61
1 I umeqqran n imeɣnajen. Ak-d uzenzun x ifiřan. N Dawud.
2 A AREBBI, seř i uřaɣi inu,
seř mliḥ i tẓaǧit inu.
3 Zi ṭṭarf aneggar n temmurt
ttřaɣiɣ xak,
xmi ittefciř wuř inu.
Ndeh ayi x ijj n jjarf yuɛřan xafi.
4 Maɣar Cek d amcan n tarewřa i necc,
d lburj ijehden ḍidd i řeɛdu.
5 Necc ad qqimeɣ
deg Uqiḍun nnec i řebda,
ad arewřeɣ
sadu udurri n wafriwen nnec. Silah.
6 Maɣar Cek, a AREBBI,
tesřid ɣar lwuɛud inu.
Cek tewcid ayi tasɣart
n yinni itteggʷeden Isem nnec.
7 Arni ɛad ussan x wussan n ujeǧid,
ejj ad aredfen iseggʷusa nnes
ijj i wenneɣni
am jjiř iḍfar umas.
8 Netta ad iqqim
zzat i wudem n AREBBI i řebda.
Ad xas teḥḍa
tamexsiwt icewwaren d řaman.
9 Xenni ad zehhdeɣ i Yisem nnec i řebda,
ḥima ad kemmřeɣ lwuɛud inu,
ass awarni umas.