28
Dawud igga x Suliman maḥend ad ibna Zzawect Tameqqrant
1 Dawud issmun di Urcalim marra imeqqranen n Israil: imeqqranen n tqebbař d imeqqranen n terbiɛin d imsexxaren n ujeǧid d imeqqranen x wařef d imeqqranen x mya d imeqqranen i iǧan x marra agřa d řkesbet n řmař n ujeǧid d warrawen nnes, jmiɛ ak-d imsexxaren icennɛen d ayt n bu-teɣruḍt, wah, kuř bu-teɣruḍt imeḥḍen.
2 Ikkar ujeǧid Dawud, inna: “Sřem-dd ɣari, aytma d řgens inu! Necc simant inu tuɣa-t ɣari deg wuř inu ḥima ad bniɣ ict n Taddart n arraḥet i Ttabut n Řɛahd n SIDI u i tnebdat n iḍaren n AREBBI nneɣ. X uyenni sswejdeɣ i řebni.
3 Maca AREBBI inna ayi: ‘Cek war tbennid i Yisem inu Taddart, maɣar cek d ijj n weryaz n imenɣan u tessizřed aṭṭas n idammen.’
4 SIDI, AREBBI n Israil, ifarz ayi zi marra taddart n baba, ḥima ad dewřeɣ d ajeǧid x Israil i řebda, minzi Netta ifarz Yahuda ḥima ad yiři d řḥakem, uca xenni taddart n baba zi taddart n Yahuda, uca jar warrawen n baba yarḍa dayi ařami igga ayi d ajeǧid x marra Israil.
5 Zi jar marra arrawen inu - maɣar SIDI iwca ayi aṭṭas n warrawen - ifarz Netta mmi Suliman, ḥima ad iqqim x řɛarc n tgelda n SIDI x Israil.
6 Netta inna ayi: ‘Mmic Suliman ad ibna Taddart inu d řemraḥat inu, maɣar netta i farzeɣ d mmi u Necc ad as iřiɣ d babas.
7 Necc ad ssmetneɣ tageldit nnes i řebda mařa netta ad iḍfar tiweṣṣa d lfarayiḍ inu s jjehd, am mammec teǧa ass-a.’
8 Xenni řexxu, ad awem ɛeřmeɣ zzat i tiṭṭawin n marra Israil, agraw n řgens n SIDI, u deg imezzuɣen n AREBBI nneɣ, ḥima ad teḥḍam u ad tarzum marra tiweṣṣa n SIDI, AREBBI nwem, maḥend ad teqqimem tᵉttᵉṭṭfem tammurt taṣebḥant tanita d řwart, uca ad tt tejjem d řwart i řebda i warrawen nwem awarni awem.
9 U cek, mmi Suliman, ssen AREBBI n babac u sexxar as s wuř imun d s řeɛmar iwejden minzi SIDI ittbeqqec marra uřawen uca ifehhem marra min dd-ittasen ɣar ixarriṣen n uzeǧif nneɣ. Mařa cek tarzud xas, Netta ad zzayek ittwaf, maca mařa tsemḥed dayes, ad cek inḍar i řebda.
10 Xzar řexxu, minzi SIDI ifarz i cek ḥima ad as tebnid ict n Taddart d Zzawect Iqeddsen. Iři d aryaz uca egg i-t!”
11 Dawud iwca i mmis Suliman amedya n wesqif n wadaf, n řebniyat nnes, d ixxamen n txubay d tɣurfatin nnes, d ixxamen nnes n daxeř, d wexxam i tqebbart n weṣřaḥ,
12 uřa d ijj n umedya n marra min ɣares-dd yusa s Arruḥ x řemraḥat n Taddart n SIDI, x marra ixxamen i d as dd-innḍen, x marra ixxamen n txubay n Taddart n AREBBI u x ixxamen n txubay n tewhibin ittwaqeddsen,
13 x terbiɛin n ikehhanen d Ilawiyyen, x marra řxedmet i tsexxart di Taddart n SIDI u x marra řeqcuɛ i tsexxart di Taddart n SIDI.
14 X wureɣ, aqa iwca řewzen n wureɣ i marra řeqcuɛ n tsexxart, uřa i řeqcuɛ n nnuqart iwca řewzen nsen, i marra řeqcuɛ i kuř tasexxart.
15 Iwca uřa řewzen i řeqnadeř n wureɣ d řefnarat nsen n wureɣ, řewzen n kuř řqendiř ak-d řefnarat nnes weḥḥdes, uřa řewzen i řeqnadeř n nnuqart, řewzen i yijj n řqendiř ak-d řefnarat nnes weḥḥdes, am mammec dd-yusa ak-d tsexxart n kuř řqendiř.
16 Ɛawed řewzen n wureɣ i ṭṭabřat i x bezzɛen aɣrum, i kuř ṭṭabřa řewzen nnes weḥḥdes, uřa d řewzen n nnuqart i ṭṭabřat n nnuqart,
17 uřa d ureɣ iṣfan i furcayat, i ṭṭawyat i urucci, i ifenjařen n wureɣ ak-d řewzen n kuř afenjař weḥḥdes, i ifenjařen n nnuqart ak-d řewzen i kuř afenjař weḥḥdes,
18 i uɛalṭar n řebxur ak-d řewzen nnes s wureɣ iqqur, uřa ammu ɛawed řewzen n wureɣ i umedya n ukarru n ijenwan n ikiruben inni ibezzɛen wafriwen nsen uca dřin Ttabut n Řɛahd n SIDI.
19 Man aya marra, inna Dawud, ittwassefhem ayi s tira zeg ufus n SIDI, marra řexdayem i dd ittasen ak-d umedya n řebni, aqa yurant di tira-ya.
20 Xenni inna Dawud i mmis Suliman: “Iři d aryaz, iři tmeḥḍed u egg i-t! War tteggʷed ca u war arexxu, maɣar SIDI AREBBI, AREBBI inu, ad yiři akidek. Netta war dayek isemmeḥ niɣ cek ittejji ař akemmeř n marra řxedmet i tsexxart di Taddart n SIDI.
21 Xzar, aqa din tirbiɛin n ikehhanen d Ilawiyyen i marra tasexxart di Taddart n AREBBI u i marra řxedmet aqa din ɣarek marra inni i ɣar teǧa di řxadar nsen ḥima ad tt ggen s tiɣit i kuř řxedmet. Uřa d řḥukkam d marra řgens bedden akidek, ḥima ad ggen marra awařen nnec.”