16
Řɛahd n Asa ak-d Aram ḍidd i Israil
1 Deg useggʷas wiss setta u-třatin n tgelda n Asa, iffeɣ Baca, ajeǧid n Israil, i umenɣi ak-d Yahuda. Ibna Rama, ḥima war ittejji uřa d ijj ad iffeɣ ɣar barra niɣ ad dd-iɛqeb ɣar Asa, ajeǧid n Yahuda.
2 Xenni iksi Asa marra nnuqart d wureɣ zeg ixxamen n txubay zi Taddart n SIDI u zi taddart n ujeǧid uca issekk marra aya ɣar Binhadad, ajeǧid n Aram, wenni tuɣa izeddɣen di Dimacq, inna:
3 “Aqa din ijj n řɛahd jar ayi d cek, jar baba d babac. Xzar, necc ad ac dd-ssekkeɣ nnuqart d wureɣ. Ruḥ cek, fsiy řɛahd nnec ak-d Baɛca, ajeǧid n Israil, maḥend netta ad igeɛɛed ad xafi iggʷej.”
4 Binhadad isřa ɣar ujeǧid Asa u issekk ikumandaren n řɛeskar nni ɣares iǧan ɣar tneddam n Israil. Nitni ɣeřben x Ɛiyun d Dan d Abal-Mayim uřa x marra tineddam n řexzen n Naftali.
5 Umi isřa Baɛca man aya, imsar, aqa netta issbedd řebni n Rama uca ismeḥ di řxedmet nnes.
6 Xenni yiwi ujeǧid Asa marra ayt n Yahuda u nitni ksen iẓra n Rama uřa d tiḥenya nnes i zi tuɣa tt ibna Baɛca, uca ibna zzayes Jabɛa d Miṣfa.
7 Deg wussan nni yusa-dd umwařaw Ḥanani ɣar Asa, ajeǧid n Yahuda, inna as: “Minzi tᵉttecřed x ujeǧid n Aram u war iǧi x SIDI, AREBBI nnec, x uya yarweř řɛeskar n ujeǧid n Aram zeg ufus nnec.
8 Ma war tuɣi uřa d ayt n Kuc d ayt n Libiya s yijj n řɛeskar ameqqran ak-d waṭṭas n ikarruten d imnayen? Maca minzi tᵉttecřed x SIDI, iwca i-ten Netta deg ufus nnec,
9 maɣar tḥewwment tiṭṭawin n SIDI x tammurt am tekmeř, ḥima ad ibedd s jjehd ak-d yinni iǧan s wuř imun akides. Di man aya teggid tubbuheřya, maɣar zi řexxu d tsawent ad din iřin imenɣan akidek.”
10 Asa ihaj x umwařaw uca ijja ad t ggen deg ukeccuḍ di řeḥbes, maɣar ammu i d as tuɣa isxeḍ x uya. Di řweqt nni d ict iḥṣar Asa ca zi řgens.
11 Xzar, imezruyen n Asa, imezwura d ineggura, xzar, aqa ttwazemmemen deg wedlis n ijeǧiden n Yahuda d Israil.
12 Deg useggʷas wiss tesɛa u-třatin n tgelda nnes ihřec Asa zeg iḍaren. Maca di tqiccet n řehřac nnes uřa řami tuɣa ihřec, war yarzu ca x SIDI, maca x imesgenfan waha.
13 Asa igga ad yareyyeḥ jar řejdud nnes. Immut deg useggʷas wiss waḥit u-rebɛin zi řeḥkamet nnes.
14 Neḍřen t deg wenḍeř i tuɣa igga i yixef nnes di tendint n Dawud uca ssarsen t x qama i tuɣa tɛemmar s řeɛṭur d marra min iǧan d ddarbat ifarzen zi min ixeǧḍen s ufus n uḥrayfi. Nitni qqden as timessi d tameqqrant aṭṭas.