9
1 Tiɣit tebna taddart nnes,
tegga tessuyda ipilaren nnes,
aqa aten di sebɛa.
2 Nettat tɣarṣ i řmař nnes,
txeǧeḍ binu nnes.
Ɛawed tessu ṭṭabřa nnes.
3 Nettat tessekk
timsexxarin nnes timeẓyanin.
X tqiccatin n řegɛudi n tendint tᵉttřaɣa:
4 “Wenni iǧan d aḥafi,
ejj i-t ad dd-yas danita!”
Nettat teqqar
i yinni war ɣar iǧi ca wuř imten:
5 “Asem-dd, ccem zeg weɣrum inu,
swem zi binu nni d awem dd-xeǧḍeɣ.
6 Jjem taqubbanect, uca ddarem,
ḍfarem abrid n řefhamet.”
7 “Wenni ittwebbxen amestehziy,
issarebbu řefḍiḥet i yixef nnes,
wenni ittɛaqaben aɛeffan,
aqa netta yarebbu abeqqiḍ
n řefḍiḥet nnes.
8 War ttɛeyyab amestehziy
ḥima netta war cek icarreh,
ɛeyyeb amiɣis, xenni netta ad cek ixs.
9 Ewc i umiɣis,
xenni ad idweř d miɣis ktar,
sɣar tussna i umsegged,
xenni netta ad ifhem ktar.”
10 Tiggʷudi n SIDI d beddu n tiɣit,
tussna n Umqeddas d Ameqqran
d beddu n řefhamet.
11 Maɣar zzayi ad ktaren wussan nnec,
iseggʷusa n tudart ad ttwarnin i cek.
12 Mařa cek d miɣis,
xenni ad tiřid d miɣis i yixef nnec,
u mařa testehezzid,
ad tarbud aya simant nnec.”
13 Tamɣart tabuhařect tᵉttbuhřuy,
nettat d taqubbanit, war tessen walu.
14 Nettat tᵉttɣima
ɣar tewwart n taddart nnes,
x ijj n kursi, x řegɛudi n tendint
15 ḥima ad třaɣa x inni iɛeddun,
inni igguren nican imesraq nsen, tenna:
16 “Wenni iǧan d aḥafi,
ejj i-t ad dd-yas danita!”
Nettat teqqar
i yinni war ɣar iǧi ca wuř imten:
17 “Aman ittwacaren d imiẓiden,
aɣrum innuffaren aqa icna.”
18 Netta war issin aqa din řexyařat,
aqa inewjiwen nnes
deg waǧaɣ n řaxart i iǧan.