49
1 I umeqqran n imeɣnajen. Zeg ayt n Quraḥ. Azehhed.
2 Sřem i uya, marra řegnus,
sḥessem marra, a imezdaɣ n ddunect,
3 am tarwa n Adam,
am tarwa n ijj n weryaz,
aytbab n wagřa d imezřaḍ
jmiɛ ak-d wayawya!
4 Aqemmum inu issawař tiɣit,
ixarriṣen n wuř inu
ccuren s řefhamet.
5 Necc ad wceɣ amezzuɣ inu
i wawař iweznen,
ad ssargbeɣ tḥajit inu n twafit
ɣar tirart n řgambri.
6 Mayemmi ɣa ggʷedeɣ
deg wussan iɛeffanen,
xmi dd ayi tᵉttenneḍ řmuɛṣiyyet
n yinni d ayi dd-iḍeffaren di tiri inu.
7 Aqa din inni ittcařen
x řeksibet nsen,
ttfeyycen s wagřa nsen ameqqran,
8 maca uřa d ijj n tawmat
war izemmar ad ifdi yijj n weryaz,
war izemmar ad ixeǧeṣ
ddeyyet n yixef nnes i AREBBI.
9 Ttaman n weṣřaḥ n řeɛmar nsen
tiɣřa aṭṭas, war dd-tᵉttis i řebda,
10 ḥima netta ad iddar i řebda,
ɛemmarṣ war ittkiccu.
11 Maɣar ittwařa imiɣisen mmuten,
uřa d abuhaři d uqeffuḥ
ad ttwaqessen s tnayen,
ad jjen řeksibet nsen
i inneɣni awarni asen.
12 Axarreṣ n wuř nsen
aqa tudrin nsen ad qqiment i řebda,
tizeddiɣin nsen zi jjiř ař jjiř.
Waxxa uřa d timmura
ggin asent ismawen nsen.
13 Bnadem i ɣar iǧa ccan, war ittɣimi ca,
netta am řebhimet ifennan.
14 Wa d abrid i ɣarsen,
min xef ttsennaden,
uca inni ten iḍeffaren ad jjiwnen
s uqemmum nsen. Silah.
15 Am wuǧi ssareyyḥen nitni ixef nsen
di řaxart,
řmewt ad ten tarwes.
Imseggaden ad xasen ḥekmen x ṣṣbeḥ,
addud nsen ad idweř i řɣecc di řaxart,
ttwassuffɣen nitni zi tzeddiɣt nsen.
16 Maca AREBBI ad ifdi řeɛmar inu
zeg ufus n řaxart,
maɣar Netta ad ayi yawi akis. Silah.
17 War tteggʷed ca mařa ca n weryaz
idweř d bu-wagřa,
xmi i ɣa yarni ucuwwar n taddart nnes,
18 maɣar di řmewt nnes
war kides ikessi ca marra aya,
acuwwar nnes war ihekkwi akides
awarni as.
19 Waxxa ibarek řeɛmar nnes
di tudart nnes,
waxxa nitni ad cek ssemɣaren
maɣar teggid min iṣebḥen i yixef nnec,
20 aqa ad dd-yaweḍ řeɛmar nnes
ɣar jjiř n řejdud nnes,
nni war ẓarren tafawt i řebda.
21 Bnadem i ɣar iǧa ccan,
maca war ifehhem,
netta am řebhimet ifennan.