6
Taẓaǧit n Suliman ɣar udeccen n Zzawect Tameqqrant
1 Xenni inna Suliman:
“SIDI inna aqa Netta ad izdeɣ deg yijj n useynu ibbumbes.
2 S tidett necc bniɣ ict n Taddart, ict n Tzeddiɣt i Cek, ijj n wemcan imten ḥima ad din tzedɣed i řebda.”
3 Issneqřeb ujeǧid aɣembub nnes uca ibarek marra agraw n řgens n Israil umi marra agraw n řgens n Israil tuɣa ibedd.
4 Netta inna: “Ad ittwabarek SIDI, AREBBI n Israil, wenni issiwřen s uqemmum nnes ɣar baba Dawud d wenni t ikemmřen s ufus nnes umi inna:
5 ‘Zeg wass i di nedheɣ řgens inu Israil zi Miṣra, war ixḍareɣ uřa d ict n tendint zi marra tiqebbař n Israil ḥima ad dinni bniɣ Taddart ḥima ad din yiři Isem inu, u war ixḍareɣ aryaz ḥima ad yiři d řḥakem x řgens inu Israil,
6 maca řexxu ixdareɣ Urcalim, ḥima ad din yiři Isem inu, u Necc ixḍareɣ Dawud, ḥima ad yiři d řḥakem x řgens inu Israil.’
7 Tuɣa deg wuř n baba Dawud maḥend ad ibna Taddart i Yisem n SIDI, AREBBI n Israil.
8 Maca SIDI inna i baba Dawud: ‘Umi teggid deg wuř nnec ḥima ad tebnid Taddart i Yisem inu, aqa mliḥ umi teggid man aya deg wuř nnec.
9 Maca war iǧi d cek i ɣa ibnan Taddart nni, maca mmic i dd-iffɣen zi tejɛinna nnec d netta i ɣa ibnan Taddart i Yisem inu.’
10 SIDI issemten awař nnes nni issiweř, maɣar necc dewřeɣ beddeɣ deg wemcan n baba Dawud u qqimeɣ x řɛarc n Israil, am mammec tuɣa issiweř SIDI, u necc bniɣ Taddart i Yisem n SIDI, AREBBI n Israil.
11 Necc ssarseɣ dinni Ttabut wenni di iǧa Řɛahd n SIDI i igga Netta ak-d ayt n Israil.”
12 Netta ibedd zzat i uɛalṭar n SIDI, arendad n marra agraw n řgens n Israil, uca netta iksi ifassen nnes ɣar ujenna.
13 Minzi Suliman tuɣa igga ict n tenhirt n nnḥas u igga i-tt di řwesṭ n řemraḥ. Tuɣa dayes xemsa n iɣaǧen n tuzzeggart, xemsa n iɣaǧen n tiru d třata n iɣaǧen n tiddi. Netta ibedd xas, ibendeq x ifadden nnes qibač i tiṭṭawin n marra agraw n řgens n Israil uca iksi ifassen nnes ɣar ujenna, inna:
14 “A SIDI, AREBBI n Israil, deg ujenna sennej u x temmurt swadday war iǧi uřa d ijj n AREBBI am Cek, wenni iḥḍan Řɛahd d tmexsiwt icewwaren i imsexxaren nnec nni igguren zzat i wudem nnec s marra uř nsen,
15 wenni iḥḍan i umsexxar nnec, baba Dawud, x min xef akides tessiwřed, minzi s uqemmum nnec i tessiwřed u s ufus nnec i t tkemmřed, am teǧa ass-a.
16 Xenni řexxu, SIDI, AREBBI n Israil, ḥḍa di ṭṭweɛ n umsexxar nnec, baba Dawud, x min xef kides tessiwřed umi tennid: ‘War ittwaqess zzayek uřa d ijj n weryaz zi zzat i wudem inu wenni iqqimen x řɛarc n Israil, min ɣa kken arrawen nnec ḥeṭṭan ad uyuren abrid nsen ɛlaḥsab Ccariɛa am mammec tuyured cek zzat i wudem inu.’
17 Xenni řexxu, a AREBBI n Israil, egg ad dewřen d tidett awařen nni tessiwřed ak-d umsexxar nnec, ak-d Dawud.”
18 “Maɣar ma s tidett ad izdeɣ AREBBI x temmurt? Xzar ajenna, wah, ajenna n ijenwan war izemmar ad Cek iksi, mecḥař s drus xenni Taddart-a i ssbeddeɣ necc!
19 Meyyeř ɣar tẓaǧit n umsexxar nnec u ɣar uḥeccem nnes, a SIDI, AREBBI inu, ḥima ad tesřed ɣar uřaɣi u ɣar tẓaǧit nni iẓẓuǧ umsexxar nnec zzat i wudem nnec.
20 Ejj tiṭṭawin nnec ad ttwarzment ass d ǧiřet tiwa i Taddart-a, tiwa i wemcan-a min xef tessiwřed aqa Isem nnec ad ittwassemten din, ḥima ad tesřed ɣar tẓaǧit i iẓẓuǧ umsexxar nnec deg wemcan-a.
21 Seř i uḥeccem n umsexxar nnec u n řgens nnec Israil, i tutra i ttẓaǧan nitni deg wemcan-a u seř Cek xenni zi Tzeddiɣt nnec, zeg ujenna, wah, seř u ɣfar.”
22 “Mařa ixḍa ijj ak-d jjar nnes u tᵉttwagg xas ict n tjaǧit, ḥima ad tt ijjuǧ u wanita yusa-dd uca ijjuǧ zzat i uɛalṭar nnec di Taddart-a,
23 seř Cek xenni deg ujenna u kkar u ḥkem x imsexxaren nnec, ḥima ad ittwaɛaqeb uɛeffan, ejj abrid nnes ad ihwa x uzeǧif nnes u egg s tsegda i umsegged u ewc i-t ɛlaḥsab tasegda nnes.”
24 “Mařa řgens nnec Israil ittwaɣřeb zzat i wudem n řeɛdu, minzi nitni xḍan akidek u nitni ad ɣarek dd-dewřen uca ad neɛmen s Yisem nnec u ad ẓẓaǧen ad ḥeccmen zzat i wudem nnec di Taddart-a,
25 seř Cek xenni zeg ujenna u ɣfar ddenb n řgens nnec Israil uca ndeh i-ten ad dd-dewřen ɣar temmurt nni i d asen tewcid u i řejdud nsen.”
26 “Mařa ajenna ittwabelleɛ ařami war din ittiři wenẓar, minzi nitni xḍan akidek, u nitni ad ẓẓaǧen am arrin azeǧif ɣar wemcan-a, ad neɛmen s Yisem nnec u ad dd-dewřen zi ddnub nsen umi ten teḥṣared Cek,
27 seř-dd Cek xenni deg ujenna u ɣfar asen ddenb n imsexxaren nnec u n řgens nnec Israil, minzi Cek tessřemded asen abrid aṣebḥan nni ittxeṣṣa ad kken, u ewc Cek xenni anẓar i temmurt nni tewcid d řwart i řgens nnec.”
28 “Mařa din řaẓ di temmurt, niɣ ṭṭaɛun, niɣ ittwassecmeḍ imendi zeg usemmiḍ, niɣ mařa din jjriḥect n wefsu niɣ tamuɣri tenni iṣarrḍen, niɣ mařa iḥṣar i-t řeɛdu ɣar tewwura nnes, niɣ teřqef i-t mammec ma tegga ca n jjriḥect niɣ ca n řeḥřac,
29 seř Cek xenni min ma i ɣa iẓẓuǧ ijj n bnadem zi marra řgens nnec Israil u min ma i ɣa ittar, am ssnen nitni kuř ijj jjriḥect nsen d řeḥriq nsen, u netta iksi xenni ifassen nnes ɣar Taddart-a.
30 Wah seř Cek xenni zeg ujenna, zeg wemcan imten mani tzeddɣed, u ɣfar u ewc kuř ijj ɛlaḥsab tibridin nnes, am mammec Cek tessned uř nnes, maɣar Cek waha i issnen uř n bnadem,
31 ḥima ad Cek ggʷeden u ad uyuren di tebridin nnec marra ussan i ɣa kken ddaren x wudem n temmurt nni tewcid i řejdud nneɣ.”
32 “Uřa mařa netta d abarrani, wenni war iǧin zi řgens nnec, maca ad dd-yas di ṭṭweɛ n Yisem nnec zeg ict n temmurt tiggʷej di ṭṭweɛ n Yisem nnec ameqqran d ufus nnec ijehden d uɣiř nnec isswiẓẓḍen, xenni mařa dd-yusin nitni, uca ad ẓẓaǧen am arrin azeǧif ɣar Taddart-a,
33 seř Cek xenni zeg ujenna, zeg wemcan imten mani tzeddɣed, u egg ɛlaḥsab marra min xef ɣarek i ɣa iřaɣa ubarrani, ḥima marra řegnus n ddunect ad ssnen Isem nnec, ḥima nitni ad cek ggʷeden, am řgens nnec Israil, u ad ssnen aqa Isem nnec ittwabarreḥ tiwa i Taddart-a i bniɣ.”
34 “Mařa řgens iffeɣ ɣar umenɣi ak-d řɛedyan nnes deg webrid i x i ten tessekked, u nitni ad ẓẓaǧen i Cek am arrin azeǧif ɣar tendint-a i tixḍared Cek, u ɣar Taddart i bniɣ i Yisem nnec,
35 seř Cek xenni zeg ujenna i tẓaǧit nsen u i uḥeccem nsen uca aɣ asen tasɣart.”
36 “Mařa nitni xḍan akidek - maɣar war iǧi uřa d ijj n bnadem i war ixeṭṭin - u Cek tesɛared xasen, ad ten tsellmed zzat i wudem n řeɛdu uca nitni ad ten nedhen d imeḥbas ɣar temmurt n řeɛdu, tiggʷej niɣ tudes i teǧa,
37 u mařa xenni ad tuben deg wuř nsen di temmurt mani ttwaḥebbsen, wah, ad tuben u ad xak dd-řaɣan di temmurt n tḥebbast nsen, ad inin: neccin nexḍa u negga min war iseggden, aqa negga tuɛeffna!,
38 wah, ad ɣarek dd-dewřen s marra uř nsen u s marra řeɛmar nsen di temmurt n řɛedyan nsen mani ttwaḥebbsen uca ad ɣarek ẓẓaǧen am arrin azeǧif ɣar temmurt nni tewcid i řejdud nsen, ɣar tendint-a i tixḍared Cek u ɣar Taddart-a i bniɣ i Yisem nnec,
39 seř Cek xenni zeg ujenna, amcan imten mani tzeddɣed, i tẓaǧit nsen u i uḥeccem nsen uca aɣ asen tasɣart. Ɣfar xenni řgens nnec min zi xak xḍan.”
40 “Xenni řexxu, AREBBI inu, ejj tiṭṭawin nnec ad iřint arzment d imezzuɣen nnec ad iřin ḥḍan i tẓaǧit deg wemcan-a.
41 Xenni řexxu, a SIDI AREBBI, adef ɣar arraḥet nnec, Cek d Ttabut n jjehd nnec. Ejj ad iřin ikehhanen nnec, a SIDI AREBBI, arḍen s usenjem, uca iři ad farḥen imtiqqan nnec s řxar.
42 A SIDI AREBBI, war tarri aɣembub n umedhun nnec, idar di tmegga n tmexsiwt icewwaren n umsexxar nnec Dawud.”