104
1 Barek SIDI, a řeɛmar inu!
A SIDI, AREBBI inu,
mammec d ameqqran Cek!
Cek tyarḍed s lɛaḍama d řɛezz.
2 Netta iřeḥḥef Ixef nnes s tfawt
am s ijj n upartessu,
Netta ittbezzeɛ ajenna
am tjartiřt n uqiḍun.
3 Aqa Netta d wenni issarsen
tiḥenya n wesqef
sadu ixxamen nnes x waman,
d wenni iggin iseynuten
d akarru nnes,
d wenni igguren
x wafriwen n usemmiḍ,
4 d wenni iggin lmalakat nnes
am yisemmiḍen
u imsexxaren nnes
d ict n tmessi itteḥduduqen.
5 Netta issbedd tammurt x dsusa nnes,
war tᵉttenhezzi ɛemmarṣ i řebda.
6 Cek třeḥḥfed as s waman ihewřen
am s yijj n warruḍ,
aman bedden tiwa i idurar.
7 Nitni arewřen zeg usiggʷed nnec,
qeǧqen ad ffɣen zi tmijja n wajjaj nnec.
8 Ttwassgeɛɛden idurar,
hekkwant teysarin
deg wemcan i d asen teggid.
9 Cek teggid aymir i waman
nni war ɛeddun,
war dd-dekkwiřen
maḥend ad dřen tammurt.
10 Cek d wenni ineddhen
tařawin di teɣzurin,
aqa ttazzřent din jar idurar.
11 Aqa warrdent marra řmař n yeyyar,
iɣyař n řexřa ttekksen afadi nsen zzaysent.
12 Ijḍaḍ n ujenna zeddɣen
ɣar temmawin nsen,
zi jar řefruɛ tᵉttekk-dd tmijja nsen.
13 Netta aqa d wenni ittessun idurar
zeg ixxamen nnes deg ujenna,
tammurt tᵉttyawan
zi řɣiǧet i dd-iffɣen zi min teggid Cek.
14 Netta igga arbiɛ iɣemmi i řmar,
uřa d aɣemmuy di ṭṭweɛ n bnadem.
Igga i-tt maḥend ad dd-yawi
aɣrum zi temmurt
15 u binu nni issfarraḥen uř n bnadem.,
ařami iɣembab ad zzayes wessgen
mahu zi zzect,
uřa d aɣrum nni issejhed uř n bnadem.
16 Ticejjura n SIDI ttyawanent,
ticejjura n tengelt n Lubnan
nni iẓẓu Netta,
17 mani tteggen ijḍaḍ řɛucc nsen,
mani i teǧa taddart n ubellarj
di tcejjura n umerzi.
18 Idurar yuɛřan aqa aten
i iɣayḍen n tṣuḍar,
řejruf d amcan n tarewřa
i ikawkawen n teṣḍart.
19 Netta igga taziri d řeɛbar
i řewqat ittwaggen,
tafuct tessen meřmi i ɣa teɣři.
20 Cek tessekkid-dd taǧest
u tewḍa-dd ǧiřet
i di ttextutyen
marra řewḥuc n wezɣar.
21 Ayraden imeẓyanen
zehharen x zzardet,
arezzun x macca nsen zi Arebbi.
22 Mařa teffeɣ-dd xenni tfuct,
ttecruruden ɣar řmargeḥ,
ttɣemmaren deg ifran nsen.
23 Xenni itteffeɣ bnadem
ɣar řxedmet nnes,
ɣar tewwuri nnes ař tameddit.
24 Mammec aṭṭas i teggid, a SIDI,
s tiɣit i teggid marra timesřayin,
tammurt tᵉttwaccur s wagřa nnec.
25 Aqa din řebḥar imɣar,
yiriw ɣar marra iɣezdisen nnes,
mani issfuffey marra s imuddaren
imeqqranen d imeẓyanen,
břa řeḥsab,
26 mani gguren iɣarruba,
uřa d ‘Liviyatan’ nni teggid
ḥima ad dayes ittirar.
27 Nitni marra ttrajan Cek,
ad asen tewced macca nsen
di řweqt nnes.
28 Mařa tewcid asen, yarrwen nitni,
mařa tarzmed afus nnec,
ddakkwařen jjiwnen s řxar.
29 Mařa teffared udem nnec,
aqa ttnexřaɛen,
mařa tkessid asen nnefs,
ad ssuffɣen buḥbeř
uca ad dd-dewřen ɣar ucař nsen.
30 Mařa tessekked-dd Arruḥ nnec,
xenni ttwaxeřqen-dd nitni,
ad tarrid aɣembub n temmurt d amaynu.
31 Aɛuǧi n SIDI ad yiři i řebda,
SIDI ad ifarḥ i marra min igga.
32 Mařa Netta ixezzar
di temmurt, tᵉttarjiji,
mařa iḥada idurar, ad duxxnen.
33 Necc xseɣ ad ɣennjeɣ i SIDI
min ɣa kkeɣ ddareɣ,
ad zehhdeɣ i AREBBI inu
min da i ɣa kkeɣ ǧiɣ.
34 Axemmem inu ad dd-yas
x řxaḍar nnes,
ad farḥeɣ di SIDI.
35 Imednab ad ttwateḥḥan qaɛ
zi temmurt,
iɛeffanen war ttiřin ɛad.
Barek SIDI, a řeɛmar inu. Hallilu-Yah!