17
Awař n Arebbi x Zzawect Tameqqrant d řkursi igellden
1 Umi izdeɣ Dawud di taddart nnes, inna Dawud i unabi Natan: “Xzar, necc zeddɣeɣ deg ict n taddart n ukeccuḍ n tcejjart n tengelt, maca Ttabut n Řɛahd n SIDI aqa-tt sadu řkettan n Uqiḍun.”
2 Natan yarra-dd x Dawud: “Egg marra min ɣarek deg wuř nnec, maɣar AREBBI akidek.”
3 Di ǧiřet nni imsar aqa yusa-dd wawař n AREBBI ɣar Natan, inna:
4 “Uyur, ini i umsexxar inu Dawud: ‘Ammu i iqqar SIDI: War d ayi tbennid Taddart i Necc, ḥima ad dayes zedɣeɣ,
5 maɣar zeg wass umi dd-ssgeɛɛdeɣ Israil zi Miṣra, Necc war zdiɣeɣ ɛemmarṣ deg ict n taddart. Maca Necc tuɣa ggureɣ zeg uqiḍun ɣar uqiḍun, zi tzeddiɣt ɣar tzeddiɣt.
6 Mani ma uyureɣ ak-d marra Israil, ma Necc ssiwřeɣ ɛemmarṣ uřa s ijj n wawař ak-d ijjen zi řquḍat n Israil, inni tuɣa ggiɣ ad arewsen řgens inu Israil, nniɣ: Mayemmi kenniw war d ayi tbennim ca taddart s ukeccuḍ n tcejjart n tengelt?’
7 Xenni řexxu, ammu i ɣa tinid i umsexxar inu, i Dawud: ‘Ammu i iqqar SIDI n řɛeskarat ijehden: Necc iwyeɣ-dd cek zi řkuri, zi ḍeffar n wuǧi, maḥend ad tdewřed d řḥakem x řgens inu Israil.
8 Mani ma tuyured, tuɣa ayi akidek u Necc teḥḥiɣ marra řɛedyan zzat i tiṭṭawin nnec u Necc ggiɣ ac ijj n yisem am yisem n imeqqranen x temmurt.
9 Necc neyyceɣ ijj n wemcan i řgens inu uca ẓẓuɣ t din, maḥend ad izdeɣ deg wemcan nnes, war ittwassnexřiɛ ɛad u war t ḥeṣṣaren ɛad ayt n řmuɛṣiyyet am zic,
10 zeg wussan umi Necc ggiɣ řquḍat x řgens inu Israil. Necc sswaḍɛeɣ marra řɛedyan nnec u ssargbeɣ cek belli SIDI ad ac ibna ict n taddart.
11 X minni i ɣa qefřen wussan nnec u ad tegged ad tareyyḥed jar řejdud nnec, ad imsar, Necc ad ssekkareɣ mmic awarni ac, wenni i ɣa iffɣen zeg warrawen nnec, u Necc ad ssmetneɣ tageldit nnes.
12 Netta ad ayi ibna ict n Taddart u Necc ad ssbeddeɣ řɛarc nnes i řebda.
13 Necc ad iřiɣ d Babas i netta u netta ad ayi yiři d Mmi u Necc war xas ssḥeyyideɣ ca tamexsiwt inu icewwaren am mammec tt sḥeyydeɣ x wenni tuɣa d ac izwaren.
14 Necc ad t ssmetneɣ di Taddart inu u di Tgeldit inu i řebda u řɛarc nnes ad ibedd imten i řebda.’ ”
15 Issiweř Natan ak-d Dawud nican am mammec marra awařen-a u am mammec marra řewḥiy-a.
Taẓaǧit n uqadi n Dawud
16 Xenni yudef ujeǧid Dawud uca iqqim zzat i wudem n SIDI, inna: “Min ɛniɣ necc, SIDI AREBBI, u min teɛna taddart inu aqa Cek tnedhed ayi-dd ař danita?
17 Di tiṭṭawin nnec tuɣa man aya drus waha, a AREBBI, u řexxu tessiwřed ɛad x taddart n umsexxar nnec deg ijj n yimar iggʷej u txezzared dayi am yijj n ufiřu n warrawen n bnadem i dd-ittawyen ɣar sennej, a SIDI AREBBI!
18 Min d ac i ɣa yini Dawud ɛad ktar x ccenɛet i tessecned i umsexxar nnec? Aqa Cek tessned amsexxar nnec!
19 A SIDI, aqa teggid marra řemɣaret-a di ṭṭweɛ n umsexxar nnec u ɛlaḥsab uř nnec, ḥima ad tessargbed ammu marra timesřayin-a timeqqranin.
20 A SIDI, uřa d ijj war iǧi am Cek. War din AREBBI mɣir Cek s marra min nesřa s imezzuɣen nneɣ.
21 Man wen i iǧan am řgens nnec Israil, ayenni n řgens i iǧan x temmurt i ɣar iraḥ AREBBI ḥima ad t ifdi i Yixef nnes d řgens, ḥima ad igg i Yixef nnes ijj n Yisem s tmegga timeqqranin d issiggʷden, u ḥima ad yaẓẓeř x řegnus zzat i wudem n řgens nnec, wenni tefdid zi Miṣra?
22 Cek teggid řgens nnec Israil d ijj n řgens i Yixef nnec i řebda. Cek, a SIDI, aqa Cek tdewřed d AREBBI i nitni.
23 Xenni řexxu, a SIDI AREBBI, ejj awař nni tessiwřed x umsexxar nnec u x taddart nnes ad ibedd i řebda u egg am mammec tessiwřed.
24 Ejj Isem nnec ad ittwassemɣar i řebda umi ɣa inin: SIDI n řɛeskarat ijehden, AREBBI n Israil, aqa-t d AREBBI x Israil, uca iři ad tᵉttwassemten taddart n umsexxar nnec Dawud zzat i wudem nnec.
25 Maɣar Cek, AREBBI inu, tessargbed deg imezzuɣen n umsexxar nnec aqa Cek ad as tebnid ict n taddart. X uya tusa-dd i umsexxar nnec deg wuř, ḥima ad iẓẓaǧ zzat i wudem nnec.
26 Xenni řexxu, a SIDI, Cek d AREBBI nni u Cek tessiwřed s marra tcuni-ya x umsexxar nnec.
27 Xenni řexxu, aqa yarḍa i Cek ad tbarked taddart n umsexxar nnec, ḥima ad tiři zzat i wudem nnec i řebda. Minzi Cek, a SIDI, tbarked tt uca ad tᵉttwabarek i řebda.”