102
1 Taẓaǧit n ijj n řmesksin mařa manayenni d aṭṭas xas, uca xenni ittfarreɣ imunas nnes zzat i SIDI.
2 A SIDI, seř ɣar tẓaǧit inu,
ejj aɣuyyi inu ad ɣarek dd-yaweḍ.
3 War tteffar udem nnec xafi
deg wass i di ttwaḥṣareɣ.
Arr-dd ɣari amezzuɣ nnec
deg wass i di řaɣiɣ,
seř-dd xenni ɣari deɣya.
4 Minzi ussan inu ɛdun am ddexxan,
ixsan inu am tefqunt icemḍen.
5 Uř inu ittisřaw u yuẓeɣ am arbiɛ,
ařami ttuɣ ad cceɣ aɣrum inu.
6 Zi ssibbet n uzehhar yuǧɣen inu,
řeṣqen iɣsan inu ɣar teřmect inu.
7 Necc am yijj bu-uɛuqqi n ujḍiḍ
di řexřa,
dewřeɣ am yijj n muka jar řxirbat.
8 Ttɣimeɣ faqeɣ s řeftanet,
dewřeɣ am yijj n wejḍiḍ
i iqqimen weḥḥdes x tzeqqa.
9 Řɛedyan inu ttekkwaren ayi ass marra.
Inni xafi ittɛeddan,
neɛɛřen am qqaren isem inu.
10 Maɣar ttᵉtteɣ iɣɣeḍ am weɣrum
u xeǧḍeɣ tisessit inu s imeṭṭawen inu
11 zi ssibbet n wesxeḍ nnec
d uduqqez n weɣḍab nnec,
maɣar Cek tessgeɛɛded ayi
u tenḍared ayi ɛawed ɣar temmurt.
12 Ussan inu am yict n tiři izzuggarten,
u necc taẓɣeɣ am tuga.
13 Maca Cek, a SIDI,
ad teqqimed x řkursi nnek i řebda,
zi jjiř ař jjiř ad dayek xarrṣen.
14 Cek ad tekkared ad tarḥmed x Ṣihyun,
maɣar aqa d řweqt
maḥend ad xas tḥinned,
minzi řweqt ittwaggen
aqa tiweḍ-dd.
15 Maɣar iẓra nnes usin-dd
x řxaḍar n imsexxaren nnec
u nitni ksin s wesḥissef di tɛejjajt nsen.
16 Řegnus ad ggʷeden Isem n SIDI,
marra ijeǧiden n temmurt
ad ggʷeden aɛuǧi nnec.
17 Xmi ɣa ibna SIDI Ṣihyun
twařat nneɣnit,
ad dd-iban deg uɛuǧi nnes.
18 Ad iřha ak-d tẓaǧit n umezřuḍ,
war isseḥqara ca taẓaǧit nsen.
19 Man aya ittwari i jjiř i dd ɣa yasen,
řgens nni dd ɣa ittwaxeřqen,
ad iṣebbeḥ i SIDi,
20 maɣar Netta aqa issijj-dd
zi Zzawect nnes Iqeddsen yuɛřan,
zeg ujenna ixzar-dd SIDI
ɣar temmurt swadday
21 ḥima ad iseř aweɛɛeḍ n umeḥbus,
ḥima ad yarxu
i yinni iǧan d tarwa n řmewt,
22 maḥend ad barrḥen
s Yisem n SIDI di Ṣihyun,
d ccenɛet nnes di Urcalim,
23 xmi dinni i ɣa ttwassmunen řegnus,
jmiɛ ak-d tgeldiwin,
ḥima ad sexxaren i SIDI.
24 Netta issarxu jjehd inu ak-d webrid,
Netta issemẓi deg wussan inu.
25 Necc nniɣ: ‘War d ayi kessi
deg wezyen n wussan n tudart inu, a Arebbi,
aqa iseggʷusa nnec ttɣiman zi jjiř ař jjiř.
26 Zeg wecḥař uya teggid dsas i temmurt,
ijenwan d řxedmet n ifassen nnec.
27 Ina ad fnan, maca Cek ad tdumed.
Nitni marra ad arcan am warruḍ,
Cek ad ten tbeddřed
am yict n řeɛbayet,
ammu i ɣa ttwabeddřen.
28 Cek maca d Cek,
iseggʷusa nnec war qeṭṭin ɛemmarṣ.’
29 Iḥenjiren n imsexxaren nnec
ad din zedɣen
u tarwa nsen ad ttwassmetnen
zzat i wudem nnec.