35
Ajeǧid Yuciya iɛeyyed Řɛid n Tɣarṣt n Useɛdu
1 Xenni igga Yuciya Řɛid n Tɣarṣt n Useɛdu i SIDI di Urcalim. Ɣarṣen i Tɣarṣt n Useɛdu deg wass wiss arbeɛṭac n uyur amezwaru.
2 Netta issbedd ikehhanen ɣar imucan n tɛessast nsen uca igga daysen uř ɣar řxedmet di Taddart n SIDI.
3 Inna i Ilawiyyen, inni isseřmaden marra Israil, inni tuɣa iqeddsen i SIDI: “Sarsem Ttabut iqeddsen di Taddart nni ibna Suliman, mmis n Dawud, ajeǧid n Israil. War d awem ittxeṣṣa ɛad ad tarbum ddqeř x tɣarḍin nwem. Sexxarem řexxu i SIDI, AREBBI nwem, u i řgens nnes Israil.
4 Swejdem ixef nwem, am tᵉttwasettfem ɛlaḥsab tudrin n ibabaten nwem, ɛlaḥsab tirbiɛin nwem, am mammec tt yura Dawud, ajeǧid n Israil, u am mammec tt yura mmis Suliman.
5 Sbeddem ixef nwem di Zzawect Iqeddsen, am tᵉttwasettfem kenniw ɛlaḥsab tirbiɛin n řaǧat n ibabaten, zzat i tawmat nwem, ayt n řgens, am tᵉttwasettfem ɛlaḥsab asettef n řaǧat n jjed n Ilawiyyen.
6 Ɣarṣem i Tɣarṣt n Useɛdu u sqeddsem ixef nwem. Swejdem tt i aytmatwem, maḥend ad ggen ɛlaḥsab awař n SIDI i immewcen s tsexxart n Musa.”
7 Iwca Yuciya uǧi, izmaren d imuyan imeẓyanen i tarwa n řgens. Marra aya tuɣa i Tɣarṣt n Useɛdu i marra inni din iǧan. Tuɣa řqedd nsen třatin-ařef, u xenni ɛawed teřt-ařaf n ifunasen d tfunasin. Marra aya i dd-yusin zeg wagřa n ujeǧid.
8 Wcin řḥukkam nnes ict n tewhibt n usgeɛɛed am tewhibt s řxaḍar i řgens, i ikehhanen u i Ilawiyyen. Ḥilqiya, Zakariyya d Yaḥiyil, imeḥḍayen n Taddart n AREBBI, wcin i ikehhanen i Tɣarṣa n Useɛdu ařfayen u-setta-mya zeg wuǧi u sennej man aya ɛad teřt-mya n ifunasen d tfunasin.
9 Kunanya, Camɛiya d Nataniyil, aytmas, d Ḥacabya, Yaɛiyil d Yuzabad, imeqqranen n Ilawiyyen, wcin i Ilawiyyen i Tɣarṣa n Useɛdu xemsa-ařaf zeg wuǧi u xenni xemsa-mya n ifunasen d tfunasin.
10 Ammu i sswejden i řxedmet. Ikehhanen tuɣa bedden deg wemcan nsen u Ilawiyyen di terbiɛin nsen, ɛlaḥsab řumur n ujeǧid.
11 Nitni ɣarṣen i Tɣarṣt n Useɛdu uca ikehhanen zeǧɛen idammen zeg ifassen nsen, u kksen Ilawiyyen zzaysent iřmawen.
12 Nitni ḥuzen iziynat i tɣarṣt n wecmaḍ ḥima ad asen tent wcen, i řefruɛ n řaǧat n ibabaten, i warrawen n řgens, ḥima ad tent wehhben d taɣarṣt i SIDI, am mammec tura deg wedlis n Musa uca ammu i iggin ak-d ifunasen d tfunasin.
13 Xenni cenfen Taɣarṣt n Useɛdu tiwa i tmessi am mammec teǧa di lqaɛida. Iziynat iqeddsen nneɣni cenfen ten di marmitat d iṭenjiren d tiqsiřin uca iwyen tent deɣya ɣar marra řgens.
14 Awarni aya sswejden uřa i yixef nsen u i ikehhanen, maɣar ikehhanen, arrawen n Harun, tuɣa řhan ak-d uwehheb n tɣarṣa n wecmaḍ d tadunt ař ǧiřet. Awarni aya sswejden Ilawiyyen i yixef nsen u i ikehhanen, arrawen n Harun.
15 Imedyazen, iḥenjiren n Asaf, tuɣa bedden deg wemcan nsen, ɛlaḥsab řumur n Dawud, Asaf, Hayman d Yadutun, amwařaw n ujeǧid, uca iɛessasen n tewwura bedden ɣar kuř tawwart. Tuɣa war ittxeṣṣi ad jjen řxedmet nsen, maɣar aytmatsen, Ilawiyyen, sswejden asen Taɣarṣt n Useɛdu.
16 Marra tasexxart n SIDI teɛdeř mliḥ deg wass nni i uḥeṭṭu n Řɛid n Tɣarṣt n Useɛdu u i uwehheb n tɣarṣa n wecmaḍ x uɛalṭar n SIDI ɛlaḥsab řumur n ujeǧid Yuciya.
17 Ayt n Israil, inni din iǧan, sswejden i Tɣarṣt n Useɛdu deg wass nni, u sebɛa n wussan ggin nitni Řɛid n Weɣrum břa Antun.
18 War din tuɣi di Israil bu Řɛid n Tɣarṣt n Useɛdu am wa zeg wussan n unabi Camwil. Uřa d ijjen zeg ijeǧiden n Israil war iggi Řɛid n Tɣarṣt n Useɛdu am mammec t igga Yuciya ak-d ikehhanen d Ilawiyyen u ak-d marra Yahuda d Israil, nni din iǧan, u ak-d imezdaɣ n Urcalim.
19 Deg useggʷas wiss tmenṭac n tgelda n Yuciya ittwagg Řɛid n Tɣarṣt n Useɛdu wanita.
20 Awarni marra aya, umi ikemmeř Yuciya Taddart, iffeɣ-dd Naxu, ajeǧid n Miṣra, ɣar Lfuraṭ ḥima ad immneɣ ak-d Karkamic. Uca Yuciya iffeɣ-dd i umsagar akides.
21 Naxu issekk-dd ɣares ireqqasen, inna: “Min din jar ayi-dd d cek, a ajeǧid n Yahuda? War iǧi ɣarek i dd ffɣeɣ ass-a, maca ɣar ict n taddart nneɣni tenni ittmenɣan akidi. Inna ayi AREBBI ittxeṣṣa ayi ad qeǧqeɣ. S uya ḥeyyed x AREBBI, wenni akidi iǧan, niɣ ad cek yareddeǧ.”
22 Maca Yuciya war issneqřeb aɣembub nnes zzayes, maca igga ixef nnes war iǧi d netta ḥima akides immneɣ, u netta war isři ɣar wawařen n Naxu inni dd yusin zeg uqemmum n AREBBI, maca yusa-dd ɣar umenɣi di teɣzurt n Majiddu.
23 Maca imjebbaden n řqews řeqfen ajeǧid Yuciya. Xenni inna ujeǧid i imsexxaren nnes: “Nedhem ayi ssenni, maɣar yezmeɣ aṭṭas!”
24 Imsexxaren nnes ksin t deg ukarru uca nedhen t deg ijj n ukarru nneɣni nni ɣares iǧa, uca iwyen t ɣar Urcalim. Immut dinni uca neḍřen t deg imeḍřan n řejdud nnes. Marra Yahuda d Urcalim ceḍnen x Yuciya.
25 Igga Irmiya ict n yezři n wecḍan x Yuciya. Ař ass-a marra imedyazen d tmedyazin ssawařen x Yuciya deg izřan nsen n wecḍan, minzi nitni ggin tt d ict n tewṣeyyet di Israil. Xzar, aqa-ten ttwazemmemen deg Izřan s Igejduren.
26 Imezruyen i iqqimen n Yuciya d tmexsiwt nnes icewwaren ɛlaḥsab min yurin di Ccariɛa n SIDI,
27 wah, imezruyen nnes, imezwura d ineggura, aqa ttwazemmemen deg wedlis n ijeǧiden n Israil d Yahuda.