15
Awařen iwezznen n Suliman - tasɣart 1c
1 Twarrit ifsusen
tessesmaḍ axeyyeq,
maca awař itteqqsen
issekkara-dd axeyyeq.
2 Iřes n imiɣisen ijebbed tussna ɣar zzat,
maca aqemmum n ibuhařiyyen
ittazzeř s tubbuheřya.
3 Tiṭṭawin n SIDI di kuř amcan,
ttḥekkarent i iṣebḥanen d iɛeffanen.
4 Iřes nni issgenfan d tacejjart n tudart,
maca arrhaj nnes ittareẓẓa buḥbeř.
5 Abuhaři ineṭṭar ttarbiyyet n babas,
maca wenni ittḥekkaran
i uwebbex, aqa iften.
6 Di taddart n umseggad dayes řkenz imɣar,
maca di min dd-ittawi uɛeffan
dayes tamara.
7 Iyencicen n imiɣisen ttbezzaɛen tussna,
maca uř n ibuhařiyyen war iǧi nican.
8 Taɣarṣt i ittqeddamen iɛeffanen
d nnɛi i SIDI,
maca taẓaǧit n inni igguren nican
aqa-tt i Netta d arḍa.
9 Abrid n uɛeffan d nnɛi i SIDI,
maca wenni iḍeffaran tasegda,
ittexs i-t Netta.
10 Ttarbiyyet iqesḥen třeqqef
wenni isemḥen deg webrid,
u wenni icarrhen awebbex,
ad immet.
11 Řaxart d tesraft n uhellek
aqa din arezmen zzat i SIDI,
mecḥař ɛad wuřawen n tarwa n bnadem?
12 Amestehziy war ittexs
wenni t i ɣa iwebbxen,
war ittriḥ ca ɣar imiɣisen.
13 Uř ifarḥen ittegg udem icnan,
maca amnus deg wuř isekkef buḥbeř.
14 Uř ifehhmen yarezzu tussna,
maca aqemmum n ibuhařiyyen
issecca ixef nnes s tubbuheřya.
15 I yinni ittwaḥṣaren marra ussan nsen
aqa iɛeffnen,
maca uř ifarḥen
am ict n zzardet war iqeṭṭin.
16 Iḥřa drus ak-d teggʷudi n SIDI,
x ijj n řkenz d ameqqran s řeḥweř.
17 Iḥřa ijj n ṭṭebṣi n řxuḍart
mani tḥekkem tayri,
x ijj n uyenduz iṣeḥḥen ak-d wecrah.
18 Aryaz ittarrujduden
issekkara imenɣiyyen,
maca wenni ɣar iǧa ttasiɛ n řxaḍar
issexsay amenɣi.
19 Abrid n umeɛguz
am cbarq ak-d isennanen,
maca amesruq n yinni igguren nican
aqa ittwassgeɛɛed.
20 Mmis amiɣis issfarreḥ babas,
maca bnadem abuhaři
isseḥqara yemmas.
21 Tubbuheřya aqa-tt d řefraḥet
i wenni war ɣar iǧi bu wuř imten,
maca ijj n weryaz n řefhamet
iggur nican.
22 Inwayen feccřen
mařa war din iǧi ccwar,
maca s waṭṭas n imcawaren
ad yiři wenway.
23 Aryaz ɣares řefraḥet
di temwarrit iṣebḥen
zeg uqemmum nnes.
Mecḥař iṣbeḥ wawař di řweqt nnes!
24 Abrid n tudart ineddeh
ɣar sennej i ufehham,
maḥend netta ad iḥeyyed
x řaxart swadday.
25 Taddart n bu-nnfaxet
ad tt iqřeɛ SIDI,
maca aymir n yeyyar n tajjač
issemtan i-t Netta.
26 Ixemmimen n uɛeffan d nnɛi i SIDI,
maca awařen icewwaren d imezdagen.
27 Wenni yarezzun x arbeḥ
iɣeṭṭeř taddart nnes di arrẓiyyet,
maca wenni icarrhen tarzifin, ad iddar.
28 Uř n imseggaden ittxarraṣ
maḥend ad dd-yarr,
maca aqemmum n iɛeffanen
ittfeyyeḍ s řɣar.
29 Iggʷej SIDI x iɛeffanen,
maca taẓaǧit n imseggaden ittesřa as.
30 Tafawt di tiṭṭawin tessfarreḥ uř,
řexbar aṣebḥan issyuma iɣsan.
31 Amezzuɣ ittesřan
ɣar uwebbex i tudart,
ad issens di řwesṭ n imiɣisen.
32 Wenni ineṭṭaren ttarbiyyet,
isseḥqara ixef nnes,
maca wenni ittesřan ɣar uwebbex,
issyawan uř nnes.
33 Tiggʷudi n SIDI d ttarbiyyet ɣar tiɣit,
u awaḍeɛ ittizwar i ccan.