90
ADLIS WISS AREBƐA: IZEHHIDEN 90-106
1 Taẓaǧit n Musa, aryaz n AREBBI.
A Sidi inu,
Cek tuɣa d Tazeddiɣt nneɣ
zi jjiř ař jjiř.
2 Qbeř ma ad iřin idurar,
qbeř ma ad dd-tessuffɣed
tammurt d ddunect,
wah aqa Cek d Arebbi
zi řebda ař řebda.
3 Cek tejjid bnadem
ad iɛqeb ɣar tɛejjajt.
Teqqared:
“Ɛeqbettiw-dd tarwa n bnadem!”
4 Maɣar ařef n iseggʷusa
di tiṭṭawin nnec
am wass n iḍennaḍ nni iɛdun,
uřa am yict n nnubet n tɛessast di ǧiřet.
5 Cek tfarḍed ten, aqa aten am yiḍeṣ.
Ɣar tuffut ggin am arbiɛ iyemman.
6 Ɣar tuffut ittzᵉyziw arrbiɛ
uca iyemma,
ɣar tmeddit ittwamjar, ittaẓeɣ.
7 Maɣar neccin nefna s weɣḍab nnec,
nennexřeɛ zeg wesɛar nnec.
8 Cek teggid řmuɛṣiyyet nneɣ
qibač nnec,
ddnub nneɣ innuffaren
di tfawt n wudem nnec.
9 Maɣar marra ussan nneɣ ad ɛdun
deg ufugem nnec isseggʷaden,
nesseɛdu iseggʷusa nneɣ
am yijj n usuḍi.
10 Ussan n tudart nneɣ
ttekken sebɛin n iseggʷusa,
niɣ, meřmi i ɣa niři nejhed,
aqa tmanyin n iseggʷusa.
Min dayes d aɛuǧi,
ittaru-dd tamara d řweḥran,
deɣya tᵉttekk tɛeddu u neṭṭaw ɣar din.
11 Man wen issnen
řqesḥan n weɣḍab nnec,
u man wen issnen tiggʷudi zzayek
am dd-ittřiq
ak-d aduqqez nnec n ufugem?
12 Seřmed aneɣ ad nḥesseb ussan nneɣ,
ḥima ad dd-nawi uř iccuren s tiɣit.
13 Dweř-dd, a SIDI, ař meřmi?
Ḥinn x imsexxaren nnec.
14 Sjjiwen aneɣ ɣar uteffu
s tmexsiwt nnec icewwaren,
xenni ad nesřiwřew,
ad nfarḥ marra ussan nneɣ.
15 Sfarḥ aneɣ anect n wussan
i d aneɣ teḥṣared,
anect n iseggʷusa i di neẓra řɣar.
16 Scen řxedmet nnec i imsexxaren nnec,
řɛezz nnec x iḥenjiren nsen.
17 Ad xaneɣ tehwa
řeḍrafet n Sidi, AREBBI nneɣ,
ḍmen Cek řxedmet n ifassen nneɣ,
wah, řxedmet n ifassen nneɣ ḍmen i-tt.