26
1 Am wedfeř deg unebdu
u am wenẓar di tmeyra,
ammu war dd-ittis ccan ak-d ubuhaři.
2 Am ẓẓawec ittfarfaren,
am tfařǧest iṭṭawen ssa d ssa,
ammu i tegga ict n nneɛřet břa ssibbet,
nettat war třeqqef.
3 Arekkuḍ i uyis, sřimet i weɣyuř,
u aɛmud i weɛrur n ibuhařiyyen.
4 War dd-ttarri x ubuhaři
anect tubbuheřya nnes,
maḥend uřa d cek
war dayes tarekkwesed.
5 Arr-dd x ubuhaři
ɛlaḥsab tubbuheřya nnes,
maḥend war ittɣiř netta d amiɣis
di tiṭṭawin nnes.
6 Am wenni ittqessen iḍaren n yixef nnes
u am wenni isessen lɛunf,
ammu i yeǧa wenni issekkan tibratin
s ufus n ijj n ubuhaři.
7 Timessaḍin n uneɛḍab arehfent,
ammu i yeǧa uřa d awař iweznen
deg uqemmum n ibuhařiyyen.
8 Am wenni ittceddan
aẓru iɣřan deg iǧiy,
ammu i iǧa wenni itteggen ccan i ubuhaři.
9 Am ict n tiwent n tzeggʷart
dd-iggeɛɛden deg ufus n uskarji,
ammu i iǧa lmatal
deg uqemmum n ibuhařiyyen.
10 Aṭṭas izemmar ad dd-issuffeɣ
marra zeg yixef nnes,
maca řmunet n ubuhaři
d wenni t ɣa icran, ad xsaren.
11 Am ijj n weqzin iɛeqben ɣar min iɛuqq,
ammu i ittɛawad ijj n ubuhaři
tubbuheřya nnes.
12 Ma teẓriḍ ɛemmarṣ ijj n weryaz
i itteggen ixef nnes d amiɣis?
Aqa din řayas aṭṭas i yijj n ubuhaři
uřa xas.
13 Ameɛguz iqqar:
“Aqa din ijj n wayrad izehharen
deg webrid,
ijj n weyrad yuyur deg wazzayen!”
14 Am tewwart tᵉttunnuḍ i teɣmart nnes,
ammu i ittunuḍ uřa d ameɛguz
di qama nnes.
15 Ameɛguz issnuffar afus nnes di ṭṭebṣi,
aqa netta yarxu maḥend ad t issiweḍ
ɣar uqemmum nnes.
16 Ameɛguz ittwařa ixef nnes d amiɣis,
zi sebɛa iryazen nni izemmaren
ad dd-arren s řefhamet.
17 Am wenni ittcebbaren
deg imezzuɣen n weqzin,
ammu i yeǧa wenni ittadfen
deg umcubbec nni war iǧi nnes.
18 Am ijj n umejnun
nni iccaten iṣefḍawen
d fřitcat d ssem ineqqen,
19 ammu i iǧa weryaz nni icemten jjar nnes,
uca iqqar: “Aqa ttqessareɣ waha, niɣ lla!”
20 Mařa war iǧi ukeccuḍ, ad texsi tmessi,
u mařa war din iǧi uxbarji,
yaressa umcubbec.
21 Am iǧa řefḥem i řefḥem itteḥduduqen
d ukeccuḍ i tmessi,
ammu i yeǧa ijj n weryaz ittemcubbucen,
maḥend ad dd-isnekkar amenɣi.
22 Awařen n uxbarjiy am ḥalawit,
tinni hekkwant
deg ixxamen n daxeř n uɛeddis.
23 Am kuffu n nnuqart x uceǧiq n třaxt,
ammu i ǧan iyencicen imiziḍen
n yijjen s wuř d aɛeffan.
24 Wenni di iǧa wecrah,
issnuffara i-t s yiřes nnes
maca deg wuř nnes ittxarreṣ di řɣecc.
25 Mařa netta ittḥeccem s tmijja nnes,
war t ttiqqi ca,
maɣar sebɛa n nnɛawat
aqa din deg wuř nnes.
26 Uřa mařa iřeḥḥef wecrah nnes
deg wecmat,
tuɛeffna nnes ad tᵉttwaɛarra
deg wegraw n řgens.
27 Wenni iɣzin ijj n weḥfur n turṣuḍi,
ad dayes iwḍa simant nnes
u taṣḍart ad dd-tedweř
ɣar wenni tt isseqnunnuyen.
28 Iřes issxarriqen
icarreh wenni ittareddǧen,
ijj n uqemmum ařeqqaɣ s teḥraymect
ittawi-dd řxarbet.