1 Aḥaz tuɣa ɣares ɛicrin n iseggʷusa, umi idweř d ajeǧid. Netta iḥkem seṭṭac n iseggʷusa di Urcalim. Netta war iggi min iǧan nican di tiṭṭawin n SIDI, AREBBI nnes, am mammec igga babas Dawud. ◘ 2 Netta yuyur deg ibriden n ijeǧiden n Israil. Ɛawed igga řexyařat ifesyen i ‘Ibaɛlen’. ◼ 3 Netta tuɣa ittawi-dd řebxur di teɣzurt n Bin-Hinnum u issecmeḍ iḥenjiren nnes di tmessi. Netta igga ɛlaḥsab jjɛayef nni ggin marra řegnus i xef yuẓẓeř SIDI zzat i wudem n ayt n Israil. 4 Netta yiwyi-dd tiɣarṣa d tewhibin n řebxur x řegɛudi u x tewririn u sadu marra azɣar aziza. 5 SIDI, AREBBI nnes, iwca i-t deg ifassen n ujeǧid n Aram. Nitni wtin t u ḥebbsen zzayes ijj n ubarru imɣar u iwyen ten ɣar Dimacq. Immewc Aḥaz deg ifassen n ujeǧid n Israil, wenni d as iwtin s ict n tecti d tameqqrant. ◼ 6 Faqaḥ, mmis n Ramalyahu, inɣa mya u-ɛicrin-ařef n yeryazen deg ijj n wass di Yahuda, marra nitni d ayt n umenɣi, minzi nitni ḥeyyden x SIDI, AREBBI n řejdud nsen. 7 Zikri, ijj n bu-teɣruḍt zi Ifrayim, inɣa Maɛasiya, mmis n ujeǧid, d Ɛazriqam, ameḥḍay n Taddart, d Ilqana, wenni d wiss tnayen awarni i ujeǧid. 8 Nedhen ayt n Israil zeg aytmatsen mitayen-ařef n temɣarin d iḥenjiren d tḥenjirin di tmeḥbast u ṭṭfen zzaysen ict n tkeccaḍt d tameqqrant. Iwyen takeccaḍt nni ɣar Samarya.

9 Dinni iǧa ijj n unabi n SIDI, qqaren as Ɛudid. Wanita iffeɣ, imsagar ak-d řɛeskar i dd-iɛeqben ɣar Samarya, inna asen: “Xzarem, minzi s wesɛar n SIDI, AREBBI n řejdud nwem, x Yahuda, igga i-ten deg ufus nwem u kenniw tenɣim ten s ijj n wesxeḍ yiweḍ ař ajenna. 10 U řexxu ittɣiř awem ad teggem ayt n Yahuda d Urcalim sadu ufus nwem am yisemɣan d tiyya. Ma war kenniw iḍfar xenni umarwas ɣar SIDI, AREBBI nwem? 11 Sřem-dd řexxu ɣari u arrem imeḥbas nni tḥebbsem zeg aytmatwem, maɣar řḥaduq n weɣḍab n SIDI i dd-yusa xawem.” 12 Xenni ssbedden yeryazen-a zeg izeǧifen n iḥenjiren n Ifrayim ixef nsen zzat i yinni dd-yareggʷeḥen zi řɛeskar: Ɛazarya, mmis n Yuḥanan, Baraxya, mmis n Macillimut, Ḥizqiya, mmis n Callum, d Ɛamasa, mmis n Hidlay. 13 Nitni nnan asen: “War tzemmarem ad tessidfem imeḥbas danita, maɣar nitni ad xaneɣ dd-arenyen amarwas zzat i SIDI. Ma ittɣiř awem nzemmar ad narni ɛad di ddnub nneɣ d umarwas nneɣ, waxxa ɛad ɣarneɣ aṭṭas n imerwusa u řḥaduq n weɣḍab n AREBBI aqa-t x Israil?”

14 Xenni semḥen yeryazen iḥezzmen s řesnaḥ deg imeḥbas d tkeccaḍt zzat i imeqqranen d marra agraw n řgens. 15 Iryazen, inni ittwasemman qbeř s ismawen nsen, kkaren uca thellan deg imeḥbas. Nitni ssyarḍen marra inni tuɣa iǧan d iɛaryanen s warruḍ zi tkeccaḍt, ssyarḍen ten s warruḍ d tsiřa u wcin asen ad ccen, ad swen. Ɛawed dehnen ten uca ssɣimen inni i tuɣa gguren ttenqarḍen x yeɣyař u ammu iwyen ten ɣar aytmatsen ɣar Ariḥa, Tandint n Tcejjura n Tini. Awarni man aya ɛeqben nitni simant nsen ɣar Samarya.

16 Di řweqt nni issekk Aḥaz ireqqasen ɣar ijeǧiden n Accur, ḥima ad as wcen afus. 17 Uřa d ayt n Idum usin-dd. Nitni wtin Yahuda u nedhen ten di tmeḥbast. 18 Ifilisṭiniyyen hejmen x tneddam n Temmurt Iwaṭan d ljanub n Yahuda uca ṭṭfen Bayt-Cams, Ayyalun, Jadirut, Suku d tneddam i ɣares dd-iqqnen, Timnah d tneddam i ɣares dd-iqqnen d Jimzu d tneddam i ɣares dd-iqqnen uca zedɣen dinni. 19 Maɣar SIDI issehwa Yahuda di ssibbet n Aḥaz, ajeǧid n Yahuda, minzi netta iffucceḥ di Yahuda, iɣdar SIDI. 20 Tiɣlat-Filnasir, ajeǧid n Accur, yusa-dd ɣares. Netta igga xas bezzez u war t issejhed. 21 Maɣar ɛad mařa Aḥaz iksi agřa zi Taddart n SIDI u zi taddart n ujeǧid u zi řḥukkam, iwca aya i ujeǧid n Accur, aqa man aya war d as ineffiɛ ca.

22 Di řweqt i di ittwaḥṣar, yarni ujeǧid Aḥaz ɛad di řɣedran nnes zzat i SIDI. 23 Netta iqeddem tiɣarṣa i irebbiten n Dimacq, inni xas iɣeřben, inna: “Maɣar irebbiten n ijeǧiden n Aram wcin asen afus, necc ad asen wehhbeɣ, ḥima ad ayi wcen afus ɛawed.” Maca nitni dewřen d ssibbet n uweṭṭu nnes u n marra Israil. 24 Aḥaz issmun řeqcuɛ zi Taddart n AREBBI uca yarẓa řeqcuɛ n Taddart n AREBBI di iwetwiten uca ibelleɛ tiwwura n Taddart n SIDI. Netta igga iɛalṭaren i yixef nnes di kuř taɣmart n Urcalim. 25 Igga uřa d řegɛudi di kuř tandint n Yahuda, ḥima ad awyen řebxur i irebbiten nneɣni. Ammu i isɛar netta SIDI, AREBBI n řejdud nnes.

26 Imezruyen iqqimen d marra ibriden nnes, imezwura d ineggura, xzar, aqa ttwazemmemen deg wedlis n ijeǧiden n Yahuda d Israil. 27 Aḥaz igga ad yareyyeḥ jar řejdud nnes. Neḍřen t di tendint, di Urcalim, maca war t ssarsen ca deg imeḍřan n ijeǧiden n Israil. Mmis Ḥizqiya idweř d ajeǧid deg wemcan nnes.