19
Amenɣi ak-d Amun d Aram
1 Awarni aya imsar, aqa Naḥac, ajeǧid n ayt n Ɛammun, immut. Mmis idweř d ajeǧid deg wemcan nnes.
2 Xenni inna Dawud: “Necc xseɣ ad ssecneɣ tamexsiwt icewwaren i Ḥanun, mmis n Naḥac, am mammec d ayi isscen babas tamexsiwt icewwaren.” Dawud issekk ireqqasen, ḥima ad t iɛezza x řmewt n babas, uca iwḍen imsexxaren n Dawud ɣar temmurt n ayt n Ɛammun.
3 Xenni nnan řḥukkam n ayt n Ɛammun i sidi nsen Ḥanun: “Ma ixs Dawud ad iweqqar babac s tidett di tiṭṭawin nnec, minzi issekk-dd inni cek i ɣa iɛezzan? Ma war dd-issekk Dawud imsexxaren nnes ɣarek, ḥima ad arzun di temmurt maḥend ad tt ssenqeřben u ad tt bergagen?”
4 Xenni iṭṭef Ḥanun imsexxaren n Dawud, iḥeff asen azyen zi tmart, iqess asen azyen n warruḍ ař ḍeffar uca issekk i-ten.
5 Nitni ṭṭfen abrid uca ḥajan ireqqasen x yeryazen-a i Dawud. S uyenni d asen issekk, minzi nitni tuɣa ttseḍḥan aṭṭas. Inna ujeǧid: “Qqimem di Ariḥa ař d i ɣa temɣar tmart nwem, xenni ad dd-tdewřem.”
6 Umi ẓrin ayt n Ɛammun belli nitni tuɣa ssarzgen ixef nsen ɣar Dawud, issekk Hanun d ayt n Ɛammun ařef talint n nnuqart, ḥima ad cran i yixef nsen ikarruten d imnayen zi Aram-Nahrayn, aqa-tt d Misuputamya, zi Aram-Maɛka u zi Ṣuba.
7 Nitni cran i yixef nsen tnayen u-třatin-ařef n ikarruten n umenɣi u cran ɛawed ajeǧid n Maɛka d řgens nnes. Nitni usin-dd uca wtin iqiḍan nsen zzat i wudem n tendint n Maydaba. Uřa d ayt n Ɛammun nnyarwen zi tneddam nsen uca ffɣen ɣar umenɣi.
8 Umi isřa Dawud aya, issekk Yuwab s marra řɛeskar nnes, ayt n bu-teɣruḍt.
9 Ffɣen-dd ayt n Ɛammun uca sedden ixef nsen i umenɣi ɣar wadaf n tendint, am ijeǧiden nni dd-usin, tuɣa aten s weḥḥedsen deg iyyar.
10 Umi iẓra Yuwab, aqa amenɣi řa zeg urendad uřa zi ḍeffar n uɣembub nnes, ixḍar zi marra inni ittwafarzen di řɛeskar n Israil uca issbedd i-ten i umenɣi ajemmaḍ n ayt n Aram.
11 Min iqqimen n řgens igga i-ten sadu i ufus n umas Abicay u nitni ssbedden ixef nsen ajemmaḍ n ayt n Ɛammun.
12 Inna netta: “Mařa Aram ijhed xafi, xenni as-dd, ewc ayi afus! Mařa ayt n Ɛammun jehden xak, xenni ad dd-aseɣ ad cek fekkeɣ.
13 Iři d aryaz u ejj aneɣ ad niři nemḥeḍ di ṭṭweɛ n řgens nneɣ u di ṭṭweɛ n tneddam n AREBBI. Ad igg SIDI min iǧan mliḥ di tiṭṭawin nnes.”
14 Xenni ibda Yuwab d řgens i ɣares iǧan ad immneɣ ak-d ayt n Aram uca ina ṭṭfen di tarewřa zzat i wudem nsen.
15 Umi ẓrin ayt n Ɛammun, aqa ayt n Aram arewřen, ṭṭfen uřa d nitni di tarewřa zzat i wudem n umas Abicay uca ɛeqben ɣar tendint. Xenni yiweḍ Yuwab ɣar Urcalim.
16 Umi iẓra Aram aqa nitni ttwawten zzat i wudem n Israil, ssekken nitni ireqqasen uca ggin ad ffɣen ayt n Aram inni tuɣa izeddɣen x ujemmaḍ n iɣzar n Lfuraṭ, u Cubak, akumandar n řɛeskar n Hadad-Ɛazar yuyur zzat i uɣembub nsen.
17 Umi nnan aya i Dawud, issmun netta marra Israil, iẓwa L’Urdun, yusa-dd ɣarsen uca isedd ixef nnes i umenɣi. Umi isedd Dawud ixef nnes i umenɣi ak-d ayt n Aram, mmenɣen nitni akides.
18 Ayt n Aram arewřen zzat i wudem n Israil uca iqḍa Dawud x sebɛa-ařaf n yenni ineddhen ikarruten n umenɣi u x arebɛin-ařef n yerazen x iḍaren zeg ayt n Aram. Ɛawed inɣa netta Cubak, akumandar n řɛeskar.
19 Umi ẓrin marra imsexxaren n Hadad-Ɛazar, aqa ttwarnan zzat i wudem n ayt n Israil, ggin nitni řehna ak-d Israil uca sexxaren as. War dd-yusi di řeɛqeř ɣar ayt n Aram ɛad ad fekken ayt n Ɛammun ict n twařa nneɣnit.