33
Řeḥkamet iɛeffnen n Manassi, ajeǧid n Yahuda
1 Manassa tuɣa ɣares tenɛac n iseggʷusa umi idweř d ajeǧid. Netta iḥkem xemsa u-xemsin n iseggʷusa di Urcalim.
2 Netta igga min iǧan d aɛeffan di tiṭṭawin n SIDI, am jjɛayef n řegnus nni tuɣa issuffeɣ SIDI zi zzat n wudem n ayt n Israil zi řwart nsen.
3 Netta ibda ad iɛdeř řegɛudi nni tuɣa ihdem babas Ḥizqiya. Netta issbedd iɛalṭaren i ‘Ibaɛlen’ uca igga tirebbin n cwarti uca ibendeq zzat i marra řɛeskar n ujenna uca iɛbed asen.
4 Issbedd ɛawed iɛalṭaren di Taddart n SIDI i x inna SIDI: “Di Urcalim ad ssmetneɣ Isem inu i řebda.”
5 Netta ibna ɛawed iɛalṭaren i marra řɛeskar n ujenna di tnayen n řemraḥat n Taddart n SIDI.
6 Netta ijja ad kken iḥenjiren nnes di tmessi di Teɣzurt n mmis n Hinnum, igga s tbezgiwt d tgezzant d tseḥḥart, u yiwi-dd inni issawařen ak-d imettan d igezzanen. Igga aṭṭas min iǧan d aɛeffan di tiṭṭawin n SIDI maḥend ad t isɛar.
7 Issbedd ijj n řexyař ineqcen nni igga di Taddart n AREBBI, i x tuɣa inna AREBBI i Dawud u i mmis Suliman: “Di Taddart-a u di Urcalim, tenni farzeɣ zi marra tiqebbař n Israil, ad ssmetneɣ Isem inu i řebda.
8 Necc war ttejjiɣ aḍar n Israil ad ittwakkes ɛad zi temmurt nni uriɣ i řejdud nwem, mařa nitni mɣir ad ḥḍan marra min i d asen umureɣ maḥend ad t ggen, ɛlaḥsab marra Ccariɛa d marra tiweṣṣa d marra lfarayiḍ nni d asen immewcen s ufus n Musa.”
9 Manassa ijja Yahuda d imezdaɣ n Urcalim ad weddaren, ařami ggin d aɛeffan x řegnus i x tuɣa iqḍa SIDI zzat i wudem n ayt n Israil.
10 Iwa, SIDI tuɣa issiweř i Manassa u i řgens nnes, maca nitni war d as wcin ca taynit.
11 SIDI issekk ɣarsen ikumandaren n řɛeskar n ujeǧid n Accur. Nitni ḥebbsen Manassa s tsennarin, carfen t s tnayen n ssnaseř n nnḥas uca jjin t ad yuyur ammu ɣar Babil.
12 Umi t iḥṣar Netta ammu, izaweg wanita zzat i wudem n SIDI, AREBBI nnes, u isswaḍeɛ ixef nnes ař ṭṭarf zzat i wudem n AREBBI n řejdud nnes.
13 Iẓẓuǧ ɣares uca Netta ijja ad issarḍa Ixef nnes zzayes s tẓaǧit yuǧɣen nnes u yarra i-t-i-dd ɣar Urcalim. Xenni issen Manassa, aqa SIDI d AREBBI.
14 Awarni uya ibna řḥiḍ n barra i tendint n Dawud, ɣar uɣezdis n řɣarb n Jiḥun di teɣzurt, u ibna i-t ař Tawwart n Iseřman, iquwwar řḥiḍ uřa d Ɛufil uca issgeɛɛed Manassi řḥiḍ aṭṭas. Igga uřa d ikumandaren n řɛeskar di marra tineddam ifaryen n Yahuda.
15 Netta ikkes irebbiten iɣriben d řexyař n ṣṣanam zi Taddart n SIDI uřa d marra iɛalṭaren nni tuɣa ibna x wedrar n Taddart n SIDI di Urcalim, uca immenḍar i-ten barra i tendint.
16 Netta igga ɛawed aɛalṭar n SIDI uca iqeddem xas tiwhibin n řehna d tewhibin n uqadi uca inna i ayt n Yahuda ad ɛebden SIDI, AREBBI n Israil.
17 Maca řgens yarni ɛad yiwi tiɣarṣa x řegɛudi, maca mɣir i SIDI, AREBBI nsen, waha.
18 Imezruyyen iqqimen n Manassa d tẓaǧit nnes ɣar AREBBI nnes uřa d awařen n imwařawen nni ɣares issiwřen deg Yisem n SIDI, AREBBI n Israil, xzar, man aya marra ittwazemmem deg wedlis n imezruyen n ijeǧiden n Israil.
19 Taẓaǧit nnes d mammec ijja AREBBI ad ittwasseṣřeḥ Ixef nnes s tẓaǧit yuǧɣen nnes, uřa d marra ddnub nnes d řeɣdar nnes d imucan mani ibna řegɛudi u issbedd tirebbin n cwarti d řexyařat ineqcen qbeř ma ittwasswaḍeɛ, xzar, man aya marra ittwazemmem deg wawařen n imwařawen.
20 Manassa igga ad yareyyeḥ jar řejdud nnes. Neḍřen t di taddart nnes. Mmis Amun idweř d ajeǧid deg wemcan nnes.
Amun, ajeǧid n Yahuda
21 Amun tuɣa ɣares tnayen u-ɛicrin n iseggʷusa umi idweř d ajeǧid. Netta iḥkem tnayen n iseggʷusa di Urcalim.
22 Netta igga min iǧan d aɛeffan di tiṭṭawin n SIDI, nican am mammec t igga babas Manassa. Amun iqeddem tiɣarṣa i marra řexyařat ineqcen i tuɣa igga babas Manassa uca isexxar asen.
23 Netta war isswaḍeɛ ixef nnes zzat i wudem n SIDI, am mammec isswaḍeɛ babas Manassa ixef nnes, maca Amun wanita yarni waha deg umarwas.
24 Imsexxaren nnes ggin xas ict n tmeɛmuč uca nɣin t di taddart nnes.
25 Řgens n temmurt maca nɣin marra inni tuɣa iggin tameɛmuč x ujeǧid Amun. Řgens n temmurt ggin mmis Yuciya d ajeǧid deg wemcan nnes.