86
1 Taẓaǧit n Dawud.
A SIDI, arr amezzuɣ nnec ɣari,
seř ayi,
maɣar necc di řeɣben u zeřḍeɣ.
2 Ḥḍa x řeɛmar inu,
maɣar necc d amtiqqi,
a AREBBI inu,
senjem amsexxar nnec,
wenni xak ittcařan.
3 Ḥinn xafi, a Sidi inu,
maɣar ttřaɣiɣ xak ass am imun.
4 Sfarḥ řeɛmar n umsexxar nnec,
maɣar i Cek, a Sidi inu,
ssgeɛɛadeɣ řeɛmar inu.
5 Maɣar Cek, a Sidi inu,
d aṣebḥan u d amsameḥ,
ɣarek tamexsiwt icewwaren
i marra inni ɣarek ittřaɣan.
6 A SIDI, seř i tẓaǧit inu,
ḥekkar i tmijja n tutra inu.
7 Deg wass n řeḥṣaret inu
ttřaɣiɣ-dd ɣarek,
maɣar Cek ad xafi dd-tarred.
8 Jar irebbiten war iǧi uřa d ijjen
am Cek, a Sidi inu,
war din min yarwesen
di tmegga nni teggid.
9 Marra řegnus i teggid, ad dd-asen,
ad sejden zzat i wudem nnec,
a Sidi inu,
ad ssɛuǧen Isem nnec.
10 Maɣar Cek d ameqqran
u Cek d wenni itteggen lmuɛjizat,
Cek weḥḥdek d AREBBI i teǧid.
11 Scen ayi abrid nnec, a SIDI,
ḥima ad uyureɣ di tidett nnec,
smun uř inu
maḥend ad ggʷedeɣ Isem nnec.
12 A Sidi inu, AREBBI inu,
xseɣ ad Cek qadiɣ s marra wuř inu,
ad cennɛeɣ Isem nnec i řebda qaɛ.
13 Maɣar tamexsiwt nnec icewwaren
temɣar xafi,
Cek tfekked řeɛmar inu
zi řaǧaɣ n řaxart.
14 A AREBBI,
imɛeffaren kkaren-dd akidi,
ict n bandiyya n ayt n bu-řexcunet
arezzun ad nɣen řeɛmar inu.
Cek war ɣarsen teǧid
qibač i tiṭṭawin nsen.
15 Maca Cek, a Sidi inu,
d Arebbi d arḥim d uḥnin,
ɣarek ttasiɛ n řxaḍar
uřa d tamexsiwt icewwaren
d řaman mɣaren.
16 Xzar-dd ɣari u ḥinn xafi,
egg jjehd nnec deg umsexxar nnec,
uca senjem mmis n tayya nnec.
17 Egg ict n řeɛřamet di ṭṭweɛ inu,
ḥima inni d ayi icarrhen
ad t ẓaren ad seḍḥan,
maɣar Cek, a SIDI, tewcid ayi afus
u tessfewwjed xafi.