4
1 Netta igga uřa d aɛalṭar n nnḥas. Tuzzeggart nnes tuɣa-tt ɛicrin n iɣaǧen u řuɛřa nnes ɛecra n iɣaǧen.
2 Xenni igga netta tarimant ifesyen. Tuɣa řeɛbar nnes ɛecra n iɣaǧen zi ṭṭarf ař ṭṭarf nneɣni, tuɣa-tt d taquract. Tiddi nnes tuɣa-tt xemsa n iɣaǧen u ict n ufiřu n řeɛbar n třatin n iɣaǧen inneḍ as-dd.
3 Sadu nnes beddent řexyařat n ifunasen, aqa nnḍent as-dd qaɛ. Nnuwarat i war dd-ffiɣent ɛad tuɣa i d as dd-innḍen qaɛ, ɛecra di kuř ijj n uɣiř, tuɣa qqnent ak-d wayawya am quwwarent i trimant di tnayen n iseddiyyen. Nnuwarat i war dd-ffiɣent ɛad tuɣa ttwafesyent d ijjen ak-d trimant.
4 Tarimant tbedd x tenɛac n ifunasen. Třata zzaysen arrin udem nsen ɣar ccamal, třata zzaysen arrin udem nsen ɣar řɣarb, třata zzaysen arrin udem nsen ɣar ljanub u třata zzaysen arrin udem nsen ɣar ccarq. Tarimant tarsa xasen u marra zzɛenquqat nsen dewřent ɣar daxeř.
5 Tuɣa tarimant tegdar ijj n cbar n ufus u tma nnes tuɣa am mammec tteggen tma n ijj n ufenjař, am tnewwact n ict n tlillect. Teksi twawit nnes teřt-ařaf n ibatuten.
6 Igga netta ɛecra n tbanyutin uca igga xemsa zzaysent x yefus u xemsa zzaysent x uzeřmaḍ, ḥima ad daysent ssirden iziynat ittwasswejden i tɣarṣt n wecmaḍ, ssirden tent daysent. Maca tarimant tuɣa-tt i ikehhanen, maḥend ad dayes ssirden ixef nsen.
7 Netta igga ɛecra n řeqnadeř n wureɣ ɛlaḥsab lfariḍa u netta issbedd i-ten di Zzawect Tameqqrant, xemsa x yefus u xemsa x uzeřmaḍ.
8 Netta igga ɛecra n tzewḍiwin uca igga i-tent di Zzawect Tameqqrant, xemsa x yefus u xemsa x uzeřmaḍ. Igga uřa d mya n ṭṭawyat i urucci n wureɣ.
9 Netta igga řemraḥ iḥṣaren i ikehhanen d řemraḥ ameqqran ak-d tewwura i řemraḥ, uca iřeḥḥef tiwwura nsen s nnḥas.
10 Tarimant igga i-tt x uɣezdis afusi ɣar zzat, ɣar uɣezdis n ccarq, jjihet n ljanub.
11 Ḥiram igga uřa d tiydurin d iɣenjajen d ṭṭawyat i urucci. Ammu i ikemmeř Ḥuram cɣeř i řeqcuɛ i igga i ujeǧid Suliman i Taddart n AREBBI.
12 Igga tnayen n ipilaren d iquraren, d ttijan i iǧan x uzeǧif n tnayen n ipilaren, d tnayen n tracciwin ḥima ad zzaysent dřen tnayen n iquraren n ttijan i iǧan x uzeǧif n ipilaren,
13 uřa d arebɛa-mya n iremmamen i tnayen n tracciwin: tnayen n iseddiyyen i kuř tracca ḥima ad zzaysen dřen tnayen n iquraren n ttijan nni iǧan tiwa sennej x wudem n ipilaren.
14 Igga tikarrutin u x tkarrutin igga tibanyutin i usird.
15 Igga uřa d tarimant d icten, uřa d tenɛac n ifunasen sadu nnes.
16 Igga Ḥiram ak-d babas uřa d teydurin d iɣenjajen d furcayat d marra řeqcuɛ nnes, i ujeǧid Suliman, i Taddart n SIDI, zi nnḥas ittwassuydan.
17 Ajeǧid ikebb i-ten deg udewwar n L’Urdun, di třaxt igdaren jar Sukkut d Ṣaradata.
18 Suliman igga marra řeqcuɛ-a x ubarru ameqqran, ařami war beqqcen ca ɛad di řewzen n nnḥas.
19 Suliman igga marra řeqcuɛ i Taddart n AREBBI: aɛalṭar n wureɣ, tizewḍiwin min xef ittwammars weɣrum n wescan,
20 řeqnadeř ak-d řefnarat nsen nni ittxeṣṣan ad arɣen ɛlaḥsab lfariḍa zzat i Wexxam n Daxeř n Zzawect, marra zeg wureɣ izedgen.
21 Igga ɛawed nnuwwar, řefnarat d tjeqqaḍin n teftič, marra zeg wureɣ. Tuɣa-t d wureɣ qaɛ.
22 Uřa d tijeqqaḍin, ṭṭawyat i urucci, tiɣenjayin d tqedduḥin n jjawi tuɣa atent zeg wureɣ izedgen. Adaf n Taddart, tiwwura n daxeř zzat i Weqdas x Uqeddas d tewwura n Taddart n Zzawect Tameqqrant, tuɣa atent zeg wureɣ.