80
1 I umeqqran n imeɣnajen.
S teɣnint n ‘Tlillicin’.
Cchadet n Asaf. Azehhed.
2 Seř, a Ameksaw n Israil,
Cek d wenni yarekkwesen Yusuf
am wuǧi,
Cek d wenni ittɣiman x ikiruben,
ban-dd di tissiqt!
3 Sekkar jjehd ameqqran nnec
zzat i wudem n Ifrayim
d Binyamin d Manassa,
as-dd ḥima ad aneɣ tfekked.
4 A AREBBI, arr aneɣ-dd,
ejj udem nnec ad xaneɣ yarɣ,
xenni ad nettwafekk.
5 A SIDI, AREBBI n řɛeskarat,
mecḥař i ɣa tekked tᵉttxeyyaqed
ɣar tẓaǧit n řgens nnec?
6 Cek tessecced ten
s weɣrum n imeṭṭawen,
tarrid ten ad swen imeṭṭawen
s ijj n řmijař ittwaggen.
7 Cek teggid aneɣ
d ict n tcamma n imcubbecen
i jjiran nneɣ,
řɛedyan nneɣ
stᵉhezzan zzayneɣ jar asen.
8 Arr aneɣ-dd, a AREBBI n řɛeskarat,
ejj udem nnec ad xaneɣ yarɣ,
xenni ad nettwafekk.
9 Cek tqeřɛed ict n tzayart zi Miṣra,
tuẓẓřed x řegnus, uca teẓẓud-i-tt din.
10 Cek tesswejded as amcan
u tarrid tt-i-dd ad tewwet iẓewran,
tɛemmar tzayart marra tammurt.
11 Ttwassduryen idurar s tiři nnes,
ticejjura n tengelt n Arebbi
s řefruɛ nnes.
12 Tegga tiseḍwin nnes
ad awḍent ař řebḥar,
ifetwan nnes iziyzawen
ař iɣzar n Lfuraṭ.
13 Mayemmi tɣeḍřeḍ iɣebrawen nnes,
ařami marra inni dd-ittekken
x webrid řeqqḍen tt?
14 Iřef zeg wezɣar iqřeb tazayart,
marra min intenhezzan deg iyyar,
aqa ihda i-tt.
15 A AREBBI n řɛeskarat,
dweř-dd ɣarneɣ,
sijj-dd zeg ujenna,
u xzar, arzef tazayart-a,
16 tthilla di tzayart
tenni iẓẓu ufus nnec afusi,
di mmic nni tessjehded i Yixef nnec.
17 Aqa tᵉttwassecmeḍ s tmessi, tᵉttwaqḍeɛ.
Zeg useggʷed n wudem nnec
ad weddaren.
18 Ejj afus nnec ad yiři
ak-d weryaz n ufus nnec afusi,
ak-d mmis n bnadem
wenni tessjehded i Yixef nnec.
19 Xenni war xak nḥeyyed ca.
Ejj aneɣ ad neddar,
xenni ad nřaɣa x Yisem nnec.
20 A SIDI, AREBBI n řɛeskarat,
arr aneɣ-dd,
ejj udem nnec ad xaneɣ yarɣ,
xenni ad nettwafekk.