73
ADLIS WISS TŘATA: IZEHHIDEN 73-89
1 Azehhed n Asaf.
Wah, AREBBI d aṣebḥan i Israil,
i yinni s wuř iṣfan.
2 Necc maca, ɛřaḥař tuɣa iḍaren inu
ffɣen zeg webrid,
war iqqim walu ad ḥřuǧḍen iṣuraf inu.
3 Maɣar tuɣa usmeɣ zeg ibuhařiyyen,
řami ẓriɣ aqa iɛeffanen mliḥ i ǧan.
4 Maɣar war din bu iseɣwan
ɣar řmewt nsen,
ṣṣulṭa nsen aqa ibedd nican.
5 Nitni war carrcen di tamara n iwdan,
war ttwařeqqfen s řmuṣibat
am wezyen nneɣni n bnadem.
6 S uya tᵉttayeř asen-dd nnfaxet
am tseddect ɣar yiri nsen
uca iřeḥḥef asen lɛunf
am yijj n warruḍ.
7 Tiṭṭawin nsen ttwaffɣent zi tadunt,
nitni ɛeddun řexyařat n wuř nsen.
8 Nitni stehzan s bṭayṭay
ssawařen x řɣar, x ddeǧ,
aqa ssawařen zi sennej.
9 Nitni arezzmen uqemmum nsen
x ujenna,
řhard nsen iggur x temmurt.
10 S uya inneqřeb
ddab nsen n řgens ɣar da,
aman ifeyyḍen ttsekkafen ten nitni.
11 Qqaren:
“Mammec i ɣa issen Arebbi?”
“Mammec i ɣa igg Umɛuǧi x kuřci
ad issen?”
12 Xzar, aqa aten d iɛeffanen!
Ɛad ddaren řebda di řhudnet,
ssewsiɛen agřa nsen.
13 S tidett, amenni waha
ssizedgeɣ uř inu
u ssirdeɣ ifassen inu di tazdugi.
14 Ass am imun necc tiyyita dayi,
kuř ṣṣbeḥ tᵉttwarebbiɣ.
15 Mařa nniɣ: “Uřa d necc ad ssiwřeɣ ammu!”,
xzar, iři ɣdareɣ
jjiř n iḥenjiren nnec.
16 Ittřiɣ ayi zemmareɣ ad fehmeɣ aya,
maca di tiṭṭawin inu
ittawi-dd mɣir tamara ibeṭṭřen,
17 ařami udfeɣ
ɣar Tzawiyyin Iqeddsen n Arebbi,
uca ḥekkareɣ i tneggarut nsen.
18 Wah, Cek tessrusid ten
x imucan itteḥruǧuḍen,
Cek tɣeṭṭřed ten d řxirbat.
19 Mammec dewřen
d ict n řqecɛet n unexřiɛ
deg ict n tecti,
ttwamḥan u ttwaqḍan
s iceřwawen issaggʷaden.
20 Am tarjit ɣar ufaqi, a Sidi inu,
ammu i ɣa tesseḥqared
abeyyen n řexyař nsen
xmi dd ɣa tfaqed.
21 Řami ittwassarzeg uř inu
di řweqt nni,
ittejju ayi řeḥriq di tiẓẓař inu.
22 Necc tuɣa ayi d aqeffuḥ,
tuɣa ayi ɣarek am yijj n řweḥc
břa řeɛqeř.
23 Ɛad maca řebda aqa ayi ɣarek,
Cek tᵉṭṭfed ayi zeg ufus afusi inu.
24 Cek ad ayi tgewwded s ccwar nnec
u awarni man aya
ad ayi teksid ɣar uɛuǧi nnec.
25 Man wen i ɣari deg ujenna
ḥaca Cek?
Akidek war tzemmar ad ayi tarḍa
uřa d ict n tmesřact di temmurt.
26 Mařa arrimet d wuř inu
semmḥen dayi,
xenni AREBBI d Taṣḍart n wuř inu
d tasɣart inu i řebda.
27 Maɣar xzar,
inni zzayek itteggʷejen ad fnan.
Cek ad tkeḥḥeḍed kuř ijj
wenni xak ittḥeyyaden
umi i ɣa issefsed ixef nnes,
28 Necc maca, řdaset i AREBBI d mliḥ i necc.
Necc ggiɣ Sidi inu, SIDI,
d amcan inu n tarewřa,
ḥima ad barrḥeɣ marra timegga nnec.