19
1 I umeqqran n imeɣnajen. Azehhed n Dawud.
2 Ijenwan ttbarrḥen s uɛuǧi n Arebbi,
řqubbet tessawař
x řxedmet n ifassen nnes.
3 Ass issazzař awařen i wass,
ǧiřet tesscan tussna ɣar ǧiřet.
4 War iǧi d řhard u war ǧin ca d awařen,
tmijja nsen war d as ittesři ḥed.
5 Řumurat nsen ffɣent x temmurt marra,
awařen nsen ffɣen ař ṭṭarf n ddunect.
Netta igga diha ijj n uqiḍun i tfuct,
6 am muřay nni dd-issijjen
zeg wexxam n řemřac,
isřiwřew am yijj n bu-teryast,
ḥima ad iksi di ticři nnes.
7 Iffeɣ-dd zeg ijj n ṭṭarf n ujenna,
uca yuyur ař ṭṭarf nnes nneɣni,
war tᵉttnuffar uřa d ict n řḥajet
i řḥaduq nnes.
8 Aqa tekmeř Ccariɛa n SIDI,
tiwi-dd agenfu i buḥbeř.
Cchadat n SIDI daysent řaman,
tticcent tiɣit i uḥafi.
9 Řumurat n SIDI seggdent,
ssfarrḥent uř.
Tawṣiyyet n SIDI teṣfa,
tesscana tafawt i tiṭṭawin.
10 Tiggʷudi zi SIDI teṣfa,
teqqim tbedd i řebda.
Řeḥkamat n SIDI d tidett,
aqa atent d řḥeqq marra.
11 Nitenti jebbdent meẓri ktar x wureɣ,
wah, ktar zeg wureɣ ittwaṣeffan,
aqa atent d timiẓidin x tamment
niɣ x tamment n teɣraṣt.
12 Uřa d amsexxar nnec
ittwawebbex zzaysent,
deg uḥeṭṭu nsent tᵉttnuffar
dayes řmunet tameqqrant.
13 Aweddar, wi zzayes yucin?
Sizdeg ayi zi min war ittbinen.
14 Ḥḍa amsexxar nnec ɛawed zeg uɛeffar,
ḥima war xafi ittṣeǧiḍ,
ḥima ad iřiɣ d amezdag
zeg uxeṭṭu imɣaren.
15 Ad dd-asen wawařen n uqemmum inu
d ixariṣṣen n wuř inu,
x řxaḍar nnec, a SIDI,
a Taṣḍart inu d Amefdi inu!