13
Awaḍeɛ i ṣṣulṭa
1 Ejj kuř ijj ad iwaḍeɛ i ṣṣulaṭat inni iǧan s lɛaḍama, minzi war din ṣṣulṭa mɣir s AREBBI, uca ṣṣulaṭat tinni iǧan, aqa issbedd i-tent AREBBI.
2 S uya wenni i ɣa immɛařan ak-d ṣṣulṭa, ittemɛařa ak-d min issbedd AREBBI, d yinni ittemɛařan ad ksin řḥukm nsen.
3 Minzi řquḍat war ǧin i tiggʷudi n yinni itteggen řxar, maca n yinni itteggen řɣar. Ma texsed ad tiřid břa tiggʷudi zi ṣṣulṭa n řquḍat? Egg min icnan, ad ac yiři ccan zzayes,
4 minzi ṣṣulṭa d tamsexxart n AREBBI i řefḍeř nnec. Maca mařa teggid řɣar, ggʷed, minzi ṣṣulṭa war tbekkes ca ssif baṭeř umi nettat d tamsexxart n AREBBI, aqa tneqqem s weɣḍab iqesḥen x yinni itteggen řɣar.
5 S uya ittxeṣṣa aneɣ ad neṭṭaɛ, war iǧi x ssibbet n weɣḍab waha, maca ɛawed x ssibbet n tnefsect.
6 X ssibbet-a tᵉttxeǧṣem ḍḍariba i kuř azeǧif umi nitni d imsexxaren n AREBBI i ittwaggen i man aya simant nnes.
7 X uya, wcem i marra min d asen ittxeṣṣan: ḍḍariba i wenni umi dd-tusa ḍḍariba i kuř azeǧif, řexřaṣ i wenni umi dd-yusa řexřaṣ, aweqqar i wenni umi dd-yusa uweqqar, ccan i wenni isdaheǧen ccan.
Tayri d akemmeř n Ccariɛa
8 War tteggem amarwas ɣar ḥed mɣir wenni n tayri ak-d wayawya, minzi wenni ittexsen wenni d as yudsen, aqa ikemmeř Ccariɛa.
9 Minzi Ccariɛa teqqar ɛawed: “War zenni, war neqq, war tticar, war ttasem!”, uca mařa din ca n tewṣeyyet nneɣni, aqa atent munent deg wawař-a: “Ad texsed jjar nnec am ixef nnec!”
10 Tayri war ttḍarri ca jjar. S uyenni tayri nettat d řekmař n Ccariɛa.
11 Aqa ssneɣ aqa ta d řweqt d tsaɛɛet ḥima ad nfaq zeg iḍeṣ, minzi řexxu Tudart nneɣ tudes-dd ktar zeg wami nedweř numen.
12 Řexxu teɛdu ǧiřet, yiweḍ-dd uziř. Ejj aneɣ ad nessars řexdayem n taǧest, ad neksi řesnaḥ n tfawt.
13 Ejj aneɣ ad nuyur s ucuwwar axmi d aziř, war iǧi di zzhu abarcan, řa deg uɣelli, řa di texmuji n farq-ccɣeř di qama uřa deg umenɣi d řeḥsed,
14 maca arḍem Siditneɣ Yasuɛ Lmasiḥ, war tticem taynit i nnecwat n weysum nwem.