22
Asewjed i řebni n Zzawect Tameqqrant
Inna Dawud: “Da i ɣa tbedd Taddart n SIDI AREBBI, u da i ɣa yiři uɛalṭar n tɣarṣa n wecmaḍ i Israil.” Yumur Dawud ad ssmunen ibarraniyyen nni iǧan di temmurt n Israil, u netta igga isuydayen ḥima ad ssuydan iẓra i řebni n Taddart n AREBBI. Dawud issewjed aṭṭas n wuzzař i řewtadat i tewwura n wadaf u i tḥenya n uɛarreḍ uřa d waṭṭas n nnḥas, ařami war izemmar ad ittwawzen řqedd nnes, uřa d akeccuḍ n tengelt, s ijj n řqedd war izemmar ad ittwaḥseb, minzi ayt n Ṣidun d ayt n Ṣur ssiwḍen aṭṭas n ukeccuḍ n tcejjart n tengelt ɣar Dawud. Dawud inna: “Mmi Suliman ɛad d aḥudri arhef. Taddart i ɣa bnan i SIDI ad tiři d tameqqrant d issɛuǧen ḥima Isem nnes d řɛezz nnes ad idweř ɣar marra timmura. Necc ad as sswejdeɣ.” Ammu i issewjed Dawud aṭṭas qbeř i řmewt nnes.
Xenni iřaɣa netta i mmis Suliman uca yumur i-t ḥima ad ibna ict n Taddart i SIDI, AREBBI n Israil. Inna Dawud i Suliman: “Mmi, necc simant inu tuɣa-t deg wuř inu, ḥima ad bniɣ ict n Taddart i Yisem n SIDI, AREBBI inu. Maca yusa-dd ɣari wawař n SIDI, inna: ‘Cek tessizzřed aṭṭas n idammen u teggid imenɣan iqesḥen. Cek war tbennid i Yisem inu Taddart, maɣar cek tessizzřed zzat i wudem inu aṭṭas n idammen x temmurt. Xzar, mmic wenni i d ac ɣa dd-ittwarwen, ad yiři d ijj n weryaz n řḥudnet, maɣar Necc ad as wceɣ řhudnet zi marra řɛedyan nnes i d as dd-innḍen, maɣar isem nnes ad yiři Suliman u deg wussan nnes ad wceɣ řehna d řhudnet i Israil. 10 Netta ad ibna ict n Taddart i Yisem inu u netta ad yiři i Necc d mmis u Necc ad as iřiɣ d Babas u Necc ad ssmetneɣ řɛarc n tgelda nnes x Israil i řebda.’ 11 Xenni řexxu, a mmi, SIDI ad yiři akidek u cek ad tfeřḥed u ad tebnid Taddart n SIDI, AREBBI nnec, am mammec tuɣa xak issiweř. 12 Iři ad ac iwc SIDI řeɛqeř d řefhamet uřa d usuyar x Israil ḥima ad teḥḍid Ccariɛa n SIDI, AREBBI nnec. 13 Xenni ad tiřid tfeřḥed, xmi ɣa teḥḍid ḥima ad ggen tiweṣṣa d lfarayiḍ, tinni yumur SIDI s Musa i Israil. Iři d aryaz u iři tmeḥḍed, war tteggʷed ca u war tefciř!
14 Xzar-dd, di řeḥṣaret inu sswejdeɣ ɣar ufus i Taddart n SIDI myat-ařef talint n wureɣ d wařef x wařef talint n nnuqart uřa d nnḥas d wuzzař, ařami war zemmaren ad weznen. Iwyeɣ uřa d akeccuḍ d yeẓra. U cek ad xas tarenyed ɛad. 15 Cek ɣarek ɛawed aṭṭas n yeryazen ḥima ad ggen řxedmet, isuydayen d řemɛuǧam i uneqqac n weẓru d ukeccuḍ d ɛřam kuř iwdan nni ɣar teǧa řefhamet di ɛřam kuř řxedmet. 16 Ureɣ d nnuqart d nnḥas d wuzzař anect war izemmar ad t ḥesben. Kkar, egg i-t uca SIDI ad kidek yiři.”
17 Dawud yumur ɛawed i marra řḥukkam n Israil, maḥend ad wcen afus i mmis Suliman, inna: 18 “Ma war iǧi SIDI, AREBBI nwem, akidwem u ma war d awem iwci řhudnet ɣar marra iɣezdisen nwem? Maɣar Netta igga marra imezdaɣ n temmurt deg ufus inu uca tᵉttwagg temmurt sadu ufus inu zzat i wudem n SIDI u zzat i wudem n marra řgens. 19 Xenni řexxu, wcem uř d řeɛmar nwem ḥima ad tarzum x SIDI, AREBBI nwem, uca kkarem, ad tebnam Zzawect Iqeddsen n SIDI AREBBI ḥima Ttabut n Řɛahd n SIDI d marra řeqcuɛ iqeddsen n AREBBI zemmaren ad ttwassidfen di Taddart i ɣa ittwabnan i Yisem n SIDI.”
 
 
22:2 yumur - s Tɛibranit ‘inna’.