144
1 N Dawud.
Ad ittwabarek SIDI, Taṣḍart inu,
wenni isseřmaden ifassen inu i umenɣi,
iḍewḍan inu i řḥarb.
2 Cek i d ayi teǧid d ameddukkeř inu
i dayes tamexsiwt icewwaren,
uřa d lburj inu, lburj inu yuɛřan
d amsenjem inu,
taseddart inu i useřqi,
d wenni ɣar arekkwařeɣ,
d wenni d ayi isswaḍḍɛen řgens inu.
3 A SIDI, min iɛna bnadem,
aqa Cek texsed ad t tessned?
Mmis n bnadem,
aqa Cek tᵉttxarriṣed dayes?
4 Bnadem amecnaw řefwar,
ussan nnes ad ɛdun am tiři.
5 Meyyeř ijenwan nnec, a SIDI, hwa-dd.
Ḥada idurar, xenni ad ggen ddexxan.
6 Ẓaryeḍ assamen u zeǧeɛ i-ten,
sekk fřitcat nnec u sxarweḍ i-ten.
7 Swiẓẓeḍ ifassen nnec zi sennej,
suffeɣ ayi-dd u fekk ayi
zi řḥemřat n waman timeqqranin,
zeg ufus n ibarraniyyen,
8 maɣar aqemmum nsen iqqar ixarriqen,
afus nsen afusi d ijj n ufus iccur s řɣecc.
9 A AREBBI, ad ac ɣennjeɣ
ijj n yezři d n jdid i Cek,
s lharpa u s lɛud s ɛecra n ifiřan
ad ac zehhdeɣ.
10 Cek d wenni issawaḍen
asenjem i ijejǧiden,
d wenni ifekken amsexxar nnes Dawud
zi ssif aɛeffan,
11 suffeɣ ayi-dd u fekk ayi
zeg ufus n tarwa n ubarrani,
zeg wenni ɣar iǧa uqemmum
i iqqaren mɣir ixarriqen,
u zeg wenni ɣar iǧa ufus afusi
iccur s řɣecc.
12 Meɛlik iḥenjiren nneɣ
ad iřin am yiɣeddiwen,
inni imɣaren ɛad di temẓi nsen,
yessitneɣ am tɣemmar
i ggin s ukeccuḍ
s ɛřam kuř arcamen,
ggin tent i yict n zzawect iqeddsen.
13 Ad ccuren řehrit nneɣ,
ad wcen zzad awarni zzad,
ad yarni wuǧi nneɣ s řuřuf n tseqqar,
s ɛecra n řuřuf n tseqqar
di ddmani n tarewsa nneɣ.
14 Ad ḥemřen imwan nneɣ mliḥ,
war ittiři ɛad uhjam
niɣ d uffuɣ i umenɣi
uřa d iɣuyyan deg wazzayen nneɣ.
15 Sseɛd n řgens nni iǧan amya.
Sseɛd n řgens nni zi AREBBI nsen d SIDI.