7
1 Izři n Dawud deg waṭṭas n tmijjiwin, izři nni iɣennej i SIDI di ssibbet n wawařen n Kuc, wenni iǧan zeg ayt n Binyamin.
2 A SIDI, AREBBI inu,
aqa ɣarek arekkwařeɣ!
Senjem ayi zi marra inni xafi ittaẓẓřen
uca fekk ayi,
3 maḥend netta war d ayi izeɛɛef
am weyrad,
ad ayi imezzeq,
řami war din wi ɣa ifekken!
4 A SIDI, AREBBI inu,
mařa necc ggiɣ man aya,
mařa din ca n řɣecc iřṣeq
deg ifassen inu,
5 mařa necc xeřfeɣ
wenni akidi iddaren di řehna s řɣar,
- maca s řɛeks wenni d ayi iḥeṣṣaren x walu,
jjiɣ t ad yuyur -
6 ejj xenni ad yaẓẓeř řeɛdu x řeɛmar inu,
ad ayi iɛdu,
ad iɛfes x tudart inu di temmurt,
ejj i-t ad issezdeɣ aɛuǧi inu di tɛejjajt!
Silah.
7 Kkar-dd, a SIDI, deg weɣḍab nnec,
suɛřa Ixef nnec x uduqqez
n yinni d ayi iḥeṣṣaren,
faq di ṭṭweɛ inu,
aqa teggid tumured řḥeqq.
8 Agraw n řegnus ad ac dd-inneḍ,
xenni dweř tiwa nsen ɣar sennej.
9 SIDI ad iḥakem řegnus.
Aɣ ayi tasɣart, a SIDI,
ɛlaḥsab tasegda inu,
ɛlaḥsab řekmaret i dayi.
10 Sbedd tuɛeffna n iɛeffanen,
semten amsegged,
Cek, wenni iqeǧben uřawen d tiẓẓař,
a AREBBI iseggden!
11 Taseddart inu i useřqi ɣar AREBBI,
Amsenjem n imseggmen n wuřawen.
12 AREBBI d ijj n řqaḍi iseggden,
Arebbi nni isexxḍen kuř ass.
13 Mařa netta war dd-iɛqib,
ad isseqḍeɛ Netta ssif nnes,
ad imḥeḍ řqews nnes
uca ad xas ineyyec.
14 Igga xas řesnaḥ ineqqen,
ad yarr fřitcat nnes
d iṣefḍawen yareqqen.
15 Xzar, aqa wḍan-dd xas
řewjeɛ n tarut n řmuɛṣiyyet,
iksi ddeyset n tamara
uca ad yaru ixarriqen.
16 Iqqaz ijj n weḥfur uca issuǧeɣ i-t,
maca d netta s yixef nnes i iwḍan
deg weḥfur n turṣuḍi i igga.
17 Tamara nnes ad dd-tedweř
x uzeǧif nnes,
řexcunet nnes ad dd-tehwa
x uceqquf nnes.
18 Ad qadiɣ SIDI ɛlaḥsab tasegda nnes,
ad zehhdeɣ i Yisem n SIDI, Amɛuǧi x kuřci.