ad tessɛuǧam AREBBI, Babas n Siditneɣ Yasuɛ Lmasiḥ.
7 S uyenni qebřem ijjen wenneɣni u ṣebrem ijjen ak-d wenneɣni, am mammec d aneɣ iqbeř Lmasiḥ ɛawed i uɛuǧi n AREBBI.
8 Maɣar ad awem iniɣ, aqa Yasuɛ Lmasiḥ idweř d amsexxar n wextan di ṭṭweɛ n tidett n AREBBI, ḥima ad iḍmen lwuɛud i iwaɛd AREBBI i řejdud,
9 u ḥima řegnus ad ssemɣaren di AREBBI x ssibbet n arreḥmet i xasen dd-tusa am mammec tura:
“S uyenni ad Cek cekkareɣ jar řegnus,
uca ad ṣebbḥeɣ Isem nnec.”
10 Uca iqqar ɛawed:
“Farḥem, a kenniw řegnus,
jmiɛ ak-d řgens nnes.”
11 Uca inna ɛawed:
“Ḥemdem SIDI, a marra řegnus,
ṣebbḥem t, a marra ccuɛub!”
12 Ɛawed Icaɛya iqqar:
“Ad yiři weẓwar n Yassa,
u Wenni dd-ikkaren
ad yiři d Azeǧif x řegnus,
ad dayes yiři usitem n řegnus.”
13 AREBBI n usitem ad kenniw iccur s řefraḥet d řehna di l’iman, ḥima ad tfeyyḍem s usitem nnes zi jjehd n Arruḥ Iqeddsen.
Bulus d amsexxar n Lmasiḥ i marra řegnus
14 Necc simant inu ttwasqenɛeɣ zi jjihet nwem, a aytma, aqa kenniw tɛemmarem s tcuni, teccurem s marra tussna, ḥima ad tessřemdem ɛawed inneɣni.
15 Maca zeg uɣezdis aqa uriɣ awem s teryast, a aytma, maḥend ad kenniw ssɛeqřeɣ, s arḍa i d ayi immewcen zi AREBBI,
16 ḥima ad iřiɣ d amsexxar n Yasuɛ Lmasiḥ i řegnus, umi ttsexxareɣ i L’Injil n AREBBI, ḥima ad tiři tɣarṣt n řegnus d tameqbuč, tᵉttwaqeddes s Arruḥ Iqeddsen.
17 S uyenni ssemɣareɣ di Yasuɛ Lmasiḥ zzat i AREBBI.
18 Minzi war zeɛmeɣ ad ssiwřeɣ deg imezzuɣen n řegnus x ca war zzayi t iggi Lmasiḥ s wawař d řxedmet.
19 S jjehd n řeɛřamat d řeɛjayeb uca s jjehd n Arruḥ n AREBBI, aqa tuɣa ggureɣ ttenḍeɣ zi Urcalim ař Illirikun uca kemmřeɣ abarreḥ n Řexbar Aṣebḥan n Lmasiḥ.
20 Di marra man aya tuɣa arezzuɣ ad barrḥeɣ s Řexbar Aṣebḥan, war iǧi mani ittwařaɣa x Yisem n Lmasiḥ qbeř, ḥima war benniɣ x dsas n wenneɣni,
21 maca am mammec tura:
“Inni war zzayes ittwabarrḥen ad t ẓaren,
u yinni war xas isřin, ad amnen.”
22 S uyenni tuɣa war iwiḍeɣ aṭṭas n imuren, maḥend ad ɣarwem dd-aseɣ.
23 Maca řexxu war ɣari bu ttasiɛ ḥima ad beccareɣ ɛad di jjwayeh-a u tuɣa ɛawed xseɣ ad ɣarwem dd-aseɣ aṭṭas n iseggʷusa zeg wami.
24 Xmi ɣa raḥeɣ ɣar Seppanya, ssitimeɣ ad ɣarwem dd-aseɣ, ad kenniw ẓareɣ, u ad zzaywem ttwassqebbḍeɣ ɣar dinni, awarni řami i ɣa arreɣ meẓri cwayt umi i ɣa ẓriɣ kenniw.
25 Maca řexxu aqa ruḥeɣ ɣar Urcalim, ḥima ad sexxareɣ i imqeddasen.
26 Minzi tuɣa yarḍa i yinni iǧan di Makiduniya d Axaya ad ggen ca n twiza i imqeddasen imezřaḍ nni iǧan di Urcalim.
27 Tuɣa arḍan x man aya, maca tuɣa t ɛawed daysen d amarwas. Minzi mařa tuɣa řegnus carcen di min ɣarsen d agřa x řeḥsab n Arruḥ, aqa-t ɛawed d amarwas di řegnus maḥend ad ten sexxaren s min ɣarsen d agřa x řeḥsab ddat.
28 Xmi ɣa kemmřeɣ tasexxart-a uca ad asen ssiwḍeɣ řɣiǧet n twiza-ya s řaman, ad dd xawem kkeɣ d abrid xmi ɣa raḥeɣ ɣar Seppanya.
29 Maca ssneɣ belli, mařa usiɣ-dd ɣarwem, ad dd-aseɣ s řmud iccuren s lbaraka n L’Injil n Lmasiḥ.
30 Ttareɣ zzaywem, a aytma, s Siditneɣ Yasuɛ Lmasiḥ uca s tayri n Arruḥ, ad tbeddem nican akidi di tẓaǧit ɣar AREBBI x ssibbet inu,
31 ḥima ad ttwafekkeɣ zeg inni war yuminen ca di Yahudiyya, ḥima ad tiři tsexxart inu i imqeddasen di Urcalim d tameqbuč,
32 ḥima ad ɣarwem dd-aseɣ ccureɣ s řefraḥet s array n AREBBI uca ad ɣarwem areyyḥeɣ.
33 AREBBI n řehna ad kiwem yiři marra idwem. Amin.